Zaitea desant sorkaran somajik ontor dovorcho mhunn ani toxench ektthaim ieun zomati korcheo nhoi mhunn kaido ghatla. Jehovachim Sakxim sorkarachea kaideank pallo ditat ani tim surokxit ritin Jehovachi bhokti korunk mellon ietat. Oxem korunk, tim videoconferencing app, zoxem Zoom, uzar korun mittingeo kortat.

 Oslea mittingechi manddavoll surokxit uronk dan kelʼle poixe vaprun sobhe pasot Zoom account vikte gheunk, Sonchalon Monddollan porvangi dilea. Oxem kelʼlean thoddea sobhank khub faido zala, zanchea lagim ho videoconferencing account gheunk 1000 tem 1500 rupea farik korunk ghoddonaslem. Heo sobha chodd korun funkott aslolim app-am vaportaleo punn tatunt fokot thoddeach zannank conference mittingek connect zaunk mellttalem ani toxench him app-am surokxit bhi naslim. Jeo sobha atam amchea songottnnen dilʼle Zoom account vapurtat tankam khub faido zata. Tantunt aslolim security setting vaprunk khub sompim asat ani zaitea zannank atam mittingent connect zaunk melltta. Aiz meren 170 desant, 65,000 odik sobha osle account vapurtat.

 Indonesia-nt, North Sulawesi mhunnttat thoim Manado-nt asloli Kairagi Sobha funkott aslolem videoconferencing app soddun songottnnen dilʼlo zoom account vaprunk lagli. Hea vixim bhav Hadi Santoso sangta: “Jim bhav-bhoinnam electronic sadhonam vaprunk sarkim nokllot, tim pasun atam mittingecho purnn faido gheunk xoktat. Hachem ek vhoddlem karonn mhunnttlear, mitting chalu astana atam tankam porot-porot login korchem poddona.”

 Ecuador desant Guayaquil mhunnttat thoim Guayacanes Oeste sobhentlo vhoddil bhav Lester Jijón, Jr., oxem mhunntta: “Hanga zaitim bhav-bhoinnam gorib asat dekhun akʼkhe sobhentlea bhav-bhoinnamnim poixe ektthaim kelear pasun te poixe Zoom license viktem gheunk pavchenasle. Atam songottnnen dilʼle zoom account vaprun zaitim zannam mittingek connect zaunk xoktat. Atam dusreank amchea mittingek connect za mhunn sangtana ami fattim-fuddem zainant.”

 Zambia desant, Lusaka mhunnttat thoim Ngwerere North sobhentlo vhoddil Johnson Mwanza oxem boroita: “Zaitim bhav-bhoinnam khub pavtti oxem mhunnttat tem ami aikola, ‘Songottnnen dilʼlea Zoom account-ank lagon ami eka-mekachea laginch asat oxem amkam bhogta. Titlench nhoi, Jehova amcho mog ani samball korta mhunn amkam dison ieta.’”

 Odruxttachea vellar adar diunk kuxin kaddun dovorlole poixe vaprun songottnnen he account vikte ghetleat. Sonvsarbhor ap-khuxen dilʼlea denngeam udexim songottnnek ho adar melltta. Zaitim zannam donate.jw.org uzar korun denngi ditat. Tumi udar kallzan dilʼlea denngeam pasot ami khub upkari. Hea denngeam udexim odruxttank sampoddloleank her ritin-ui ami adar diunk xoktat.—2 Korintkarank 8:14.