1. Khorench poschatap kortat tankam Jehova kitem bhas dita?

 JEHOVA amcho Rochnnar, Kaido Diupi ani Neai Korpi zalolean, amkam bhogsunk taka odhikar asa. (St. 100:3; Iz. 33:22) Punn amcho Bapui zalolean, to amcho khub mog korta. Tor ami tache add patok kortat ani khorench poschatap kortat tednam to amkam bhogsunk toiar asta. (St. 86:5, NW) Hea pasot, provadi Izaiasa udexim tannem hi bhas dili: “Zori patkam tumchim lal-tambddim, tori borfa vori zatoleat tumi nitoll-dhovim.”—Iz. 1:18.

2. Dusream sangata bori ixttagot samballunk ami kitem korunk zai?

² Ami opurnn asat dekhun utramnim ani kornneamnim ami eka-mekak dukhoitat. (Jak. 3:2) Punn ami eka-mekak bhogxitat zalear ami tanchea sangata bori ixttagot samballunk pavtolim. (Mho. 17:9; 19:11; Mt. 18:21, 22) Tor ami lhan-lhan vattamnim eka-mekak dukhoitat tednam ami tankam bhogxilolem Jehovak zai. (Kol. 3:13) Ani oxem korunk amkam borem karonn asa. Tem mhunnttlear, Jehova Dev pasun amkam “udar kallzan” bhogxita.—Iz. 55:7.

3. Hea lekhant ami kitem polloitolim?

³ Tor Jehovachi dekh gheun ami dusreank koxem bhogsunk zata tem ami hea lekhant polloitolim. Toxench, ami khoinchea patkam vixim vhoddilank sangchi goroz asa, Jehova amkam dusreank bhogsunk kiteak urba dita ani dusreanchea patkank lagon khub dukh sosunk poddlolea bhav-bhoinnam thaun ami kitem xikonk zata, hea vixim pasun ami hea lekhant polloitolim.

4. (a) Gombhir patok adarlam tannem kitem korunk zai? (b) Vhoddilank kosli zobabdari asa?

⁴ Khoinchea-i Kristanvan ek gombhir patok adarlam mhunn ami zannant zalear, tea vixim ami vhoddilank kollounk zai. Karonn  gombhir patok adarta to munis Jehovacho kaido samkoch moddtta. Gombhir patkanchim thoddim udharonnam amkam 1 Korintkarank 6:9, 10-nt mellttat. Tor gombhir patok adarlam tannem Jehova lagim magnnem korun bhogsonnem magonk zai, ani aplea patkam vixim vhoddilank sangonk zai. (St. 32:5; Jak. 5:14) Tor vhoddilank kosli zobabdari asa? Jezuchea bolidanacher adarit fokot Jehova Dev patok korta taka purnn toren bhogsunk xokta. * Punn eka patkeak sobhent dovorcho kai na, hea vixim Bible uzar korun nirnnoi gheunk tannem vhoddilank zobabdari dilea. (1 Kor. 5:12) Tor ho nirnnoi gheunk vhoddil kortat ti ek vost mhunnttlear, te hea prosnanche zobab sodhunk proitn kortat. Zoxe, patok korpean zannam zaun tem patok kelem kai? Tannem dusream koddchean tem patok lipounk proitn kelo kai? To zaito temp porian hem patok korit asa kai? Ani mhotvachem mhunnttlear, tannem Jehova add patok kelam mhunn taka khorench vaitt dista kai? Ani Jehova sangata apli ixttagot porot ghott korunk taka itsa asa mhunn tachea kornneamnim dison ieta kai? Jehovan taka bhogxila mhunn khatreche purave asat?—Itihas 3:19.

