OBHEASACHO LEKH 5
Tuje Borabor Vochunk Amkam Zai
“Tuje borabor vochunk amkam zai kiteak tumche sovem Dev asa mhonn ami aikolam.”—ZEK. 8:23.
GIT 26 You Did It for Me
KITEM XIKTOLIM a
Her menddrank (“dha dadle”) obhixiktam sangata (‘eka Judev’) Jehovacho bhokti korcho sueog mellʼlla (Peregraf 1-2 polloiat)
1. Amchea disamnim kitem ghoddttolem mhunn Jehova sangta?
AMI jietat tea kalla vixim Jehovan bhasailʼlem: “Tea disamnim, sogllea bhasanchea raxttrantle dha dadle eka Judevachea mangak dhortole ani mhonnttole: ‘Tuje borabor vochunk amkam zai kiteak tumche sovem Dev asa mhonn ami aikolam.’” (Zek. 8:23) Hanga sanglolo ‘Judev,’ Devan aplea povitr xokten obhixikt kelʼleank suchit korta. Tankam “Devachi Israel porza” pasun mhunnttlea. (Gal. 6:16) Te “dha dadle,” hea prithumer sodanch jieuncho bhorvonso asloleank suchit kortat. Obhixikt kelʼlea zomeacher Jehovachem besanv asa mhunn tim vollkhun ghetat ani tanchea sangata tachi bhokti korop ek vhodd sueog mhunn tim lekhtat.
2. “Dha dadle” obhixiktam ‘borabor koxe voitat?’
2 Prithumer aslolea dor eka obhixiktanchim nanvam b ami zannam zaunk xokonant. Punn prithumer jieuncho bhorvonso asloleamnim tanchea “borabor vochunk” zata. Koxem? Bible sangta “dha dadle” eka Judevachea mangak vo vostrak dhorun mhunnttole: ‘Tuje borabor vochunk amkam zai kiteak tumchem sovem Dev asa mhunn ami aikolam.’” Hea versant ekach Judeva vixim sanglam. Punn “tumchem sovem” him utram, eka munxa poros chodd zannank suchit korunk xoktat. Hacho orth, to Judev fokot ekach munxak nhoi, punn obhixikt zannanchea akʼkhea zomeak suchit korta. Obhixikt naslolim tim, obhixiktam sangata Jehovachi seva kortat. Punn tim obhixiktank aple fuddari mhunn lekhinant. Karonn Jezu tancho guru vo fuddari zaun asa.—Mt. 23:10.
3. Hea lekhant ami khoinchea prosnanche zobab polloitolim?
3 Aiz Devachea lokam modem obhixikt Kristanv asat dekhun thoddim ghoddie chitunk puro: (1) Obhixiktamnim svotak koxem lekhunk zai? (2) Jezuchea mornnachea Ugddas Disak dakhancho soro ani unddo ghetat tankam ami koxem lekhunk zai? (3) Osleancho ankddo vaddtta mhunn ami uskeunchim goroz asa kai? Hea prosnanchem zobab hea lekhant mellttole.
OBHIXIKTAMNIM SVOTAK KOXEM LEKHUNK ZAI?
4. 1 Korintkarank 11:27-29-ant aslolea khoinchea xittkounne vixim obhixiktamnim bariksannen chintunk zai, ani kiteak?
4 1 Korintkarank 11:27-29-ant (vachat.) aslolea xittkaunne vixim obhixiktamnim bariksannen chintunk zai. Ek obhixikt Ugddas Disak dakhancho soro ani unddo “favo na te bhaxen” koso gheunk xokta? To Jehovachea nitichea dorjeam pormonnem jiena tednam to oxem khata ani pieta zalear oxem korunk xokta. (Heb. 6:4-6; 10:26-29) ‘Jezu Krista sovem voir sorgar inam jikhunk Dev apoita,’ tem mellonk zai zalear visvaxi ranvchi goroz asa mhunn obhixikt zannant.—Filp. 3:13-16.
