Hanv 1935-ant, England-achea Darlaston xarant zolmolʼlo. Hem xar Black Country-cho bhag zaun asa. Black Country, England-acho ek bhag, zoim vareant sodanch kallo dunvor astalo ani hea pasot taka Black Country mhunnttat. Hanv sumar char vorsancho aslo tednam mhojim avoi-bapui Jehovachea Sakxeam sangata Bible xikonk laglim. Uprant, hanv sumar 14-15 vorsancho zalo tednam hench sot mhunn mhaka khatri zali. Ani 1952-ant, hanv 16 vorsancho aslo tednam hanvem bautizm ghetlo.

Heach vellar, hanv eke vhoddle factory-int kam korunk laglo. Hea factory-int gaddieche veg-veglle bhag ani gaddi sarki korunk uzar kortat tim sadhonam toiar kortale. Thoim, khoinchea-i eke company-cho manager zaunk, hanv proxikxonn gheunk laglo. Mhaka tem kam khub avoddttalem.

Punn ek dis, mhaka ek mhotvacho nirnnoi korunk poddlo. Eka bhonvddi korpi bhavan, Willenhall-ant aslolea mhojea sobhent, sumana modem zata ti Sobhechi Book study gheunk sanglem. Punn hem korunk mhaka kotthin aslem. Karonn tea vellar hanv don sobhenche mittingenk hajir zatalo. Ani hanv mhojea ghora thaun sumar 32 kilometr pois Bromsgrove-ant kam kortalo. Tor sumanachea modem zata te mittingek, hanv thoinchea sobhent hajir zatalo. Ani sumanachea xevottak, hanv porot ghora voitalo tednam Willenhall-ant aslolea sobhent hajir zatalo.

Mhaka Jehovache songottnnek modot korunk zai asli dekhun, bhonvddi korpi bhavan jem sanglolem tem korunk hanv fuddem sorlo. Tea pasot, mhaka ekdom chodd avoddttalem tem kam mhaka soddchem poddlem. Punn hanvem ho nirnnoi ghetlo mhunn mhaka kednanch dukh zaunk na. Karonn Jehovachea sevent mhaka anikui chodd khuxalkai mellʼlli.

Hanv Bromsgrove sobhent voitalo tednam mhaka thoim Anne nanvachi ek bhoinn mellʼlli. Tem pollounk ekdom sobit distalem ani tannem Jehovachi seva aplea jivitant poilea zagear dovorloli. Ami 1957-ant kazar zalim, ani uprant amkam sangata mellon niemit pioneer seva, khas pioneer seva, bhonvddi korpachem kam ani Bethel-ant seva korpacho sueog mellʼllo. Anne mhojea jivitant ailem dekhun hanv khub khuxal!

1966-ant, Gilead-achea 42-avea korsak hajir zaunk amkam apounnem mellʼllem tednam ami khub khuxal  zalim. Korsa uprant amkam Malawi-nt seva korunk dhaddlim. ‘Hea zagear ravtat te lok ekdom mogall ani sogleank ieukar ditat tosle,’ oxem zaito lok mhunnttat. Punn amkam thoim chodd temp ravonk mellchem na mhunn ami chintunk naslem.

Ami Febrer 1,1967-ant Malawi-nt pavlim. Thoim pavlea uprant amcho poilo mhoino thoinchi bhas xikonk gelo. Ani uprant ami district kam suru kelem. Amche lagim ek vhoddli gaddi asli, ani hi gaddi koslea-i rostear ani udkant pasun cholonk xokta mhunn thoddo lok chintʼtalo. Punn toxem naslem. Khorem mhunnttlear, ami ti gaddi thoddeach udkant cholounk xoktalim. Toxench, thodde pavtti amkam matiechea zopddeamnim ravonk poddttalem ani pausachea disamnim thoim ponvona zaunk amkam voir taddpotrim ghalunk poddttalim. Tor amchem mixinori kam hea toren suru zalem. Tantunt thoddeo oddchonneo asleo khoreo, punn amkam tem kam khub avoddttalem.

Abrilant, amkam rokddoch thoinchea sorkara thaun virodh soscho poddttolo mhunn mhaka kollon ailem. Karonn hanvem radio-cher Malawi-cho raxttrpoti, Dr. Hastings Banda-chem bhaxon aikolem. Tea bhaxonant, Jehovachim Sakxi tax farik korinant ani sorkarak tras kortat mhunn tannem sanglem. Punn khorem mhunnttlear, heo sogleo fotti asleo mhunn ami zannam aslim. Karonn ami rajkaronnachea koslea-i kamant bhag ghenaslim, ani khas korun tanchea rajki pokxanchim karddam viktim ghenaslim, hem sorkarak avoddnaslem.

