Tea ghoddnne uprant mhojem jivituch bodolʼlem. Ani hanv tednam thaun Devak sodhunk laglo. Punn tea ratik kitem ghoddlem tem sangchea poilim mhojea bhurgeaponna vixim hanv tumkam sangonk sodhta. Hanv jea toren vaddlolo, taka lagon hanv Devak sodhunk laglo.

Hanv 1937-ant utʼtor France-antlea Guesnain-ant zolmolo. Thoim kollxea khonnincher khub kam choltalem. Mhozo bapui hem kam khub mhenotin kortalo tem polloun, hanv pasun mhenot korunk xiklom. Kollxea khonnincher kam korpeam sangata onʼneai zatalo ani tanchem kam dhokeachem aslem. Tor mhozo bapui tankam modot korunk sodhtalo dekhun tanchea hokʼka pasot zhuzonk to veg-vegllea songottnnecho bhag zalo. Tea bhair, zaite padri zanchem jivit khub susegadachem aslem, te kollxeachem kam kortolea gorib lokam thaun jevonn ani poixe magtale. Tor, padreanchi hi vagnnuk polloun mhojea bapain mhaka dhorma vixim kainch xikounn diunk na. Khorem mhunnttlear, ami Deva vixim uloich naslim.

Hanv vaddlo toso, hanv pasun onʼneai-acho dves korunk laglo. France-ant thodde lok pordexiam lagim khub vaitt toren vagtale. Ho onʼneai mhaka  boro lagonaslo. Pordexeanchea bhurgeam sangata hanv football khellttalo, ani tanchea sangata vell sarunk mhaka borem distalem. Mhoji avoi pasun France-antli nhoi, punn Poland-achi asli. Tor, soglea kullachea lokamnim eka-meka sangata xantin ani ek-sarkem vaglolem mhaka zai aslem.

1957-ant sorkarachea kaidea pormonnem mhaka soineant bhorti zaunchem poddlem. Hea toren, hanvem poilim sanglolem toxem hanv Algeria-chea dongramnim pavlo. Hanvem Devak ulo marlea uprant mhojea mukhar amcho dusman nhoi, punn ek zongli gaddov ubo aslo. Hem polloun mhojem kalliz xant zalem. Punn hea ghoddnnek lagon ani zhuzak lagon hanv jivitachea udʼdhexa vixim chodd bariksannen chintunk laglo. Mhojea monant he prosn aile: Amchea jivitacho orth kitem? Devak amchi kallji asa kai? Amkam sodanch xanti astoli kai?

Uprant ek dis hanv suttier mhojea avoi-bapaichea ghora aslo tednam, mhaka eklo Jehovacho Sakxi mellʼllo. Tannem French bhaxent mhaka ek Bible dilo. Tem Catholic bhaxantor kelʼlem La Sainte Bible, aslem. Algeria-k hanv porot gelea uprant, tea Bible-a thaun hanv vachunk laglo. Tantuntlo ho ek vers vachlea uprant, hanv chintunk laglo. Prokasovnni 21:3, 4, zoim mhunntta: “Ho polleiat monxam modem Devacho Tombu . . . Tanchea dolleantlim sogllim dukam To pusun kaddtolo; moronn anink aschem na, dukh anink korchim nant, rudon somptolem, koxtt-ui anink asche nant.” a Him utram vachun hanv ojap zalo. ‘Hem ani khorem zatolem kai?’ mhunn hanv chintunk laglo. Tea vellar, mhaka Deva vixim vo Bible-a vixim kainch khobor nasli.

1959-ant, soinikachi seva somplea uprant, hanv Francois nanvachea eka Sakxeak mellʼllo. Tannem mhaka Bible-antlean zaitim sotam xikoilim. Udharonnak, tannem mhaka Bible-antlean, Devachem nanv Jehova mhunn dakhoilem. (St. 83:18) Toxench, Dev onʼneai kaddun uddoitolo, prithum sobit bag kortolo ani Prokasovnni 21:3, 4-ant aslolim utram khorim kortolo mhunn tannem mhaka somzailem.

Tor him Bible-antlim sotam sarkim mhunn mhaka kollon ailem ani tim mhojea kallzak laglim. Ani hea vixim hanvem rokddench kitem tori korunk zai mhunn mhaka dislem. Ghoddie hanv paiche bhaxen chintunk laglolo ani padrin Bible-ant na tem xikoilam dekhun tannim onʼneai kela mhunn mhaka dislem. Ani ragan hanv tancher add vochonk sodhtalo!

