Toloo-toloo kalan nea di wɔ lowai, Zesu “ ŋɔ kəlaɠaa [apɔtɛlɛɠaa] ə lɛɛ, galaɉonŋaa ” di kɛ Zolosalɛmu. Nu kpulu logoloi tii ɓə kɛ a ɲɛi tɔwɔ nua, maahɔlɔɓo mɛni wala-wala ta a too kɛ kɛɛnaa lɔpee ta, diɛ ɓə kɛi ɉu pili, diɛ di kpən dee kilistalea maatiɛɠaa kəlee laa hu (Túwɔ́ pələ 15:2). Da kɛi kɛ di kpən dee mɛni ta hu, da gbea kɛ Yálá lawoo hu pili, ə lɛɛ di di kpɔɔ lɛɛ Yálá ŋɔ kili maahəɠɛɛ yəi, yili yɛ di tənəndɔɔ. Yili ɓə kɛi kpɔnmaa tɛɛ di pɔ diɛ pɛli mɛni tɔnɔ hu (Túwɔ́ pələ 15:25). Pələ lɔ ɓə nwɔnɔ Ɲɛi tɔwɔ nua da gɛ la háákələi.

Di kaa a nu kpulu yii Yálá aa ɉəɠə ɉu niiɓa kɛ mɛni ɓa. Kilistalea maatiɛɠaai di kaa a Ɲɛi tɔwɔ nua, Yálá lawoo wɛli kaa diɛ kpɔ kɛnɛ. Di mɛni tamaa kpaɠala kɔlɔn yɛ hwilɛn na kalan mɛni ɓa. Lɔwɔ həli pələ tɛi-tɛi, Ɲɛi tɔwɔ nua da di ŋaakpɔn ə gɛ di Zehova ŋɔ Kəlaɠaa maakpaanŋaa kɔlɔn lɔi mɛi naa kəlee. Yɛ pələi lɔ ə kɛ la toloo-toloo kalan nea di wɔ lowai, háákələi, Ɲɛi tɔwɔ nua di wɔ liɛwooɠaa da həɠə Biblə hu. Da niɛwooɠaa tii pɛɛn a lɛɛtɛlɛɠaa di dɛɛ galangbɔnŋaa hu, awala kɛtii di dɛɛ galangbɔnŋaa mɛi kaa nua diɛ, yiliɠaa di ɉu woo ɓo di nán nonnii diɛ galangbɔnŋaa hu. Yili a gɛ Yálá ŋɔ nu kpului yee ə lɔ gee, ə lɛɛ di kiliŋahiɛ pələ ə kɛ tanɔn (Túwɔ́ pələ 16:4, 5). Ɲɛi tɔwɔ nua da nu kəlee hwaŋalɔ Yálá lawoo laa həli mɛni ɓa, diɛ Yálá ŋɔ nu kpului kɔnɔn gɛ. Diɛ nan nonnii hinaa taɠaa həɠə ɉu, ə gɛ yiliɠaa diɛ kóló tamaa kɛ galangbɔnŋaa maa mɛni ɓa.

Da di kpɔɔ lɛɛ laa Yálá ŋɔ kili maahəɠɛɛ yɛ di tənəndɔɔ. Zehova yaa tɔnɔ gbən lɔ ɓə gaa hɛn gəlee mɛi. Yili ɓa, ya ɓə Ɲɛi tɔwɔ nua da di ɲɛi tinɛn bɔ pələ di tənəndɔɔ mɛni ɓa, da non Zesu yii gaa a galangbɔn nwun namu (Kɔlɛntə dɔlɔɔ 11:3 ; Efɛsə 5:23). Ɲɛi tɔwɔ nua di hwa di kpɔɔ kaa yɛ Yálá ŋɔ nu kpului nwun namənaa. “ Ɓɛi Məlaa lon [Zesu] a kɛi li laa ” kilistalea maatiɛɠaa kəlee “ da kɛ bɔ, ” da Ɲɛi tɔwɔ nua (Kulɔ ponoŋa 14:4). Vɛliwooɠaai kwa gɛ ɲɛi tɔwɔ nua maa mɛni ɓa di ɉu kɔlɔn.

• Toloo-toloo kalan nea di wɔ lowai, gbɛɛ nua ɓə kɛ a ɲɛi tɔwɔ nua ?

• Ɲɛi tɔwɔ nua da di kpɔɔ lɛɛ ləi laa Yálá yɛ di tənəndɔɔ háákələi ?