Uprant, ami Setembr mhoineachea newspaper-ant ek khobor vachli. Amche bhav sogleak tras kortat mhunn raxttrpotin tancher boglantt ghatlem. Ani uprant sorkarachi mitting zali tednam, apunn rokddoch Jehovachea Sakxeanchea kamacher bondi ghaltolo mhunn tannem sanglem. Ani Otumbr 20, 1967-ant tannem amchea kamacher bondi haddli. Ani rokddench amchem xakha ofis bond korunk ani  mixinori seva kortolea bhav-bhoinnank, tea desantlim bhair kaddunk pulis ani her dusre odhikari aile.

Tin dis bondkhonnint ghatlea uprant, amkam Mauritius-achea desant dhaddlim. Tea vellar ho des Britain-achea tabeant aslo. Punn thoinchea odhikariamnim amkam tea desant bhitor soronk diunk nant. Uprant amkam Rhodesia-nt dhaddlim (atam taka Zimbabwe mhunnttat). Thoim pavlea uprant amkam ek ragixtt officer mellʼllo ani tannem amkam bhitor soronk diunk nant. Tannem mhunnttlem: “Malawi thaun tumkam dhanvddaun ghatlim. Mauritius-ant tumkam bhitor soronk diunk nant. Tor atam hanga ravonk melltta mhunn tumi hanga aileant?” Hem aikon Anne roddonk laglem. Amkam atam khoinsoruch ravonk mellche na oxem amkam dislem. Mhaka teach vellar porot England-ant vochonk koxem dislem. Punn magir tea officer-amnim amkam thoinchea xakha ofisant ravonk porvangi dili. Punn tannem amkam sanglem, ki ami dusrea disa ieun tanchea ofisant tankam mellonk poddttolem. Ami samkinch thoklolim. Punn ami soglem Jehovacher soddun dilem. Ani dusrea disa donparam, amkam thoddo vell porian Zimbabwe-nt ravonk porvangi mellʼllea mhunn amkam kollon ailem. Ami ekdom ojap zalim! Tea disa mhaka koxem bhoglem tem hanv kednanch visorchona. Khorench, Jehova Dev mhaka sarki vatt dakhoita mhunn mhaka khatri zali.

Zimbabwe-chea xakha ofisant mhaka Seva Khateant kam korunk nemlo. Mhaka Malawi ani Mozambique-ant choltolem kam polloun gheunchi zobabdari asli. Mhaka aslem tem ek kam mhunnttlear, Malawi-che sorkittachi dekhrekh korpi dhaddttale te riportt bhaxantor korop. Ek dis sanjechea vellar, hanv osloch ek riportt bhaxantor kortalo tednam mhaka roddonk ailem. Karonn thoim aslolea amchea bhav-bhoinnank khub dhumallo sosunk poddttalo. * Tori astana, tim visvaxiponnan soglem sostalim, ani tancho bhavarth kitlo ghott aslo tem polloun mhaka pasun urba mellʼlli.—2 Kor. 6:4, 5.

Malawi-nt aslolea bhav-bhoinnank, toxench Malawi-nt ailolea dhumalleak lagon Mozambique pollon gelʼlea bhav-bhoinnank, Bible-achea adarit prokaxonam mellonk ami amchean zata tem soglem kelem. Oxem korunk, Malawi-nt uloitat ti mukhel bhas, ti mhunnttlear, Chichewa bhaxent prokaxonam bhaxantor korunk modot korpi bhaxontor team-ik, ami Malawi thaun Zimbabwe voili. Zimbabwe-nt ravtolea eka bhava lagim ek vhoddlem xet aslem. Tor tannem bhaxantorachem kam polloun gheupi hea bhav-bhoinnam pasot ek ofis ani ghoram bandlim. Hea vorvim, tim Bible-acher adarit prokaxonam bhaxantor korpachem hem mhotvachem kam korit ravonk pavlim.

Zimbabwe-nt, dor vorsak Chichewa bhaxent odhivexon zatalem. Hea odhivexonak, Malawi-ntlea sorkittachea dekhrekh korpeank hajir zaunk ami manddavoll keli. Odhivexona uprant, hea bhavank odhivexonant aslolea bhaxonanchi outline mellttali. Ani thoinchean porot Malawi ailea uprant, he bhav apleachean zata titleo boreo vatto uzar korun her bhavank hi mahiti pavoitale. Anik ek pavtt, te Zimbabwe-nt odhivexonak ailʼle tednam hea dhirvont sorkittachea dekhrekh korpeank urba mellonk ami ek Raj Seva Korsachi manddavoll keli.

