1. Jezun aplea xisank menddram sangata sor korunk, ek karonn kitem asonk xokta?

 APLE xis ani aplea modem aslolo sombond, Jezun ek gonvlli ani menddram modem aslolea sombondak sor kelo. (Juanv 10:14) Karonn menddram fokot aplea gonvlleachoch tallo vollkhotat ani taka kan ditat. Hem somzonk ek bhonvddi korpi kitem mhunntta tem polloum-ia. “Amkam thoddea menddrancho fottu kaddunk zai aslo dekhun menddram asat tea zagear vochon ami thoddea menddreank amchea-xim apoile. Punn tim amcho tallo vollkhonaslim dekhun tannim amkam kan diunk na. Punn jednam tancho gonvlli, zo ek lhan bhurgo aslo, tannem ulo marlo tednam tim rokddinch tacho tallo aikon tache-xim ailim.”

2-3. (a) Jezuche xis tachem aikotat mhunn koxem dakhounk xoktat? (b) Ami hea ani fuddlea lekhant kitem xiktolim?

² Tea bhonvddi korpeachim utram ami aikotat tednam amkam Jezun aplea xisam vixim sanglolem tem ugddas ieta. Tannem mhunnttlem: “Tim Mhozo tallo aikotolim.” (Juanv 10:16) Punn Jezu tor sorgar asa. Tor aiz ami Jezuchem aikotat mhunn ami koxem mhunnonk zata? Tacho tallo aikonk ek mukhel vatt mhunnttlear, tacheo xikounneo amchea jivitant apnnavop.—Mt. 7:24, 25.

³ Jezuchea xikounne modem tannem thoddeo vostu korcheo ani thoddeo vostu korcheo nhoi mhunn sanglem. Tantuntlea thoddea vostum vixim ami hea ani fuddlea lekhant xiktolim. Tor hea lekhant, tannem korcheo nhoi mhunn sangloleo don vostu khoincheo teo ami polloum-ia.

4. Lukas 12:29-a pormonnem, amchea “monant husko” kiteak zaunk puro?

⁴ Lukas 12:29 vachat. Jezun aplea xisank gorjecheo vostu mellchea vixim “monant husko dhorun jieum nakat” mhunn sanglem. Ani Jezun dilʼlo solʼlo ami apnnaunk sodhtat, karonn Jezu sangta tem sodanch sarkem mhunn ami zannant. Punn thodde pavtti oxem korunk amkam kotthin zaunk xokta. Kiteak?

5. Koslea karonnank lagon amkam usko zaunk puro?

 ⁵ Ami ghoddie ek oslea zagear ravtat zait zoim lok gorib ani thoim kam mellonk kotthin. Vo amchi famil posunk kam kortalo to munis ghoddie bhair poddla zait. Toxench, COVID-19 piddek lagon ami ghoddie amchem kam hogddailam zait. Tor amcheo gorjecheo vostu zoxem jevonn, nhesop ani ravonk ek zago amchea lagim astolo kai mhunn ami uskeunk puro. (Up. 9:11) Tumkam hantuntlea khoinchea-i karonnank lagon vo her koslea-i karonnank lagon usko zata zalear, usko kaddinakat mhunn Jezun dilʼlo solʼlo tumi koso apnnaunk zata?

6. Ek pavtti apostl Pedruk kitem ghoddlem tem sangat.

⁶ Ek pavtti, apostl Pedru ani Jezuche her apostl Galileachea Doriant hoddeant asle tednam vadoll zalem. Tea vellar, Jezu udkacher cholon tanchea sorxim ieta tem tannim polloilem. Pedrun mhunnttlem: “Saiba, Tunch zalear, udkacher cholun Tuje sorxem hanv ie-so kor.” Tednam Jezun taka “ie” mhunn sanglem. Tea vellar, “Pedru hoddea velo denvun Jezu sorxim vochunk udkacher cholunk laglo.” Punn uprant kitem zalem? Pedru “vadoll polleun bhielo ani buddunk laglo. Bob marun tannem mhollem: ‘Saiba, mhaka vattai!’” Tednam Jezun aplo hat pavoun taka salvar kelo. Tor Pedrun Jezucher nodor dovorli tea meren to udkacher cholonk pavlo. Punn jednam tannem  tem vadoll polloilem, to bhielo ani buddonk laglo.—Mt. 14:24-31.

