Jehovachea Sakxeank Bible-achi kholaiechi xikounn diunk New York-achea Patterson xarant ek mukhel zago asa. Thoim Gilead nanvacho panch mhoineancho kors zata. He pautt hea korsak 48 zannam aslim. Tanchea Graduation kariavollik tankam sangat diunk tanchim ghorchim, ixtt ani borem magpi ailole. Hea kariavollik sogle mellon 9,694 lok asle.

1943 thaun hea korsa udexim, onnbhov aslolea sumar 8000 porgottnnarank mixinori seva korunk xikounn mell’llea. Hanga xikoita tem soglem Bible-acher adarit aslolean xikpeancho bhavarth ghott zata. Dusrea desant porgott’ttana addkolleank fuddo korunk boreak poddtta tosle gunn apnnaunk ho kors modot korta.

“Bore Ani Man Favo Aslole Gunn Bariksannin Monant Gholloiat.” Jehovachea Sakxeanchea Sonchalon Monddollantlo Bhav Anthony Morris kariavollicho chermen aslo. Tannem, Filipkarank 4:8 hem vers uzar korun hea kariavollichi survat keli. Thoim sangta, ‘Bore ani man favo aslole gunn . . . tumchea monant gholloiat.’

Amchea monant bore gunn gholloit ravlim zalear, hea mog naslolea sonvsarant pasun ami mogan vavrunk zata mhunn Bhav Morrisan sanglem. Tannem fuddem mhunnttlem, “Borea gunnancher niall korat ani mogall zaiat.”

Dev fokot amcheo chuki polloina mhunn dakhoun Bhav Morrisan amchea sorginchea Bapachem borem udharonn amchea mukhar dovorlem. (Stotr 130:3) Tannem xevottak mhunnttlem, “tumchea bhavam-bhoinnincheo fokot chuki polloum nakat” punn mogan ravat.

“Zannvai Ghe, Punn Chodd Xannom Zaum Naka.” United States-antlea xakha monddollicho Bhav, Harold Corkern hannem, aplem bhaxonn Upodexok 7:16-acher adarlem. To mhunntta, “ami amchem ginean sarkea ritin uzar kelolem Devak zai punn ami gorvixtt zalolim taka naka.”

Dusreank sol’le dita tednam vo dusreank chuk sudarunk modot korta tednam ami mogan korunk zai mhunn Bhav Corkernan ugddas korun dilo. Amchea lagim ghoddona tem Dev amchea thaun magona, toxench ami-i dusream koddlean chodd axa dovrunk zaina. “Tumchi zannvai, somzonni ani ginean bore bhaxen uzar korat ani tumche bhav tumcho sangat zoddunk khuxal zatole” oxem Bhav Corkernan sanglem.

“Devan Kelam Tem Kodinch Visornaka.” (Stotr 78:7) Sonchalon Monddollintlo Bhav Guy Pierce hannem bhurgeanchea vagnnuke vixim uloun aplem bhaxonn suru kelem. Bhurgeanchea borea vo vaitt vagnnukecho porinnam tanchea avoi-bapaichea nanvacher poddtta. (Mhonn’nneo 20:11) Toxench amchea borea vo vaitt vagnnukecho porinnam, amchea sorginchea Bapachea nanvacher zata mhunn tannem sanglem. “Devachim bhurgim ani devcharachim bhurgim hacheruch vollkhum-ietat: jim konn Devache khuxe pormannem jienant vo aplea bhavam-bhoinnincho mog korinant, tim Devachim nhoi.”—1 Juanv 3:10

Hea Sakxeank khaltikai ani her bore gunn asat dekhun tankam Gilead korsak apoile mhunn Bhav Pierce-an tankam ugddas korun dilo. Uprant bhavan, tankam oxich khaltikai dakhoit ravonk sanglem. Ho kors kela mhunn tankam heram poros vhodd podvi mell’lli oxem nhoi. Punn atam tim anink borea ritin sonvsarbhor aslolea bhavam-bhoinnik modot korun, ekvott sambhallunk pavtolim. Toxench dusream thaim khaltikaien vagon ek borem udharonn dovrunk xoktolim. (Stotr 133:1) “Bible-antlean ghetlea ti somzonni uzar korun tumi Jehova vixim tumchem ginean vaddounk zata. Ani oxem korit ravlim zalear Jehova thaim asloli tumchi ixttagot ghott zait voitoli,” mhunn Bhav Pierce-an tankam sanglem.

