Húlu lɔɔ a pa a pɛlɛn ɲii ɓoɔ ninɛ. Maanɛɛ ə́ lɛɛ lɔ ma yɛ́ ə́ wɔ nua wɛlilakɛ ə lɛɛ yɛ́ di maawiɛ, kəlaa nui maa mɛni wala-walaa yɛ́ dɛɛ nu lɔpee gəlee ɓa lɔi mɛi, ya ɓaa nui ka yaa kaa húlu lɔ. Yili hwa pɛli nɛɛi ə́ wɔ nua taɠaa diɛ. Kəlaa, Biblə ŋɔ liɛwooɠaa da pɛli kpɔnmaa tɛɛi ə́ pɔ, ka diɛni ka lɛɛ a ka nɛɛ. Ka wɔ yii ninɛi kaa gɔwɔtɔɔ, ka wala kaa Biblə ŋɔ liɛwooɠaa pɔ túwɔ́ ɓo, nɛɛlaa a kɛ nwɔnɔ ka yəi bɛlɛn.

YII BIBLƏ KAA MOI : « Ə́ nan da ə́ lee di maawiɛ » (Efɛsə 6:2). Ə ma kɛ ə́ kaa a nu kɛnɛ, maanɛɛ yɛ́ ə́ kaa nua maawiɛ a holo kəlee. Kɛ a gɔlɔnŋaa yɛ́ ma, ə́ nɛa awala kɛtii ə́ hilɛ yaa kpɛli maanɛɛ ə gili lɛɛ gaa nua hu. « Wɛlikɛmaa [...] hwa tolo ɲɔnwɔɔ kulɔ ». Yili ɓa, ya ə́ nɛa awala kɛtii ə́ hilɛ kaa yɛ ɲɛi hee gaa nua ɲɛi, ho nwana yɛ́ (Kɔlɛntə dɔlɔɔ 13:4 ; Galatə 5:26).

YII KA PƐLI GƐI :

• Wooɠaa kaa laa, maa ho nɛɛ li di ho kulɔ ə́ la, yɛ pələi : « Ə́ wɔ nua di hwa hɛn da kaa ɉú », awala kɛtii : « Gɛ́ mɛni ta ho ta lɛlɛ li ə́ lee ɲɛi ɓa »

• Gɛ pələ kwɛli ma, yɛ́ ka ə́ nɛa awala kɛtii ə́ hilɛ, ka wɔ mɛniɠaa kaa pələ ə kɛ tanɔn

YII BIBLƏ KAA MOI : « Hulɔnu a nan da nee di lɛɛ, ə pa, da nɛa di pɛlɛ di kee ɓa di kɛ tɔnɔ » (Matie 19:5). Ə ma kɛ kaa húlu lɔ, a pɛli kɛi ə́ kaa nua kwəi diɛ ə́ ŋaawoo kaa nii di la. Ka yəi bɛlɛn mɛni kəlee ta ɓo wɛli a pɛli kɛi diɛ.

Ka maa mɛni yii ka kaa nua da pɛli da ɓoi, kaa ɓə maanɛɛ ka nɛ. Ka mo diɛ a wɛlikɛmaa. Ka haŋa ka mo diɛ, kəlaa ka ho gɛ a di ɲɛi hwala pələ (Haŋɔn 15:1, TMN). Ya kɛi ə́ kpɔɔmaayɛɛ, ə́ wɔ mɛni kɔlɔ haa ma, yɛ́ ə́ liilaa, yili a pɛli kpɔnmaa tɛɛi ə́ pɔ ka ə́ wɔ nua ka lɛɛ a ka nɛɛ, ə lɛɛ « ka ka yee hee ka kee mu wɛlikɛmaa [laa] hu ». (Efɛsə 4:2.)

YII KA PƐLI GƐI :

• Ka gaa kaa ma ka wɔ nua da kɛ bɔ di ka yəi bɛlɛn mɛni kəlee ta ɓo, mɛniɠaai da pɛli da ɓoi, ka nu hweelɛi ka mo woo laa maa hu

• Pələi maanɛɛ ka mo la diɛ, ka pɛli ɉu