5. Obhixikt Kristanvamnim svotak koxem lekhunk zai?
5 Jehovachi povitr xokti aplea sevokank gorvixtt nhoi, punn khalte zaunk modot korta. (Ef. 4:1-3; Kol. 3:10, 12) Tor, dusream poros apunn vortim asat mhunn obhixikt Kristanvam chintinant. Her sevokam poros apnnank Jehova thaun chodd povitr mellona mhunn tim zannant. Dusream poros apnnank Bible-achea sotam vixim chodd somzonni asa mhunn tim chintinant. Ani tim dusreank obhixikt zaleant mhunn sangonant ani Ugddas Disak herank dakhancho soro pieunk ani unddo khaunk urba dinant. Tachea bodlek, sorgar vochonk fokot Jehovach apounnem dita mhunn tim khaltikaien manun ghetat.
6. 1 Korintkarank 4:7, 8-a pormonnem obhixikt Kristanvamnim koxem vagonk zai?
6 Sorgar vochonk apounnem mellop ho ek vhodd man mhunn obhixikt lekhtat. Punn dusrim tanchea sangata khas toren vagonk zai mhunn tim opekxa korinant. (Filp. 2:2, 3) Tim obhixikt zalim tednam Jehovan herank tea vixim kollounk na mhunn pasun tim ugddas dovortat. Tor tim obhixikt zalim tednam dusrim tem manun ghenant zalear tim ojap zainant. Karonn Devan apleak ek khas zobabdari dilea mhunn sangta tednam heramnim rokddench manun gheunchem nhoi mhunn Bible sangta tem tim ugddas dovortat. (Prok. 2:2) Dusreanchem dhean apnnancher ieunchem nhoi dekhun, obhixikt Kristanv dusreank poile pavtti mellttat tednam apunn ek obhixikt mhunn sanginant. Ani hea vixim tim dusream lagim boddai marinant.—1 Korintkarank 4:7, 8 vachat.
7. Obhixikt Kristanvam kitem korchimnant, ani kiteak?
7 Obhixikt Kristanvam apunn eka khas zomeacho sodosio asa dekhun her obhixiktam sangatach vell sarunk zai mhunn chintinant. Obhixikt zalʼlea vixim bhasabhas korunk vo Bible obheas korunk melloun ieunk tim her obhixiktank sodhunk vochonant. (Gal. 1:15-17) Obhixikt Kristanvam oxem kortat zalear sobhent ekvott urcho na ani Devachea lokam modem xanti ani ekvott samballunk modot korta tea povitr xokte add tim kam kortolim.—Rom. 16:17, 18.
AMI OBHIXIKT KRISTANVANK KOXEM LEKHUNK ZAI?
Ami obhixiktank ani sobhent fuddakar ghetoleank famad munxam koxim lekhchim nhoi (Peregraf 8 polloiat) f
8. Ugddas Disa unddo ani dhakancho soro ghetat tanchea sangata vagtana ami kiteak chotrai dovrunk zai? (Futtnott pasun polloiat.)
8 Ami obhixikt bhav-bhoinnank koxem lekhunk zai? Eklo Kristacho obhixikt bhav aslear pasun taka chodduch man dita zalear chukichem zatolem. (Mt. 23:8-12) Udharonnak, vhoddilanchea ‘bhavartachi dekh gheunk’ Bible amkam urba dita. Punn, khoinchea-i eka munxak amcho fuddari korunk zata mhunn Bible sangona. (Heb. 13:7) Thoddeank “dupett inam favo koxe lekhche” mhunn Bible sangta tem khorem. Punn hem, te obhixikt asat taka lagon nhoi, punn “aplem kam borem choloitat” ani “utor porgottunk ani xastr xikounk mhenot ghetat” taka lagon tankam man favo. (1 Tim. 5:17, Povitr Pustok – Novo Korar) Ami obhixiktank chodduch vakhannʼnni ani dhean ditat zalear ami tankam lojent ghaltolim. c Ani tachea poros paxtt mhunnttlear, ami tankam gorvixtt korunk pavtolim. (Rom. 12:3) Kristachea eka obhixikt bhavan itli gombir chuk korunk amkam konnakuch karonn zaunk naka.—Lukas 17:2.
