▪ Paulun boroilem: “Devache khuxe pormannem jieunche pasot, khud Somurti vorvim hanv tika melom.”—Gal. 2:19.

Somurtintle Kaide pallunk zai mhunn Galasia sobhentlea thoddea Kristavank distalem. Karonn tanche modem thodde khotte xikoupi asle je xikoitale ki Somurt pallʼllearuch eklo salvar zaunk xokta. Tor, sunʼnot ani Somurtintle her kaide eklean pallunkuch zai mhunn te xikoitale. Punn tanchi xikounn chukichi asli ani tannim Jezuchea soddvonnecher bhavarth dovrop gorjechem asa mhunn dakhoun diunk Paulun him utram mhunnttlim.—Gal. 2:4; 5:2.

“Devache khuxe pormannem jieunche pasot, khud Somurti vorvim hanv tika melom” oxem mhunnon hanga Paulu sangonk sodhtalo ki Somurticho probhav aplea jivitacher naslo. Udharonnak, Bible sangta ki ek munis morta tednam tacher konnacheanuch probhav ghalunk zaina vo taka koslich khobor asona. (Up. 9:5) Punn Jezuchea soddvonnecher bhavarth dovorlolean to Deva mukhar jivont zatolo mhunn Pauluk khatri asli.

Hem koxem zaunk xokta? Paulun somzailem “Somurt formaita tim kamam korun nhoi, punn Jezu Kristacher bhavarth dovrun ki khoichim-i monxam Devak manovlolim zatat.” (Gal. 2:16) Tor, Moizesachi Somurt kiteak lagon diloli? Tannem fuddem mhunnttlem, ‘Je sonstik bhasavnni kelʼli, ti ie porian, kaide portun-portun moddon ieunche khatir, vo lok patki asat mhunn dakhounchea khatir, Devan uprant Somurt-ui sthapun dili.’ (Gal. 3:19) Hea versa pormonnem, Somurti udexim tea lokank kollʼllem ki tim patkim asat, tannim Somurt purnn ritin pallunk zaina ani ‘ek sonsot’ ieunchi asa. Tor, Jezu Krist ti sonsot zaun asa mhunn Somurti udexim kollon ailem. Ani jednam tim Jezu Kristacher bhavarth dovortat, tednam tim Deva mukhar manovlolim zatat. (Gal. 3:24) Tor Paulun, Jezuchea soddvonnecher bhavarth dovorlo dekhun to Somurti pormonnem melo koso zalo, punn Devache khuxe pormonnem to jivont zalo. Hacho orth, Pauluchea jivitant Somurticho nhoi punn Devacho probhav aslo. Punn, Jezuk manun gheun tacher bhavarth dovrunk, Somurti udexim taka modot zali.

Paulun, Romkarank toxench sanglolem. Tannem mhunnttlem: “Mhojea bhavam-bhoinnimno, Kristache kuddi udexim tumi-i Somurti sorim melʼlim zaleant . . . amkam bandun dovortali te Somurtik atam ami meleanv; mhonnttoch Somurtintlim ami suttleanv.” (Rom. 7:4, 6) Tor hea versant ani Galasiekarank 2:19-a pormonnem, Somurti udexim jem moronn tankam favo aslem, tea vixim Paulu uloinaslo. Punn, Jezuchea soddvonnecher patienni dovrun, Somurtintlean suttka mellonk zatali vo Somurticho probhav tanchea jivitacher naslo hea vixim to uloitalo.