Dhormdutancho Itihas 2:1-47
2 Ponʼnasavea disachea porbechea vellar,* tim soglim ekach zagear ektthaim aslim.
2 Tednam okosmat mollbar thaun vareacho, zum-zum korun avaz ailo, ani tim boson aslim tem akʼkhem ghor tea avazan bhorlem.
3 Ani tankam ujeacheo jibo koxeo dixtti poddleo, ani teo ek-ek ieun dor ekleacher bosleo.
4 Tim soglim povitr xokten bhorlim ani povitr xokten tankam tank dilʼlea pormonnem tim veg-vegllea bhasamnim ulounk laglim.
5 Tednam sonvsarantlea dor eka raxttrant ravpi Dev-bhirantiche Judev lok Jeruzalemant asle.
6 To avaz aikonk ailo tednam soglo lok ektthaim zalo ani te sogle ojap zale. Ani dor ekleak, xis tanchea bhaxent uloita tem aikonk ietalem.
7 Soglo lok samko ojap zalo ani mhunnonk laglo: “He sogle uloitat te Galiliekar nhoi?
8 Tor amkam te amchea dor ekleachea mai-bhaxent uloitat tem koxem aikonk ieta?
9 Ami tor Parthi, Medi ani Elamitkar, toxench Mesopotamia, Judeia, Kapadosia, Pontus ani Asiantlea jilʼleant ravpi lok zaun asat.
10 Toxench, ami Frijia, Pamfilia, Ejipt, Sirena lagim aslolea Libia; ani Roma thaun ailʼle lok zaun asat. Ami sogle Judev ani Judev dhorm apnnailʼle lok.
11 Amchea modem Kretantle ani Arabi lok asat. Tori astana, te amchea bhasamnim Devachea vhodd kamam vixim uloitana ami aikotat.”
12 Sogle lok ojap zale ani chintunk poddle. Te eka-mekak mhunnonk lagle: “Hem soglem kitem cholʼlam?”
13 Punn, thodde lok xisanchim fokannam korunk lagle: “Te drakxancho novo* soro pieun ttaitt zaleat.”
14 Tednam Pedru tea Ikra apostlam sangata ubo ravlo ani thoim ektthaim zalʼlea lokank tannem mottʼttea avazan oxem mhunnttlem: “Judeiantlea ani Jeruzalemantlea soglea lokamno, hanv sangtam tem dhean diun aikat.
15 Tumi chintʼtat toxe he lok pieun ttaitt zaunk nant, karonn atam sokallchim fokot nnov voram* zaleant.
16 Tachea bodlek, Joel provadean jem sanglolem tench ghoddtta:
17 ‘Dev mhunntta: “Xevottachea disamnim hanv mhoji povitr xokti soglea torechea munxancher votoitolom ani tumche put ani tumcheo dhuvo bhasaunneo kortolim ani tumche tornnatte dorxonam polloitole, ani tumchea modle zanntte sopnam polloitole.
18 Tea disamnim, hanv mhojea chakrancher ani chakornincher pasun mhoji povitr xokti votoitolom ani tim bhasaunni kortolim.
19 Ani hanv voir mollbar ojapam, ani sokol prithumecher vizmitam korun dakhoitolom—rogot, uzo, ani dhunvrachim kupam, osleo vostu tumkam distoleo.
20 Jehovacho* vhodd ani mhoimen bhorlolo dis ieunchea poilim suriacher kallokh poddttolo ani chondrim rogta sarko tambddo zatolo.
21 Ani zo konn Jehovachem* nanv gheun ulo korta to salvar zatolo.”’
22 “Izraelitkaramno, mhojem aikat: Nazaretkar Jezu Devan dhaddlolo munis aslo. Devan tachea udexim vhoddlim-vhoddlim ani ojapanchim kamam ani vizmitam korun tumkam tacho puravo-i dilo mhunn tumkam khobor asa.
23 Hea munxak tumi noxtteanchea hatant dilo, ani khambear* khillaun jivexim marlo. Devan fuddar zannam zaunchi tank uzar korun ani aplea khuxe* pormonnem tachea sangata oxench ghoddom mhunn tharailem.
24 Punn Devan taka jivont korun mornnachea chopkeantlo* soddoilo, karonn taka mornnachea chopkeant bandun dovrunk koxench zainaslem.
25 Taka lagon, David tachea vixim mhunntta: ‘Hanv sodanch Jehovak* mhojea mukhar* dovortam. To mhojea uzvea vatten asta, oxe toren mhaka konnuch halounk xokona.
