1-2. Juanv 4:35, 36-ant boroil’lim utram Jezun kiteak mhunnttlim astolim?

JEZU halinch roilolea xetantlean cholon voitalo. (Juanv 4:3-6) Hem xet sumar char mhoineamnim lunvpak toiar zatole. Punn thoim astana Jezun sanglolim him utram aikonk vegllinch disonk puro. Tannem mhunnttlem: “Tumche dolle uklun polleiat, xetam zalim dhovim, lunvchim zalim.” (Juanv 4:35, 36 vachat.) Tor to kitem mhunnonk sodhtalo?

² Jezu hanga xet lunvchea vixim nhoi, punn lokank lunvchea vixim, mhunnche, lokank ektthaim korchea vixim uloitalo. Hachea poilinch kitem zal’lem tea vixim dhean dium-ia. Judev lok Samaritkaram thaun pois ravtale. Tori punn Jezun eka Samaritkar bailek porgott kel’lem ani tinnem tem aikolem! Ani tinnem, her Samaritkarank vochon Jezu vixim sanglolem ani tiche aikon te Jezu lagim chodd xikonk taka mellonk bhair sorlole. Tor Jezu “xetam zalim dhovim,” hea vixim uloitana te Samaritkar taka mellonk vatter asle. (Juanv 4:9, 39-42) Hea ghoddnne vixim chodd mahiti diupi eka pustokant oxem mhunnttlam: “Te lok Jezuk mellonk ani tachea thaun xikonk rokddech aile . . . hantuntlean tannim apunn lunvunk toiar aslole danne koxe asat mhunn dakhoun dilem.”

3. Lokam vixim Jezuk koxem distalem toxem tumkam-i dista zalear, tumchi porgottnni anik bori koxi zaunk xokta?

³ Tumi zankam bori khobor porgott’ttat tanchea vixim tumkam koxem dista? Tumkam tim lunvunk toiar zal’lea xetantlea dannea sarkim distat kai? Toxem dista zalear, tumi tin vostu korunk pavtolim: Poilem, porgottnni korunk khub unno vell asa hem monant dovrun tumi porgott kortolim. Karonn, lunvnnecho vell unno asta dekhun vell ibadd korunk zaina. Dusrem, lok bore khobrek kan ditat tednam tumi khuxal zatolim. Karonn Bible sangta: ‘Lunvnnechea vellar lok sontostat.’ (Iz. 9:2) Tisrem, dor ek  munis fuddarak Jezucho xis zaunk xokta oxem tumi chintat dekhun uloitana tumchea aiknnareak kitem avoddtta to vixoi monant dovrun uloitolim.

4. Hea lekhant ami apostl Paulu thaun kitem xiktolim?

⁴ Samaritkar kednanch Jezuche xis zaunche na, oxe thodde Jezuche pattlavdar ghoddie chint’tale. Punn, Jezun toxem chintchea bodlek te fuddarak aple xis zatole oxem chintlem. Jezu bhaxen ami amchea vattarantle lok fuddarak Jezuche xis zaunk xoktat mhunn chintunk zai. Hea vixim apostl Paulun amchea pasot ekdom bori dekh dovorlea. Ami tachea thaun kitem xikonk zata? (1) Apunn porgott’tta tea lokanchi patienni kitem asa tem to zannam aslo, (2) tankam kitem avoddttolem tem zannam zaunk tannem proitn kelo ani (3) te Jezuche fuddarak xiz zaunk xoktat mhunn tannem chintlem. Hea tin vixoi-ancher ami hea lekhant bhasabhas kortolim.

5. Devsthanant aslolea lokank Paulu kiteak somzonk xoktalo?

⁵ Paulu chodd pavtti Judevanchea devsthanamnim porgott’ttalo. Udharonnak Tesalonikent astana, devsthanant “tin Sonvar porian tannem [Judevam] lagim Povitr Pustok dhorun bhasbhas keli.” (Itihas 17:1, 2) Paulu Judev aslo dekhun devsthanant porgott korunk taka sompem zalem. (Itihas 26:4, 5) Tor Paulu Judev lokank somzotalo dekhun to tankam dhiran porgott korunk xoktalo.—Filp. 3:4, 5.

