Obhesacho Lekh 42
Bible Videartheank Bautizm Gheunk Ami Koxi Modot Korunk Zata—Dusro Bhag
“Kitem kortai ani kitem xikoitai tache vixim chotrai dhor.” —1 TIM. 4:16.
GIT 77 Light in a Darkened World
KITEM XIKTOLIM a
1. Xis korchem kam lokancho jiv salvar korta mhunn ami koxim zannant?
XIS korchea kamam udexim lokancho jiv salvar zata. Hem ami koxim zannant? Matev 28:19, 20-ant Jezun hi adnea dili tednam tannem oxem mhunnttlem: ‘Vochun . . . xis korat . . . snan diat vo bautizm diat.’ Bautizm ghevop kitlem gorjechem? Amkam sasnachem jivit zai zalear ami bautizm gheunk zai. Eklo bautizm gheunk sodhta zalear Jezuchea mornna udexim apleak sasnachem jivit melltta mhunn tannem bhavarth dovrunk zai. Teach karonnak lagon, apostl Pedrun Kristanvank sanglem: “Jezu Kristachea punorjivontponna vorvim . . . bautizm tumkam atam taronn dita.” (1 Ped. 3:21, NW) Tor eklo bautizm gheta tednam taka purnorjivontponnacho bhorvonso melltta.
2. 2 Timotak 4:1, 2-ant sanglam tea pormonnem ami kosle torechim xikoupi asonk zai?
2 Xis korunk ami ‘xikounn diunchea monan vo xikounchi kola’ uzar korunk zai. (2 Timotak 4:1, 2 vachat.) Kiteak? Karonn Jezun amkam adnea dilʼli: “Vochun . . . xis korat . . . tankam xikoiat.” Tea kamant ami “thir” ravonk zai mhunn apostl Paulun sanglem. Karonn toxem kelolean “tuji ani tujem utor aikotoleanchi soddvonn tum zoddtoloi.” Taka lagon, Paulun mhunnttlem: “Kitem xikoitai tache vixim chotrai dhor.” (1 Tim. 4:16) Ami lokank xikoun tankam xis korunk sodhtat dekhun amchem xikovop ekdom borem asonk zai.
3. Hea lekhant Bible obheas gheunchea vixim ami kitem xiktolim?
3 Sonvsarbhor ami lakʼkhamnim Bible obheas ghetat. Punn poilinchea lekhant ami xiklim toxim, choddxea Bible videartheank bautizm gheun Jezuche xis zaunk ami koxi modot korunk zata tem ami zannam zaunk zai. Tor eka Bible videartheak bautizm gheunk modot korunk dor eka xikoupean korunk zai te anik panch vixoi hea lekhant ami xiktolim.
XIKOITANA BIBLE UZAR KORAT
Xikoitana Bible anik bore toren uzar korunk eka onnbhovi xikoupeachi modot gheiat (Peregraf 4-6 polloiat) f
4. Bible obheas ghetana xikoupean chodd kiteak ulounk nozo? (Futtnott pasun polloiat.)
4 Amkam Devachem Utor avoddtta dekhun dusreank xikoitana ami khub ulounk xoktat. Punn ami Pahrogopur Obheas, Sobhecho Bible Obheas vo amchea videarthea sangata Bible obheas ghetana ami chodd ulounk nozo. Ami xikounk Bible borea toren uzar korunk sodhtat dekhun, eka xikoupean chodd uloinastana ravonk chotrai dovrunk zai. Ami eka Bible versacher vo vixoi-acher zannam asloli sogli mahiti sangonk nozo. b (Juanv 16:12) Tumi bautizm ghetlo tednam Bible-a vixim kitlim zannam aslim ani atam kitlem zannant tachea modem sor korun polloiat. Tea vellar ghoddie tumi fokot Bible-antlim mullavim sotam zannam aslim. (Heb. 6:1) Punn atam tumkam Bible-a vixim jem khobor asa tem zannam zaunk tumkam zaitim vorsam laglim. Tor tumchea Bible videartheak soglench ekuch pavtti xikounk vochonakat.
5. (a) 1 Tesalonikekarank 2:13 pormonnem, amcho videarthi xikta tednam taka kitem kollʼllolem amkam zai? (b) Ami amchea videartheak to xikta tea vixim amkam sangonk ami koxi urba diunk zata?
