1. Que lle axudou a Xob a coñecer mellor a Xehová?

 DE TÓDALAS conversacións que tivo Xob na súa vida, a máis especial foi a que tivo con Xehová. Deus díxolle que se fixase nalgunhas cousas incribles que creara. Iso axudaríalle a confiar máis na sabedoría de Deus e a non dubidar de que pode coidar dos seus servos. Por exemplo, recordoulle que el coida dos animais, e así deixoulle claro que tamén podía coidar del (Xob 38:39-41; 39:1, 5, 13-16). Ó reflexionar en varios exemplos da creación, Xob aprendeu moito das calidades de Deus.

 2. Por que pode ser difícil pararnos a analizar as cousas que creou Xehová?

² Nós tamén podemos aprender máis de Deus se nos paramos a analizar as cousas que creou, aínda que non sempre sexa fácil facelo. Por exemplo, se vivimos nunha cidade, quizais vexamos poucos detalles da creación de Xehová no noso día a día. E incluso se vivimos cerca da natureza, pode que teñamos pouco tempo para fixarnos na creación. Neste artigo veremos por que é bo que dediquemos tempo e esforzo a observar a creación. Tamén analizaremos como usaron Xehová e Xesús a creación para ensinarlles a outros, e que podemos facer para aprender máis leccións da natureza.

 3. Que demostra que Xehová quería que Adam desfrutase da creación?

³ Xehová quería que o primeiro ser humano desfrutase da Súa creación. Cando creou a Adam, deulle un paraíso moi bonito para que vivise alí e descubrise moitas cousas.  Ademais, pediulle que o cultivase e que o estendese por toda a Terra (Xén. 2:8, 9, 15). Imaxina o emocionado que se tivo que sentir Adam ó ver que as sementes xerminaban e que as flores florecían. Que privilexio coidar do xardín de Edén! Xehová tamén lle dixo que lles puxese nome ós animais (Xén. 2:19, 20). Deus puido escoller eses nomes, pero encargoulle esta tarefa a Adam. Seguro que el dedicou tempo a estudar cada animal con moito coidado, a observar as súas características e a analizar o seu comportamento para decidir como lles ía chamar. Canto tivo que desfrutar! Isto deulle a oportunidade de valorar aínda máis a sabedoría, a habilidade e a creatividade do seu Pai.

 4. a) Por que deberiamos pararnos a observar a creación? b) Que cousas das que Xehová creou che gustan máis?

⁴ Unha razón pola que deberiamos pararnos a observar a creación é porque Xehová quere que o fagamos. De feito, dinos: “Levantade os vosos ollos ó alto, ollade”. E despois pregunta: “¿Quen fixo esas cousas?”. A resposta é evidente (Is. 40:26). Xehová encheu os ceos, a terra e o mar de moitísimas cousas marabillosas que nos ensinan detalles acerca del (Sal. 104:24, 25). Por exemplo, pensa en como nos creou a nós. Fíxonos coa capacidade de valorar a beleza que hai na natureza. Ademais, deunos os cinco sentidos —a vista, o oído, o tacto, o gusto e o olfacto— para que poidamos desfrutar de tódalas cousas que el fixo.

 5. Segundo Romanos 1:20 (TNM), como nos beneficia fixarnos na creación de Xehová?

⁵ A Biblia dinos que deberiamos fixarnos na creación por outra importante razón: porque nos ensina sobre as calidades de Xehová (le Romanos 1:20, TNM). Por exemplo, pensa no ben deseñadas que están as cousas que fixo. A que podemos ver a súa sabedoría? Ou pensa na variedade de comidas das que desfrutamos. Isto é unha proba evidente de canto nos quere Xehová a tódolos seres humanos. Cando vemos as súas calidades nas cousas que creou, chegamos a coñecelo mellor e iso fai que queiramos acercarnos máis a el. Agora, vexamos algúns exemplos de como usou a creación para ensinarlles leccións importantes ós humanos.

 6. Que podemos aprender ó observar as aves migratorias?

⁶ Xehová ten un tempo fixado. Cada ano, entre finais de febreiro e mediados de  maio, os israelitas podían ver como voaban as cegoñas que migraban cara ó norte. Deus díxolles: “As cigoñas do ceo coñecen todas o tempo da súa volta” (Xer. 8:7). Igual que Xehová ten un tempo fixado para que estas aves migren, tamén ten un tempo fixado para levar a cabo os seus xuízos. Na actualidade, as aves migratorias recórdannos que podemos confiar en que Xehová ten un “tempo fixado” para poñerlle fin a este mundo malvado (Hab. 2:3, TNM).