6. Atenantlea bazarant aslole lok devsthanant aslolea lokam poros veglle koxe asle?

⁶ Pauluchea virodheamnim taka Tesalonike ani Beroea thaun dhanvddailea uprant to Atenant pavlo. To porot “Judevam lagim ani Devak bhoztoleam kodde devsthanant bhasabhas” korunk laglo. (Itihas 17:17) Punn Paulu bazarant porgott kortalo tednam, tachem aikotat tea lokanchem chintop vegllem aslem. Tachea aiknnaream modem totvgineamnim ani her videxi lok asle, zankam Paulucho sondex ek ‘novi xikounn’ koxi disli. Tannim Pauluk sanglem: “Tum sangtai tantleo thoddeo vostu amkam attveoch vo veglleoch lagtat.”—Itihas 17:18-20.

7. Itihas 17:22, 23-a pormonnem, Paulun aplea uloupant koso bodlav kelo?

⁷ Itihas 17:22, 23 vachat. Paulun devsthanant aslolea Judevank jea toren sondex porgottlo tea toren tannem Atenant aslolea videxiank porgottunk na. Tannem ghoddie apnnakuch oxem vicharlem astolem, ‘Atenantle he lok kitem patietat kai?’ Tachea sor bhonvtonni kitem asa ani tea lokancheo dhormik chali-riti kitem tacher tannem dhean dilem. Uprant, te lok kitem mantat ani Bible-antlem sot, hanchea modem kitem ek sarkem asa tacher to uloilo. Bible-a vixim mahiti diupi eklo oso mhunntta, “Onbhavarthi Grek lok Judevanchea ani Kristanvachea ‘khorea’ Devachi bhokti  korinasle mhunn Judev Kristanv zaun aslolo Paulu zannam aslo. Tori punn, to hanga jea Deva vixim tanchea lagim uloilo to Dev tea Atenachea lokank onvollkhi naslo mhunn dakhouncho proitn korta.” Tor Paulu aplea uloupant bodlav korunk toiar aslo. Apunn porgott’ttalo to sondex te bhokti korunk sodhtolea tea ‘onvollkhi Deva’ koddleanuch aila mhunn tannem Atenkarank sanglem. Tea videxiank Devachea Utranchi vollokh nasli. Tori astana, Paulun tankam soddun diunk na. Tachea bodlek, lunvunk toiar aslolea xetantlea dannea sarke tannem tankam lekhle ani bori khobor sangtana aplea uloupant bodlav kelo.

8. (a) Tumchea vattarantle lok khoinche dhorm pallttat tem tumi koxim zannam zaunk xoktat? (b) Konnui apleak aplo svotacho dhorm asa mhunn sangta zalear, tumi tankam koxim zobab ditolim?

⁸ Paulu bhaxen, tumchea bhonvtonni kitem ghoddtta tacher dhean diat. Tumchea vattarantlea lokank kitem avoddtta tem zannam zaunk bhonvtonni kitem asa tem polloiat. Tea aiknnarean aplea ghora bhair sogleo vostu koxeo dovorleat? Aiknnareachem nanv, tachem nhesop ani disop, ani tachi uloupachi rit hantuntlean to khoinchea dhormacho mhunn amkam kollonk xokta kai? Ghoddie aiknnaro apnnak aplo dhorm asa mhunn tumkam sangonk puro. Te oxem sangtat tednam Flutura nanvachem ek khas pioneer tankam oso zobab dita, “Tunvem mhoji patienni manun gheunk zai mhunn tuka hanv sangonk ieunk na, punn tujea lagim hea vixoi-acher hanv ulounk ailam . . . ”

9. Eka dhormik munxa lagim khoinchea vixoi-ancher tumi ulounk xoktat?

⁹ Eka dhormik munxa lagim tumi khoinchea vixoi-acher ulounk xoktat? To kitem patieta ani tumi kitem patietat tantunt kitem ek-sarkem asa tem zannam zauncho proitn korat. To ghoddie ekach Devachi bhokti korta astolo. Jezu munxakullacho soddvonnar mhunn ghoddie to patieta astolo, vo ami eka noxttea sonvsarant jietat ani hacho beginuch nas zauncho asa mhunn ghoddie to patieta astolo. Tor tumchea ani tanchea modem ek-sarkem aslolea oslea patiennecher tanchea sangata uloiat ani tankam kallzak lagta toso Bible-acho sondex diat.

