Gbɛɛ nua ɓə ə́ di kɔlɔn diɛ ɓo a Zehova ŋɔ Kəlaɠaa ? Daɠaa kaa kiɛ a ə́ heeyɔwɔɠaa, daɠaa diɛ ɓo a ə́ kólókɛyɔwɔɠaa, ka daɠaa ka ɓo kələ tɔnɔ mu lakwəli taa. Awala kɛtii, nua yiiɠaa ka diɛni kaa lono kɛ yɛ hwilɛn na Biblə ɓa. Gbɛɛ nua kpɔkpɔ ɓaa kuɔ ? Lə mɛni ɓa kwa ku wɔ laana laa hukulɔ nu kəlee ɓa ?

Ku kaa lɔ yɛ nu kəlee. Kwa həɠə híín kəlee hu. Ku taɠaa di kɛ kalan dakpɛliɠaa hu, daɠaa di ho kɛ laali Yálá la. Kɛlɛɛ ku kəlee ku gbea lowai həɠə ɉu, ku Biblə ŋɔ kalanwooɠaa maakpɛɛ kpɔ a nɛlɛɛ kuɔ təɠa pa kɛi a Kəlaɠaa (Túwɔ́ pələ 17:11). Mɛniɠaa ku di maakwɛli, ku di kaa a teɲa. Yili ɓə gɛ, kuɔ kpinii ku hwaa ma, kuɔ kwɛli hwilɛn Zehova Yálá ɓa.

Biblə kalanŋaa a kpɔnmaa tɛɛ ku pɔ. Mɛni kaa kuɔ yɛ pələi lɔ gaa la nu kəlee ɓa, hɔn yɛ ɓo nwɔnɔ kuɔ yɛ pələi gaa la nu kəlee ɓa. Kɛlɛɛ kwaa gaa kuɔ ma, kwa kɛi hwaŋa həɠə kuɔ Biblə ŋɔ tɔn nwooɠaa pɔ tuwɔ ɓo holo kəlee, ku wɔ yɛnɛɛ maa a hwalən a nɛlɛɛ (Somə 128:1, 2, TMN). Yili ɓə aa gɛ, mɛni lɛlɛɛɠaa kwaa di kɔlɔn Biblə haalai, kwa kɛ di hukulɔi la nua diɛ.

Ku yii pələ lɛlɛɛɠaa di kaa ku yəi, da həɠə Yálá yəi. Ɲii pələɠaa tii ku di maakwɛli Biblə hu, da ku wɔ yɛnɛɛ ɲaanɛɛ, diɛ gɛ kuɔ nu takpɛliɠaa maawiɛ, kuɔ kɛ a təlimo nua da mɛni lɛlɛɛ kɛ nua. Ɲii pələɠaa tii da kpɔnmaa tɛɛ nua pɔ kɔlɔi pono mɛni hu, ə lɛɛ diɛ tɛ tɔwɔ di wɔ yɛnɛɛ hu. Da pɛlɛn nua yee lɔ gee, di tuwɔ pələ ɲɔn gulɔ di yee pɔ. Ku laa na kuɔ ma “ Yálá hwa nu hu yɛɠɛ ”, yili ɓə gɛi kuɔ ɓo a nan nonnii tɔnɔn, ku laa ho politikə da huwu mɛni hu lɔi mɛi naa kəlee. Ku tɛi-tɛi ku kaa lɔ yɛ nu kəlee, kɛlɛɛ kwa pɛlɛ ku kee ɓa, ku kaa a nu huwu yii veelɛ ho ma. — Túwɔ́ pələ 4:13 ; 10:34, 35.

• Lə ɓə a nɛ yɛ Zehova ŋɔ Kəlaɠaa kaa lɔ yɛ nu kəlee ?

• Yii pələ ləkɛɛɠaa ɓə Zehova ŋɔ Kəlaɠaa daa maakwɛli Biblə hu ?