 7. Que podemos aprender ó ver como voan as aves? (Isaías 40:31).

⁷ Xehová fortalece os seus servos. A través de Isaías, Xehová prometeu que fortalecería os seus servos para que remontasen o voo coma se tivesen “ás de aguia” cando se sentisen débiles ou desanimados (le Isaías 40:31). Para os israelitas era algo habitual ver aguias remontando o voo. Podían ver como o facían case sen esforzarse grazas ás correntes de aire. Que bonita comparación! Se Xehová lles daba a estas aves as forzas que necesitaban, seguro que tamén podía fortalecer os seus servos. Cando vexas como unha ave remonta o voo cara ó ceo sen apenas mover as alas, recorda que Xehová tamén pode darche a ti as forzas que necesitas para superar os problemas.

 8. Que aprendeu Xob ó pararse a pensar na creación de Deus, e que podemos aprender nós?

⁸ Xehová merece que confiemos nel. Xehová axudoulle a Xob a confiar máis nel (Xob 32:2; 40:6-8). Cando falou con el, mencionou moitas cousas que creara, incluídas as estrelas, as nubes e os raios. Tamén falou dos animais, como o touro salvaxe e o cabalo (Xob 38:32-35; 39:9, 19, 20). Todas estas cousas non son só unha proba do seu impresionante poder, senón tamén do seu amor e da súa gran sabedoría. Grazas a esta conversación, Xob chegou a confiar en Xehová máis ca nunca (Xob 42:1-6). De maneira parecida, pararnos a pensar na creación recórdanos que Xehová é moitísimo máis sabio e poderoso ca nós. Ademais, confírmanos que pode poñer fin a tódalas nosas probas e dános a seguridade de que o fará. Isto axúdanos a confiar máis nel.

9, 10. Que nos ensinan de Xehová o sol e a chuvia?

⁹ Xesús coñecía moi ben a natureza. Como foi “un mestre de obras”, tivo o privilexio de colaborar co seu Pai na creación de todo o Universo (Pr. 8:30). Máis tarde, cando estivo na Terra, usou a creación para ensinarlles ós seus discípulos acerca do seu Pai. Vexamos algunhas leccións que lles ensinou.

¹⁰ Xehová demóstralles o seu amor a tódalas persoas. No Sermón do Monte, Xesús fixo que os seus discípulos se fixasen en dúas cousas da creación que moita xente dá por sentado: o sol e a chuvia. Ambas cousas son imprescindibles para que haxa vida. Xehová puido negarse a darlles estas cousas ós humanos que non o serven. Pero demostra o seu amor facendo “saí-lo seu sol sobre malos e bos, e chover sobre xustos e inxustos” (Mt. 5:43-45). Xesús usou esta idea para ensinarlles ós seus discípulos que Xehová quere que amemos a tódalas persoas. Cando desfrutemos dun impresionante amencer ou cando vexamos como a chuvia refresca a terra, reflexionemos en como isto é unha proba de que Xehová nos demostra o seu amor  a todos. O seu exemplo pode motivarnos a mostrar esa mesma clase de amor predicándolles a tódalas persoas.

11. Como pode animarnos observar os paxaros?

¹¹ Xehová dános as cousas que necesitamos para vivir. No Sermón do Monte, Xesús tamén dixo: “Ollade para as aves do ceo: nin sementan, nin seituran, nin recollen nas arcas e, con todo, son mantidas polo voso Pai celestial”. É posible que os que estaban escoitando a Xesús estivesen vendo como as aves voaban polo ceo cando lles preguntou: “¿Non valedes vós máis ca elas?” (Mt. 6:26). Que forma tan bonita de asegurarlles que Xehová coidaría das súas necesidades físicas! (Mt. 6:31, 32) Esta lección que aprendemos da creación tamén anima os que serven fielmente a Deus hoxe en día. Unha irmá nova que é pioneira en España sentíase desanimada porque non conseguía encontrar un lugar onde vivir. Pero despois fixouse nuns paxaros que se estaban alimentando dunhas sementes e dunhas pequenas froitas, e sentiuse máis tranquila. Ela conta: “Ver como Xehová coidaba daqueles paxaros fíxome confiar en que tamén coidará de min”. Pouco despois, atopou onde vivir.