10. Ami kitem korcho proitn korunk zai, ani kiteak?

¹⁰ Ugddas dovrat, lok aplo dhorm kitem xikoita tem soglench mantat oxem asona. Tor tumi eka munxacho dhorm khoincho, hem zannam zalea uprant pasun to kitem patieta tem zannam zauncho proitn korat. Australia-ntlo David nanvacho ek khas pioneer oso mhunntta, “Aiz zaite lok aplea dhormachea xikounne sangata totvgineanachi xikounn mantat.” Albania-ntlem Donalta oxem mhunntta, “Thodde lok apunn eka dhormache mhunn sangtat, punn uprant te Devacher patienant mhunn sangtat.” Ani thodde lok apunn trindad-ak patietat mhunn sangonk puro, punn te khoreanich Bap, Put, ani povitr xokti, he tigui mellon ek Dev mhunn ghoddie patiena astole, oxem Argentina-chea eka mixinori bhavak kollon ailem. To mhunntta, “Hem zannam zalolean ami amchea modem ani  aiknnarea modem kitem ek-sarki patienni asa tem zannam zaunk sompem zata.” Tor, lok khoreanich kitem patietat tem zannam zauncho proitn korat. Hea toren, Paulu bhaxen tumi ‘tore-torechea lokam lagim tankam manvota’ tea toren ulounk xoktolim.—1 Kor. 9:19-23.

11. Itihas 14:14-17-ant sanglolea pormonnem, Lystrachea lokam lagim uloitana Paulu tanchea kallzak lagta toso koso uloilo?

¹¹ Itihas 14:14-17 vachat. Aplea aiknnareank kitem avoddtta tem motint dovrun Paulu tanchea lagim uloilo. Udharonnak, jea lokam lagim Lystrant Paulu uloilo tankam Devachea Utracher thoddem vo kainch ginean naslem. Tor, tankam somzota tea vixoi-ancher to uloilo. Vella pormonnem utpon zatat tim follam ani jivitant khuxalkai mellonk Devan kelolea manddavolli vixim to uloilo. Aple aiknnare sompe ritin somzonk xoktat toslim utram ani udharonnam tannem uzar kelim.

12. Eka munxak kitem avoddtta tem zannam zaun tumi tumchea uloupant koso bodlav korunk zata?

¹² Tumchea vattarantlea lokank kitem avoddtta tem zannam zaunk tumchi somzunchi tank uzar korat ani uprant tumchea uloupant bodlav korat. Eka aiknnarea lagim ulounchea poilim vo tachea darar marchea poilim, tea munxak kitem avoddtta tem tumkam koxem kollttolem? Bhonvtonni kitem asa tacher dhean diat. Ghoddie to aplea ghora fuddem fulam-zhaddam laita astolo, vo ek pustok vachta astolo, vo apli gaddi sarki korta astolo, vo anik khoinchea-i eka kamant buddla astolo. Zata zalear, to kitem korta teach vixoi-acher uloun tumchem ulovop suru korunk zata. (Juanv 4:7) Aiknnaro kitem nhesla tachea voilean pasun tachea vixim zaitem somzonk xokta, zoso to khoinchea desacho, to kitem kam korta, vo tachi avoddtti sports ttim khoinchi. “Hanvem 19-vorsachea eka tornnattea lagim ulovop suru kelem. Tannem ghatlolea T-shirt-acher eka famad gaupeachem chitr aslem. Tor, hanvem taka tachea T-shirt-a vixim vicharlem ani taka to gaupi kiteak avoddtta tea vixim to mhaka sangonk laglo. Oxem uloun ek Bible obheas suru zalo, ani aiz to amcho ek bhav zaun asa,” mhunn Gustavo mhunntta.

