Jonas 2:1-10
2 Uprant Jonasan nusteachea pottantlean, aplea Deva Jehova lagim magnnem kelem,
2 ani mhunnttlem:
“Mhojea sonkoxttachea vellar hanvem Jehova lagim magnnem kelem ani tannem mhaka zobab dilo.
Fonddachea* kholaie* thaun hanvem modoti pasot ulo marlo,
Ani tunvem mhozo avaz aikolo.
3 Tunvem mhaka khol udkant, uktea doriachea kholaiek uddoilo tednam,Udkachea lottan mhaka gherav ghatlo.
Tujim vhoddlim-vhoddlim lharam mhojea voilean marunk laglim.
4 Hanvem mhunnttlem, ‘Tunvem mhaka tuje nodre mukhavoilo pois dhanvddailo!
Atam hanv tujem povitr mondir porot koso pollounk xoktolom?’
5 Udkan mhaka gherav ghatlo, ani mhozo jiv dhokeant aslo,Hanv khol doriant buddot gelom.
Doriantlim jhilkhuttam mhoje toklek ghuspolim.
6 Hanv dongrachea mulla poriant pavlom.
Prithumeche darvontte mhojea pasot sasnak bond zale.
Punn Jehova mhojea Deva, tunvem mhaka tea fonddantlo jivo bhair kaddlo.
7 Mhozo jiv voitalo tednam hanvem Jehovacho ugddas kelo.
Tea vellar mhojem magnnem tuka tujea povitr mondirant pavlem.
8 Je upeog naslolea murteanchi bhokti kortat te tankam visvaxi mog dakhoita tea Devak* nakartat.*
9 Punn hanv tuje upkar attoitolom, ani tuka bolidan bhettoitolom.
Hanvem ji angvonn kelea ti hanv pallttolom.
Jehova Deva, taronn tujeach thaun melltta.”
10 Uprant, Jehovan nusteak hukum dilo ani tea nustean Jonasak suke zomnir vonklo.
Footnotes
^ Xobdhkox polloi.
^ Utran utor, “potta.”
^ Vo “te tanchea visvaxi mogachi zhor asloleak.”
^ Vo ghoddie, “te ovisvaxi zatat.”