Febrer 1975-ant, Malawi thaun Mozambique pollon gelʼlea bhav-bhoinnank hanv mellonk gelo. He bhav tombumnim ravtale ani te Jehovachea songottnne thaun ietalem tem margdorxon bore toren pallttale. Zoxem tea vellar, sobhent vhoddilanche manddavolli vixim songottnne thaun mellʼllolem novench margdorxon tannim bore bhaxen pallʼllem. Novech vhoddil zalolea bhavamnim bhaxonnam diunk, disachea versacher toxench Pahrogopur-acher bhasabhas korunk ani zomati korunk manddavoll kelʼli. Tea bhair, odhivexonant kortat tea bhaxen, tannim tombu nitoll dovrunk, te surokxit dovrunk ani thoim jevonn vanttunk veg-veglle vibhag kelʼle. Jehovachea modotin he visvaxi bhav kitlo vavr korunk pavle tem polloun mhaka khub urba mellʼlli.

Sumar 1979 thaun, Zambia-chem xakha ofis Malawi-chea bhavanchem kam polloun gheunk laglem. Tori astana hanv Malawi-chea bhavam vixim chintʼtalo ani tanchea khatir magnnem kortalo, ani oxench dusrim pasun kortalim. Toxench, Zimbabwe Xakha Somiticho sodoxia aslolean, hanv zaite pavtti mukhel ofisachea prothinidink, toxench Malawi, South Africa ani Zambia-ntle fuddakar gheupi bhavank mellttalo. Ani dor ek pavtti, “Ami Malawi-chea  bhavam pasot anik kitem korunk zata?” heach prosna vixim bhasabhas kortale.

Punn vell soron gelo toso, Malawi-nt aslolea amchea bhav-bhoinnank sosunk poddttalo to dhumallo unno zait gelo. Ani dhumalleak lagon Malawi soddun gelʼlim amchim bhav-bhoinnam, sovkas-sovkas korun thoim porot ieunk laglim. Toxench, bhonvtonnchea desamnim Jehovachea Sakxeank porgottnni korunk ani ektthaim ieunk porvangi mellʼlli. Tea bhair, amchea kamacher asloli bondi kaddli. Ani oxench 1991-ant Mozambique-ant zalem. Punn, ‘Malawi-nt aslolea amchea bhav-bhoinnanchea kamacher ghatloli bondi kednam kaddttole?’ mhunn ami chintʼtale.

Sovkas-sovkas korun Malawi-nt pasun poristhiti bodlonk lagli. Ani 1993-ant sorkaran Jehovachea Sakxeancher ghatloli bondi kaddli. Tor uprant, hanv eka mixinori sangata uloitalo tednam tannem mhaka vicharlem, “Tum porot Malawi-nt voitolo?” Tednam hanv 59 vorsancho aslo. Tor hanvem mhunnttlem, “Na, atam tor hanv zanntto zala!” Punn teach disa amkam Sonchalon Monddolla thaun ek message aili, ani tannim amkam porot Malawi-nt vochonk sanglem.

Zimbabwe-nt amkam amchem kam khub avoddttalem. Karonn ami thoim khuxal aslim ani zaitim borim ixttam kelʼlim. Tor ho nirnnoi gheunk amkam khub kotthin aslem. Punn Sonchalon Monddollan amkam sanglem ki amkam Zimbabwe-nt ravonk zai zalear ami thoinch ravonk zata. Tor amkam zai aslem zalear ami Zimbabwe-ntuch ravonk xoktalim. Punn tea vellar, hanvem Abraham ani Sara vixim chintlem. Tim zannttim aslim, tori astana, Jehovachem utor pallunk aplem ekdom borem ghor soddunk tim toiar zalim.—Ut. 12:1-5.

Tor ami Jehovache songottnne thaun mellʼllolem margdorxon manun ghetlem. Ani sarkim 28 vorsam uprant, teach tarker, tem mhunnttlear Febrer 1, 1995-ant ami porot Malawi gelim. Songottnnen Malawi-nt Xakha Somiti stapon keli, ani mhaka ani anik don bhavank, thoim Jehovachea Sakxeachem kam porot chalu korpachi manddavoll korunk zobabdari dili. Ani ami rokddench tem kam suru kelem.

Jehovachea besanvan Malawi-nt kitli vaddavoll zali tem ami polloilem. 1993-ant thoim sumar 30,000 porgottnnaram aslim. Punn uprant 1998-ant, thoim 42,000-a poros chodd porgottnnaram zalim. * Porgottnnechem kam vaddlem dekhun Sonchalon Monddollan thoim ek novem xakha ofis bandunk maniotai dili. Hea pasot ami Lilongwe-ant 30 acre-achi zomin ghetli ani mhaka bandkam somitint kam korunk nemlo.