13. Tumi eka aiknnareak Bible obheas gheunk borea toren koxi urba diunk zata?

¹³ Tumi konnak Bible obheas gheunk urba ditat zalear, tea obheasa udexim taka koxi modot zata  tem taka somzailolean to obheas gheunk fuddem sortolo. (Juanv 4:13-15) Udharonnak, Poppy nanvachea eka bhoinik ti kitem sangta tem aikonk eke bailen aplea ghora bhitor apoilem. Poppy-n ghorantlea vontticher tea bailechi certificate polloun ti khub xikounn ghetloli ek professor asli mhunn kollon ailem. Tika xikxonnachem avodd asa ti polloun amkam pasun dusreank xikounchi manddavoll asa, zoxi Bible obheas gheunchi ani mittingechi mhunn Poppy sangonk lagli. Ti bail Bible obheas gheunk toiar zali, dusrea disak mittingek geli, ani thoddeach tempa uprant eka sorkitt zomatik hajir zali. Eka vorsa uprant, tinnem bautizm ghetlo. Tor tumi tumkanch vicharat: ‘Hanv jea konnank porot bhett kortam taka kitem avoddtta? Amchi Bible obheasachi manddavoll mhojea aiknnareak avoddttoli zalear tea manddavolle vixim taka sangtana hanvem koxem ulounk zai?’

14. Tumi eka Bible obheasak toiari kortana ani to tumi to ghetana, tumchea dor eka Bible videartheak koxem monant dovrunk zata?

¹⁴ Tumi ek Bible obheas suru kelea uprant, jea konna lagim tumi Bible obheas ghetat tankam monant dovrun obheasa pasot toiari korat. Toxem kortana tachi famil, tachem xikxonn, tacho onnbhov, taka kitem avoddtta hem soglem monant dovrat. Tumi toiari kortana, Bible-antlem sot somzaunk tumi tankam khoinchim versam ugddun dakhoitolim, khoinche viddeo dakhoitolim, ani khoinchim udharonnam uzar kortolim hea vixim chintat. Tumi tumkanch vicharat, ‘Hea Bible videartheak khas korun koslea vixoi-acher uloilear tachea kallzak lagtolem?’ (Mho. 16:23) Albania desant, ek pioneer bhoinn Flora sangata ek bail obheas ghetali. Tinnem mhunnttlem, “Punorjivontponnachi xikounn hanv manun ghena.” Punn tinnem ti xikounn manun gheunkuch zai mhunn Floran sangonk na. Karonn Flora mhunntta, “Poilem tinnem punorjivontponn bhasail’lea tea Deva vixim zannam zaun ghevop gorjechem aslem mhunn hanv somzolem.” Tea disa thaun, Flora tea baile sangata Bible obheas ghetana Jehovachea mogacher, zannvaiecher ani xoktecher chodd dhean diunk laglem. Uprant ti bail punorjivontponnacher bhavarth dovrunk lagli. Ti atam Jehovachi ek urbebhorit Sakxi zaun asa.

15. Itihas 17:16-18-ant sanglolea pormonnem, Atenkaranchi khoinchi vagnnuk polloun Pauluk dukh zalem, punn tannem Atenkarank kiteak soddun diunk na?

¹⁵ Itihas 17:16-18 vachat. Aten xar murteamnim, loingik pozoddponnamnim, ani fottkirea totvgineanamnim buddlole. Thoinchea lokamnim tacho opman kelo. Tori astana Paulun Atenkaranchea lokank kednanch soddun diunk na. Kristanv zaunchea poilim, Paulu ek “ninda” korpi, “dhumallo” diupi ani “okman” korpi munis zaun aslo. (1 Tim. 1:13) Punn zoxem, Paulu fuddarak aplo xis zaunk xokta mhunn Jezun chintlem, toxech Atenkar pasun Jezuche xis zaunk xoktat mhunn Paulun chintlem. Ani tancher taka aslolo bhorvonso tuttonk na.—Itihas 9:13-15; 17:34.

16-17. Sogle toreche lok Jezuche xis zaunk xoktat mhunn amkam koxem kolltta? Ek udharonn diat.

