Sobhentlea her mittinge bhaxen porgottnni mitting Jehovan kelʼli ek manddavoll zaun asa. Hea vorvim amkam eka-mekak urba diunk ani mog dakhounk ek sondhi melltta. (Heb. 10:24, 25) Porgottnni mitting choddan-chodd panch tem sat minttanchi asonk zai. (Hea mittinge poilim dusri mitting asli zalear hi anikui lhan asonk zai.) Porgottnnent konnem konnam sangata kam korchem ani khoinchea vattarant porgottnni korchi ti mahiti hea mittingent ditat. Toxench, hea mittinge vellar magnnem kortat. Porgottnni mitting ghetat tannim bori toiari korun, tea disa pasot porgottnnent faideak poddtta tosli mahiti diunk zai. Karonn choddxim bhav-bhoinnam ghoddie eka sumana poilim porgottnnent gelʼlim astolim. Tor tannim porgottnnent kitem ulounk zai tea vixim sanglear tankam adar zatolo. Porgottnni mitting ghetat tannim bhav-bhoinnank faido zatolo toslea anik khoinchea vixoi-ancher ulounk zata?

• Amchem Kristi Jivit ani Porgottnni—Mittingechi Pustika, hantunt ulounk modot koxem uzar korop tea vixim sangonk zata

• Halinch ghoddloli ek ghoddnni vo newspaper-acher ailoli ek khobor uzar korun aiknnarea lagim ulovop koxem suru korunk zata tem sangonk zata

• Vattarant aiknnare ulovop bond korunk sodhtat tednam tankam koso zobab diunk zata tea vixim sangonk zata

• Vattarant thodde lok, Dev asa mhunn patienant vo soglem apxinch ailam mhunn patietat. Toxench, thoddim dusri bhas uloitat vo amchea vattarant chodd korun mellonant toslea dhormachim astat. Tor osle lok mellttat tednam tanche lagim koxem ulounk zata tem sangonk zata

• jw.org website-icher vo JW Library^® app-acher vo Bible-acher aslolo ek khas vixoi koso uzar korop tem dakhounk zata

• Seve Pasot Mukhel Prokaxonantlem ek prokaxon koxem uzar korop tem sangonk zata

• Fon-a voilean, chitti boroun vo jahir zagear porgottnni koxi korop, porot bhetto ani Bible obheas koxe korop tem sangonk zata

• Porgottnni kortana porgottnnaramnim koxem surokxit ravop, aiknnareachea gorje pormonnem koxem ulovop, bore toren koxem vagop, vattarant lok aikonant zalear pasun borem chintop koxem dovrop vo oslea khoinchea eka vixoi-acher ulounk zata

• Vachunk ani Xikovnn Diunk Lokx Di hea pustikentlea eka obheasacher vo video-cher ulounk zata

• Sangata porgottnni korta tea porgottnnarak urba ani modot koxi diunchi tem sangonk zata

• Porgottnnek lagu zata toslea eka versa vixim vo porgottnnent mellʼllolo ek onnbhov sangonk zata