MUMMY-DADDY-N BOREM UDHARONN DOVORLEM

1957-ant mummy-daddy Italy thaun Canada-chea, Saskatchewan-ant aslolea Kindersley xarant gelim. Uprant, rokddinch tim sot xiklim ani Jehovachi seva tanchea jivitant poilea zagear dovorli. Mhaka ugddas asa, lhan astana hanv mhojea famili sangata zaito vell porgottnnent sartalom. Tor hanv thodde pavtti fokannamnim oxem mhunnttalom, “Hanvem atth vorsanche piraieruch sahaiok pioneer seva suru kelʼli.”

Mhojim mummy-daddy gorib aslim. Tori punn, Jehovachi seva poilea zagear dovrunk tannim amkam ek borem udharonn dovorlem. Udharonnak 1963-ant, U.S.A.-chea California-nt aslolea Pasadena-nt ontoraxttria odhivexonak hajir zaunk tannim apleo zaiteo vostu vikleo. Toxench 1972-ant, ami Canada-chea, British Columbia-nt aslolea Trail xarant ravonk gelim. Karonn thoinchea Italian bhas uloupi lokank ami porgott korunk sodhtalim. Tem xar sumar 1,000 kilometr pois aslem. Mhozo daddy eka store-ant cleaner-achem ani maintenance-achem kam kortalo. Taka chodd poixe zoddunk zaiteo sondheo asleo. Punn Jehovachi seva poilea zagear dovrunk tannem teo nakarleo.

Mummy-daddy-n mhaka ani mhojea tin bhav-bhoinnam pasot ekdom borem udharonn dovorlem dekhun hanv tancho khub upkari. Jehovachi seva korunk sogleam-von poilim mhaka tanchea udharonnantlean proxikxonn mellʼllem. Tanchea koddlean hanv jem xiklom tem hanv aiz poriant visronk na. Tem mhunnttlear, hanvem Devachem Raj poilea zagear dovorlem zalear, Jehova mhoji kallji ghetolo.—Mt. 6:33.

AMI PURNN VELLACHI SEVA SURU KELI

1980-nt, hanv Debbie nanvachea eka sobit cheddva lagim kazar zalom. Tem Jehovache sevent khub bizi  aslem. Amkam dogainkui purnn vellachi seva korunk zai asli dekhun kazar zaun tin mhoinea uprant, tannem pioneer seva suru keli. Kazar zaun eka vorsa uprant, ami eke lhan sobhent gelim, zoim porgottnnaranchi chodd goroz asli. Uprant hanv pasun Debbie sangata pioneer seva korunk laglom.

Punn thoddea vella uprant ami niraxi zalim ani porot ieunk chintʼtalim. Punn nirnnoi gheunchea poilim ami sorkittachea dekhrekh korpea lagim uloilim. Tannem amkam mogan punn ukteponnim oxem sanglem: “Tumchi poristhiti kotthin zaunk tumi-i zobabdar asat. Tumi tumchea oddchonneancher chodd dhean ditat. Oxem korchea bodlek, borem asa tacher dhean diat.” Amkam heach solʼleachi goroz asli. (St. 141:5) Ami rokddoch bhavacho solʼlo apnnailo ani rokddench amkam kollon ailem ki amchea jivitant khoreponnim zaiteo boreo vostu asat. Tea sobhent zaitim lhan bhurgim, toxench bhoinno Jehovache sevent khub vavr korunk sodhtalim. Ani tea bhoinnanche ghov sotant nasle. Hantuntlean amkam ek mhotvachem lisanv xikonk mellʼllem. Tem mhunnttlear, borem kitem asa tacher dhean diunk ani Jehova aplea vellar soglem sarkem kortolo mhunn tacher patieunk. (Mik. 7:7) Oxem kelʼlean, amchi poristhiti bori zait geli ani Jehovache sevent ami porot khuxal zalim.

Amchea poilea pioneer korsachea xikoupeamnim dusrea desamnim seva kelʼli. Tannim amkam thoinche fottu dakhoile ani dusrea desamnim seva kelʼlean tankam koslea oddchonneancho fuddo korunk poddlo ani koslim besanvam mellʼllim tem sanglem. Hem aikon mixinori mhunn seva korunk amchi-i urba vaddli. Ani ami oxench korunk tharailem.

Ho novo dhei melloun gheunk, 1984-ant ami Quebec-ant gelim, zoim French bhas uloitat. Ho vattar British Columbia thaun 4,000 kilometram poros pois asa. Thoim amkam novi sonskruti ani novi bhas xikonk asli, jem sompem naslem. Anik ek oddchonn mhunnttlear, zaite pavtti amchea lagim chodd poixe asonasle. Ek pavtti oxem zalem ki amkam fokot bottattech khaun dis sarunk poddle. Eka xetkarean aplea xetantle urlole bottatte amkam punzaunk dile. Debbie-n tea bottatteanchem veg-vegllem ani ruchik jevonn kelem. Heo oddchonneo aslear pasun, Jehovachi seva khuxalkaien korit ravonk ami amchean zata tem soglem kelem ani Jehova amchi kallji gheta tem ami polloilem.—St. 64:10.

