1-2. Jezuchea pavlamnim ami koxim cholonk xoktat? Ek udharonn diat.

 TUMI eka bhirankull zagear cholon voitat mhunn chintat. Thoim bhonvtonnim sogli renv asa. Ani tumkam vatt khobor na dekhun tumi eka guide-a fattlean cholon voitat. Ovchit tumcho guide tumkam dixtti poddona! Punn tumkam bhieupachi goroz na. Karonn tea renver tumkam tachi pavlam dixtti poddttat ani tea pavlamnim tumi cholon vochonk xoktat.

² Ami Jezuche khore xis, ani hea bhirankull zagear mhunnche hea noxttea sonvsarant jietat. Punn Jehovan amkam vatt dakhounk ek poripurnn Guide dila. To mhunnttlear, Jezu Krist, zachea pavlamnim ami cholonk xoktat. (1 Ped. 2:21) Bible-a vixim mahiti diupi eka pustoka pormonnem, Pedrun Jezuk eka guide-ak sor kelo. Jea toren renver aslolea tea guide-achea pavlamnim tumi cholonk pavlim, teach toren tumi Jezuchea pavlamnim cholonk xoktat. Punn Jezuchea pavlamnim cholop mhunnttlear kitem, tachea pavlamnim ami kiteak cholonk zai, ani ami hem koxem korunk zata tem polloum-ia.

3. Ekleachea pavlamnim cholop mhunnttlear kitem?

³ Ekleachea pavlamnim cholop mhunnttlear kitem? Bible-ant ‘cholop’ vo ‘pavlam dovrop,’ him utram thodde pavtti ek munis aplea jivitant kitem korta tem sangonk uzar keleant. (Ut. 17:1; Mho. 4:26) Ek munis koso jieta, hem tachea pavlank sor korunk zata. Ami amchem jivit tachea sarkim jielim zalear, ami tachea pavlamnim choltat oxem mhunnonk zata.

4. Jezuchea pavlamnim cholop mhunnttlear kitem?

 ⁴ Jezuchea pavlamnim cholop mhunnttlear kitem? Sadhea utramnim mhunnot zalear, tachi dekh ghevop. Hea lekhachea mukhel versant, Jezun koxtt sosun amkam ek bori dekh dovorlea mhunn apostl Pedru sangta. Punn her ritimnim pasun tannem amkam ek bori dekh dovorlea. (1 Ped. 2:18-25) Khorench, Jezuchem akʼkhem jivit, mhunnche tannem kitem xikoilem ani kitem kelem, tem amkam ek bori dekh zaun asa.

5. Ami oporipurnn aslear pasun Jezuchi dekh gheunk xoktat kai? Somzaiat.

⁵ Ami oporipurnn aslear pasun Jezuchi dekh gheunk xoktat kai? Hoi, karonn Pedrun mhunnttlem, ‘[Jezuchea] panvlamnim ami cholonk zai.’ Punn ami poripurnn toren tachea pavlamnim cholonk zai mhunn tannem sangonk na. Ami oporipurnn aslear pasun amchean zata titlem Jezuchea pavlamnim cholonk proitn kortat zalear, apostl Juanvan sanglem toxem ‘Jezu cholʼlo toxench ami cholonk pavtolim.’—1 Juanv 2:6.

6-7. Jezuchi dekh ghetlolean ami Jehova sangata amchi ixttagot koxi ghott korunk xoktat?

⁶ Ami Jezuchea pavlamnim cholʼlear, Jehova sangata amchi ixttagot ghott zatoli. Koxi? Poilem, Devak manta tea toren ami koxem jieunchem, hea vixim Jezun amkam ek borem udharonn dovorlam. (Juanv 8:29) Tor ami Jezuchea dekhin choltat zalear, Jehova khuxal zatolo. Ami Jehova lagim ixttagot korcho proitn kortat tednam Jehova pasun amcho ixtt zatolo.—Jak. 4:8.

