Dhormdutancho Itihas 1:1-26
1 Mogall Theofilas, Jezun seva suru keli tednam thaun, tannem jim kamam kelim ani jem xikoilem tem soglem hanvem poilea pustokant boroilam.
2 Tantunt Jezun aplea vinchun kaddlolea apostlank povitr xokte udexim suchounneo dileo, ani tea uprant Jezuk sorgar vhelo tea meren ghoddloleo ghoddnneo asat.
3 Moro poriant dukh soslea uprant, to zaite pavtti aplea xisank dixtti poddlo ani apleak jivont kela mhunn tannem tankam zaite khatreche purave dile. To 40 dis poriant, tankam dislo ani Devachea Rajea vixim tankam sangot ravlo.
4 To xisank mellʼllo tednam, tannem tankam oxi adnea dili: “Jeruzalem soddun vochonakat. Punn Bapan jea vixim utor dilam ani jea vixim tumi mhojea koddlean aikolam tem purnn zai meren thoinch ravat.
5 Karonn Juanvan udkant bautizm dilo, punn atam thaun thoddea disam uprant tumkam povitr xokten bautizm mellttolo.”
6 Xis ektthaim zale tednam, tannim taka vicharlem: “Somia, tum heach vellar Izraelak tanchem raj porot ditolo?”
7 Tannem tankam mhunnttlem: “Vell vo kall* zannam zauncho odhikar tumkam na. To tharauncho odhikar Bapan aplea lagim dovorla.
8 Punn tumcher povitr xokti ietoli tednam tumkam boll mellttolem ani Jeruzalemant, ani akʼkhea Judeiant ani Samarient, toxench prithumechea sogleant poisulʼlea vattarant pasun tumi mhojea vixim govai ditole.”
9 Hem sanglea uprant, te polloita astanach, taka voir uklun vhelo ani tanchea dolleam mukhar taka eka kupan lipoilo.
10 To voitalo tednam te mollbar polloitale. Itlean okosmat dhove kopdde ghatlole don munis tanchea kuxik ieun ube ravle
11 ani tannim mhunnttlem: “Galiliekaramno, tumi hanga ube ravon mollbak kiteak polloitat? Ho Jezu zaka tumchea modlean mollbar ubarun vhelo, taka jea toren tumi mollbar voitana polloila teach toren to porot ietolo.”
12 Uprant te Zoitunanchea Dongrar thaun, Jeruzalemant porot aile. Ho dongor Jeruzalema thaun sumar ek kilometr* pois aslo.
13 Jeruzalemant pavlea uprant, te xis te ravtale tea unchlea rumant gele. Thoim Pedru, Juanv ani Jakob, Andre, Filip ani Thomas, Bartholomev ani Matev, Alfevacho put Jakob, urbevont Simanv ani Jakobacho put Judas aslo.
14 Te sogle ekach udʼdhexan magnnem korit ravle ani tanchea borabor thoddeo bailo, Jezuche bhav ani tachi avoi Marie pasun asli.
15 Tea disamnim bhav* ektthaim zalʼle astana (te sogle mellon sumar 120 lok asle) Pedrun tanchea modem ubo ravon oxem mhunnttlem:
16 “Bhavamno, povitr xokte udexim Devachea Utrant Davidan jem Judasa vixim sanglolem tem purnn zaunk zai aslem. Judas, Jezuk dhorunk sodhtolea lokank Jezu koddem gheun ailo.
17 Ho Judas amchea modlo eklo aslo ani tannem amchea bhaxen seventui vantto ghetlo.
18 (Heach munxan, aplea fottingponnachea poixeamnim ek xet viktem ghetlem. To toklen poddlo, tachem pott futtlem ani tacheo sogleo antkoddio bhair sorleo.
19 Jeruzalemant ravtolea soglea lokank hi khobor kollon aili. Taka lagon tanchea bhaxent tea xetak Hakeldama, mhunnche, “Rogtachem Xet” oxem nanv poddlem.)
20 Karonn Stotranchea pustokant oxem boroilam, ‘Tachem ghor padd zaum, ani tantunt konn ravona zaum’ ani, ‘To samballttalo ti zobabdari dusreak mellom.’
21 Dekhun Somia Jezun amchea borabor kelʼlim soglim kamam jea munxamnim akʼkho vell amchea borabor ravon polloileant,
22 tanchea modlea eklean amchea borabor Jezu jivont zalo mhunn govai asop gorjechem asa. Oxe toren, Juanvan Jezuk bautizm dila tea disa thaun taka amchea modlo voir uklun vhela tea disa meren, zannem him soglim kamam polloileant tanchea modlo to eklo asonk zai.”
23 Tor tannim dog zannanchim nanvam sanglim, eklo Juze zaka Barsabas ani Justus pasun mhunnttale, ani dusro Mathias.
24 Uprant xisamnim magnnem kelem: “Jehova* Deva, tum sogleanchim kallzam vollkhota. Hea don munxam modlo tunvem konnank vinchla tem amkam sang,
25 jea vorvim Judasan ji seva ani apostlanchi zobabdari soddun dili ani aple vatten gelo, ti zobabdari taka mellchi.”
26 Tednam tannim tanchea nanvan sorti ghatleo, ani sort Mathiasachea nanvan poddli, ani taka 11 apostlam sangata anik ek apostl mhunn manun ghetlo.*
Footnotes
^ Mhunnche, tharailʼle dis.
^ Utran utor, “ek sabath disachea vatte itlo.” Ek Judev sabathachea disa itlich vatt cholonk xoktalo.
^ Thodde pavtti Bible-ant ʼbhavʼ hem utor dadleank toxench bailank pasun lagu zata tea toren uzar kelam.
^ Mhunnche, taka urlolea 11 apostlam sarko lekhlo.
