1. Jehovachea sevent chodd vavr korunk zaitea bhav-bhoinnamnim kosle dhei dovorleat?

 XEVOTT lagim pavta toso ami Jehovachi seva zata titli chodd korunk vavurtat. (Mt. 24:14; Lukas 10:2; 1 Ped. 5:2) Oxem korunk zaitea bhav-bhoinnamnim veg-veglle dhei dovorleat. Zoxem thoddim pioneer seva korunk sodhtat, thoddim Bethel-ant vo songottnnechea bandkamant vantto gheunk sodhtat. Ani zaitea bhavamnim sobhecho sevok vo vhoddil mhunn seva korunk dhei dovorla. (1 Tim. 3:1, 8) Tor aplo lok khuxemonan apli seva korunk fuddem sorta tem polloun Jehova khub khuxal zata!—St. 110:3, NW; Iz. 6:8, 9.

2. Ami Jehovachea sevent dovorleat te dhei melloun gheunk xokonant tednam amkam koxem disonk puro?

² Thodde pavtti ami dovorleat te dhei melloun gheunk amkam khub vell lagonk puro. Vo amchea piraiek ani her poristhitink lagon ami te dhei melloun gheunk xokonant astolim. (Mho. 13:12, NW) Oxench bhoinn Melissa-k * ghoddlem. Tika Bethel-ant seva korunk vo Raj Porgottnnarank Kors korunk itsa asli. Punn ti mhunntta, “Mhojea piraiek lagon atam hanv he dhei melloun gheunk xokona. Hem chintun thodde pavtti hanv khub nirax zata.”

3. Jehovachea sevent ek sondhi vo sueog mellonk thoddeamnim kitem korchi goroz asa?

³ Thoddim tornnattim asot vo bholaiken borim asot. Tori astana, Jehovachea sevent thoddim kamam korunk tankam sondhi mellona. Kiteak zait? Tankam ghoddie thodde gunn nant astole. Udharonnak, tim huxar asat astolim, rokddech nirnnoi ghetat astolim, vo tankam kam korunk urba asa astoli. Tori punn, tannim ghoddie pasiens dakhounk, bariksannen  kam korunk, ani dusreank man diunk xikonk zai astolem. Tumchi poristhiti pasun oxi asa zalear, tumi vaddounk zai tea gunnancher kam kortat tednam chintinant tea vellar tumkam ek khas sueog mellonk puro. Hea vixim amkam bhav Nick-achem ek udharonn asa. To 20 vorsancho aslo tednam taka sobhecho sevok mhunn nemunk na dekhun to khub niraxi zalo. To mhunntta, “Hanv khoim tori chukla oxem mhaka dislem.” Punn to fatti soronk na. To sobhent apleak dil’lem kam ani porgottnnechem kam korit ravlo. Ani aiz, to Xakha Somiticho sodoxio mhunn kam korta.

4. Ami hea lekhant kitem xiktolim?

⁴ Tumi Jehovachea sevent dovorleat te dhei melloun gheunk pavonk nant mhunn niraxi zaleant kai? Oxem zalear, tumche uske Jehovak sangat. (St. 37:5-7) Toxench, onnbhovi bhavam lagim modot gheiat. Ani te ditat te sol’le tumi apnnaitat tednam tumche dhei melloun gheunk tumkam modot zatoli. Punn bhoinn Melissa bhaxen, atam tumi tumche dhei melloun gheunk xokonant zalear pasun tumi tumchi khuxalkai koxi samballunk zata? Hem zannam zaunk ho lekh amkam modot kortolo. Tor hea lekhant ami (1) amkam khuxalkai koxi mellonk xokta, (2) ami amchi khuxalkai koxi vaddounk zata, ani (3) amchi khuxalkai anik vaddounk ami kosle dhei dovrunk zai tem ami xiktolim.

5. Ami khuxal asonk anik kitem korunk zai? (Upodexok 6:9)

⁵ Ami khuxal asonk kitem korunk zai tem amkam Upodexok 6:9 sangta. (Vachat.) Ek munis aplea axechea koxttamnim choddfoddtta vo apleachean melloun gheunk zainant tea vostum fattlean dhanvta tednam, to kednanch khuxal asona. Punn zo munis “aplea lagim kitem asa tantunuch” dhadoxi asta, to khuxal asta. Tor ami amchea lagim asa tantunuch dhadoxi astat ani amchean melloun gheunk zatat tosle dhei dovortat tednam ami khuxal astolim mhunn ami xikonk zata.