9. Ami obhixikt Kristanvank resped ditat mhunn koxim dakhoitolim?
9 Jehovan obhixikt keleant tankam ami resped ditat mhunn ami koxim dakhounk xoktat? Tim obhixikt koxim zalim tem ami tankam vicharchimnant. Hem tanche modem ani Deva modem aslolean tea vixim zannam zauncho hokʼk amkam na. (1 Tes. 4:11; 2 Tes. 3:11) Tea bhair tim obhixikt asat dekhun tancho ghov vo bail, tanche avoi-bapui vo tanche her sodoxio pasun obhixikt asat mhunn ami chintchimnant. Karonn eka munxak sorgar voicho bhorvonso aplea famili thaun daiz mhunn mellona, bodlek taka tem Deva thaun melltta. (1 Tes. 2:12) Dusreank dukhoita tosle prosn pasun ami vicharche nhoi. Udharonnak, ghov nastana prithumer sasnak jieunk koxem dista mhunn ami obhixikt zalʼlea eka bhavachea bailek vicharchimnant. Karonn novea sonvsarant Jehova “sogllea rochnnank dhadoxi” kortolo mhunn ami purnn khatri dovrunk zai.—St. 145:16.
10. Ami thoddeank chodduch man dinant zalear ami amkanch koxim rakhtolim?
10 Ami obhixiktank dusream poros chodd mhotv dina zalear ami amchich rakhonn kortat. Koxi? Thoddim obhixikt Kristanv ghoddie visvaxi ravchimnant mhunn Bible sangta. (Mt. 25:10-12; 2 Ped. 2:20, 21) Punn ami tankam chodduch man ditat zalear ami munxancho pattlanv kortat oxem zatolem. Munxam mhunnttlear obhixikt Kristanv vo zankam zaitim zann vollkhotat toslim bhav-bhoinnam vo Jehovachi seva zaitim vorsam thaun kelea toslim bhav-bhoinnam zaunk xoktat. Ami oxem kortat tednam tim ovisvaxi zalear vo sobha soddun gelear, Jehovacher aslolo amcho bhavarth haltolo ani tachi seva korop ami bond kortolim. Tor ami osle bhav-bhoinnank chodduch mhotv diun pattlav korunk amkam kednanch naka.
ANKDDO VADDTTA MHUNN AMI USKEUNCHI GOROZ ASA KAI?
11. Ugddas Disa dakhancho soro ani unddo ghetat tanchea ankddeant kitem bodol zala?
11 Zaitea vorsa thaun, Ugddas Disa dakhancho soro ani unddo ghetat tancho ankddo denvont aslo. Punn halinchea vorsamnim, dor vorsa tancho ankddo vaddot gela. Haka lagon ami uskeunchi goroz asa kai? Na. Hem kiteak, tem ami fuddem polloum-ia.
12. Ugddas Disak dakhancho soro ani unddo ghetat tancho ankddo vaddtta tem polloun ami kiteak uskeunchi goroz na?
12 “Apnnanchim konn tim Dev vollkhota.” (2 Tim. 2:19) Ugddas Disa je konn dakhancho soro ani unddo ghetat tim obhixikt asat vo na tem Jehovak khobor asa. Punn tea vixim ankddo meztat tea bhavank khobor asona. Tor tea ankddeant apunn obhixikt mhunn somzotat tim pasun asat. Udharonnak, dakhancho soro ani unddo thoddim ghetalim, punn uprant tannim bond kelem. Ani thoddeank mansik duens aslolean apunn Krista sangata sorgar raj choloitolim mhunn tim chintunk laglim astolim. Tor khoreamnim prithumer kitlim obhixikt Kristanv urleant tem ami sarkem sangonk xokonant.
13. Vhodd sontap suru zatolo tednam kitlim obhixikt Kristanvam hea prithumecher urtolim mhunn Bible sangta kai?
13 Jezu obhixikt Kristanvak sorgar vhoronk ietolo tednam tim prithumechea veg-vegllea zageamnim astolim. (Mt. 24:31) Nimannea disamnim obhixikt Kristanvam modem thoddinch hea prithumer astolim mhunn Bible sangta. (Prok. 12:17) Punn vhodd sontap suru zatolo tednam kitlim zann urtolim tem Bible sangona.