5 Amcho videarthi jem kitem xikta tem Bible-ant asa mhunn kollʼllolem amkam zai. (1 Tesalonikekarank 2:13 vachat.) Hem ami koxem korunk xoktat? To kitem xikta tea vixim sangonk tumchea videartheak urba diat. Soglech pavtti tuminch Bible-antlim versam somzaunchea bodlek thoddim versam taka somzaunk sangat. Devachem Utor tachea svotachea jivitant to koso apnnaunk xokta tem taka dakhoiat. To Bible-antlim versam vachta tednam tea vixim to kitem chinta ani tachea vixim taka koxem dista tem sangonk urba ditat tosle prosn vicharat. (Lukas 10:25-28) Udharonnak, tumi oxem vicharunk zata: “Hea versantlean Jehovachea khoinchea gunnam vixim tujean xikonk zata?” “Bible-antlean tum atam jem xikla tem tujea jivitant koxem faideak poddonk xokta?” “Tum atam xikla tachea vixim tuka koxem dista?” (Mho. 20:5) Tumcho videarthi kitlo zannam tem mhotvachem nhoi, punn to jem kitem xikla tacho to kitlo mog korta ani to tem kitlem apnnaita tem mhotvachem.
6. Eka Bible obheasak, eka onnbhovi porgottnnarak gheun gelear kiteak borem zatolem?
6 Tumchea Bible obheasak tumi onnbhovi xikoupi porgottnnarank tumchea sangata vhortat kai? Toxem zalear, tumi Bible obheas koxim ghetat ani Bible koso uzar kortat tea vixim tankam koxem dista mhunn tankam vicharunk zata. Hem korunk khaltikai gorjechi. (Itihas 18:24-26 sor korat.) Uprant, to videarthi xikta tem somzota oxem dista kai mhunn tumi onnhbovi porgottnnarak vicharunk zata. Ek vo chodd sumanam tumi Bible obheas gheunk pavonant tednam tea onnbhovi porgottnnarak to Bible obheas gheunk sangonk zata. Hea toren Bible obheas chukonastana fuddem voitolo ani obheas korop kitlem mhotvachem tem to videarthi zannam zatolo. Ho obheas “mhozo” ani konnacheanuch to gheunk zaina oxem chintinakat. To videarthi xikot ravlolo zai zalear taka kitem sogleam-von boreak poddttolem tem tumi diunk proitn korunk zai.
URBEN ANI KHATREN XIKOIAT
Bible-antlim totvam koxim apnnaunchim tem tumchea videartheak somzonk bhav-bhoinnanche onnbhov sangat (Peregraf 7-9 polloiat) g
7. Eka videartheachi xikchi umed vaddounk kitem modot korunk xokta?
7 Eka videartheak Bible-ant aslolea sotam vixim tumchi urba ani khatri dison ieunk zai. (1 Tes. 1:5) Oxem kelolean to jem kitem xikta tachea vixim ghoddie tachi umed vaddttoli. Bible-antlim totvam tumchea jivitant tumkam koxim faideak poddleant tea vixim tumi taka ghoddie sangonk zata. Tim totvam aplea sodanchea jivitak pasun faideak poddonk xoktat mhunn to zannam zatolo.
8. Tumchea Bible videartheak modot korunk tumi anik kitem korunk zata, ani toxem tumi kiteak korunk zai?
8 Tumche videarthi fuddo kortat tosleo oddchonneo tumi vo her bhav-bhoinnamnim fuddo keleat zalear tea vixim tumchea videartheak Bible obheas ghetana sangat. Tumchea sobhent aslolea toslea bhav-bhoinnank tumi obheasak gheun voitat zalear tem videartheak faideak poddttolem. Tea bhair, jw.org-cher “The Bible Changes Lives” c hantunt aslole urbebhorit onnbhov taka sangonk zata. Osle lekh ani viddeo dakhoilolean tumchea videartheak Bible-antlim totvam tachea jivitant apnnailolean koso faideak poddtta tem taka kollon ietolem.
9. Ek videarthi apunn xikta tea vixim aplea familicheank ani ixttank sangonk tumi taka koxi urba diunk xoktat?
9 Tumchea Bible videarthea sangata tacho ghov vo tichi bail pasun xikta kai? Na zalear, taka vo tika Bible obhesak bosonk zata mhunn sangat. Tumcho videarthi xikta tem aplea familik ani ixttank sangonk urba diat. (Juanv 1:40-45) Koxem? Tumi Bible obheas ghetana oxem vicharunk zata: “Ami xikleat te vixoi tujea familik tunvem koxem sangonk zata?” vo “Tujea ixttak hea vixim sangtana tum khoincho vers uzar kortolo?” Hea toren, tumi tumchea videartheak ek xikoupi zaunk modot kortolim. Uprant, to purto zata tednam sobhe sangata porgottnnent bhag gheunk pavtolo. Bible xikonk umed aslolea konnankui to vollkhota zalear tumchea videartheak vicharat. Toslea konnak to vollkhota zalear, tea munxak rokddinch vochon mellat ani Bible obheas gheunk itsa asa kai mhunn vicharat. Bible Koso Xikonk Zata? d ho viddeo taka dakhoiat.