12. Segundo Mateo 10:29-31, que nos ensinan os gorrións sobre Xehová?

¹² Xehová valóranos a cada un de nós individualmente. Antes de enviar os seus apóstolos a predicar, Xesús axudoulles a superar o medo á oposición (le Mateo 10:29-31). Para conseguilo, falou dun dos paxaros máis comúns en Israel: o gorrión ou pardal. Cando Xesús estivo na Terra, estes paxaros valían moi pouco. Pero el díxolles ós seus discípulos: “Non cae o primeiro no chan sen o consentimento do voso Pai”. E engadiu: “Vós valedes máis ca tódolos pardais xuntos”. Con esas palabras, Xesús aseguroulles que Xehová os valoraba individualmente, así que non tiñan por que terlle medo á persecución. Seguro que os discípulos recordaban as súas palabras cando vían algún gorrión mentres predicaban nas vilas e nas cidades. Así que, sempre que vexas un paxariño, recorda que Xehová te valora a ti individualmente porque vales “máis ca tódolos pardais xuntos”. Co seu apoio, non terás medo cando te enfrontes á oposición doutras persoas (Sal. 118:6).

13. Que podemos facer para aprender máis cousas de Xehová a través da creación?

¹³ Podemos aprender moitas máis cousas de Xehová a través da creación. Como? Primeiro, temos que dedicar tempo a observala. Despois, necesitamos pensar en que nos ensina de Xehová. Non sempre nos vai ser fácil facer estas dúas cousas. Géraldine, unha irmá do  Camerún, di: “Medrei vivindo nunha cidade, así que me dei conta de que tiña que esforzarme máis por observar a natureza”. Un ancián que se chama Alfonso explica: “Aprendín que necesito dedicar parte do meu tempo a estar só para observar a creación de Xehová e para meditar no que me ensina acerca del”.

14. Que aprendeu David ó meditar na creación de Deus?

¹⁴ David pensaba moito na creación de Deus. De feito, díxolle a Xehová: “Cando vexo o ceo, feitura da túa man, a lúa e as estrelas que fixaches alí, ¿que é o home, para que o lembres”? (Sal. 8:4, 5 [8:3, 4, TNM]). Cando miraba cara ó ceo pola noite, non se limitaba a desfrutar mirando as estrelas. Tamén meditaba no que lle ensinaban acerca de Deus. Iso axudoulle a ver o marabilloso que é Xehová. Noutros momentos, tamén reflexionou en como se fora formando o seu corpo cando estaba na matriz da súa nai. Ó meditar nestes detalles tan impresionantes, chegou a valorar aínda máis a sabedoría de Xehová (Sal. 139:14-17).

15. Pon exemplos de como viches as calidades de Xehová na creación (Salmo 148:7-10).

¹⁵ Igual ca David, ti tampouco tes que ir moi lonxe para atopar algún detalle da creación no que poidas meditar. Se miras ó teu arredor, poderás ver moitas calidades de Xehová. Por exemplo, podes ver o seu poder ó sentir como o sol quenta a túa pel (Xer. 31:35). Medita na súa sabedoría cando vexas como un paxaro constrúe o seu niño. Pensa no seu sentido do humor cando vexas como un canciño persegue o seu rabo. E agradécelle a Xehová o seu amor cando vexas un animal xogando coa súa cría. Temos moitísimas oportunidades de aprender de Deus porque toda a creación louva a Xehová, tanto as cousas grandes como as pequenas, as que están lonxe e as que están cerca (le Salmo 148:7-10).

16. Que deberiamos estar decididos a facer?

¹⁶ Se observamos con atención a creación descubriremos que todo o que fai Xehová é marabilloso. Ademais, poderemos ver as súas calidades, como a sabedoría, o poder, o amor e moitas outras. Por iso, deberiamos estar decididos a sacar tempo regularmente para desfrutar da creación e para meditar no que nos ensina de Xehová. Se o facemos, acercarémonos aínda máis ó noso Creador (Sant. 4:8). No seguinte artigo, veremos como poden usar os pais a creación para axudarlles ós seus fillos a acercarse máis a Xehová.