5. Vhoddil ghetat tea nirnnoiak lagon sogleank koso faido zata?

⁵ Patok adarlam tache vixim nirnnoi ghetana, Jehovan ghetla toch nirnnoi gheunk vhoddil proitn kortat. (Mt. 18:18) Oxem kelolean sobhek koso faido zata? Poschatap korina taka sobhentlean bhair kaddlolean tacho vaitt porinnam sobhentlea her bhav-bhoinnancher zaunk pavona, ani sobha surokxit urta. (1 Kor. 5:6, 7, 11-13; Titak 3:10, 11) Toxench, patok kelam taka poschatap korunk ani Jehovachea bhogsonneantlean faido zoddun gheunk modot zata. (Lukas 5:32) Teach bhaxen, poschatap korta taka Jehova sangata apli ixttagot porot ghott korunk modot kor mhunn vhoddil Jehova lagim magnnem kortat.—Jak. 5:15.

6. Eka munxak sobhentlean bhair kaddlear pasun Jehova taka bhogsunk toiar asta kai? Somzaiat.

⁶ Punn patok adarta to munis poschatap korunk sodhina zalear vhoddil taka sobhentlean bhair kaddttat. Ani tannem sorkaracho khoincho-i kaido moddla zalear taka favo asa tea khastintlean, vhoddil taka salvar korunk proitn korinant. Karonn eklean poschatap korum vo na, tannem sorkaracho kaido moddla zalear, tacho neai korunk ani taka xikxa diunk Jehovan sorkari odhikariank odhikar dila. (Rom. 13:4) Punn tea munxan kelʼlem patok kitlem-i gombhir asum, apnnem ek vhoddli chuk keli mhunn to uprant vollkhon gheta, khorench poschatap korta ani aplea chitnamnim ani vagnnukent bodol korta zalear Jehova taka bhogsunk toiar asta.—Lukas 15:17-24; 2 It. 33:9, 12, 13; 1 Tim. 1:15.

7. Dusrim amkam dukhoitat tednam ami kitem korunk zata?

⁷ Jehova eka munxak bhogxitolo kai na, ho nirnnoi amkam gheunk poddona mhunn kitlem borem nhoi! Punn thodde pavtti, amkam ghoddie dusreank bhogsunk poddot. Zoxem konnem-i amkam dukhoilem zalear, ami tankam bhogxitolim vo rag dhorun ravtolim? Ani to bhogsonnem magona zalear kitem? Tea vellar pasun, tea munxak bhogsunk ani tacho rag dhorina zaunk ami tharaunk zata. Hem khorem ki amkam khub dukh zalam zalear tea munxak bhogsunk amkam vell lagonk puro, ani amkam khub vavr korunk poddot. Hea vixim Setembr 15, 1994-achea Pahrogopur-ant oxem sanglam: “Ami konnakui bhogxitat tednam, tacho orth, tannem koslich chuk korunk na mhunn ami chintat oxem nhoi. Punn ek Kristanv bhogxita tednam, Jehova tem sarkem kortolo mhunn to tacher visvas dovorta. Karonn sogleancho Neai Korpi Jehova, sarkea  vellar ani sarke toren neai kortoloch mhunn taka khatri asta.” Tor dusreank bhogsunk ani apunn neai kortolo mhunn tacher patieun ravonk Jehova amkam kiteak urba dita?

8. Ami Jehovache doiallai-e pasot upkari asat zalear kitem kortolim?

⁸ Dusreank bhogxitat tednam Jehovache doiallai-e pasot ami upkari asat mhunn dakhoitat. Jezun ek pavtt, ek dhoni ani tachea chakrachi vopar sangli. Ho chakor aplea dhoniak ek vhoddlem rinn farik korcho aslo. Punn tachea dhonian taka tachem soglem rinn bhogxilem. Punn uprant teach chakran, apleak thoddech-xe poixe farik korcho aslo tea aplea vangddi chakrak doia dakhounk na. (Mt. 18:23-35) Hea voparint Jezun, Jehovak tea dhoniak sor kela. Tor hi vopar sangon Jezu kitem xikounk sodhtalo? Jehovan amkam doia dakhoilea mhunn ami tache upkari asat zalear, ami dusreank bhogxitolim. (St. 103:9) Khub vorsam poilim, eka Pahrogopur masikent oxem sanglolem: “Jezu Kristachea bolidana udexim, Jehovan amkam jitle pavtti bhogxileant, title pavtti ami dusreank kednanch bhogsunk pavchimnant.”