“Amcho Kaido Aslo Toch Ami Pall’lla.” Korsachea khateachi dekh-rekh korpi Bhav William Samuelson, hannem aplea bhaxonnachi survat ek prosn vincharun keli. Tannem vincharlem, “Amkam zai tem kam mellonastana dusrench kam korunk poddlem zalear ami kitem korchem?” Lukas 17:7-10-ant sanglam tem amchean ugddasak haddunk zata. Thoim mhunnttlam, “Toxench, tumkam sanglolem titlem-i kelea uprant, tumi-i mhonnatt: Chaltim-bexttim chakram ami; amcho kaido aslo toch ami pall’lla.” Jehova lagim amchi sor keli zalear ami chaltim-bexttim chakram.

Sakxeanim Bible-acho obheas korunk khub vell sarlo. Ani oxem korop thoddeank kotthin zalem karonn tankam itlem xikpachi sonvoi nasli. Fuddem bhavan mhunnttlem ki, “Tumi korunk zai aslem tench kelam, ani taka lagon atam tumi tumcho bhavarth koso ghott zala tem pollounk zata. Ek visvaxi chakra sarkem ak’khea sonvsarachea rochnnarachi seva korit ravonk ek vhodd man mhunn kednanch visor nakat,” oxem mhunnon Bhav Samuelson-an aplem bhaxonn sompoilem.

“Tras Ieta Tednam Jehova Tuka Sanddcho Na Mhunn Ugddas Dovor.” Korsachea khateachi dekh-rekh kortoleank modot korpi Bhav, Sam Robersonan, xikpeank thodde pautt niraxiponn sosunk poddttolem mhunn xittkailole. Magir tannem tankam Devacher bhavarth ghott korta toslea udharonnacher niall korunk sanglem. Zoxem, Joshuachem udharonn. Moizesan Joshuak mhunnttlolem, ‘Jehova tuka soddcho na ani sanddcho-i na.’ (Dusri Somurt 31:8) Ani taka lagon aplea zanntte piraier Joshua mhunnonk xoklo, “hanv mornnank lagim pavlam; sogllea tumchea kallzan ani otmean Sorvespora tumchea Devan kel’leo soglleo bhasavnneo pallon aileat mhonn zanno zaiat; tantli ek porian pallon ienastana urli na.”—Joshua 23:14.

“Hanv tuka kednanch soddcho na ani sanddcho-i na” oxem Jehova Dev aplea soglea sevokank sangta. (Hebrevank 13:5) To aplea nanvachea ortha pormonnem goroz poddtta thoim zai tem zatolo. Ani aplea sevokanchi kallji gheunk to kitem goroz tem kortolo mhunn, amkam to khatri dita. “Kednanch niraxi zaum nakat. Kednach fatti soro nakat. Jehova tumkam kednanch, kednanch, kednanch sanddcho na.” Hi utram sangon Bhav Robersonan aplem bhaxonn sompoilem.

