1-2. Tumi bautizm gheunk sodʼdheak purtim nant zalear, tumi niraxi kiteak zaunchem nhoi? (Masikachem fuddlem chitr polloiat.)

 TUMI bautizm gheunk sodhtat zalear, tumi tumchea pasot ekdom boro dhei dovorla. Punn oxem korunk tumi sodʼdheak purtim asat kai? Tumkam ani tumchea vhoddilank, tumi bautizm gheunk toiar asat mhunn dista zalear, toxem korunk fattim soronakat. Karonn bautizm ghetlolean, Jehovache sevent tumkam zaitim besanvam mellttolim.

² Punn dusre vatten, bautizm gheunchea poilim tumkam tumchea jivitant thodde bodlav korche poddttole mhunn sanglam zalear, vo hea vixim tumkam svota kollon ailam zalear, niraxi zainakat. Karonn tumi zannttim vo tornnattim asum, sogleamnim vaddavoll korun bautizm gheuncho ho mhotvacho dhei melloun gheunk zata.

3. Ethiopiekar odhikarean Filipak kitem vicharlem, ani amchea monant koslo prosn ieunk xokta? (Itihas 8:36, 38)

³ Itihas 8:36, 38 vachat. Ethiopiekar odhikarean Filipak vicharlem: “Bautizm gheunk mhaka kitem addkholl asa?” Ethiopiekarak bautizm gheunchi itsa asli. Punn hem mhotvachem panvl gheunk to khorench toiar aslo kai?

4. Ethiopiekarak Devachea Utrantlean xikot ravonk itsa asli mhunn koxem kollon ieta?

⁴ Ethiopiekar “Devachi bhokti korunk Jeruzalemant gelʼlo.” (D.I. 8:27) Hantuntlean tannem Judev dhorm apnnailʼlo mhunn kollon ieta. Ani to Hebrev Bhaxen Boroilʼlea Pustokam thaun Jehova vixim xiklo mhunn kainch dubhav na. Punn taka anikui xikonk itsa asli. Oxem ami kiteak mhunnonk zata? Filip taka rostear mellʼllo tednam to Ethiopiekar khol sotam aslolim Izaias provadeacho kovllo vachtalo. (D.I. 8:28) Tor hantuntlean to Devachea Utrantlim mullavim sotanch nhoi, punn khol sotam zannam  zaunk sodhtalo mhunn ami zannam zatat.

5. Ethiopiekar jem xiklo tea vixim tannem kitem kelem?

⁵ Hea odhikareak Ethiopiachi Ranni Kandakechea dorbarant ek vhodd podvi asli, ani taka “tichea theveancho dekhrekh korpi mhunn nemlolo.” (D.I. 8:27) Tor zaiteo zobabdareo aslolean taka khub kam astalem. Tori astana, Jehovachi bhokti korunk tannem vell kaddlo. Apunn jem kitem xiktalo titlench taka puro naslem; punn to xiklo tacher tannem kam kelem. Hea pasot, Ethiopia thaun Jeruzalemant aslolea Devmondirant ieun Jehovachi bhokti korunk tannem khub lamb provas kelo. Ho provas korunk taka zaito vell ani khorch korunk poddlo astolo. Tori astana, to Jehovachi bhokti korunk sodhtalo dekhun, to kitem-i korunk toiar aslo.

6-7. Jehova pasot Ethiopiekaracho mog koso vaddlo?

⁶ Ethiopiekar Filipa koddlean thoddim mhotvachim sotam xiklo. Tantuntlem ek sot mhunnttlear, Jezu Krist Mesias zaun aslo mhunn taka kollon ailem. (D.I. 8:34, 35) Jezun aplea pasot jem kitem kelʼlem tem xiklea uprant Ethiopiekar khub khuxal zalo. Tor tannem kitem kelem? Tannem Judev dhorm apnnailʼlo ani lokam modem taka resped aslo. Tor taka zai zalear to tosoch ravonk xoktalo. Punn Jehova ani Jezu pasot tacho mog itlo vaddlo ki Jezucho pattlavdar zaunk tannem bautizm gheuncho ek mhotvacho nirnnoi ghetlo. Ani Filipan to Ethiopiekar toiar aslo to polloilo ani taka bautizm dilo.

⁷ Ethiopiekarachi dekh gheun tumi pasun bautizm gheunk toiar zaunk zata. Tumi hem kortat tednam, tumi khatren oxem mhunnonk pavtolim: “Bautizm gheunk mhaka kitem addkholl asa?” Tor Ethiopiekaran oxem kitem kelem jem tumi pasun korunk zata? To xikot ravlo, to xiklo tacher tannem kam kelem, ani Deva pasot aslolo mog to vaddoit ravlo.