Ek dis amkam okosmat fon ailo ani amkam Canada Bethel-ant seva korunk apoilim. Punn tachea poilim ami Gilead Korsa pasot fom bhorlolem. Bethel-ant seva korunk amkam apoileant mhunn ami khuxal aslim. Punn Gilead Korsak apounk nant mhunn matxe dukhi aslim. Tori astana ami Bethel-ant gelim. Thoim pavlea  uprant ami bhav Kenneth Little, zo xakha somiticho ek vangddi aslo, taka vicharlem: “Amchea Gilead Korsachea fomam vixim kitem?” Tannem sanglem, “Tumkam thoim apounnem ailem zalear tem polloum-ia.”

Eka sumana uprant, mhaka ani Debbie-k Gilead Korsak apoilim. Tor ami kitem kortolim tem ami tharaunk zai aslem. Hea vixim bhav Little-an amkam sanglem: “Tumi kitem-i vinchun kaddum, punn kednam-na-kednam, tumi dusre torechi seva vinchun kaddunk zai asli, oxem tumkam disot. Punn eke torechi seva dusre torechea seve poros bori asa oxem nhoi. Karonn Jehova khoinche-i poristhitint amkam besanvam diunk xokta.” Tor ami Gilead Korsak gelim. Ani itlim vorsam bhav Little-an mhunnttlolim utram sarkim zaun aslim mhunn ami pollounk xoklim. Ani amchea bhaxen zankam Jehovache sevent kitem korchem tem vinchun kaddunk poddlem tednam, choddxe pavtti ami tankam bhav Little-an mhunnttlolim utram sanglim.

AMI MIXINORI SEVA SURU KELI

83-avea Gilead Korsak hajir zaunk ami khub khuxal aslim. To kors Abril 1987-ant New York, Brooklyn xarant zalo. Ami soglim mellon thoim 24 vidʼdhearthi aslim. Bhav Ulysses Glass ani Jack Redford amche mukhel xikoupi asle. Panch mhoine koxe gele tem kollonkuch na. Ani Setembr 6, 1987-ant ami graduate zalim. Uprant bhav John ani bhoinn Marie Goode sangata amkam Haiti desant seva korunk dhaddlim.

Haiti-nt mixinori mhunn seva korpi bhav-bhoinnank 1962-ant desantlean bhair kaddlim. Tea uprant, thoim mixinori mhunn seva korunk konnakuch dhaddunk naslim. Amchem graduation zaun tin sumanam uprant ami thoim gelim. Thoim ami dongri vattarant aslolea kheddea-ganvant eke lhan sobhent seva kortalim, zoim  35 porgottnnaram aslim. Mixinori ghorant fokot hanv ani Debbie ravtalem ani amkam zaitem xikonk aslem. Thoincho lok khub gorib aslo ani choddxea zannank vachunk ienaslem. Ami thoim aslim tednam, rajkaronnak lagon zaiti hinvsa zatali ani lok sorkar bodolcho proitn kortale, zhogddim kortale ani thoim vadollam pasun zatalim.

Haiti-nt bhav-bhoinnanchem jivit khub kotthin aslem. Tori astana tim Jehovacho mog kortalim, urben tachi seva kortalim ani khub khuxal aslim. Amkam tanchea koddlean zaitem xikonk mellʼllem. Ek zanntti bhoinn, jika vachunk ienaslem, tika Bible-antlim sumar 150 versam tonddpatt aslim. Thoim dor disak khub oddchonneo asleo. Tea pasot, fokot Devachem Raj munxakullacheo sogleo oddchonneo kaddun uddoitolem mhunn porgott korit ravonk amchi khatri anik vaddli. Amchim thoddim Bible vidʼdhearthi, zankam ami survatek sot xikoilolem, tim niemit pioneer, khas pioneer ani vhoddil mhunn seva korunk laglim. Hem polloun ami khub khuxal zalim.

Haiti-nt astana, hanv Trevor nanvachea eka tornatteak mellʼllom. To Mormon mixinori aslo ani tachea sangata zaite pavtti ami Bible-a vixim uloilim. Zaitea vorsam uprant, tannem mhaka ek chitt boroili, zantunt tannem oxem boroilʼlem: “Fuddlea zomatik hanv bautizm ghetam. Haiti-nt jea zagear hanv Mormon mixinori mhunn seva kortalom, thoim mhaka khas pioneer mhunn seva korunk zai.” Ani zaitea vorsam meren tannem ani tache bailen toxench kelem.