6. Atam ami khoinchi vopar polloitolim, ani ami kiteacher dhean ditolim?

⁶ Amkam noveo-noveo vostu xikonk avoddttat dekhun, amchea lagim asa tantunuch ami dhadoxi ravonk xokonant oxem zaitea lokank dista. Punn Bible sangta ki ami amchea lagim “asa tantunuch” khuxal ravonk zata. Hem ami koxem korunk zata tem Matev 25:14-30-ant, Jezun dil’lea talentanchea voparintlean ami polloum-ia. Tea voparintlean, amchea lagim asa tantunuch dhadoxi ravon ami khuxalkai koxi melloun gheunk zata ani ti koxi vaddounk zata tacher ami dhean ditolim.

7. Jezun diloli talentanchi vopar thoddeach utramnim sangat.

⁷ Jezun aplea voparint, eka dhonia vixim sanglem zo eka poixil’lea ganvant voicho aslo. Tannem bhonvddek voichea poilim aplea tinui chakrank apoun haddle ani tanchea tanki pormonnem tannem ekleak panch talent, dusreak don talent, ani tisreak ek talent dilo. * Poilea don chakramnim apleak dilolea talentache anikui talent zoddle. Punn tisrea chakran apleak dilolea talentachem kainch korunk na ani hea pasot dhonian taka kama thaun kaddlo.

8. Poilo chakor kiteak khuxal zalo astolo?

⁸ Dhonian apleak itle talent dileat tem polloun to poilo chakor ekdom khuxal zalo  astolo. Karonn aplea lagim itle poixe diun dhoniak apleacher kitlo visvas asa tem taka kollon ailem. Punn tea poilea chakra bhaxen apleak itle talent mellonk nant tem polloun to dusro chakor niraxi zalo kai?

9. Jezun dil’lea voparint dusrea chakran kitem korunk na? (Matev 25:22, 23)

⁹ Matev 25:22, 23 vachat. Apleak fokot donuch talent dileat mhunn dusro chakor dhoniacher bejar vo ragar zalo oxem Jezun sangonk na. Toxench, ‘Dhonian mhaka fokot donuch talent kiteak dileat? Hanv-ui poilea chakra bhaxen khub vavr kortam. Hanv ek boro chakor nhoi oxem dhoniak dista zalear, tannem dilole talent zomnint purun hanvem mhojea pasot kam kelearuch odik borem zatolem,’ oxem-i tea chakran chintlem mhunn Jezun sangonk na.

10. Dusrea chakran apleak dilolea talentanchem kitem kelem?

¹⁰ Punn poilea chakra bhaxen, tea dusrea chakran pasun apli zobabdari bore bhaxen samball’lli. Ani dhonian apleak dilole don talentache tannem anik don talent zoddle. Hem polloun tacho dhoni khub khuxal zalo. Tannem tea chakrak xabaski dili ani taka anikui zobabdareo dileo!

11. Ami amchi khuxalkai koxi vaddounk zata?

¹¹ Tor tea dusrea chakra bhaxen, Jehovachea sevent amkam sod’dheak asa tem kam ami zata titlea bore bhaxen korun amchi khuxalkai vaddounk zai. Tor, ‘soglea vellar’ porgottnnechem kam korit ravat ani sobhent tumkam ditat tim kamam purnn kallzan korat. (D.I. 18:5; Heb. 10:24, 25) Dusreank urba ditat tosle zobab diunk  mittinge pasot toiari korat. Tumkam dil’lem khoinchem-i kam titlem gorjechem nhoi oxem somzonakat. Zoxem, modlea sumanachea mittingek tumkam videartheanche bhag mellttat tednam te mon lavun korat. Ani sobhent tumkam koslem-i kam ditat tednam tem bore toren ani sarkea vellar korun sompounk vavrat. (Mho. 22:29) Hea toren, Jehova pasot tumi vavr korit ravtat tednam tachea sangata tumchi ixttagot ghott zatoli, tumi vaddavoll korunk pavtolim ani tumchi khuxalkai anik vaddttoli. (Gal. 6:4) Toxench, ami melloun gheunk sodhtalim ti zobabdari dusreank melltta tednam amkam tanchi nattkai zaunchi na, punn ami tanchea pasot khuxal astolim.—Rom. 12:15; Gal. 5:26.