9. Jehova konnank doia dakhoita? (Matev 6:14, 15)

⁹ Ami dusreank bhogxitat tednam Jehova amkam bhogxita. Ami dusreank doia dakhoili zalear Jehova amkam-i doia dakhoitolo. (Mt. 5:7; Jak. 2:13) Jezun aplea xisank magnnem korunk xikoitana, heach vixim tankam sanglem. (Matev 6:14, 15 vachat.) Toxench adim, Jehovan aplea visvaxi sevokak, Jobak kitem sanglem, tantuntlean pasun amkam hench xikonk melltta. Elifaz, Bildad, ani Zofaran Joba lagim vaitt toren uloun taka dukhoilo tednam Jehovan taka tanche pasot magnnem korunk sanglem. Ani Joban toxench kelem tednam Jehovan taka besanvam dilim.—Job 42:8-10.

10. Rag dhorun ravlolean amkanch koxe tras zatat? (Efezkarank 4:31, 32)

¹⁰ Ami rag dhorun ravtat tednam amkanch tras zatat. Rag dhorun ravop, ek zodd vojem koxem zaun asa. Ami tem vojem kuxin kaddttat tednam amkam xanti melltta. (Efezkarank 4:31, 32 vachat.) Ani Jehovak pasun ami oxench kelʼlem zai. Tea pasot to amkam oxem mhunnon urba dita: “Krodhan rogot xizunk dium naka: tuzo rag denvoi.” (St. 37:8) Rag dhorun ravop, vik pievop koxem zaun asa. Oxem kortat tednam amkanch tras zatat. (Mho. 14:30) Teach bhaxen, ami rag dhorun ravtat tednam ami amchi monachi xanti hogddaunk xoktat ani amchi bholaiki bigddonk xokta. Punn Jehovacho solʼlo apnnaun ami dusreank bhogxitat tednam amkanch faido zata. (Mho. 11:17) Tem mhunnttlear, amkam monachi xanti asta ani ami Jehovachi seva korit ravonk pavtat.

11. Bodlo gheunchea vixim Bible amkam kitem sangta? (Romkarank 12:19-21)

¹¹ Farikponn gheupachem kam Jehovachem, amchem nhoi. Dusrim amkam dukhoitat tednam tancho bodlo gheunk Jehovan amkam odhikar diunk na. (Romkarank 12:19-21 vachat.) Amkam soglich mahiti asona, ani ami opurnn asat dekhun Jehova jea toren neai korunk xokta tea toren ami korunk xokonant. (Heb. 4:13) Toxench, thodde pavtti amchea bhavnank lagon ami chukicho nirnnoi gheunk xoktat vo sarkem tem korunk amkam kotthin zaunk xokta. Ani hea pasot, Jehovan Jakobak oxem borounk prerit kelo: “Kiteak ami monxam ragan kitem-i kortanv tednam, Devachi mogachi manddavoll ami pallunk pavonanv.” (Jak. 1:20) Punn Jehova sarkem tem korun neai kortoloch mhunn ami khatri dovrunk zata.

