Dhormdutancho Itihas 13:1-52
13 Atam Antiokachea sobhent provadi ani xikounn diupi asle. Te mhunnttlear, Barnabas, Simeanv zaka Kallo* mhunnttale, Sirenacho Lusius, Manaen zo jilʼleacho odhikari Heroda borabor xiklolo ani Saulu.
2 Te Jehovachi* seva ani upas kortale tednam povitr xokten tankam sanglem: “Hanvem jea kamank lagon Barnabasak ani Sauluk apoileat, taka lagon tankam kuxin kaddat.”
3 Magir upas ani magnnem kelea uprant, tannim tea dogaincherui hat dovorle ani tankam dhaddun dile.
4 Uprant, povitr xokten dhaddlole he munis Seleusiak gele, ani thoim thaun tarvar boson Siprusak vochonk bhair sorle.
5 Te Salamis xarant pavle tednam Judevanchea sobha-ghoramnim vochon Devachem utor porgottunk lagle. Tanchea borabor Juanv* pasun aslo, zo tanchi seva* kortalo.
6 Tea akʼkhea zunvear bhonvlea uprant te Pafos xarant pavle. Thoim tankam Bar-Jezu nanvacho ek Judev mellʼllo. To ek jadugar ani khotto provadi aslo.
7 To thoincho Razpal* Sergius Paulusa borabor ravtalo. Sergius Paulus ek huxar munis aslo. Tannem Barnabasak ani Sauluk aplea fuddeant apoile, karonn taka Devachem utor aikopachi khub itsa asli.
8 Punn Bar-Jezu zaka Elimas jadugar mhunnttat (Elimas nanvacho orth jadugar), to tancho virodh korunk laglo. Ani razpalan bhavarth dovorcho nhoi mhunn tannem bhorpur proitn kelo.
9 Tednam Saulu, zaka Paulu-i mhunnttale, to povitr xokten bhorlo ani tea jadugara koddem polloit ravlo,
10 ani mhunnttlem: “Are soglea torechea fottingponnan ani soglea torechea noxtteponnan bhorlolea Soitanachea* puta, soglea nitivontponnachea dusmana, Jehovachea* nitt vattencho virodh korop tum soddun diunchona kai?
11 Atam polloi! Jehovacho* hat tujea add asa. Tum kuddʼddo zatolo, ani thoddea vella pasot tum suriacho uzvadd pollounk xokchona.” Teach vellar, tachea dolleam mukhar datt dov koso ailo ani kallokh ailo, ani to hevtten-tevtten apleak konnui hatak dhorun vhorot kai mhunn sodhunk laglo.
12 Tednam jem ghoddlem tem polloun razpalan bhavarth dovorlo, karonn Jehova* vixim xikounn aikon to ekdom ojap zalʼlo.
13 Tea uprant, Paulu ani tache sangati Pafosantlean tarvar boson Pamfiliantlea Perga xarant aile. Thoim Juanv* tankam soddun Jeruzalemant porot gelo.
14 Punn, te Perga thaun fuddem gele ani Pisidia vattarantlea Antiok xarant aile. Thoim te Sabathachea disa sobha-ghorant vochon bosle.
15 Thoim sogleam mukhar Kaideachim ani Provadeanchim Pustokam* vachlim. Tea uprant sobha-ghorachea odhikareamnim Pauluk ani tachea sangateank oxem mhunnon apoile: “Bhavamno, lokancho dhir vaddounk tumkam kitem-i sangpachem asa zalear tankam sangat.”
16 Tednam Paulu ubo ravlo, ani tannem aplea hatamnim sogleank vogi ravonk khunna keli ani mhunnttlem:
“Izraelitkaramno ani Devachi bhirant manun choltolea lokamno, aikat.
17 Izraelitkaranchea Devan amchea purvozank vinchle ani te Ejiptt desant videxi mhunn ravtale tednam tannem tankam bollixtt raxttr kelem. Ani aplea xoktivont hatan thoim thaun bhair haddle.
