Galasiekarank 5:22, 23-ant (Povitr Pustok - Novo korar) he nnov gunn dilole asat. Tea gunnank povitr xoktechem foll mhunnttlam. Te gunn mhunnttlear ‘mog, khuxalkai, xanti, pasiens, doiallai, boremponn, bhavarth, dulobai, ap-domaunni.’ Punn Devachi povitr xokti fokot hech nnov gunn utpon korunk modot korta oxem na. Hem ami kiteak mhunnonk zata?

Apostle Paulun poilinchea versamnim kitem boroilam tacher dhean diat: “Patki soimba pormannem choltat tanchim kamam vollkhunk sompem. Oslim monxam pozoddponnant, mhelleponnant ani kamcharant lolltat; kuddea devak bhoztat ani ghaddianger dhanvtat; dusmankai samballtat ani zhogddeamnim dis kaddtat; nattkaien bhoron asat ani krodhan zolltat; peleachea vostunchi axa dhortat; dusongam ani pokxam udexim loka modem bhed-futti ghaltat; futtlolea dolleamnim peleak polletat; soreak lobhdollim asat; dhumxannamnim rat sartat. Ani anink-ui oslim khotteponnam kortat.” (Gal. 5:19-21) Tor hanga sanglolea ‘patki soimba pormannem choltat tanchea kamam’ modem Paulu Koloskarank 3:5-ant sanglole her gunn pasun sangonk xoktalo. Teach bhaxen, nnov borea gunnam vixim sanglea uprant, “Osleam gunnam add vocho-xi somurt nam” mhunn tannem mhunnttlem. Tor hantuntlean, povitr xokti amkam utpon korunk modot korta tea soglea gunnam vixim Paulun sangonk na mhunn kollon ieta.

Hem amkam Paulun Efezkarank jem sanglem tantuntlean sarkem kolltta. Tannem boroilem: “Uzvaddachim kamam sogllea jinsachem boreponn, promannikponn ani sot” utpon korta. (Ef. 5: 8, 9) Hanga “boreponn” hea gunnak, promannikponn ani sota sangata “uzvaddachim kamam” vo foll mhunnttlam. Punn, “boreponn” ho gunn ‘povitr xoktechem foll’ hantunt aslolea nnov gunnantlo ek gunn pasun zaun asa.

Toxench Paulun, Timotak, “niai-nit, bhoktiponn, bhavart, mog, sosnnikai, bholeponn” he gunn utpon korunk sanglem. (1 Tim. 6:11, Povitr Pustok - Novo Korar) Hea sov gunnam modem fokot tin gunn, mhunnche bhavarth, mog, ani bholemponn vo dulobai ‘povitr xoktechem foll’ zaun asat. Punn Timotak, neai-nit, bhoktiponn, ani sosnikai he gunn utpon korunk pasun povitr xoktechi goroz asli.—Koloskarank 3:12; 2 Pedru 1:5-7 sor korat.

Tor, Galasiekarank 5:22, 23-ant, eka Kristanvan utpon korunk zai toslea soglea gunnam vixim boroilolem na mhunn amkam kollon ieta. Devachi xokti amkam ‘povitr xoktechea foll-ant’ aslole nnov gunn utpon korunk modot korunk xokta. Punn zoso ek Kristanv sotant vaddavoll korta, tannem anikui gunn utpon korunk zai. Tea bhair, tannem “khorea nitivontponnan ani visvaxiponnan Devachea khuxie pormonnem rochlolem novem veoktitv ghalunk zai.”—Ef. 4:24, NW.