7. Pedruchea udharonna thaun ami kitem xikonk zata?

⁷ Ami Pedruchea udharonna thaun kitem xikonk zata? Pedru hoddeantlean denvun udkar cholonk laglo tednam vadoll polloun apunn bhietolo mhunn tannem chintunk naslem. Punn Jezucher patieun tacher dhean diunchea bodlek Pedruchem dhean vadollacher gelem ani tem polloun to bhielo. Pedru bhaxen aiz ami udkacher cholonant zait, punn amchea sogleanchi bhavarthachi porikxa zata. Teach bhaxen, Jehova ani tachea bhasaunneancher amchem dhean halʼlem zalear amcho bhavarth unno zatolo ani ami amchea uskeant buddonk lagtolim. Tor, amchea jivitant kosle-i tras ieum, Jehova amchi modot kortoloch mhunn ami bhavarth dovrunk zai. Hem ami koxem korunk zata?

8. Gorjecheo vostu mellchea vixim amkam chodd usko zaina zaunk ami kitem korunk zai?

⁸ Amkam usko zata tednam ami Jehovacher visvas dovrunk zai. Karonn tachi seva ami amchea jivitant poili dovorli zalear to amcheo sogleo gorzo purnn kortolo mhunn tannem amkam bhas dilea. (Mt. 6:32, 33) Ani Jehova bhasaita tem to sodanch purnn korta. (D.S. 8:4, 15, 16; St. 37:25) Hea vixim chintat: Fulank toxench suknneank Jehova goroz tem soglem dita zalear amkam jevunk ani nhesonk goroz tem to diuncho na kai? (Mt. 6:26-30; Filp. 4:6, 7) Zoxem ek mogall avoi-bapui, tankam aplea bhurgeancho mog asa dekhun tancheo gorzo purnn kortat, teach bhaxen amchea sorginchea Bapak amcho mog asa dekhun to amcheo gorzo purnn kortolo mhunn ami khatri dovrunk zata!

9. Eka zoddpeachea udharonnantlean ami kitem xiktat?

⁹ Jehova amchea gorzanchi koxi kallji gheta tea vixim ami ek udharonn polloum-ia. Purnn vellachi seva kortolea eka zoddpean refugee center vo asro ditat tea zagear ravtolea thoddea bhoinnank mittingek vhoronk aplea pornea gaddient ek voracho provas kelo. To bhav sangta: “Mitting zalea uprant, ami tea bhoinnank amchea ghora jevnnak apoilim. Punn tankam diunk amchea kodde kainch naslem, mhunn amkam kollon ailem.” Tea uprant kitem zalem? Bhav fuddem mhunntta: “Ami ghora pavlim tednam dara fuddlean jevnnacheo vostu asloleo don vhoddlim begam aslim. Tim konnem dovorlim tem amkam khobor nasli. Jehovan amkam goroz teo vostu dileo.” Anik ek pavtt, tanchi gaddi bond poddli. Ani ti sarki korunk tanchea kodde poixe nasle. Punn porgottnnent vochonk tankam gaddiechi khub goroz asli. Gaddi sarki korunk tim garage-int gelim. Thoim ek munis ailo ani tannem vicharlem: “Hi konnachi gaddi?” Bhavan ti apleachi gaddi ani ti sarki korunk khub korch lagtolo mhunn sanglem. “Poixeanchi koslich porva na. Punn mhojea bailek oslich gaddi zai ani heach rongachi. Hi tum mhaka kitleank viktolo?” mhunn tea munxan sanglem. Bhavan ti gaddi vikli ani taka itle poixe mellʼlle ki to dusri gaddi gheunk pavlo. Bhav mhunntta: “Tea disa ami kitlim khuxal zalim tem ami utramnim sangonk zaina. Karonn hem apxinch zaunk na, punn Jehovan hem soglem kelem mhunn amkam purnn khatri asa.”