18 Tannem sumar 40 vorsam meren oronnʼnneant* tanche koddem pasiens kaddlem.
19 Magir Kanan desantlea sat raxttrancho nas korun Devan to des Izraelitkarank daiz mhunn dilo.
20 Hem soglem sumar 450 vorsanchea kallar ghoddlem.
“Tea uprant tannem tancher fuddari nemle. Fuddareancho kall Samuel provadea meren aslo.
21 Magir Izraelitkaramnim ek raza maglo. Ani Devan Kishacho put Sauluk tancher raza nemlo. To Benjamin kullacho aslo. Tannem 40 vorsam meren tancher raj kelem.
22 Taka kaddlea uprant, Devan Davidak tancho raza nemlo, zachea vixim tannem govai dili ani mhunnttlem: ‘Mhaka Jesecho put David mellʼllo. To mhojea kallzak avoddtta toslo asa ani to mhoji khuxi purnn kortolo.’
23 Devan apnnem dilʼlea utra pormonnem, heach Davidachea sonstintlean* Izraelitkaram koddem ek salvar korpi dhaddlo, to mhunnttlear Jezu.
24 Jezu ieunchea poilim, Juanvan ukteponnim Izraelachea soglea lokank tannim poschatap kela ani tankam bhogsonnem zai mhunn dakhounk bautizm gheiat mhunn porgott kelem.
25 Punn aplea sevecho xevott lagim pavlo toso Juanv mhunnttalo: ‘Tumkam kitem dista, hanv konn? Hanv to nhoi. Punn polloiat! Mhojea fattlean zo ieta tachea paim-anchim zotim kaddunk pasun hanv purto na.’
26 “Bhavamno, Abrahamachea sonstintleamno, ani Devachi bhirant manun choltolea lokamno, aikat. Devan amkam salvar korchea vixim ek sondex dhaddla.
27 Jeruzalemant ravtoleamnim ani tanchea odhikareamnim tea tarokak vollkhonk na. Punn tachi zhoddtti kortana tannim Provadeanchea Pustokant* sangloleo sogleo vostu purnn keleo, jeo dor sabathachea disa vachtat.
28 Khorem mhunnttlear, taka marun uddounk tanche koddem kainch karonn naslem. Tori astana, tacher mornnachem formonn marchem mhunn tannim Pilata koddem maglem.
29 Magir, tache vixim boroilʼleo sogleo vostu tannim purnn kelea uprant taka khambea voilo* sokol denvoilo ani eka dholint* dovorlo.
30 Punn Devan taka melʼleantlo jivont kelo.
31 Ani je tachea borabor Galilientlean Jeruzalemant gelʼle, tankam to zaite dis meren dislo. Ani atam tech tachea vixim lokank govai ditat.
32 “Taka lagon, ami tumkam amchea purvozank dilʼlea bhasaunne vixim bori khobor porgott kortat.
33 Jezuk melʼleantlo jivont korun Devan tanchea bhurgeam pasot, mhunnche amchea pasot kelʼli bhasaunni soglea toren purnn keli. Tea vixim dusrea Stotrant oxem boroilam: ‘Tum mhozo put, ani aiz hanv tuzo bapui zalam.’
34 Devan taka melʼleantlo jivont kelo ani to porot kednanch moron kusta toslo munis zaunchona. Devan hi bhasaunni khori korunk oxem mhunnttlem: ‘Davidak dilʼlea bhasaunne pormonnem hanv tumkam visvaxi mog dakhoitolom. Hi bhasaunni visvas dovorpa sarki asa.’
35 Taka lagon, anik eka Stotrant oxem mhunnttlam: ‘Tum tujea visvaxi sevokachi kudd kusonk diunchona.’
36 Davida vixim ami polloilem zalear, tannem jivitbhor Devachi seva keli* ani uprant to melo.* Ani taka tachea purvozam borabor purlo, ani tachi kudd kusli.