May 2001-ant Sonchalon Monddollacho bhav  Guy Pierce-an xakha ofisachem somorponnachem bhaxonn dilem. Tea vellar, thoim Malawi-ntlim 2,000-am poros chodd bhav-bhoinnam hajir zalim. Ani tanchea modlea choddxea zannamnim bautizm gheun 40-am poros chodd vorsam zaun gelʼlim. Thoim bondi asli tednam hea bhav-bhoinnank zaitim vorsam porian khub dhumallo sosunk poddlo. Tori astana tim visvaxi ravlim. Tim gorib aslim khorim, punn tancho bhavarth ani Jehova sangata tanchi ixttagot ekdom ghott asli. Ani atam tanchem novem Bethel pollounk tim khub khuxal aslim. Tim voitalim thoim Afrikeche style-in Raj-gitam gaitalim tem hanvem aikolem. Ani hem sogleam-von chodd mhojea kallzak laglem. Khorench, amcher kitle-i tras ieum, ami visvaxiponnan Jehovachi seva keli zalear Jehova amkam besanvam dita mhunn mhaka khatri zali.

Xakha ofis bandun zalea uprant, mhaka Malawi-nt zaitea Raj-ghoranchea somorponnachim bhaxonnam diunk sondhi mellʼlli mhunn hanv khub khuxal zalo. Jehovache songottnnen poixeachem unnemponn asa tea zageancher rokddinch Raj-ghoram bandunk kelʼlea manddavolli thaun Malawi-nt aslolea bhav-bhoinnank khub faido zalo. Poilim thoddea sobhentlim bhav-bhoinnam, nilgiri zhaddam uzar korun Raj-ghoram bandtalim, ani tanche pakem vo paddos toiar korunk tonn uzar kortalim. Toxench bosonk, tim matieche bank uzar kortalim. Punn hea nove manddavollik lagon, bhav-bhoinnam atam urben vitte toiar korun, sobit Raj-ghoram bandunk pavtalim. Punn atam pasun, bosonk tankam bankuch uzar korunk borem dista. Karonn tim mhunnttat, ‘Bankar sodanch anik eka munxak bosonk zago astach!’

Aplea sevent vaddavoll korunk Jehova aplea lokank koso modot korta tem polloun hanv ekdom khuxal zalo. Karonn Afrikantle tornnatte bhav modot korunk fuddem sortale, ani Jehovache songottnne thaun mellʼllolea proxikxonnak lagon te rokddech zaiteo vostu xikonk pavle tem polloun hanv ojap zalo. Ani oxem kelolean te Bethel-ant ani sobhamnim anikui zobabdareo samballunk pavle. Thoddea bhavank novech sorkittache dekhrekh korpi mhunn nemlolean sobhank khub faido zalo. Tantuntle choddxe zann kazari asle. Tor tanchea somazantle choddxe lok ani tanchea familintle sodoxio, tankam bhurgim asonk zai mhunn tancher dobhav ghaltale. Punn te Jehovachi seva vaddounk sodhtale dekhun tankam bhurgim nakat mhunn tannim tharailʼlem.

Afrikent 52 vorsam ravlea uprant, mhoji bholaiki bigddonk lagli. Tea pasot, Xakha Somitin, Sonchalon Monddolla lagim amkam porot Britain-ant dhaddunk zata kai, mhunn vicharlem. Ani amkam maniotai mellʼlli. Amkam avoddtta toslem kam soddun vochonk amkam khub dukh zalem. Punn Britain Bethel-antlim bhav-bhoinnam, amchea zanntteponnant khub bore toren amchi kallji ghetat.

Jehovan dilʼlem margdorxon manun ghevop, mhojea jivitant hanvem ghetlolo sogleam-von boro nirnnoi aslo mhunn mhaka kainch dubhav na. Karonn hanv mhojea svotachea zannvaiecher patielʼlo zalear, aiz mhojem jivit vegllem astolem aslem. Punn mhojea jivitacheo ‘vatto nitt korunk,’ hanvem kitem korchi goroz asa tea vixim Jehovak poilinch khobor asli. (Mho. 3:5, 6) Hanv tornnatto aslo tednam eke vhoddle company-nt kam koxem cholta tem zannam zaunk mhaka khub umed asli. Punn Jehovache songottnnent kam kelolean, hanv ekdom dhadoxi zaunk pavlo. Khorench, Jehovachi seva kelolean, mhaka anik khoinchem-i kam korun mellchi nasli titli chodd khuxalkai mellʼlli!