10. Gorjechea vostum vixim usko korina zaunk Stotr 37:5 amkam koxi modot korta?

¹⁰ Ami borea gonvlleachem aikon amchea gorzam vixim chodd uskenant tednam Jehova amkam goroz tem ditolo mhunn ami khatri dovrunk zata. (Stotr 37:5 vachat; 1 Ped. 5:7) Atam meren Jehova ghoddie amchea familichea vhoddilak vo amchea patranvank uzar korun amchea soglea gorzancho kallji ghetalo astolo. Punn  peregraf 5-ant polloilem toxem, ghoddie atam amcho familicho vhoddil amcho samball korunk pavona vo amchem kam ami hogddailam zait. Tori astana, Jehova koxe-i bhaxen amcheo gorzo purnn kortolo ani amchi kallji ghetolo mhunn ami khatri dovrunk zata.  Jezu amkam anik kitem korinaka mhunn sangta tea vixim ami polloum-ia.

11. Matev 7:1, 2-a pormonnem, Jezun amkam kitem korinaka mhunn sanglem, ani hem kiteak kotthin zaunk xokta?

¹¹ Matev 7:1, 2 vachat. Jezu zannam aslo ki aple aiknnare opurnn asle ani dusreanchea chukincher chodd dhean ditale. Tea pasot tannem mhunnttlem: “Tumi nit korum nakat.” Ami opurnn zalʼlean amkam-i dusreanchi nit korchi sonvoim asonk xokta jem kaddunk amkam kotthin zaunk puro. Tor hea vellar ami kitem korunk zata? Ami Jezuchem aikon, dusreanchea chukincher dhean dina zaunk vavr korum-ia.

12-13. Jehova Raza Davida sangata koso vaglo tacher niall kelolean dusreanchi nit korop ami koxim pois korunk xoktat?

¹² Jehovachea udharonnacher niall kelolean, amkam oxem korunk modot zata. Karonn to dusreanchea borea kamancher dhean dita. Raza Davidan vhodd-vhodd chuki kelʼleo. Tori astana, Jehova tachea sangata koso vaglo tem ami polloum-ia. Udharonnak, Davidan Bathsheba sangata pordvar kelo, ani tichea ghovak pasun jivexim marlo. (2 Sam. 11:2-4, 14, 15, 24) Hea pasot, tachea akʼkhea ghorabeak tras bhogunk poddle. (2 Sam. 12:10, 11) Anik ek pavtt, Davidan Israelachea akʼkhea foujechi lokgonnti keli. Punn Jehovan taka oxem korunk sangonk na. To ghoddiek gorvan fulon Jehovacher patieun ravchea bodlek aple foujecher patieun ravlo astolo. Hea karonnak lagon, Jehovan Israelacher pidda dhaddli ani sumar 70,000 Israelitkar moron gele!—2 Sam. 24:1-4, 10-15.

¹³ Tumi Davidachea kallar jielʼlim zalear, Jehovan Davidak kiteak bhogxilo vo Jehovachem bhogsonnem mellonk Davidak favo naslem mhunn chintun tumi Davidachi nit kortolim aslim kai? Punn chintun polloiat. David jivitbhor Jehovak visvaxi ravlo, ani tannem khorench poschatap kelo. Toxench, to kallzantlean Jehovacho mog kortalo, ani sarkem tem korunk sodhtalo. Ani hea soglea karonnank lagon Jehovan taka bhogxilo. Tor Jehova amchea chukincher nhoi punn amchea borea gunnancher vo kamacher dhean dita mhunn ami tache kitlim upkari asonk zai.—1 Raz. 9:4; 1 It. 29:10, 17.

14. Dusreanchea chukincher dhean dina zaunk kitem kelear amkam modot zatoli?

¹⁴ Dusreanchea chukincher dhean diun tanchi nit korop khub sompem. Punn Jehova amchea chukincher dhean dina. Tachea bodlek to amche bore gunn polloita. Ani ami pasun toxench korunk zai. Dusreanchea chukincher dhean dinastana tanchea sangata bore bhaxen vagonk ami vavrunk zai. Zoxem, ek hiro taschea poilim to titlo khas disona. Punn to taslea uprant kitlo sobit distolo ani kitlo moladik zatolo tem ek xanno munis zannam. Tor Jehova ani Jezu bhaxen, ami dusreanchea chukincher dhean dinastana tanche bore gunn pollounk vavrunk zai.