“Sonvsarachea Ximam Porian Tancho Sondex Pavlo.” (Romkarank 10:18) Korsacho xikoupi Mark Noumair hachea bhagant thoddea Sakxeanim porgottnneche onnbhov sangle ani te dekhave korunui dakhoile. Udharonnak, South Africa desantlea eka zoddpeak aplea desantlea tin bailam lagim ulounk mell’llem. Tim tanchea lagim Zulu ani Xhosa bhaxen uloun khub khuxal zalim. Toxench Sri Lanka desantlem ek zoddpem Bharot desantlea eka munxak mell’llem. Tachi bail ani dhuv Sri Lanka-nt ravtat. Tea munxan Bible kednanch pollounk naslo dekhun tea zoddpean taka aplo Bible dilo.

“Borea Kamak Purto Zaunk Pavta.” Borovop korta tea somitik modot korpi, Bhav Gene Smalley hannem, don zoddpeank tanche onnbhov sangonk laile. Tim donui zoddpim Sierra Leone hea desantlim aslim. Ghorant udok na dekhun dor ek disa udok kaddun ghora vhoronk tankam kitle tras poddttale tem tannim sanglem. Punn itle tras kaddunui tim khuxal aslim, karonn 50 lokank tim Bible-a vixim xikoitalim. Ani hi khuxalkai tea trasam mukhar kainch nhoi oxem tankam distalem.

Hea korsa udexim fuddem porgottnnechem kam korunk mell’llolea modoti pasot tea charui zannamnim upkar attoile.—2 Timotak 3:16, 17.

“Xevottak Porian Ani Tachea Uprantui Thir Ravat.” Sonchalon monddollicho Bhav, Gerrit Lösch, hannem aplem bhaxonn eka dhanvpea vixim sangon suru kelem. Ek pois dhanvpak vochpi munis aplem dhanvop sompoitolo zalear tannem poilinch apunn koso dhanvtolo hem tharavop gorjechem. Sonvsarant dhanvpacheo sporda zatat tantunt ekloch jikhta. Punn kristanv dhanvtat tea spordent jim konn xevottak porian thir ravon dhanvtat, tim jikhtolim.

Thir ravop mhunnttlear koslea-i poristhitint Devachi seva korit ravop. Dusream koddlean virodh ailear vo tras ani niraxiponn sosunk poddlear pasun ami amcho bhorvonso ghott dovorchi goroz asa. Jezun mhunnttlem, “Xevottak porian thir ravtit tankam Dev taronn ditolo.” (Matev 24:13) Itlea trasant pasun ami thir ravtat tem polloun Jehova Dev ani Jezu Krist khub khuxal zatat. Thir ravonk ami kitem korunk zai tem Bhav Lösch-an fuddem sanglem.

• Deva lagim magnnem korat karonn Dev ‘sosnnikai dita’ ani ‘amcho bhar apunn ubharta’.—Romkarank 15:5; Stotr 68:19.

• Kitle-i tras ailear pasun ghott ravat karonn “tumchean sosunk zata tea-von khor tallnni tumcher ieunk To kednanch nirmicho na; punn kosli-i tallnni aili zalear, ti sosunk To tumkam boll ditolo ani oxem tantlim bhair sorunk To tumkam vatt dakhoitolo.”—1 Korintkarank 10:13.

• Kristacher aslolo tumcho bhorvonso unno zaunk dium nakat karonn, ‘apnnak sukh mellchem aslem tache svater, loz mhonn pollenastana, Tannem moronn soslem.’—Hebrevank 12:2.

Atam samko unno vell urla ani ho vell fatti sorpacho nhoi mhunn Bhav Löschan sanglem. Taka lagon, “urlea te vattechea xevottak porian thiraien dhanvot ravum-ia.”—Hebrevank 12:1.

Kariavollichea xevottak eka bhavan chitt vachli. Tea chitint korsant aslolea sogleanim apleak mell’llolea borea xikounnek lagon upkar attoilole. Bible-acho bariksannin obheas kelolean tankam Devachea ud’dhexa vixim bori somzonni mell’lli ani tancho bhavarth anink ghott zalo. “Ami xikleant teo boreo vostu ami amchea jivitant lagu kortolinch” oxem tannim tantunt boroilolem.