Yɛ pələi Biblə a mo la, Zesu haa pulu, Balanabasə da apɔtɛlɛ Pɔli di kɛi kalangbɔnŋaa mɛi kaa. Lə mɛni ɓa di kɛi yili kɛ ? Maahɔlɔɓo di ɓəlaa kalan nea maa liihɛlɛn ə kɛ diɛ. Pɔli ə mo yɛ ma “ Daa yiiɠaai ŋɛi gu Yálá lawoo laa həli ɉu, gu pənə gwəli laa [...] gu di mɛi kaa pələi di kaa gɛi la. ” (Túwɔ́ pələ 15:36). Pɔli ə kɛi hiɛ kweaaɠaa kulɔ, yɛ məlaa kalan nea hwaŋalɔ. Yili lɔ ɓə nwɔnɔ háákələi kalangbɔnŋaa mɛi kaa nua da kɛ gɛi.

Da pa ku hwaŋalɔ mɛni ɓa. Kalangbɔn 20 da da ɓə galihwaɓoɔ koɓi logolo mɛi kaa mun dɔnɔ ɓa. Lɔwɔ tɔnɔ ɓə a gɛ yɛ kalangbɔn dɔnɔ mɛi kaa, a yili kɛ gee mɛi hweelɛ (2) kwəlan dɔnɔ yee mu. Nua tii da di nɛani da pa galangbɔnŋaa hu, da ku hwaŋalɔ a di wɔ kalan ɲii ɓo pələ da Biblə ŋɔ liɛwooɠaa. Da pa, da gɛ pələ kwɛlima di nu kəlee kɔlɔn : yɛ pələi muhəɠə ninɛɠaa da nu maa pɔlɔɔɠaa di kaa la. Da kɛ ku pɔ kwa diɛni kuɔ Yálá lawoo laa həli, ə lɛɛ kuɔ Biblə kalan nua diɛ. Da kalaɉonŋaa da kɛ nwɔnɔ lii galan nea taɠaa pɔɔli, diɛ di mɛi kaa, diɛ di hwaŋalɔ. Da kalan gɛ ŋaakpɔnŋaa ɓa, diɛ nu kəlee hwaŋalɔ. — Túwɔ́ pələ 15:35.

Da lɛɠɛ nu kəlee ɓa. Koɓi pɛlɛɛ mɛi kaa nua da kpɔnmaa tɛɛ kalan nea pɔ, ə gɛ yiliɠaa di lɛɛ a di maalɛɠɛɛ Zehova ɓa. Da nwundɔɔ kɛ da kalaɉonŋaa ə lɛɛ tiɓo kɛ nua, ə gɛ di gaa akɛ galangbɔn kaa tɛi tɔwɔ, ə lɛɛ nwɔnɔ di liɛwoo tɛɛ yiliɠaa pɔ yɛ hwilɛn na di kɛ kóló ɓa. Da kpɔnmaa tɛɛ pələkulɔnua pɔ, ə gɛ yiliɠaa di tɛ tɔwɔ Yálá lawoo laa həliɛ hu. Di kwəi a nɛɛ nu ninɛɠaa kɔlɔn mɛni ɓa galangbɔn ɉu, ə lɛɛ pələi yiliɠaa kaa tɛi la tɔwɔ diɛ gbaɠala kɔlɔn. Ku nán nonnii tii, di tɛi-tɛi a gbɔɔ kɛ a ku ‘ [hiɛ] gee pulu ʼ ku wɔ mɛni lɛlɛɛ maa mɛni ɓa (Kɔlɛntə veelɛnaa 8:23). Di kananŋaa Yálá ɓa, ə lɛɛ laana laa kɛnɛ yɛ ɓo di yəi. Maanɛɛ ku di pɔɔ kɔɔn yili hu. — Hebulu 13:7.

• Lə mɛni ɓə koɓi pɛlɛɛ mɛi kaa da kɛ lii la kalangbɔnŋaa hu ?

• Da pa galangbɔn mɛi kaa mɛni ɓa, ya tɛɛ ləi ə́ yili dɔlɔ hɔlɔɓo ?