Na. Davidan jem boroilʼlem tem sarkem aslem.

Davidan hea ani her versamnim oxench kitem boroilʼlem. Tannem mhunnttlem: “Oso hanv sodanch Tujea Nanvachem kirton gaitolom, ani dispottim mhojeo angovnno palltolom.” “Pormespora, mhojea Deva, sogllea mhojea kallzan tuka dhinvastam, sodankal Tujem Nanv vakhanntam.” “Sodankal Tujem Nanv vakhanntam.”—St. 61:8; 86:12; 145:1, 2.

Davidan Stotr 61:8-antlim utram boroilʼlim tednam apunn kednanch morchona oxem tannem chintunk na. Karonn patkak lagon ami soglim mortat ani apunnui ek patki mhunn to zannam aslo. (Ut. 3:3, 17-19; St. 51:4, 5) Toxench Abraham, Izak ani Jakob, he Jehovache visvaxi sevok pasun moron gelʼle, ani apunnui ek dis mortolo mhunn Davidak khobor asli. (St. 37:25; 39:4) Tor Davidan boroilʼlea utrantlean, to sodankal, tem mhunnttlear, to jivo asosor Jehovak vakhannʼnni diunk taka itsa asli ani tannem ho nichov kelʼlo mhunn amkam kollon ieta.—2 Sam. 7:12.

Thodde pavtti Davidan, tachea jivitant kitem ghoddlolem tea vixim boroilem, zoxem amkam Stotr 18, 51, ani 52-ant vachunk melltta. Ani Stotr 23-ant, Jehova aplea xelliank margdorxon dita, ghottai dita ani rakhonn dita toslo ek gonvlli mhunn Davidan sanglem. David pasun osloch ek gonvlli zaun aslo. Hea pasot, Jehova aplea xellianchi koxi kallji gheta tem to pollounk xoklo. Dekhun ‘soglea tachea jivitant’ to Jehovachi seva korunk sodhtalo.—St. 23:6.

Tea bhair, Davidan boroilʼlem tem soglem, tannem Jehovachea preronnan boroilʼlem mhunn ugddas dovrat. Hantunt fuddarak ghoddcheo asleo teo bhasaunneo pasun mellon asleo. Udharonnak, Stotr 110-nt, Davidan boroilem ki tacho Somi sorgar ‘Devachea uzveak bosla’ ani Dev tachea dusmanancho nas korunk ani ‘raxttranchi monsubi’ korunk taka odhikar ditolo. Davidan jem boroilʼlem tem Mesiasa vixim aslem ani David tacho purvoz zaunk pavlo. Ho Mesias sorgar thaun Raj choloitolo aslo ani ‘sasnachea sasnak iadnik’ mhunn seva kortolo aslo. (St. 110:1-6) Ani Stotr 110-nt Davidan boroilʼli hi bhasaunni aplea vixim asli ani ti fuddarak ghoddon ietoli mhunn Jezun to hea prithumer ailea uprant sanglem.—Mt. 22:41-45.

Tor Davidan Jehovachea preronnan jem kitem boroilʼlem, tem to jietalo tea kallak, toxench to fuddarak jivont zaun sodankal Jehovachi bhokti kortolo tea kallak pasun lagu zatalem. Hantuntlean, amkam Stotr 37:10, 11, 29-ant sanglolim utram pasun somzonk modot zata. Tem mhunnttlear tea versamnim, adlea Israelant aslolea poristhiti vixim, toxench fuddarak Dev apli bhasaunni purnn kortolo tednam hea prithumer astoli tea poristhiti vixim pasun sanglam mhunn ami zannam zatat.—Hea masikent, “Tum Mhojea Borabor Sobit Bagent Astolo” hea lekhacho peregraf 8 polloiat.

Tor Stotr 61:8 ani osleach her versantlean, David apunn jivo asosor Jehovachi mhoima korunk sodhtalo mhunn amkam kollon ieta. Toxench, fuddarak Jehova Davidak jivont kortolo tednam to sodankal Jehovachi mhoima korunk pavtolo mhunn ami zannam zatat.