12. Bhoinn Melissa-n ani bhav Nick-an apli khuxalkai vaddounk kitem kelem?

¹² Tor Jehovachea sevent amkam sod’dheak aslolea kamacher ami dhean dilem zalear kitem porinnam zaunk xokta tem ami Melissa ani Nick-achea udharonnantlean xikonk zata. Zoxem ami peregraf 2-ant polloil’lem, bhoinn Melissa-k Bethel-ant seva korunk vo Raj Porgottnnarank Kors korunk itsa asli. Tika hem korunk mellonk na mhunn niraxi zaunchea bodlek, tinnem aplem purnn dhean pioneer sevecher dovorlem ani porgottnnent asloleo veg-veglleo vatto apnnaileo. Toxench, ami peregraf 3-ant polloil’lem toxem, bhav Nick-ak sobhecho sevok mhunn nemunk na dekhun niraxi zaunchea bodlek, to porgottnnechem kam korit ravlo, mittingent bore zobab diunk laglo, ani tannem Bethel-a pasot form bhorlem. Ani rokddench dusrea vorsak Bethel-ant seva korunk taka apounnem mell’llem.

13. Amkam sod’dheak asloli zobabdari ami bore bhaxen keli zalear kitem zaunk xokta? (Upodexok 2:24)

¹³ Amkam Jehovachea sevent sod’dheak asloli zobabdari ami bore bhaxen keli zalear, bhav Nick-a bhaxen amkam anikui zobabdareo mellonk xoktat. Punn amkam anik zobabdareo mellonant zalear pasun, bhoinn Melissa bhaxen ami Jehovachea sevent jem kitem kortat tantunt amchi khuxalkai vaddounk zata ani dhadoxi ravonk zata. (Upodexok 2:24 vachat.) Hem soglem polloun amcho Dhoni Jezu amchea kamacho valor korta hem zannam zaun amchi khuxalkai anik vaddttoli.

14. Jehovachi seva kortana ami kitem ugddas dovrunk zai?

¹⁴ Ami Jehovachea sevent sod’dheak zaitem kam kortat astolim. Punn ami hem ugddas dovrunk zai: Ami amchi seva vaddounk dhei dovrunk zata. Zoxem, ami anik bore porgottpi ani xikoupi zaunk, toxench amchea bhav-bhoinnank modot korunk dhei dovrunk zata. Amchea lagim kitem korunk zata ani kitem korunk zaina tem motint dovrun ami dusreank modot korunk fuddem sortat tednam ami he dhei melloun gheunk pavtolim.—Mho. 11:2; D.I. 20:35.

15. Tumchi khuxalkai vaddounk tumi anik kosle dhei dovrunk zatat?

¹⁵ Tumi anik kosle dhei dovrunk zatat? Ami  poilea peregrafant polloil’lem toxem, tumi ek sahaiok pioneer vo niemit pioneer zaunk, Bethel-ant seva korunk vo songottnnechea bandkamant vantto gheunk dhei dovrunk zata. Toxench, tumi ek novi bhas xikonk vo porgottnnaranchi chodd goroz asa toslea eka zagear vochon porgottnni korunk dhei dovrunk zata. Tumi hantuntlo khoincho dhei melloun gheunk zata tea vixim nirnnoi gheunk tumi Jehova lagim magnneant modot magonk zata. (Mho. 16:3; Jak. 1:5) Ani tumi dovorlolo dhei melloun gheunk kitem  korunk zai tem zannam zaunk Organized to Do Jehovah’s Will hea pustokacho odheai 10 tumi vachunk zata. * Tea bhair, tumi tumchea sobhent aslolea vhoddilam lagim ulounk zata. Hea toren, tumi dovorlolo dhei melloun gheunk tumi vavr kortat tednam tumi kortat ti vaddavoll sogleank dison ietoli ani tumchi khuxalkai anik vaddttoli.

