Judasachi Chitt 1:1-25
1 Hanv Judas, Jezu Kristacho sevok, ani Jakobacho bhav, apounnem mellʼllam tankam hi chitt boroitam. Tim Jezu Kristachea sangata ravchim mhunn Dev amcho Bap tancho mog korta ani samball korta.
2 Deva thaun tumkam anik chodd doia, xanti, ani mog mellom.
3 Mhojea mogacheamno, amkam sogleank faido zata tea taronna vixim tumkam borounk hanv proitn kortalom. Punn magir povitr lokank ekuch pavtti sasna pasot dilʼlea bhavarthachi rakhonn korunk tumi zata titlo proitn korcho mhunn tumkam urba divop gorjechem oxem hanvem chintlem.
4 Tumkam boroupachem karonn mhunnttlear, amchea modem osle thodde lok kollonastana bhitor sorleat, zankam Devachea Utrant khub poilinch xikxa tharailʼli asa. Te Devachi bhokti naslole oxe lok zaun asat, je amchea Devachea favo naslolea doiechem nimit diun loz naslolim patki kamam* kortat ani amcho ekloch Dhoni ani Somi, Jezu Kristacho visvasghat kortat.
5 Tumi hem bore bhaxen zannant, tori astana, hanv tumkam ugddas korun diunk sodhtam ki Jehovan,* aplea lokank Ejiptta thaun salvar kele, punn uprant zannim bhavarth dakhounk na tancho tannem nas kelo.
6 Ani jea devdutamnim nemun dilʼli seva ani ravonk dilʼlo zago soddun dilo, tankam Devan aplea vhodd disak zhoddtti korchea pasot sasnachea sanklleamnim bandun kallkhant dovorleat.
7 Teach bhaxen, Sodom ani Gomora ani tanchea bhonvtonnchea xarantlea lokamnim pasun vhodd promannan onoitik kuddicho sombond* dovorlo ani kaidea add asloleo kuddicheo itsa purnn korit ravle. Tankam khast dili ani ujeant tancho sasnak nas kelo, ani tanchea udexim amkam xittkaunni mellonk te lok amkam ek udharonn zaun asat.
8 Tori astana, he munis pasun sopnet ravtat, dusreanchi kudd mhelli kortat, odhikar asloleank valor naslolea bhaxen lekhtat, ani Devan zankam mhoima dilea tanchea add uloitat.
9 Punn Moizesachea kuddi vixim mukhel devdut Mikaelacho Soitana* koddem vad-vivad zalo tednam tannem Soitanak opmanachim utram uloun guneanvkari tharaun, apnnem tachi nit korop sarkem oxem chintunk na. Tachea bodlek, tannem oxem mhunnttlem: “Jehova* tuji nit korum.”
10 Punn he munis tankam somzona tea soglea vostum vixim opmanachim utram uloitat. Ani somjikai naslolea zonvaram bhaxen, aplea sobhava pormonnem apleak somzota tea soglea vostumnim apleakuch mhelle korit ravtat.
11 Hea munxanchem ekdom vaitt zatolem, karonn te Kainachea vatten cholonk lagleat ani inam mellonk lagon te Balamachea chukichea vatten dhanvot asat. Toxench Korah bhaxen, tancher odhikar asloleam add uloun tannim apnnacheruch nas voddun haddla!
12 Tumchea sangata jevnnak* ietat ani khata-pietat te munis udkant liplolea khoddpa sarke asat. Te apleach vixim chintʼtat tea* loz naslolea gonvlleam sarke, varean hevtten-tevtten voitat tea sukhea kupam sarke, foll diupachea vellar foll dinant, purnn toren sukhleant* ani mulla thaun umttoleant tea zhaddam sarke asat.
13 Te doriantlea bhirankull lharam sarke asat ani tanchi lojechi vagnnuk lharancher zata tea fesa sarki asa. Te vatt chuklolea noketram bhaxen kallea-kitt kallkhant asat ani te thoim sodankal urtole.
14 Adanva thaun satvea pillgentlo munis, Enokan pasun tanchea vixim oxi bhasaunni keli: “Polloiat! Jehova* aplea lakʼkhamnim povitr devdutam sangata aila.
15 Devachi bhokti korinant toslea lokamnim Devachea add vochon jim vaitt kamam keleant tea pasot tankam guneanvkari tharaunk, ani patkeamnim tachea add uloilʼlea toptat toslea utrank lagon tankam guneanvkari tharaunk to aila.”
16 Te munis gunngunnttat, aplea jivitant dhadoxi asonant, aplea itsam pormonnem vagtat, aplea tonddan vhoddleo-vhoddleo boddaio martat ani dusream koddem godd utram uloun aplo faido korun ghetat.
17 Punn mhojea mogacheamno, tumi amchea Somi Jezu Kristachea apostlamnim poilinch sangloleo teo vostu ugddas korat.
18 Te tumkam sangtale: “Xevottachea kallar, apleach patki itsam pormonnem vagtat tosle, fokannam korpi munis ietole.”
19 Hech te munis je futt ghaltat, ani tanchea bhitor Devachi povitr xokti na. Te fokot kuddichea vostum vixinch chintʼtat.*
20 Mhojea mogacheamno, tumi tumchea povitr bhavarthachea buniadicher tumkam ghott korat, ani povitr xoktechea margdorxona pormonnem magnnem korat.
21 Ani sasnachem jivit melloun gheunk amchea Somi Jezu Kristachi kakutichi vatt polloita astana, tumi tumkanch Devachea mogant ghott dovrat.
22 Toxench, jim dubhavtat tanchi kakut korit ravat,
23 ani nisonttonachea ujeantlim tankam voddun bhair kaddat ani salvar korat. Punn dusreanchi kakut kortana chotrai dhorat, ani tanchea vaitt kamacho dves korat, jea udexim tannim apnnacheruch dag lavun ghetla.*
24 Dev tumkam tumi addkhollon poddona zaunk rakhonk xokta, aplea mhoime mukhar guneanv nastana ubim korunk xokta, ani tumkam khub khuxalkai diunk xokta.
25 Tea ekleach Taronn diupi Devak, amcho Somi Jezu Krista udexim mhoima, vortemponn, xokti ani odhikar, poilim, atam ani hea fuddem-i sasnak mellot ravom. Amen.
Footnotes
^ Grik bhaxent Di·a′bo·los, zacho orth “fott marun nanv piddʼddear korpi.”
^ Utran utor, “mogachea jevnnak.”
^ Utran utor, “bhienastana aplinch pottam bhortat tea.”
^ Utran utor, “don pavtti meleant.”
^ Vo “te zonvaram sarke asat.”
^ Utran utor, “tanchea kopddeancho pasun dves korat, zacher tanchea kuddicho dag lagla.”