Ugddas Disak dakhancho soro ani unddo ghetat tankam ami polloitat zalear ami koxem vagonk zai? (Peregraf 14 polloiat)
14. Romkarank 9:11, 16-ant sanglolea porim, obhixikt Kristanvank vinchun kaddchea vixim ami kitem zannam zatat?
14 Obhixikt Kristanvank kednam vinchtolo tem Jehova tharaita. (Rom. 8:28-30) Jezuchem punorjivontponn zalea uprant Jehovan obhixikt Kristanvank vinchunk suru kelem. Poilea xekddeant soglim khorim Kristanvam obhixikt aslim. Tachea uprantlea xekddeamnim apunn Kristanv mhunn sangtale te choddxe lok khoreanich Jezuche pattlavdar nasle. Tori astana tea vorsamnim Jehovan thoddea khorea Kristanvank obhixikt kelim. Him khorim Kristanvam gonva sarkim aslim jim nera sangata vaddttolim mhunn Jezun sanglolem. (Mt. 13:24-30) Nimannea disamnim, Jehova oslea lokank vinchun kaddit asa jem 1,44,000 ankddeacho bhag zatole. d Tor xevottachea thoddeach vella poilim, Jehova thoddeank vinchun kaddtta zalear ami tachea zannvaiecher dubhavchim nhoi. (Romkarank 9:11, 16 vachat.) e Jezun eka voparient, nimannea vorak kam korunk ailolea vavraddeam sangata tancho dhoni jea toren vaglo tacher her vavraddeamnim prosn ubarlo mhunn sanglem. Hea vavraddeam sarkim ami zaunchim nhoi mhunn ami chotrai dovrunk zai.—Mt. 20:8-15.
15. Matev 24:45-47-ant sanglolea pormonnem, soglim obhixikt Kristanvam ‘visvaxi ani xannea chakrache’ bhag zaun asat kai? Somzaiat.
15 Sorgar voicho bhorvonso asa tim soglim ‘visvaxi ani xannea chakrache’ bhag nhoi. (Matev 24:45-47, vachat.) Poilea xekddeant, Jehova ani Jezu thoddeach lokam vorvim xikoitale. Teach porim te aiz thoddeank uzar korun zaiteank xikoitat. Poilea xekddeant Jehovan fokot thoddeach obhixikt Kristanvank Bible-antlim thoddim pustokam borounk uzar kele. Toxench, Jehovan aiz thoddeach obhixikt Kristanvank amkam “vogtar jevonn” diunk zobabdari dilea.
16. Hea lekhant ami kitem xiklim?
16 Hea lekhant ami kitem xiklim? Jehovan choddxea lokank hea prithumer sasnache jivit diunk tharailam. Ani jim thoddim Jezu sangata raz choloitolim, tankam sorgar jivit mellttolem. Jehova aplea soglea sevokank inam ditolo. ‘Judevank’ toxench ‘dha dadleank.’ Tannim aple kaide pallʼllole ani tim apnnank sodanch visvaxi ravlolim taka zai. Ami soglim taka khaltim ravlolim, sangata tachi seva keloli, ani ekvottan ravlolim taka zai. Ani sobhent xanti samballunk sogleamnim vavurlolem taka zai. Xevott lagim pavta toso, ami soglim Jehovachi seva korit ravum-ia. Ani “ekuch hindd” zaun Kristacho pattlav korum-ia.—Juanv 10:16.
a Hea vorsa, mongllara Abril 7 tarker ami Kristacho mornnacho dis ugddas kortolim. Tea disa unddo ani dakhacho soro ghetoleank ami koxem lekhunk zai? Tancho ankddo vaddot asa mhunn ami uskeunchi goroz asa kai? Hea prosnanche zobab amkam hea lekhant mellttole. Ani ho lekh Janer 2016 Watchtower masikecher adarit asa.
b Stotr 87:5, 6-ant sanglolea pormonnem, Jezu sangata sorgar razvottki choloitoleanchim nanvam ghoddie Dev fuddarak sangtolo.—Rom. 8:19.
c Janer 2016 The Watchtower masikent aslolem boks, “Love ‘Does Not Behave Indecently’” polloiat.
d Jezu vorvim povitr xokti votoilea mhunn Itihas 2:33 dakhoita. Tori punn dor eklea munxak Jehova apounnem dita.
e Chodd mahiti mellonk, May 1, 2007 The Watchtower masikent aslolem “Questions From Readers” polloiat.
GIT 34 Walking in Integrity
f CHITRACHI MAHITI: Eka odhivexonant mukhel ofisacho protinidhi ani tachea baile sangata fottu gheunk ek lokancho zomo ektthaim zala mhunn chintat. Hem kitlem opmanachem!