16. Tumi sod’dheak umkoch dhei melloun gheunk xokonant zalear tumi kitem korunk zata?

¹⁶ Ami atam meren polloileat te dhei tumi sod’dheak melloun gheunk xokonant zalear, tumi atam melloun gheunk xoktat tosle dhei dovrunk zatat. Te khoinche tem polloum-ia.

17. 1 Timotak 4:13, 15 pormonnem, ek boro xikoupi zaunk eka bhavan kitem korunk zata?

¹⁷ 1 Timotak 4:13, 15 vachat. Tum ek bautizm ghetlolo bhav zalear tunvem tuji vach’chi, ulounchi ani xikounchi kola vaddounk proitn korunk zata. Karonn oxem korunk tunvem ‘lokx dilear’ tujea aiknnareank faido zatolo. Vachunk ani Xikovnn Diunk Lokx Di hea pustikecho dor ek odheai xikonk ani bhaxonnam ditana tantunt dil’lo sol’lo apnnaunk tunvem dhei dovrunk zata. Toxench, bhav-bhoinnancho bhavarth ghott korunk ani tim xiktat tem apnnaunk tunvem tankam koxi modot korunk zata tacher dhean diunk zata. Tea bhair, sahaiok sol’lo diupea lagim vo her vhoddilam lagim tunvem khoim sudharnni korunk zai tea vixim modot gheunk zata. * Karonn te ‘utor porgottunk ani xikovnn diunk ghas ghetat vo khub vavr kortat.’ (1 Tim. 5:17) Ani tum oxem korta  tednam tuji ani toxench heranchi khuxalkai vaddttoli.

18. Porgottnnechea ani xikoupachea kamant amchi kola vaddounk ami kosle dhei dovrunk zatat?

¹⁸ Amkam sogleank porgott korchi ani xis korchi zobabdari asa. (Mt. 28:19, 20; Rom. 10:14) Hantunt tumi tumchi kola vaddounk sodhtat kai? Toxem zalear, Xikovnn pustikecho obheas korun tumi xiktat tem lagu korunk tumi dhei dovrunk zata. Toxench, Amchem Kristi Jivit ani Porgottnni—Mittingechi Pustika ani sumanachea modlea mittingek dakhoil’lea ulounk modot viddeo-ntlean tumkam anik zaiteo suchounneo mellttoleo. Hantuntli khoinchi suchounni tumchea vattarant faideak poddttoli tem zannam zaiat ani ti apnnaunk dhei dovrat. Oxem kortat tednam tumi bore porgottpi ani xikoupi zatolim ani tumkam khub khuxalkai mellttoli.—2 Tim. 4:5.

19. Devak manta tosle gunn vaddounk ami kitem korunk zata?

¹⁹ Ami sogleamnim dovrunk zai tantuntlo ek mhotvacho dhei mhunnttlear, Devak manta tosle gunn vaddovop. (Gal. 5:22, 23; Kol. 3:12; 2 Ped. 1:5-8) Udharonnak, bhavarth ho gunn vaddounk zai zalear ami kitem korunk zata? Ami amchea prokaxonamnim bhavarth ghott korchea vixim aslole lekh vachun tantuntle sol’le apnnaunk zatat. Toxench, kotthin vellar pasun bhav-bhoinnamnim aplo bhavarth koso samball’lla tem ami JW Broadcasting^®-ant pollounk zata. Ani tanchea bhaxen ami amcho bhavarth ghott korunk zata.

20. Ami niraxiponn pois korun amchi khuxalkai koxi vaddounk zata?

²⁰ Atam amkam zai tea ritin ami Jehovachi seva korunk xokonant astolim. Punn novea sonvsarant ami purnn ritin tachi seva korunk pavtolim. Tor, aiz zata te bhaxen ami tachi seva korunk vavrum-ia. Ani oxem ami kelem zalear ami amchi khuxalkai vaddounk pavtolim, amchem niraxiponn pois kortolim ani chodd gorjechem mhunnttlear, amchea “khuxal Dev” Jehovak ami man ani mhoima haddunk pavtolim. (1 Tim. 1:11, NW) Tor Jehovachea sevent kortat tantunt ami khuxal zaum-ia!