12. Jehova neai kortoloch hacher amkam visvas asa mhunn ami koxem dakhounk zata?

¹² Dusreank bhogxitat tednam Jehova neai kortoloch mhunn amkam visvas asa mhunn ami  dakhoitat. Jehova neai kortolo mhunn ami tacher patieun ravtat tednam, patkak lagon ailole sogle tras to kaddun uddoitolo, mhunn amkam tacher visvas asa mhunn ami dakhoun ditat. Karonn Devan bhasailolea novea sonvsarant amkam dukh ditat toslea ghoddnneanchi ‘anink iad aschi na, munxachea monant kednanch tacho ugddas pasun ieuncho na.’ (Iz. 65:17) Tor amkam konnui khub dukh dita tednam ami tancho rag dhorun ravcho nhoi. Punn oxem ami khoreanich korunk xoktat kai? Thoddeamnim hem koxem kelam tem ami fuddem polloum-ia.

13-14. Bhogsonnea vixim Tony ani José-chea onubhovantlean tumi kitem xiklim?

¹³ Dusreanchea vaitt kamank lagon amchea zaitea bhav-bhoinnank khub dukh soschem poddlem. Tori astana, tannim tankam bhogxilim. Oxem kelolean tankam koso faido zalo?

¹⁴ Philippines-ant ravpi bhav Tony-k * ek dis kollon ailem, ki José nanvachea eka munxan tachea vhoddlea bhavak jivexim marlo. Tednam Tony sot xikonk naslo. Ani to ek ekdom ragixtt munis aslo. Tor to bodlo gheunk sodhtalo. José-n hi kirm kelʼli dekhun taka dhorlo ani bondkhonnint ghatlo. Punn uprant taka bondkhonnintlean soddlo tednam, apunn José-k sodhun kaddun taka jivexim martolo mhunn Tony-n nichov kelo. Ani hea pasot, tannem ek pistol pasun viktem ghetlem. Punn tea vellar, Tony Jehovachea Sakxeam sangata Bible xikonk laglo. To sangta, “Hanv Bible xiklo tednam hanvem mhojea sobhavant ani vagnnukent bodol korunk zai aslo, tem mhunnttlear, hanvem mhozo rag soddun diunk zai aslo mhunn hanv xiklo.” Uprant Tony-n bautizm ghetlo ani magir taka sobhecho vhoddil mhunn nemlo. Punn ek dis, José pasun Jehovacho Sakxi zala mhunn taka kollon ailem. Tea vellar to kitlo ojap zalo astolo! Te dogui mellʼlle tednam tannim eka-mekak veng marli ani Tony-n José-k bhogxilo mhunn tannem taka sanglem. Oxem kelolean Tony-k koslim besanvam mellʼllim? Utramnim sangonk zaina titli khuxalkai taka mellʼlli mhunn Tony sangta. Khorench, Tony José-k bhogsunk toiar aslo dekhun Jehovan taka besanvam dilim.

15-16. Bhogsonnea vixim bhav Peter ani bhoinn Sue-achea onubhovantlean tumi kitem xiklim?

 ¹⁵ Dusreanchea vaitt kamank lagon, bhav Peter ani bhoinn Sue-ak pasun khub tras bhogche poddle. 1985-ant tim dogaim Raj-ghorant aslim tednam okosmat thoim ek vhoddlo bomb sfott zalo. Jehovacho Sakxi naslolea eka munxan Raj-ghorant bomb dovorlolo. Tea vellar bhoinn Sue-ak khub mar laglo. Ani tika aiz porian sarkem dixtti poddona, aikonk iena ani tika kosloch vas pasun iena. * Tea ghoddnne vixim ugddas kortat tednam tim dogaim chintat, ‘Ek munis itlem vaitt koxem mhunn korunk xokta?’ Zaitea vorsam uprant tea bomb ghatlolea munxak pulisamnim dhorlo ani taka jivitbhor bondkhonn favo zali. Tea munxak tumi bhogxilo kai, mhunn bhoinnik ani bhavak vicharlem tednam tannim oxem sanglem: “Ami dusreank bhogxinastana rag dhorun ravlim zalear amchi bholaiki bigoddtta, amkam monachi xanti asona ani ami niraxi zatat mhunn Jehovan amkam xikoilam. Tea pasot bomb sfott zaun thoddeach vella uprant, amkam rag dhorun ravona zaunk ani xantin jieunk modot kor mhunn ami Jehova lagim magnnem kelem.”