8. Juanv 17:3-antlean amkam kitem xikonk melltta?

⁸ Juanv 17:3 vachat. Bible obheas suru korunk tumkam hea versantlea utram udexim urba mellʼllea kai? Zaiteank mellʼllea. Punn hea versant amkam xikot ravonk pasun urba dilea. Karonn “ekleach khorea Devak . . . vollkhon ghevop” kednanch kabar zaunchem na. (Up. 3:11) Ami sodankal Jehova vixim xikot ravtolim. Jitlim ami tache vixim xiktolim, titlinch ami Jehovak anik lagim sortolim.—St. 73:28.

9. Bible-antlim mullavim sotam xiklea uprant ami kitem korunk zai?

⁹ Ami Jehova vixim xikonk lagtat tednam ami fokot mullavinch sotam xiktat. Hebrevank boroilʼlea chittint, Paulun hea sotank “mullavi xikovnn” mhunnttli. Punn hi “mullavi xikvonn” titli mhotvachi nhoi oxem to sangonk sodhinaslo. Karonn hea xikounnek tannem bhurgeak ghottai ditolea dudak sor kelam. (Heb. 5:12; 6:1) Tannem soglea Kristanvank, mullavea sotam bhair Devachea Utrantlim khol sotam  pasun xikonk urba dili. Tor Devachea Utrantlim kholaiechim sotam xikonk tumkam itsa asa kai? Jehova ani tachea udʼdhexa vixim xikot ravon tumi vaddavoll korunk sodhtat kai?

10. Thoddea zannank xikpa vixim koxem dista?

¹⁰ Amchea modlea zaitea zannank, xikonk kotthin zata astolem. Xikpa vixim tumkam koxem dista? Iskolant astana vachunk ani xikonk tumi huxar aslim kai? Tumkam xikonk avoddttalem kai? Ani kitem-i novem xikonk tumi khuxal zatalim kai? Vo xikpachem kam tumchean kednanch zaunchem na oxem tumkam dislem? Toxem zalear, tumi ekttinch nant. Zaitea zannank oxench dista. Punn Jehova tumkam modot korunk xokta. Karonn to poripurnn asa ani to sogleam-von boro Xikoupi zaun asa.

11. Jehova ek “Vhodd Xikoupi” mhunn tannem koxem dakhoun dilam?

¹¹ Jehovan, apunn ek “Vhodd Xikoupi” mhunn sanglam. (Iz. 30:20, 21, NW) Kiteak? Karonn to aplea vidʼdheartheam sangata, pasiensan ani doiallaien vagta. To tanchea borea gunnancher dhean dita. (St. 130:3) Tim kitem korunk xoktat ani xokonant tem to zannam. To tankam somzota, ani tanchean korunk zaina tem korunk tankam sangona. Amcho mendu tannench dilʼlem ek moladik dennem mhunn ugddas dovrat. (St. 139:14) Tannem amcho mendu hea toren rochla ki amkam xikpachi avodd asa. Ami sasnak xikot ravlolim ani ami xiktat tantuntlean amkam khuxalkai mellʼlloli amchea Rochnnarak zai. Taka lagon Bible-achea sotam pasot ami atam ‘axeunk’ zai. (1 Ped. 2:2) Oxem korunk ami melloun gheunk xoktat tosle dhei dovrunk zatat, ani chukonastana Bible vachun tacher obheas korunk zata. (Josh. 1:8) Oxem kelolean, Jehovache modotin tache vixim chodd ani chodd vachunk ani xikonk tumkam avoddttolem.

12. Ami Jezuchem jivit ani porgottnne vixim kiteak niall korunk zai?

¹² Toxench, Jezuchem jivit ani porgottnne vixim chukonastana niall korunk vell kaddat. Ami Jehovachi seva korunk sodhtat zalear, ami Jezuchi dekh ghevop gorjechem zaun asa, khas korun hea kotthin vellar. (1 Ped. 2:21) Karonn aplea pattlavdarank oddchonneancho fuddo korunk poddttolo mhunn Jezun ukteponnim sanglolem. (Luk. 14:27, 28) Punn oddchonneo aslear pasun, apnna bhaxen aple pattlavdarui visvaxiponnan Jehovachi seva korunk xoktole mhunn Jezuk khatri asli. (Ju. 16:33) Tor Jezu aplem jivit koxe toren jielo tea vixim bariksannen chintat, ani tumchea sodanchea jivitant tachi dekh gheunk dhei dovrat.

13. Ami Jehova lagim kitea vixim vinoti korit ravonk zai, ani kiteak?

¹³ Ginean ghetlearuch puro nhoi. Ginean gheunk mukhel karonn mhunnttlear, ami Jehova vixim anik xikonk sodhtat, toxench mog ani bhavarth osle gunn vaddounk sodhtat. (1 Kor. 8:1-3) Ami Jehova vixim xikot ravtat toxim, amcho bhavarth anik vaddoi mhunn ami vinoti korit ravum-ia. (Luk. 17:5) Ani to udar kallzan oslea magnneancho zobab ditolo. Amcho bhavarth khorea gineanacher adarit asta tednam, ami anik vaddavoll korunk pavtolim.—Jak. 2:26.

