Hulɔnon da ə gala nwun maaɓo, gu maa mɛni hukulaa kaa. Apɔtɛlɛ Pɔli ə kɛ a ɉulɔnon tii gala. Gu ho ɉulɔnon tii laa kɔlɔn, kɛlɛɛ gu gɔlɔn guɔ ə liikpələ mɛni ta kɛ. Mɛnii ə gɛ ə́ kaa bɔ ə́ mɛn ? —

Pɔli ə kɛ gaho ŋa Zolosalɛmu. Di ɉon maahɔlɔɓo ə kɛi Zesu maa mɛni ɓo. Ɉolahi kwidiɠi ə gbəndee ə gɛ ə Pɔli tɛɛ taa takpɛli hu, daa laa ɓaa kɛ Sezale. Pɔli wɛlikpɛɛ kɛ mɛni ɲɔn gɛ nua diɛ, di kɛ bɔ di mɛni ɲɔn gɛ la. Di mo diɛ ma : « Ka gu mo ɉolahi kwidiɠi ɓa ə holahiɠaa tɔɔ də li a Pɔli kiti tee pɛlɛ la. Ka gu gu loo bələi, ɓɛlowai Pɔli a kɛi tɛɛ la ka gu baa ! »

Pɔli malən ə mɛnii tii bələ mɛn. Lə ɓə maanɛɛ kɛ ə gɛ ? Ə li gaho pɛlɛ la ə mo Pɔli ɓa, Pɔli ə mo ma yɛ ma ə li ə mɛni ɲɔn gɛ mɛnii tii ɓo ɉolahi kwidiɠi ɓa. Ə́ wɔ kili ɓa gɛ laa nɛɛ kɛ Pɔli malən ma ə mɛni tii ɓo ɉolahi kwidiɠi ɓa ? — Kpaa, maahɔlɔɓo ɉolahi kwidiɠi ə kɛ a hulɔnu yii maawiaa. Kɛlɛɛ Pɔli malən liikpəlɛɛ kɛ, ə lɛɛ ə mɛnii tii ɓo ɉolahi kwidiɠi ɓa.

Ɉolahi kwidiɠi ə kɛ a gɔlɔnŋaa yii kpɔlɔɔ maanɛɛ kɛ ə gɛ. Ə holahi 500 həɠə ɉu Pɔli maakpɛ mɛni ɓa ! Ə mo diɛ yɛ diɛ di Pɔli həɠə gbinii tii hu də li la Sezale. Pɔli ə həli mɔɔn a nɛlɛɛ ? — Ee, mɛni ɲɔn gɛ nua tii di ho pɛli Pɔli hon ɉii. Di wɔ mɛni ɲɔn tii ho pɛli.

Kili ləkɛɛ ɓə ya pɛli ɉɔlɔɓoi yili hu ? — Yɛ́ kpɛli ya pɛli liikpələ laa kɛi yɛ Pɔli malən. Guɔ kpɛli maanɛɛ gu lii ə kɛ a gbəlɛɛ ɓɛlowai gwa kɛ Zehova lawoo laa həlii la nua diɛ. Ə́ kaa pai lɛɛ Zehova maa mɛni ɓoɔ ɓa a liikpələ ? — Ya gɛ tii ya pɛli nu takpɛli nwun maaɓoi.