¹⁶ Tor tea munxak bhogsop, bhavak ani bhoinnik sompem aslem kai? Na. Tim mhunnttat: “Sue-ak laglolea marak lagon tika tras zatat tednam amkam tea munxacho khub rag ieta. Punn ami teach vixim chintit ravonant dekhun amkam monachi xanti melltta. Khorem mhunnttlear, to bomb ghatlolo munis ek dis amcho bhav zalo zalear ami khuxalkaien taka ieukar ditolim. Tor hea ghoddnnentlean ami xikonk pavlim, ki Bible-antlim totvam apnnailolean, amchea jivitant ghoddloleo vaitt ghoddnneo visron ami khuxalkaien jieunk xoktat. Toxench, Jehova beginuch soglem sarkem kortolo hem zannam zalolean amkam bhuzvonn melltta.”

17. Bhogsonnea vixim Myra-chea onubhovantlean tumi kitem xiklim?

¹⁷ Atam ami bhoinn Myra-chea jivitant kitem ghoddlem tem polloum-ia. Myra kazar zalea uprant sot xikli. Tednam tiche dogui put lhan asle. Punn tichea ghovan sot apnnaunk na, ani  uprant tannem pordvar kelo ani aple familik soddun gelo. Tea vixim Myra sangta: “Mhozo ghov amche familik soddun gelo tednam mhaka ek vhodd dhoko boslo. Hem mhojea sovem ghoddtta mhunn hanv manun gheunk xokonasli. Mhaka kednam-kednam khub rag ietalo ani hanvuch guneanvkar oxem mhaka distalem. Mhaka kitli dukh zali tem hanv utramnim sangonk xokona.” Tanchem kazar somplem tem khorem. Tori astana hem dukh Myra-chea kallzant urlem. Myra fuddem sangta: “Thoddea mhoineam pasot mhaka khub usko zatalo ani rag ietalo. Ani hacho porinnam, Jehova ani dusream sangata aslolea mhojea sombondacher zaunk laglo mhunn hanvem polloilem.” Punn atam Myra to rag pois korunk xokli mhunn ti sangta. Toxench, tichea ghovak pasun kainch vaitt zalʼlem tika naka. Tachea bodlek, ek dis to sot xiktolo mhunn ti axeta. Myra aplem dhean fuddaracher dovorta. Tinnem aplea dogui putank sotant vaddoile. Ani aiz ti tanche famili sangata mellon Jehovachi seva korta.

18. Sogleam poros Vorto Neai Korpi Jehova Dev kitem kortolo mhunn ami bhorvonso dovrunk zata?

¹⁸ Jehova sogleam-von Vorto Neai Korpi zaun asa, ani to lokancho neai korta. (Rom. 14:10-12) Hi mhotvachi zobabdari tannem amkam diunk na mhunn kitlem borem nhoi! Karonn kitem borem ani kitem vaitt tem Jehova borem zannam. Tor, to sodanch sarke toren neai kortolo ani kednanch onʼneai korchona mhunn ami bhorvonso dovrunk zata.—Ut. 18:25; 1 Raz. 8:32.

19. Jehova fuddarak kitem kortolo?

¹⁹ Munxache opurnntaiek ani patkak lagon amche kuddik bhailean vo amchea kallzak khub dukh zalam astolem. Punn fuddarak amkam hea sogleancho ugddas pasun ieunchona. Karonn Jehova Dev hem soglem kaddun uddoitolo. (St. 72:12-14; Prok. 21:3, 4) Ani hea vella pasot ami axeun ravtat. Punn tea mhunnosor, Jehovachi dekh gheun ami dusreank bhogxit ravum-ia. Ani Jehovan amkam hi tank dilea mhunn tache upkar attoum-ia.