14. Ami xiktat tacher kam korop kitlem mhotvachem tem apostl Pedrun koxem dakhoun dilem? (Chitr pasun polloiat.)

¹⁴ Kristanvamnim, tim xiktat tacher kam korop ekdom mhotvachem mhunn apostl Pedrun xikoilem. Hem somzaunk tannem Noahche ghoddnne vixim sanglem. Hea ghoddnne vixim sangtana, buddttechea poilim, tem mhunnttlear, Noah ‘tarum bandtalo tea kalla’ vixim to uloilo. (1 Ped. 3:20) Tea kalla voilea noxttea lokank apunn buddtti dhaddun nas kortolo mhunn Jehovan Noahk sanglem. Punn fokot hem zannam zalolean, Noah ani tachi famil salvar zaunchi nasli. Jehovan tankam sanglolem tacher tannim kam korunk zai aslem. Ani tannim toxench kelem. Tem mhunntlear, tannim  ek vhoddli arkpett bandli. (Heb. 11:7) Tor Noahn jem kelʼlem, taka Pedrun bautizmak sor korun oxem boroilem: “Hi ghoddnni bautizmachi ek khunna zaun asa jem tumkam . . . taronn dita.” (1 Ped. 3:21, NW) Tor eka orthan, Noahn ani tache familin arkpett bandunk zaitim vorsam kelʼlea kamak, ami bautizm gheunchea poilim kortat tea vavrak sor korunk zata. Tor bautizm gheunk toiar zaunk ami kitem korunk zai?

15. Ami kallzantlean poschatap kela mhunn koxem dakhounk zata?

¹⁵ Ami korunk zai, ti sogleam-von poili vost mhunnttlear, kallzantlean poschatap korop. (D.I. 2:37, 38) Ami khorench poschatap kortat tednam, ami khoreponnim bodlav korunk pavtolim. Tor Jehovak manvonant tosleo vostu, zoxem, onoitik sombond dovrop, tombaku khavop, gallio marop vo vaitt toren ulovop tumi soddun dilam kai? (1 Kor. 6:9, 10; 2 Kor. 7:1; Ef. 4:29) Tumi azunui oxem korunk na zalear, bodlav korunk proitn korit ravat. Tumi tumchea Bible xikoupea lagim hea vixim ulounk zata, vo sobhechea vhoddilam lagim modot ani margdorxon magonk zata. Toxench tumi tornnattim asat, ani tumchea avoi-bapai sangata ravtat zalear tumi tanchi modot gheunk zata. Oxem kelolean, bautizm gheunk tumkam addkholl korunk xoktat tosleo vaitt sonvoim-o soddun diunk tumkam modot zatoli.

16. Jehovache bhokte sombondit aslolea kamamnim kitem mellon asa?

¹⁶ Tumi korunk zai, ti dusri mhotvachi vost mhunnttlear, chukonastana Jehovache bhokte sombondit aslolim kamam korop. Zoxem mittingek hajir zavop ani tantunt bhag ghevop. (Heb. 10:24, 25) Toxench, tumi porgottnnent vochonk purtim zatat tednam, chukonastana toxem korat. Karonn jitlim chodd tumi porgottnni kortolim, titlich chodd hem kam korunk tumkam khuxalkai mellttoli. (2 Tim. 4:5) Tor tumi tornnattim asat ani tumchea avoi-bapai sangata ravtat zalear, tumkanch vicharat: ‘Mittingek hajir zaunk vo porgottnnent vochonk mhojea avoi-bapain mhaka ugddas korcho poddtta kai? Vo hanv svota zaun toxem kortam?’ Ami Jehova pasot kortat tim ‘bhoktivont kamam,’ ami taka dilolim dennim koxim zaun asat. (2 Ped. 3:11; Heb. 13:15) Ani ami ap-khuxen Jehovak dilʼlim soglim dennim taka khub manvotat. (2 Korintkarank 9:7 sor korat.) Tor ami ap-khuxen him kamam korunk fuddem sortat tednam, amkam Jehovacher bhavarth asa, ami tacho mog kortat, ani tannem amkam dilʼlea soglea pasot  ami kitlim upkari asat tem ami dakhoun ditat. Tea bhair, Jehovak amchem boreantlem-borem diun ami khuxal zatat mhunn ami dakhoitat.