26 Taka lagon mhojem kalliz khuxalkaien bhorlem ani mhojea tonddantlean khuxechim utram bhair sorlim. Ani hanv* bhorvonso dovrun jietolom;
27 karonn tum mhaka Fonddant* sanddchona. Tum aplea visvaxi sevokachi kudd kusonk diunchona.
28 Tunvem mhaka jivitachi vatt dakhoilea. Tum tujea mukhar* mhaka khuxalkaien bhortolo.’
29 “Bhavamno, amcho purvoz Davida vixim, hanv ukteponnim tumkam hem sangonk xokta. To melo ani taka purlo ani tachi dhol* aiz poriant amchea modem asa.
30 To ek provadi aslo, ani tachea sonsti modlea ekleak xinvasonacher bosoitolo mhunn Devan soput diun taka utor dilʼlem mhunn to zannam aslo.
31 Dev, Kristak meloleantlo utthoitolo mhunn David zannam aslo, ani to Kristak Fonddant* sanddchona ani tachi kudd kusonk diunchona oxem Davidan sanglem.
32 Tea Jezuk, Devan jivont kela ani ami sogle tache sakxi.
33 Taka sorgar, Devan aplea uzveak bosoilo ani Bapan utor dilʼlea pormonnem ti povitr xokti taka mellʼlli. Ani ti povitr xokti tannem amcher votoili ani ti kam korta ti tumi polloitat ani aikotat.
34 David sorgar vochonk na, punn to svota oxem sangta, ‘Jehovan* mhojea Somiak mhunnttlem: “Tum mhojea uzveak tea meren bos,
35 jea meren hanv tujea dusmanank monnoi* koxi tujea paim-am ponda ghalina.”’
36 Taka lagon, Izraelachea akʼkhea ghorannean hem zannam zaunchem ki jea Jezuk tumi khambear khillaun jivexim marlo, taka Devan Somi ani Krist kela.”
37 Tannim Pedruchim utram aikolim tednam tanchea kallzak khub dukh bhoglem, ani tannim Pedruk ani dusrea apostlank mhunnttlem: “Bhavamno, atam ami kitem korum?”
38 Pedrun tankam mhunnttlem: “Poschatap* korat. Ani tumchea modlea dor eklean aplea patkanchem bhogsonnem mellchem mhunn Jezuchea nanvan bautizm gheuncho, tednam tumkam povitr xokti funkott dennem mhunn mellttoli.
39 Karonn hem utor tumchea pasot ani tumchea bhurgeam pasot asa, ani pois aslolea tea soglea lokam pasot asa zankam amcho Dev Jehova* aplea lagim apoitolo.”
40 Tannim tankam anik zaiteo vostu sangon bore bhaxen govai dili ani to tankam somzait ravlo: “Hea bigoddlole pillge thaun kuxin sorat ani salvar zaiat.”
41 Jea lokamnim khuxalkaien tachim utram manun ghetlim tannim bautizm ghetlo. Tea disa sumar 3,000 lok xis zale.
42 Te sogle lok apostlam koddlean xikot ravle. Te sangata ektthaim zatale, jevtale, ani magnnem kortale.
43 Apostlam udexim zaitim ojapanchim kamam ani vizmitam zaunk laglim. Hem polloun soglea lokanchea monant bhirant bosli.
44 Zannim bhavarth dovorlo te sogle sangata ektthaim zatale ani tanchea lagim jem kitem asa tem te eka-mekak vanttʼttale.
45 Te apleo vostu ani bhattam-bensam viktale ani tantuntlean melltta tem sogleank vanttʼttale. Te dor ekleak tanchea gorje pormonnem ditale.
46 Te eka udʼdhexan dor disa Devmondirant ietale ani eka-mekachea ghorant jevnnak voitale, ani promannikponnan ani khuxalkaien vanttun khatale.
47 Te Devak vakhannttale ani soglea lokank tem manvotalem. Dor disa Jehova* salvar kortalo te lok tanchea modem vaddot gele.
Footnotes
^ Grik bhaxent pen·te·ko·ste′ mhunnttlear ponʼnasavem. Hi porob Nisan 16 tarker thaun 50 dis mezun ponʼnasavea disa monoitale.
^ Vo “godd.”
^ Jezu Kristachea disamnim, hem tisrem vor aslem. Ho vell suria udeta tednam thaun meztale.
^ Vo “udʼdhexa.”
^ Vo ghoddie, “bandhpasantlo.”
^ Vo “mhojea dolleam mukhar.”
^ Vo “mhoji kudd.”
^ Vo “tujea tondda mukhar.”
^ Vo “somadhi.”
^ Mhunnche, Ihan bankin.
^ Hacho orth, eklean aplem chintop sarkem korop.