TUMCHEA VIDEARTHEANK SOBHENTLEA BHAV-BHOINNAM SANGATA IXTTAGOT KORUNK URBA DIAT
Tumchea videartheank sobhentlea bhav-bhoinnam sangata ixttagot korunk urba diat (Peregraf 10-11 polloiat) h
10. 1 Tesolonikekarank 2:7, 8-ant sanglolea pormonnem, eka xikoupean Pauluchi dekh koxi gheunk zata?
10 Xikoupeamnim aplea videartheanchi bori kallji gheunk zai. Tor tumche videarthi fuddarachim bhav-bhoinnam mhunn chintat. (1 Tesalonikekarank 2:7, 8 vachat.) Sonvsarantlim ixttam soddun Jehovachi seva korunk ani aplea jivitant goroz te bodlav korunk tumchea videartheank sompem na. Tor sobhent khorim ixttam mellonk ami tankam modot korunk zai. Tumi tumchea videarthea sangata fokot Bible obheas ghetanach nhoi punn her vellar pasun vell sartat tednam tumi tanche ixtt zaunk xoktat. Hem korunk tumi tankam call korunk xoktat, message-i dhaddunk xoktat vo vochon bhett diunk xoktat. Hea toren tanchi tumkam kallji asa mhunn tumi dakhoitolim.
11. Amchea videartheank sobhent kitem mellʼllolem amkam zai, ani kiteak?
11 Ek mhunnʼnni asa: “Eka bhurgeak vaddounk akʼkhea ganvchi goroz asta.” Punn ami oxem mhunnonk xoktat: “Ek xis korunk akʼkhea sobhechi goroz asta.” Bore Bible xikoupi aplea videartheank sobhechea bhav-bhoinnanchi vollokh korun ditat tednam tim pasun tankam Jehovachea lagim soronk modot kortolim. Hea toren, videarthi Jehovachea lokam sangata ixttagot korunk pavtolim ani somosia ietat tednam bhav-bhoinnam tankam urba diunk pavtolim. Amcho dor ek videarthi sobhecho ani amchea sonvsarbhorchea familicho bhag zaun asa mhunn taka dislolem ani tanchea lagim soronk tachi itsa vaddloli amkam zai. Taka oxem dista tednam Jehovacho mog korunk taka urba dinant toslea ixttam sangata ixttagot pois korunk sompem zatolem. (Mho. 13:20) Tor tachim poilinchim ixttam taka pois kortat zalear pasun Jehovachea songottnnent khorim ixttam mellttolim mhunn taka khatri astoli.—Marku 10:29, 30; 1 Ped. 4:4.
SOMORPONN ANI BAUTIZMA VIXIM POROT-POROT ULOIAT
Ek videarthi eka-fattlean-ek pavl gheta tednam bautizm gheuncho dhei melloun gheunk xokta! (Peregraf 12-13 polloiat)
12. Somorponn ani bautizma vixim ami amchea videarthea lagim kiteak ulounk zai?
12 Eklean Jehovak aplem jivit somorponn korun bautizm ghevop kitlem gorjechem tem tumchea videartheank porot-porot sangat. Karonn ekleak Jehovachi seva korunk ani bautizm gheunk modot korop, hoch Bible obheas gheuncho amcho dhei zaun asa. To videarthi obheas korunk suru korun thoddeach mhoinea uprant vo chodd korun to mittingek ieunk suru kelea uprant, tannem ek Sakxi zaun Jehovachi seva korunk ami modot kortat mhunn taka kollonk zai.
13. Eka videarthean bautizm gheunk khoinchim pavlam gheunk zai?
13 Eka videarthean bautizm gheunk zai zalear tannem zaiteo vostu korunk zai. Poilim, tannem Jehovak zannam zaun tacho mog korun tacher bhavarth dovrunk zai. (Juanv 3:16; 17:3) Tednam to Jehovacho ani sobhentlea bhav-bhoinnancho ixtt zatolo. (Heb. 10:24, 25; Jak. 4:8) Uprant, apnnem adim kelolea vaitt kamank lagon to poschatap korta ani teo vostu korop bond korta. (Itihas 3:19) Magir, apunn patieta tea sotam vixim to dusreank sangta. (2 Kor. 4:13) Xevottak, to Jehovak somorponn korta ani bautizm gheta. (1 Ped. 3:21; 4:2) To bautizm gheta tea disa soglim kitlim khuxal zatat! Ho dhei melloun gheunk, to dor ek pavl gheta tednam taka xabaski diat ani fuddem soronk urba di-it ravat.