17-18. Bautizm gheunk purtim zaunk tumkam khoincho mhotvacho gunn modot kortolo, ani koso? (Mhonnʼnneo 3:3, NW, 4-6)

¹⁷ Tumi bautizm gheunk toiari kortat toxim, tumkam oddchonneancho fuddo korunk poddttolo. Tumchea bhavarthak lagon thoddim zannam tumchim fokannam korunk xoktat, tumcho virodh korunk xoktat vo dhumallo haddunk xoktat. (2 Tim. 3:12) Tumi ek vaitt sonvoim soddunk proitn kortat astolim. Punn toxem korunk tumkam kotthin zata astolem. Vo bautizm gheunk purtim zaunk tumkam khub vell lagta, oxem chintun tumi niraxi zatat astolim. Tor hea oddchonneancho fuddo korunk tumkam khoincho gunn modot kortolo? Ek mhotvacho gunn mhunnttlear, Jehova pasot tumcho mog.

¹⁸ Tumkam aslolea gunnam modem, Jehova pasot tumcho mog sogleam-von boro gunn zaun asa. (Mhonnʼnneo 3:3, NW, b 4-6 vachat.) Ani ho mog koslea-i oddchonneancho fuddo korunk tumkam modot korunk xokta. Bible-ant zaite pavtti, Jehova aplea sevokancho visvaxi mog korta mhunn sanglam. Hacho orth, to aplea sevokank kednanch sanddun dina, vo tancho mog korop kednanch bond korina. (St. 100:5, NW) Jehovan amkam aplea sarkim rochleant. (Ut. 1:26) Tor ami Jehova bhaxen visvaxi mog koso dakhounk zata?

19. Jehovan tumkam lagon kelam tea soglea pasot tumchem upkariponn tumi koxem dakhounk zata? (Galasiekarank 2:20)

¹⁹ Poilem mhunnttlear, Jehovache upkar attoiat. (1 Tes. 5:18) Dor disa, tumkanch vicharat, ‘Jehova mhozo mog korta mhunn tannem koxem dakhoilam?’ Uprant, Jehovan tumchea pasot kelʼlea umkeach vostunk lagon, magnneant tache upkar attoiat. To tumcho mog korta dekhun, tannem tumchea pasot boreo vostu keleat mhunn apostl Paulu bhaxen vollkhon gheiat. (Galasiekarank 2:20 vachat.)  Tor tumkanch vicharat, ‘Mhaka Jehovacho mog asa mhunn hanv-ui dakhounk sodhtam kai?’ Jehova pasot tumcho mog tallnneo pois korunk, oddchonneancho fuddo korunk ani chukonastana tache bhokte sombondit aslolim kamam korunk tumkam modot korit ravtolo. Hea toren, tumi dor disa Jehovacho mog kortat mhunn dakhounk pavtolim.

20. Somorponn korop mhunnttlear kitem, ani ho nirnnoi kitlo mhotvacho zaun asa?

²⁰ Tor vell voita toso, Jehova pasot tumcho mog itlo vaddttolo ki tumi tumchem jivit taka somorponn korunk pavtolim. Tem mhunnttlear, tumi ek khas magnnem korun, kosle-i poristhitint Jehovachi seva korunk toiar asat mhunn taka sangtolim. Ani somorponn kelea uprant, sasnak Jehovachim zaunk tumkam ek ekdom bori sondhi mellttoli mhunn ugddas dovrat. Hi bhas amkam porot-porot diunk poddona. Hoi, somorponn ek gombhir nirnnoi zaun asa. Khorem mhunnttlear, tumi jivitant ghetolea zaitea borea nirnnoi-am modlo, ho sogleam-von boro nirnnoi astolo. (St. 50:14) Punn Soitan Jehova pasot tumcho mog unno korunk ani tumi taka ovisvaxi zaunk proitn kortolo. Tor taka kednanch jikhonk dium nakat! (Job 27:5, NW) Jehova pasot tumcho mog ghott asa zalear, tumchea sorginchea Bapak dilʼli bhas tumi pallunk pavtolim ani tachea sangata asloli ixttagot anikui ghott korunk pavtolim.

21. Bautizm fokot ek survat zaun asa oxem ami kiteak mhunnonk zata?

²¹ Tumi tumchem jivit Jehovak somorponn kelea uprant, tumi bautizm gheunk sodhtat mhunn tumchea sobhentlea vhoddilank sangonk zata. Punn sodanch ugddas dovrat ki bautizm ghetlo mhunnttoch amchem kam somplem oxem nhoi. Hi fokot Jehovache sevent ek survat zaun asa. Karonn tednam thaun tumi sasnak tachi seva korunk fuddem sortat. Tor Jehova pasot tumcho mog atanch ghott korat, ani to mog disan-dis vaddoit ravonk dhei dovrat. Oxem kelolean, tumi bautizm gheunk purtim zatolim. Tumcho bautizmacho dis sogleam-von khas dis zaun astolo. Ani bautizm ghetlea uprant pasun, tumi Jehova ani tachea Puta pasot tumcho mog vaddoit ravtolim mhunn ami axetat!