Punn Francois-an ani Sakxeam modem mellʼllolea novea ixttamnim mhaka xant ravonk sanglem. Khore Kristanv lokank fokot Devachea Rajeachi bori khobor sangtat, punn lokanchi nit korinant mhunn tannim mhaka somzailem. Karonn Jezun hench kelem ani aplea pattlavdarankui oxench korunk sanglem. (Mt. 24:14; Lukas 4:43) Tea bhair, lokanchi patienni veglli asa zalear pasun tanchea sangata doiallaien ani borea toren ulounk mhaka xikonk zai aslem. Bible sangta toxem “Somiacho chakor zhogddekar zauncho nhoi, punn soglleam thaim thondd” ravonk zai.—2 Tim. 2:24.

Hanvem mhojea jivitant goroz te bodlav kele ani 1959-ant Jehovachea Sakxeanchea eka sorkitt zomatik hanvem bautizm ghetlo. Thoim mhaka  Angele, nanvachi ek bhoinn mellʼlli. Ti mhaka avoddli dekhun hanv tichea sobhent vochonk laglo. Ani uprant 1960-ant amchem kazar zalem. Ti khorench ek ekdom bori bail ani Jehova thaun ek moladik dennem zaun asa.—Mho. 19:14.

Mhojea jivitant hanv zannvai aslolea onnbhovi dadleam koddlean zaitim mhotvachim lisanvam xiklom. Sogleant mhotvachem lisanv mhunnttlear: Amkam koslem-i kam mellom, ami tem bore toren kortolim zalear khaltikai ani Mhonnʼnneo 15:22-ant sanglolim utram apnnavop gorjechim. Thoim mhunntta: “Zaiteacheo budhi ghetloleo ievzonneo folladik zatat.”

1964-ant, hanv sorkittachi dekhrekh korpi mhunn seva korunk laglo tednam, ho solʼlo apnnavop gorjechem mhunn mhaka kollon ailem. Mhaka sobhank bhett diunchi ani bhav-bhoinnak urba diun tankam Jehova lagim haddchi zobabdari asli. Tednam hanv fokot 27 vorsancho aslo ani mhaka titlo onnbhov naslo dekhun hanv chuki kortalo. Punn hanv tea chuki thaun xiklom. Ani onnbhov aslolea ‘zaiteanchea budhi’ thaun hanv mhotvachim lisanvam xikonk pavlom.

Hanvem sorkittachi dekhrekh korpachem kam suru kelem tednam kitem ghoddlem tem hanv sangonk sodhtam. Hanv Paris-antlea eka sobhek bhett diunk gelʼlo tednam eka onnbhovi bhavan mhaka apunn tujea lagim ulounk xokta kai mhunn vicharlem. Hanvem “borem” mhunn sanglem.

Tannem mhaka kuxik vhoron vicharlem, “Dotor konnachea ghora bhett diunk voita?”

Hanvem mhunnttlem, “Duentachea.”

Tannem mhunnttlem: “Tem khorem, punn tum tor sotant ghott asloleam sangatach, zoxem sobhechea vhoddila sangata chodd vell sarta oxem hanvem polloilam. Amchea sobhent zaitim bhav-bhoinnam niraxi, novim vo lojetat toslim asat. Tor, tunvem tanchea sangata thoddo vell sarlo ani tanger jevnnak gelo zalear tankam zaiti urba mellttoli.”

Tea bhavan dilʼlea moladik solʼlea pasot hanv khub upkari asa. Jehovachea xelleam pasot aslolo tacho mog mhaka dison ailo. Tannem dilʼlo solʼlo mhaka manun gheunk khub kotthin aslo. Tori astana, hanvem to rokddoch apnnailo. Khorench, osle bhav asat mhunn hanv Jehovache khub upkar attoitam.

1969 ani 1973 hea vorsa, Colombes, Paris-ant zalʼlea don ontoraxttria odhivexonant, Jevnnachem  Khatem polloun gheunk mhaka nemlolo. 1973-achea odhivexonant amkam sumar 60,000 lokank, panch disa pasot jevonn diunk zai aslem. Hem ani hanv koso korunk pavtolo kai mhunn mhaka dislem. Punn Mhonnʼnneo 15:22-ant sanglolo solʼlo apnnailolean mhaka porot modot zali. Hanvem hea vixim zannvai asloleam koddem budh ghetli. Hanvem mas katorpi, bhaji rovpi, randpi ani saman viktem gheupi bhavam thaun solʼlo ghetlo. Ami sangata mellon kam kelolean hem kotthin kam borea toren korunk pavle.

1973-ant, mhaka ani mhoje bailek France-antlea bethel-ant seva korunk apoilim. Mhaka mellʼllolem poilench kam borench kotthin oxem mhaka dislem. Mhaka Afrikentlea Cameroon desantlea bhavank prokaxonam dhaddpachem kam dilʼlem. Thoim 1970 tem 1993 poriant, amchea kamacher bondhi asloli. Mhojean hem kam korunk zatlem oxem mhaka disonaslem. France-achea xakhechea dekhrekh korpi bhavak hem kollʼllem tednam tannem mhaka urba diun mhunnttlem: “Cameroon-antlea amchea bhavank prokaxonanchi ekdom goroz asa. Tor ami tankam tim dhaddunkuch zai!” Ani ami ti tankam dhaddlinch.