⁷ Dusrem, Jezu poripurnn ritin aplea Bapaichea dekhin cholʼlo. Taka lagon, “jim konn Mhaka polletat, tim Mhojea Bapak polletat,” oxem to mhunnonk xoklo. (Juanv 14:9) Tor ami Jezuche gunn apnnaitat ani to dusream lagim koso vaglo toxinch ami  vagtat tednam, ami Jehovachi dekh ghetat. Udharonnak, Jezuk eka koddkarak polloun churchure dislem, eke duvent bailechem dukh to somzolo, ani zannim aplea mogacheank mornnant sanddleant tanchi taka doia disli. (Marku 1:40, 41; 5:25-34; Juanv 11:33-35) Tor Jezuchea pavlamnim cholʼlolean ami Jehovachi dekh gheunk zata. Oxem kelolean Jehova lagim amchi ixttagot ghott zatoli.

8. Jezuchea pavlamnim cholʼlear ami sonvsaracher koxim “zoit” vhoronk pavtolim?

⁸ Jezuchea pavlamnim cholʼlear ami amchem dhean haloinastana Jehovachi seva korit ravonk pavtolim. Apunn morchea adlea rati Jezu oso mhunnonk xoklo: “Hanvem sonvsaracher zoit vhelem!” (Juanv 16:33) Jezu apunn hea prithumer kiteak ailo tem to kednanch visronk na. Tem mhunnttlear, Devachem nanv povitr korunk. Jezun sonvsarachea lokanchem chintop ani vagnnuk apnnaunk na. Ani toxench, tanche sarke dhei tannem dovrunk na. Tor ami Jezu thaun kitem xikonk zata? Hea sonvsaracheo zaiteo vostu amchem dhean halounk xoktat. Punn Jezu bhaxen ami Jehovachea sevent sodanch dhean ditat zalear, ami pasun hea sonvsaracher “zoit” vhoronk xoktolim.—1 Juanv 5:5.

9. Amkam sasnachem jivit zai zalear ami kitem korunk zai?

⁹ Jezuchea pavlamnim cholʼlear amkam sasnachem jivit mellttolem. Sasnachem jivit zai zalear apnnem kitem korunk zai mhunn eka girest tornnattean Jezuk vicharlem tednam, tannem mhunnttlem: “Mhoje pattlean ie.” (Mt. 19:16-21) Toxench, apunn Krist mhunn manun gheinaslolea thoddea Judevank Jezun mhunnttlem: “Mhojim menddram . . . Mhozo patthlav kortat; ani tankam Hanv Sasnnik Jivit ditam.” (Juanv 10:24-29) Tea bhair, Mha-dhormsobhecho vangddi, Nikodemak Jezuchi xikounn avoddttali. Taka Jezun mhunnttlem, ‘mhojer bhavarth tthevta tea dor-eka munxak sasnik jivit mellttolem.’ (Juanv 3:16) Tor Jezun xikoilam tem ami amchea utramnim ani korneamnim apnnaitat tednam amkam tacher bhavarth asa mhunn dakhoitat. Ani oxem korun amkam fuddarak sasnik jivit mellttolem.—Mt. 7:14.

10. Jezuk “vollkhon ghevop” mhunnche kitem? (Juanv 17:3)

¹⁰ Ami Jezuchea pavlamnim cholonk zai zalear, ami poilim tachi vollokh gheunk zai. (Juanv 17:3 vachat.) ‘Vollkhun gheunk zai,’ mhunnttlear, tache gunn, tachem chintop, ani tache dorje chodd ani chodd borea toren zannam zavop. Tor ami sotant kitlim-i vorsam asum, Jehova ani Jezu vixim ami vollokh gheit ravonk zai.

11. Char Xubhvortomanamnim amkam kitem vachunk melltta?

¹¹ Aplea Putachi vollokh gheunk Jehovan aplea Utrant amkam char Xubhvortomanam dileant. Tantunt amkam tachem jivit, ani tachea porgottnne vixim vachunk melltta.  Tem vachlolean, Jezun kitem mhunnttlem, tannem kitem kelem, ani taka koxem bhoglem, hem soglem amkam kolltta. Hea toren ami Jezuchea udharonnacher ‘niallun’ ami tachi anik borea toren vollokh gheunk pavtat. (Heb. 12:3) Eke ritin ami Xubhvortomanam vachtat tednam, amkam Jezuchi pavlam dixtti poddttat. Tor, ami tea pavlamnim cholonk pavtat.

