Nu tamaa di wɔ kili ɓa, da kɛ ma Zehova ŋɔ Kəlaɠaa, kalan ninɛ ta laa li. Kɛlɛɛ aa kɛ kea a kwəlan 2 700 da da, Yálá kpɔkɔ ə kɛi kɛ ŋɔ tiɓo kɛ nua diɛ ŋɔ́ “ Kəlaɠaa ”. (Izai 43:10-12, TMN.) Ə lɛɛ la ɉu gwəlan 1931 ə həli, di kɛi kɛ kuɔ “ Biblə Kalan nua ”. Ə həɠə gwəlan tii ɓa, ku laa ɓaa Zehova ŋɔ Kəlaɠaa. Lə mɛni ɓa ku naa tii hee kuɔ ?

Ku laa tii a ku wɔ Yálái laa kulɔ ponoŋa. Biblə pɛɛn di mo toloo di yee ŋa, Zehova laa ə kɛ ɉu gee mɛi waa tamaa. Nua daa Zehova laa maahwalən a giliin naaɠaa Biblə tamaa hu, yɛ Námu, awala kɛtii Yálá. Kɛlɛɛ, Yálá kpɔkpɔ ə gbɔɔ lɛ Mowisə ɓa, ə mo ma yɛ ma naa ɓaa Zehova, ə lɛɛ yɛ ma “ Náá katii a yələ kəlee da ŋɔɔ. ” (Kulɔ hɛɓɛ 3:15, TMN). Pələ ɓə ə kɛi da lɛɛ yáláɠaa di lowai tɔɔ laa. Ku kwəinɛɛi Yálá laa maahəɠɛɛ tii hee mɛni ɓa kuɔ.

Ku laa tii a ku kɛ kóló lɛ. Gɔwɔ ə tɔɔ Abɛli ɓa, hinaa tamaa da nɛaa tamaa di wɔlɔ laa Zehova la, di maa kəla hwaa ɓo. Kwəlan nwun damaa yee mu, Nuwe, Abalahamu, Sala, Mowisə, Davidə, da nu takpɛliɠaa di pɛlɛ “ [gəla] kpulu tamaa ” tii diɛ (Hebulu 11:4–12:1). Kiti tee pɛlɛ la, kəla kaa a nu yii a nɛ yɛ nuta hɔn və mɛni ta hu. Kuɔ kpɛli kwa Yálá maa teɲa lɛ nua diɛ.

Kwa Zesu pɔɔ kɔɔn. Biblə yɛ Zesu kaa a “ təlimo kəla ”, yɛ ɓo nwɔnɔ a teɲa ɓo mun (Kulɔ ponoŋa 3:14). Zesu yaa kpinii ə mo yɛ ma ə Yálá laa lɛ nua diɛ, ə lɛɛ ə “ teɲa maa kəla hwaa ɓo ”. (Záán 17:26 ; 18:37.) Yili ɓa, maanɛɛ Zesu ŋɔ kalan neai di Yálá laa leelee hee diɛ, ə lɛɛ di nɛ nua diɛ. Yili ɓə Zehova ŋɔ Kəlaɠaa da gɛ a hwaŋalɔ.

• Lə mɛni ɓa Biblə kalan nua di di laa hee a Zehova ŋɔ Kəlaɠaa ?

• Minɛ lowai ɓə Zehova ə Kəla hɔlɔɓoɔ kɔwɔtɔɔ la lɔi mɛi ?

• Zehova ŋɔ Kəlaɠaa gɛnɛ mun maa gbɛɛ ?