37 Punn zaka Devan melʼleantlo jivont kelo tachi kudd kusonk na.
38 “Tor bhavamno, tacheach udexim tumkam patkanchem bhogsonnem mellonk xokta mhunn zannam zaiat. Ani hich khobor ami tumkam porgottʼttat.
39 Jea vostumnim Moizesan dilʼlea Kaidea udexim tumi niropradi zaunk xokonant, teach vostumnim ek munis visvas dovorta zalear Jezu udexim niropradi zaunk xokta.
40 Taka lagon, Provadeanchea Pustokant boroilam tem tumchea thaim ghoddona zaunk zagrut ravat:
41 ‘Beporva korpeamno, polloiat, ani ojap zaiat, ani nas zaiat, karonn hanv tumchea disamnim ek oxem kam kortolom, jea vixim tumkam konnem-i bariksannen sanglem zalear pasun tumi kednanch tacher visvas dovorchenant.’”
42 Hem sanglea uprant te bhair sortale tednam hea vixim tannim fuddlea Sabatha disa pasun ieun ulounchem mhunn lokamnim tanchea lagim vinoti keli.
43 Sobha somplea uprant, zaite Judev ani Judev dhorm apnnailʼle lok je Devachi bhokti kortale, te Paulu ani Barnabasa borabor gele. Tednam tannim dogaimnim tanchea lagim uloun, tankam Devachea favo naslolea doient ravonk urba dili.
44 Fuddlea Sabathachea disa sumar akʼkhem xar Jehovachem* utor aikonk ektthaim zalem.
45 Punn Judev, lokancho zomo polloun tancher samke zollonk lagle ani Paulu xikoitalo teo vostu khotteo mhunn dakhoun diunk vad-vivad korunk lagle ani to sangtalo tea vostunchea add ulounk lagle.
46 Tednam Paulun ani Barnabasan bhienastana tankam oxem mhunnttlem: “Devachem utor poilem tumkam Judevank sangop gorjechem aslem. Punn tumi tem nakartat ani tumi sasnachea jivitak purte nant mhunn dakhoun ditat dekhun, polloiat! ami dusrea raxttram lagim voitat.
47 Jehovan* amkam hi adnea dilea: ‘Prithumechea konnxea meren taronna vixim sondex porgott korchea khatir hanvem tumkam raxttram pasot ek uzvadd koso nemla.’”
48 Judev nhoi tea lokamnim hem aikolem tednam te khub khuxal zale ani Jehovachea* utrachi vakhannʼnni korunk lagle, ani sasnachem jivit favo aslolea sogleamnim bhavarth dovorlo.
49 Titlench nhoi, Jehovachem* utor bhonvtonnchea soglea vattarant ximpddot gelem.
50 Punn Judevamnim, xarantlea Dev-bhirantichea famad bailank ani mukhel dadleank uksaile. Tannim tankam Pauluk ani Barnabasak dhumallo diunk lailo ani tankam xarantlean bhair dhanvddaile.
51 Tea pasot, xarantlea lokank sakx mellchi mhunn tannim aplea paim-anchi dhulʼl fafddun uddoili ani te Ikoniumak gele.
52 Ani xis khuxalkaien ani povitr xokten bhorot gele.
Footnotes
^ Utran utor, “nigro.”
^ Mhunnche, Juanv Marku.
^ Vo “modot.”
^ Grik bhaxent Di·a′bo·los, zacho orth “fott marun nanv piddʼddear korpi.”
^ Mhunnche, Juanv Marku.
^ Kaide ani Provadeanchim Pustokam mhunnttlear Hebrev bhaxen boroilʼlim Bible-achim soglim pustokam.
^ Hem utor choddxe pavtt eka oslea zageak uzar kelam zoim chodd lok ravonant, kainch roinant ani thoim chodd zhaddam ani udokui asona.
^ Utran utor, “bientlean.”
^ Vo “rukha voilo.”
^ Vo “somadhint.”
^ Vo “Devachi khuxi keli.”
^ Utran utor, “to mornnachea nhident nhidlo.”