15. Dusreanchi nit korina zaunk ami kitem korunk zai?

¹⁵ Dusreanchea borea gunnancher dhean diunchea sangata ami tanchi nit korchi nhoi vo tanchea vixim vaitt ulounchem nhoi. Hem ami koxem korunk zata? Ami ek udharonn polloum-ia. Ek dis Jezu devmondirant aslo tednam tannem ek gorib vidvek unnea molache don nanne dan kortana polloili. Tea vellar Jezun oxem vicharunk na: “Tinnem anik dan kiteak diunk na?” Tea gorib vidven kitlem dan dilem tacher dhean diunchea bodlek Jezun tinnem titlench dan kiteak dilem ani tichi poristhiti koxi asli tea vixim chintlem. Ani tinnem jem kitem kelem tea khatir tichi tokhnnai keli. Tor Jezu bhaxen, ami dusreanchea poristhiti vixim chintolim tednam ami tanchi nit korchim nant.—Lukas 21: 1-4.

16. Bhoinn Veronica-chea udharonnantlean tumi kitem xiktat?

 ¹⁶ Hem korop kiteak itlem gorjechem tem zannam zaunk ami bhoinn Veronica-chem udharonn polloum-ia. Tachea sobhent ek bhoinn asli ji aplea puta sangata eksuri ravtali. Veronica sangta: “Tim mitting ani porgottnni chukoitali. Hea pasot hanv tanchi nit korunk lagli. Punn uprant ek dis hanv tea bhoinni sangata porgottnnent geli. Tednam tichea putak ek mansik duens aslolean tika tachi kallji gheunk kotthin zatalem mhunn tinnem mhaka sanglem. Toxench, tancheo gorjecheo vostu mellonk ani Jehova sangata tanchi ixttagot ghott dovrunk tika kitem soglem korchem poddtta tem-ui tinnem mhaka sanglem. Tea bhair, tichea putachea hea duensak lagon thodde pavtti tika dusrea sobhechea mittingek voichem poddttalem, oxem-i tinnem mhaka sanglem.” Tea bhoinnichea poristhiti vixim zannam zalea uprant, Veronica oxem mhunnonk pavli. “Tea bhoinnik itlea oddchonneancho fuddo korcho poddttalo mhunn hanvem kednanch chintunk pasun naslem. Punn Jehova pasot ti korta tem soglem polloun hanv atam ticho khub mog ani valor kortam.”

17. Jakob 2:8 kitem sangta, ani thoim sanglam tem ami koxem lagu korunk zata?

¹⁷ Ami eka bhavachea vo bhoinnichea chukincher dhean diunk lagleant oxem amkam dista zalear ami kitem korunk zai? Poilem  mhunnttlear, ami amchea bhav-bhoinnancho mog korop gorjecho mhunn ugddas dovrunk zai. (Jakob 2:8 vachat.) Dusrem, oslim chintnam amchea mona thaun kaddun uddoi mhunn Jehova lagim ami kallzantlean magnnem korunk zai. Ani tisrem, ami magtat tea pormonnem kam korunk zai, mhunnche tea bhavak vo bhoinnik bore toren vollkhunk ami proitn korunk zai. Ami tanchea sangata ghoddie porgottnnent vochonk zata, vo tankam jevnnak apounk zata. Tor hea toren ami tanchea lagim uloitat ani vell sartat tednam tanche bore gunn amkam dixtti poddttole. Ani Jehova ani Jezu bhaxen, tanchea hea gunnancher ami dhean ditolim. Hea toren ami amcho boro gonvlli, Jezuchem aikon dusreanchi nit korop bond korunk pavtolim.

18. Ami amchea borea gonvlleachem aikon pallttat mhunn ami koxem dakhounk zata?

¹⁸ Zoxim menddram aplea gonvlleachoch tallo aikotat, teach bhaxen ami pasun Jezu sangta tench korunk zai. Ami gorjechea vostum vixim uskevop, ani dusreanchi nit korop pois korunk amchean zata titlo proitn kortat tednam Jehova ani Jezu amcher besanv ghaltole. Tor ami ‘supurlea hinddantlim’ zaum vo ‘her menddrantlim’ zaum, amcho boro gonvlli sangta tem pallit ravonk ami amcho nichov korum-ia. (Lukas 12:32; Juanv 10:11, 14, 16) Tor fuddlea lekhant, Jezun aplea xisank kor mhunn sangloleo don vostu kitem teo ami polloum-ia.