EUROPE ANI UPRANT AFRIKA

Amkam Europe-antlea eka oslea zagear seva korunk dhaddlim, zoim porgottnni korop sovkas-sovkas korun sompem zait voitalem. 1992-ant, ami Slovenia-nt aslolea Ljubljana xarant pavlim. Mhojim mummy-daddy Italy-nt ieunchea poilim hea xarant vaddlolim. Hem xar ani tachea sorvbhonvtonnim aslolea xarank adim Yugoslavia mhunnttalim. Ani tea vattaramnim azunui zhuz choltalem. Hea xarant porgottnnechea kamachi dekhrekh Austria-ntlem Vienna, Croatia-ntlem Zagreb ani Serbia-ntlem Belgrade, him xakha ofisam kortalim. Punn Yugoslavia-che veg-veglle des zalʼle mhunnttoch, dor eka desak svotachem Bethel ofis asonk zai aslem.

Ami novea zagear aslim dekhun ami ek novi bhas ani sonskruti xikchi asli. Thoinche lok oxem mhunnttale: “Jezik je težek,” zacho orth “Hi bhas xikop khub kotthin asa.” Ani khoreaninch ti bhas khub kotthin asli. Songottnnent kosle-i bodlav ietale tednam, bhav-bhoinnam te rokddench manun ghetalim. Ani Jehovan tankam koxim besanvam dilim tem amkam pollounk mellʼllem. Tanchem visvaxiponn  polloun amkam khorench khub khuxalkai bhogtali. Porot ek pavtt, Jehova sarkea vellar ani sodanch mogan poristhiti koxi suttavi korta tem ami pollounk xoklim. Slovenia-nt amkam zaitem xikonk mellʼllem ani hachea poilim amkam jem xikonk mellʼllem tantuntlean amkam hanga aslolea oddchonneancho fuddo korunk modot zali.

Amchea jivitant anikui bodlav zale. 2000 vorsak amkam West Afrikentlea Côte d’Ivoire xarant seva korunk dhaddlim. Punn Novembr 2002-ant, tea desa bhitor zhuz suru zalem dekhun amkam Sierra Leone-ant vochonk poddlem. Sierra Leone-ant 11 vorsam porian zhuz choltalem ani tem tednanch somplolem. Okosmat Côte d’Ivoire soddun vochonk amkam kotthin zalem, punn ami jim lisanvam xiklolim tea vorvim khuxal ravonk amkam modot zali.

Thoim zaito lok sot xikonk sodhtalo ani amchea mogall bhav-bhoinnamnim zhuzak lagon zaitim vorsam khub tras kaddlole, hacher ami dhean dilem. Tim gorib aslim, tori astana, tanchea lagim jem kitem aslem tem dusreank diunk tim fattim soronk nant. Ek bhoinn Debbie-k kopdde diunk sodhtali. Debbie tem gheunk fattim-fuddem zatalem tednam tinnem mhunnttlem: “Zhuzachea vellar, dusrea desantlea bhav-bhoinnamnim amkam modot keli. Tor atam ami dusreank modot korunk sodhtat.” Tor ami tea bhav-bhoinnanchi dekh gheunk tharailem.

Uprant ami porot Côte d’Ivoire-ant gelim. Punn rajkaronnachea goddboddak lagon, thoim porot hinvsa suru zali. Tor Novembr 2004-ant amkam helicopter-an tea desantlim bhair kaddlim. Zonn eklea lagim fokot 10 kilo beg aslem. Ti rat ami French military camp-ant zomnir nhidon sarli. Uprant dusrea disak, amkam plane-an Switzerland-ak dhaddlim. Ami sumar modianir xakha ofisant pavlim. Tednam Xakha Somitichea bhavamnim, toxench, Ministerial Training School-achea xikoupeamnim ani tanchea bailamnim veng marun amkam mogan ieukar dilo. Tannim amkam gorom-gorom jevonn dilem ani Switzerland-antleo zaiteo chokletteo dileo. Ami khoreaninch bhav-bhoinnancho mog onnbhovlo.

Amkam thoddea vella pasot Ghana desant seva korun dhaddlim. Tea uprant, Côte d’Ivoire-ant desa bhitor zhuz unnem zalea uprant, amkam porot thoim dhaddlim. Amchi seva bodlot asli ani okosmat amkam eka zagear thaun dusrea zagear vochonk poddttalem. Oslea vellar bhav-bhoinnamnim amkam doia dakhoili dekhun amkam khub modot zali. Jehovachea sevokam modem oslo mog asa tem khorem. Punn bhav-bhoinnam dakhoitat tea mogacho ami sodanch valor kortolim mhunn hanvem ani Debbie nichov kelo. Amkam zaitea kotthin poristhitincho fuddo korunk poddlo, punn amkam zaitim lisanvam pasun xikonk mellʼllim.