Cameroon-achea bhonvtonnim aslolea desamnim thoinchea vhoddilank mellonk hanv zaite pavtti gelo. Tim prokaxonam Cameroon-ant chukoinastana pavounk manddavoll korunk tea dhirvont ani zannvaiechea bhavamnim mhaka modot keli. Ani khorench, Jehovan amchea hea vavracher besanv ghatlem. Karonn sumar 20 vorsam meren thoinchea bhav-bhoinnank, Pahrogopur masik ani mhoineanchem prokaxon Our Kingdom Service ek pasun chukoinastana mellʼllem.

Ami eka-mekak zannam zaunk suru kelem tednam thaun hanvem Angele-chi Jehova lagim ghott ixttagot asa mhunn polloilem. Ani amchem kazar zalem tednam ticho ho gunn anikui chodd dison ailo. Udharonnak, amchem kazar zalʼlem tea  sanjer tinnem mhaka, amchean zata titli Jehovachi purnn vellachi seva korit ravonk modot kor mhunn magnnem korunk sanglem. Jehovan amchem magnnem aikolem.

Jehovacher mhozo visvas anik ghott korunk Angele-n mhaka modot keli. Udharonnak, 1973-ant amkam Bethel-ant seva korunk apoilem tednam hanv fattim-fuddem sortalo. Karonn mhaka sorkittachem kam khub avoddttalem. Punn Angele-n mhojea ugddasak haddlem ki ami Jehovak amchem jivit somorponn kelam. Tor tachem songotton amkam jem kitem korunk sangta tem ami korunk zai. (Heb. 13:17) Ani khorench tinnem jem kitem sanglolem tem sarkem aslolem. Tor, ami Bethel-ant gelim. Mhoji bail somjikaiechi, zannvaiechi ani ti Jehovacho khub mog korta. Tor tichea hea gunnank lagon amchem kazari jivit ghott zaunk pavlem. Ani ami jivitant bore nirnnoi gheunk pavlim.

Atam ami dogaim zanttim zaleant. Punn Angele mhaka dor eka kamak tenko dita. Udharonnak, zaite Bible kors Inglez bhaxen zalolean ti bhas xikonk hanv ani Angele zaito proitn korunk laglim. Hem korunk ami Inglez bhas uloitolea sobhent vochonk laglim. Tednam ami sumar 75 vorsanchim aslim. Hanv France Xakha Somiticho Sodosio aslolean mhaka zaiteo zobabdari asleo. Tor, Inglez bhas xikonk mhaka vell mellonaslo. Punn hanvem ani Angele-n eka-mekak modot keli. Atam amkam 80 poros chodd vorsam zaleant. Tori astana, ami sobhechea mittinge pasot Inglez ani French bhaxent toiari kortat. Toxench, amchean zata te bhaxen ami amchea sobhe sangata mittingent ani porgottnnent bhag ghetat. Khorench, Inglez bhas xikonk zo ami vavr kela tacher Jehovan khub besanv ghatlam.

2017-ant amkam hem ek besanv mellttolem mhunn ami chitukuch na: Angele ani mhaka, Xakha Somitichea Sodoxiank ani Tanchea Bailank aslolea korsak vochonk mellʼllem. Ho kors Watchtower Educational Center Patterson, New York-ant zata.

Jehova khorench boreantlo boro xikoupi zaun asa. (Iz. 30:20) Tor sogleank, tornnatteank ani zantteank sogleant bori xikounn melltta mhunn kainch dubhav na! (D.S. 4:5-8) Khorench, tornnattim Jehovachem ani visvaxi bhav-bhoinnanchem aikotat tednam aplea jivitant bore nirnnoi gheunk ani visvaxiponnan Jehovachi seva korunk pavtat mhunn hanvem polloilam. Mhonnʼnneo 9:9 mhunntta: “Xanneak bud di ani to odik xannom zatolo, Nitik pallo divpeak xikoi, to aninkui zannar zatolo.”

Sumar 60 vorsam poilim, Algeria-chea dongrar zalʼlea ghoddnnem vixim hanv kednam-kednam chinta. Itlim borim besanvam mellttolim mhunn hanvem kednanch chintunk na. Hanv heram thaun zaitem xikonk pavlo. Jehovan mhaka ani Angele-k khuxalbhorit ani dhadosponnachem jivit dilam. Tor ami amchea sorginchea Bapa koddlean ani tacho mog kortolea zannvai ani onnbhov aslolea bhav-bhoinnam koddlean xikot ravcho nirnnoi kela.