¹⁶ Poilea xekddeant, soglea toreche lok Jezuche xis zale. Paulun Gresachea tabea khala aslolea Korint xarantlea Kristanvank boroilem tednam tea sobheche thodde lok Kristanv zaunchea adim opradi asle vo pozoddponnachea khor patkant buddlole asle. Tannem uprant sanglem: ‘Tumche modem oslim kai zannam adim aslim; punn atam tumi nitoll zaleant.’ (1 Kor. 6:9-11) Tumi Pauluchea zagear aslolim zalear he lok fuddarak bodlonk xoktole ani Jezuche xis zaunk xoktole mhunn tumi chint’tolim aslim kai?

¹⁷ Aiz, zaito lok Jezuche xis zaunk aplea jivitant bodlav kortat. Sogle toreche lok Bible-achea sondexak kan diunk xoktat mhunn Yukina nanvachea Australiantlea eka khas pioneer bhoinnik kollon ailem. Udharonnak, ek dis tinnem eka ofisant eke tornnatte bailek polloilem. Tichea angacher zaite tattoo asle ani ti vegllech toreche kopdde nhesloli. Yukina fuddem mhunntta, “Survatek hanv tachea sangata ulounk  fattim sorlem, punn uprant hanv ulounk laglem. Tika Bible-achi itli avodd asli ki ticher aslole thodde tattoo Stotr pustokantlim versam zaun aslim mhunn mhaka kollon ailem!” Tinnem Bible-acho obheas suru kelo ani ti mittingek pasun ieunk lagli. *

18. Amchea vattarantle lok amchem aikotole vo na hem ami kiteak tharaunchem nhoi?

¹⁸ Xetam lunvchim zalim oxem Jezun mhunnttlem tednam choddxe lok tache pattlavdar zatolem oxem to chint’talo kai? Na. Karonn thoddech lok tacher bhavarth ghaltole mhunn Devachea Utrant adinch boroun dovorlolem. (Juanv 12:37, 38) Ani Jezuk dusreanchea kallzant kitem asa tem zannam zaunchi tank asli. (Mt. 9:4) Tacher bhavarth dovrunk xoktat toslea thoddeach lokancher tannem dhean dilem. Tori astana, tannem sogleach lokank vhodd urben porgott kelem. Jezu bhaxen ami lokanchi kallzam parkhunk xokonant. Toxem zal’lean amchea vattarantle lok amcho sondex aikotole vo na hachi nit korop kitlem chukichem zatolem! Tachea bodlek, fuddarak lok Jezuche xis zaunk xoktat oxem chintat. Burkina Faso desantlo Marc nanvacho ek mixinori oxem mhunntta: “Mhojea sangata choddxe pavtt oxem ghoddtta. Je lok Bible obheas korun vaddavoll kortole mhunn hanv chint’tam te vaddavoll korinant. Punn je lok vaddavoll korche nant mhunn hanv chint’tam tannim vaddavoll kelea. Tor hachea voilean, Jehovachi povitr xokti amkam vatt dakhoita tea vatten ami chol’lear boreak poddttolem mhunn hanv xiklom.”

19. Ami amchea vattarantlea lokam vixim koslem chintop dovrunk zai?

¹⁹ Ami poilech pavtt eka vattarant voitat tednam, amkam thoim choddso lok piklolea dannea sarke lunvnnek toiar asa oxem disona zait. Punn Jezun aplea xisank kitem sanglolem tem ugddas korat. “Xetam zalim dhovim, lunvchim zalim,” oxem tannem mhunnttlem. Lok bodlonk xoktat ani Jezuche xis zaunk xoktat. Fuddarak Jezuche xis zaunk xoktat tea lokank Jehova “bhanddaram” sarkim moladik mhunn lekhta. (Hag. 2:8) Ami, Jehova ani Jezu bhaxen chintat zalear, te lok khoinchea ganvche, khoinchea dhormache, te kitem mantat, ani tankam kitem avoddtta hem zannam zauncho proitn kortolim. Te onvollkhi nhoi punn fuddarak amchim bhav-bhoinnam zaunk xoktat mhunn ami chintolim.