12. Xubhvortomanam thaun amkam purnn faido mellonk ami kitem korunk zai?

¹² Punn hea Xubhvortomanancho amkam purnn faido zatolo zalear, ami tim fokot vachlear pavona. Tancho ami bariksannen obheas korunk zai ani niall korunk zai. (Joshua 1:8 sor korat.) Hem korunk ami don suchounneo polloum-ia. Teo suchounneo amkam vachlam tem lagu korunk modot kortoleo.

13. Tumi Xubhvortomanant vachtat tea ghoddnnent asat mhunn chintunk kitem korunk zata?

¹³ Poilem, Xubhvortoman vachtat tednam, tumi tea ghoddnnent asat mhunn chintat. Hem korunk Jehovachea songottnnen dilolim prokaxonam uzar korun thoddo sodh korat. Tumi vachtat tea ghoddnne poilim ani uprant kitem ghoddlem tem zannam zauncho proitn korat. Tea ghoddnnent sanglolea lokam vixim ani zageam vixim anik zannam zaiat. Tumi vachtat ti ghoddnni dusrea Xubhvortomanant pasun vachat. Karonn teach ghoddnne vixim, dusrea eka Xubhvortoman boroupean anik mahiti dilea astoli. Oxem kelolean, tumi vachtat ti ghoddnni eke toren pollounk, aikonk, ani bhogunk pavtolim.

14-15. Xubhvortomanam thaun xiktat tim lisanvam ami koxim apnnaunk zata?

¹⁴ Dusrem, tumi tea ghoddnne thaun xiktat tim lisanvam apnnaiat. (Juanv 13:17) Tor Xubhvortomana thaun ek ghoddnnecher obheas kelea uprant tumkanch vicharat: ‘Hea ghoddnne thaun xiklam tem lisanv hanvem mhojea jivitant koxem apnnaunk zata? Tem lisanv hanv dusreank modot korunk koxem uzar korunk xokta?’ Poilem, tumi konnank modot korunk sodhtat tem chintat, ani uprant  sarkea vellar, mogan, borea bhaxen taka tem somzaiat.

¹⁵ Tor ami xikleant tim don lisanvam ek ghoddnni vachtana koxi uzar korunk zata tem polloum-ia. Hi ghoddnni, tea don nanne dan kelolea vidve vixim asa.

16. Marku 12:41-ant dilolea ghoddnne vixim sangat.

¹⁶ Tumi tea ghoddnnent asat mhunn chintat. (Marku 12:41 vachat.) Tarik: Nisan 11, 33 K.X. Hem Jezu morchea thoddeach disam poilim ghoddlem. Tea disa, Jezun aplo choddso vell devmondirant Deva vixim xikounk sarlo. Tea vellar, thoinchea dhorm fuddareamnim ieun tachea odhikaracher prosn ubarlolo. Ani thoddeamnim taka kotthin prosn pasun vicharlem. (Marku 11:27-33; 12:13-34) Atam to devmondirachea dusrea bhagant voita. Tea zageak Bailanchem Angonn mhunnttale. Thoim boson, to vontti lagim dovorlolea dananchea pettienk polloita. Zaito lok ieun thoim aplem dan ghaltat. Girest lok zaite nanne ghaltat tem to polloita. Ghoddie te nanne pettient poddttale tednam tancho avaz pasun to aikonk xoktalo.

17. Marku 12:42-ant sanglolea tea gorib vidven kitem kelem?

¹⁷ Marku 12:42 vachat. Thoddea vella uprant ek bail thoim ieta. Ti ek ‘gorib vidva’ asli. (Lukas 21:2) Tika aplem jivit sarunk khub kotthin aslem. Ani ghoddie gorjecheo vostu gheunk pasun tichea lagim poixe nasle. Tori astana, ti eka dan pettie lagim vochon don lhan nanne ghalta. Dan pettient te poddttana tancho avaz pasun ghoddie iena. Punn tinnem tem don nanne ghatleat mhunn Jezuk khobor asa. Te nanne tea vellar ekdom unne molache asle. Tea poixeamnim jevnna pasot uzar kortat tea lhanantlem-lhan suknnem pasun viktem gheunk zainaslem.