TUMCHO VIDEARTHI VADDAVOLL KORTA VO NA TEM VELLA-VELLAR TOPASAT
14. Eka xikoupean aplea videartheanchi vaddavoll koxi topasunk zata?
14 Eka videartheak somorponn korun bautizm gheunk ami modot kortat tednam amkam pasiensachi goroz asa. Punn Jehova Devachi seva korunk taka itsa asa vo na tem pasun ami zannam zaunchi goroz asa. Jezuchi adnea pallunk to proitn korta mhunn tachea korneamnim dison ieta kai vo taka fokot Bible-antle thodde vixoi zannam zaunchi itsa asa?
15. Bautizm gheunk ek videarthi toiar asa mhunn xikoupeak koxem kollttolem?
15 Tumcho videarthi vaddavoll korta vo na tem vella-vellar topasat. Udharonnak, to aplim bhavnam Jehovak magnneant sangta kai? (St. 116:1, 2) Taka Bible vachunk avoddtta kai? (St. 119:97) To chukonastana mittingek hajir zata kai? (St. 22:22) To xikta tem aplea jinnent apnnaita mhunn dison ieta kai? (St. 119:112) To xikta tem aplea familik ani ixttank sangta kai? (St. 9:1) Chodd mhotvachem mhunnttlear, to ek Jehovacho Sakxi zaunk sodhta kai? (St. 40:8) To hantuntlem khoinchench korina zalear, tachem karonn kitem tem zannam zauncho proitn korat ani tachea sangata hea vixim doiallaien, punn ukteponnim uloiat. e
16. Eklea lagim Bible obheas korop bond korunk zai mhunn tumkam koxem kollttolem?
16 Eklea videarthea sangata tunvem Bible obheas korit ravonk zai kai na mhunn vella-vellar tumkanch vicharat. Tumi tumkam he prosn vicharunk zatat: ‘To videarthi obheasak toiar korina kai? To mittingek ieunk itsa dakhoina kai? Tannem azun meren vaitt sonvoim-o soddun diunk na kai? To azun meren eka khottea dhormacho sodosio zaun asa kai?’ Hea prosnank, hoi mhunn zobab ieta zalear, olo zaunk sodhina toslea munxak pevpak xikoilʼlea sarkem zaunk xokta. Apunn jem xikta tacho mog korina ani aplea jivitant bodlav korunk sodhina toslea videarthea lagim obheas korit ravlear kitem faido?
17. 1 Timotak 4:16-ant sanglolea pormonnem, dor eka Bible xikoupean kitem korunk zai?
17 Xis korchem kam ekdom mhotvachem mhunn ami lekhtat. Ani ami amchea Bible videartheank bautizm gheunk modot korunk sodhtat. Taka lagon Bible uzar korun ami urben ani khatren xikoitolim. Sobhentlea bhav-bhoinnam sangata ixttagot korunk ami amchea videartheak urba ditolim. Toxench, somorponn ani bautizm gheunchea dhei-a vixim ami taka porot-porot sangot ravtolim. Tea bhair, to videarthi vaddavoll korta vo na mhunn ami vella-vellar topastolim. (“ Videartheank Bautizm Gheunk Modot Korunk Xikoupeamnim Kitem Korunk Zai”.) Lokancho jiv salvar korchea hea kamant bhag gheunk ami khuxal zatat. Tor ami amchea Bible videartheank bautizm gheunk modot korunk amchean zata tem soglem korum-ia.
GIT 79 Tankam Thir Ravonk Adar Di
a Jehovan amkam ek moladik dennem dilam. Tem mhunnttlear, amchea videartheank Jehova bhaxen chintunk ani vagunk modot korop. Amchi xikoupachi kola vaddounk ami anik kitem korunk zai tea vixim hea lekhant sanglam.
b Setembr 2016-antlo Life and Ministry Meeting Workbook hantunt aslolo “Avoid These Pitfalls When Conducting a Bible Study” ho lekh polloiat.
c ABOUT US > EXPERIENCES hantunt vochat.
d JW Library®, hacher MEDIA > OUR MEETINGS AND MINISTRY > TOOLS FOR THE MINISTRY hantunt vochat.
e Mars 2020, Pahrogopur hea masikent, “Jehova Pasot Mog ani Upkariponn Bautizm Gheunk Urba Dita” ani “Tum Bautizm Gheunk Toiar Asa?” he lekh polloiat.
f CHITRANCHI MAHITI: Bible obheas zalea uprant ek onnbhovi bhoinn, eka Bible xikoupeak tannem chodd uloinastana koso obheas gheunk zata tem somzaita.
g CHITRANCHI MAHITI: Ek videarthi aplea Bible obheasant apunn ek bori bail koxi zaunk xokta tea vixim xikta, ani uprant apunn xiklea tem ti aplea ghovak sangta.
h CHITRANCHI MAHITI: Ek videarthi ani ticho ghov Raj-ghorant mellʼllolea eka ixttachea ghorant vell sartat.