AMI MIDDLE EAST-ANT GELIM

2006-ant mukhel ofisa thaun amkam chitt aili, zantunt amkam Middle East-ant vochon seva korunk sanglem. Tor porot ek pavtt amkam noveo sonskruteo, bhaso ani oddchonneancho fuddo korcho aslo. Toxench, tea zagear dhormancho ani rajkaronnacho khub probhav aslo. Punn thoim aslolea sobhamnim veg-vegllea sonskrutintlea bhav-bhoinnank mellon amkam khub khuxalkai bhogtali. Ani songottnne thaun tim margdorxonam apnnaitalim dekhun bhav-bhoinnam modem ekvott aslo tem ami polloilem. Ami tea bhav-bhoinnanchi khub tokhnnai kortalim. Karonn tanchea modlim choddxim zannam, famili koddlean, iskolant xiktoleam koddlean, kamachea zagear asloleam koddlean, ani xezaream koddlean aslolea virodhacho dhiran fuddo kortalim.

2012-nt, Izraelachea, Tel Aviv xarant, ami khas odhivexonak hajir zalim. Ani 33 K.X.-achea Ponʼnasavea  disa uprant, tea vattarant poilech pavtti itlo Jehovacho lok mellon ailolo. Khorench, ti kariavoll ami kednanch visorchimnant!

Tea tempar amchea kamacher bondi aslolea eka desant amkam seva korunk dhaddlim. Ami thoim thoddim prokaxonam vhelim, porgottnni keli ani lhan-lhan zomatink hajir zalim. Thoim soglea zagear hotʼtearam gheun soinik toxench check point astale. Punn ami thoddeach porgottnnaram sangata chotraien voitalim dekhun amkam titli bhirant disonasli.

POROT AFRIKENT

2013-nt amkam ek veglle torechi seva korunk dhaddlim. Tem mhunnttlear, Congo-chea Kinshasa xakhent seva korunk dhaddlim. Ho des khub vhodd ani sobit asa. Punn thoim zaitim zhuzam zalʼlim ani thoincho lok khub gorib asa. Poilim ami chintʼtalim Afrikent amchem jivit koxem astolem tem amkam khobor asa. Punn thoim pavlea uprant amkam anikui zaitem xikonk aslem. Khas korun, sarke roste ani pul nasle toslea zagear amkam provas korunk poddttalem tednam. Heo sogleo oddchonneo asonui ami borea vostuncher dhean dilem. Tem mhunnttlear, bhav-bhoinnam khub gorib asonui khuxalkaien Jehovachi seva kortalim, urben porgottnni kortalim ani khub vavr korun mittingek ani zomatink ietalim. Jehovachea besanvan ani modotin zaito lok sotant ieta tem amkam pollounk mellʼllem. Congo-nt amkam khub mhotvachim lisanvam xikonk mellʼllim ani thoim amkam zaitim ixttam mellʼllim, ji amchi famil koxi zaun asa.

2017-chea xevottak amkam Dokxinn Afrikent seva korunk dhaddlim. Ami seva kelʼlea xakha modem ti sogleam-von vhoddli xakha asli. Ani thoim amkam Bethel-ant oslem kam korunk sanglem, jem ami poilem kednanch korunk naslem. Tor ami azunui zaitem xikchem aslem. Punn ami adim jim lisanvam xiklolim tim apnnailʼlean amkam modot zali. Thoinchim bhav-bhoinnam zaitea vorsam thaun visvaxiponnan Jehovachi seva kortat tem polloun amkam khub borem dislem. Tim veg-vegllea sonskrutintlim aslear pasun soglim ekvottan kam kortat hem ekdom ojapachem aslem. Tor Jehovachim sevokam novi vagnnuk, toxench Bible-antlim totvam apnnaitat dekhun Jehova tancher besanv ghalun tankam xanti dita tem ami pollounk xoklim.

Itlim vorsam hanvem ani Debbie-n veg-vegllea zagear seva kelea. Amkam veg-veglleo sonskruteo ani noveo bhaso xikonk mellʼlleo. Oxem korunk sogle pavtti sompem asonk na tem khorem, punn songottnne ani bhav-bhoinnam vorvim amkam soglea vellar Jehovacho visvaxi mog dison ailo. (St. 144:2) Purnn vellachi seva korun amkam jim lisanvam xikonk mellʼllim tantuntlean amkam Jehovachi anikui borim sevokam zaunk modot zali.

Mhoje mummy-daddy-n mhaka bore toren vaddoila, mhoji bail Debbie-n mhaka sangat dila ani sonvsarbhor aslolea bhav-bhoinnanchea borea udharonnak lagon hanv khub upkari asam. Ieunchea disamnim pasun, amchea Vhodd Xikoupi Jehova Deva koddlean ami xikot ravtolim mhunn hanvem ani mhoje bailen nichov kela.