18. Marku 12:43, 44-a pormonnem, tea vidven ghatlolea dana vixim Jezun kitem sanglem?

¹⁸ Marku 12:43, 44 vachat. Tea gorib vidven dan ghatlolem tem polloun Jezu khub khuxal zata. Tor to aplea xisank apoun tankam hea vidve vixim oxem sangta: ‘Pettent duddu ghaleat tea sogleam poros he gorib vidven odik ghalam. Tor sogleamnim, [khas korun girest lokamnim] apnnank ogllem aslem tantlem ghalem; punn hinnem aplea goribponnantlem kaddun aslem titlem-i ghalem, aplea jivak zai aslem tem porian.’ Tor Jehova apleachi kallji ghetolo mhunn tika aslolo bhorvonso tichea hea dana udexim kollon ieta.—St. 26:3.

19. Tea gorib vidvek Jezun kitem sanglem tantuntlean ami khoinchem mhotvachem lisanv xiktat?

¹⁹ Tumi tea ghoddnne thaun xiktat tim lisanvam apnnaiat. Tumi tumkanch vicharat, ‘Tea gorib vidve vixim Jezun kitem sanglem tantuntlean mhaka kitem xikonk melltta?’ Tea vidvek ghoddie Jehovak anik diunk zai aslem astolem. Punn tinnem aplea lagim ghoddtta tem soglem kelem. Mhunnchem tinnem Jehovak aplea boreantlem-borem dilem. Ani tinnem ghatlolea danancho Jehova khub valor korta mhunn Jezuk khobor asli. Tor ami hanga hem mhotvachem lisanv xiktat: Ami Jehovak amchea boreantlem-borem ditat tednam ani amchea lagim ghoddtta tem soglem ditat tednam, mhunnche purnn kallzantlean tachi seva kortat tednam to khuxal zata. (Mt. 22:37; Kol. 3:23) Hoi, amchea bhoktek lagon, mhunnche porgottnnek ani mittingek lagon ami ghaltat to vell ani xokti pasun to valor korta!

20. Tea vidve thaun xiklolem lisanv dusreank modot korunk tumi koxem uzar korunk xoktat? Ek udharonn diat.

²⁰ Hea vidve thaun xiklolem lisanv tumi dusreank modot korunk koxim uzar korunk xoktat? Oslea eka bhav vo bhoinnim vixim chintat, jim ghoddie atam Jehovachi seva korunk xokonant. Udharonnak, eke zanttea  bhoinnichi bolaiki titli bori na, vo tika xokti na dekhun tika atam porgottnnent poilim bhaxen korunk zaina zait. Vo ek bhav aplea duvensak lagon, dor eka mittingek Raj-ghorant pavona zait. Oslea bhav-bhoinnank, apunn kainch valorachinant oxem disonk puro vo tim nirax zaunk puro. Tor tanchi seva polloun Jehova khuxal zata mhunn dakhounk, tumi tea vidve thaun xiklolem lisanv uzar korun tankam “faideak poddtat toslim” utram sangat. (Ef. 4:29) Tim Jehovak aplea boreantlem-borem ditat tednam Jehova khuxal zata mhunn tankam khatri diat. (Mho. 15:23; 1 Tes. 5:11) Tim Jehova pasot kortat ti seva ekdom unnim aslear pasun, oslea bhav-bhoinnank tumi xabaski ditat tednam, tumi Jezuchea pavlamnim cholonk pavtolim.

21. Tumi kitem korcho nichov kela?

²¹ Xubhvortomanachea char pustokant Jezuchea jivita vixim amkam itli bariksannechi mahiti dilea, tea pasot ami Devache khub upkari! Tim pustokam vachlolean ami Jezuchea pavlamnim cholonk xoktat. Ami amchea svotachea obheasa vellar vo Kuttumbik Bhokte vellar hea pustokancher borea toren obheas korunk zata. Ami Jezuchea pavlamnim cholonk zai zalear, ami tea ghoddnnent asat mhunn chintunk zata ani tea ghoddnnentlean xiklolim lisanvam amchea jivitant lagu korunk zata. Tea bhair, Jezun kitem kelʼlem tachi dekh ghetlearuch puro nhoi, punn tannem kitem sanglem taka pasun ami kan diunk zai. Jezu morchea poilim tannem sanglolea utram thaun ami kitem xikonk zata, tea vixim ami fuddlea lekhant xiktolim.