ƝAAKWƐLƐI 37
Yii Biblə a mo yɛ hwilɛn na kóló mɛni ɓa da wali mɛni
Kóló mɛni awala kɛtii wali mɛni aa ta ə́ liihɛlɛn ? Gɛ laa a pɛli ə wala gu yəi gu lowai hɔlɔɓo gu wɔ kóló mɛni hu, ə lɛɛ guɔ pɛli lowai hɔlɔɓoi yii yaan gu Zehova ɓatoo kpɔ yɛ pələi gaa la bɔ. Kəlaa Biblə ŋɔ liɛwooɠaa da pɛli di kpɔnmaa tɛɛ gu pɔ mɛnii tii hu.
1. Lə ɓə Biblə a mo yɛ hwilɛn na kóló mɛni ɓa ?
Yálá kaa bɔ guɔ gu kɛ kóló ɲaanɛɛ gulɔ. Biblə kaa kɛi ma : “ Mɛni ɲaanɛɛi lɔ gaa nu yəi, ya ɓaa […] ə gwəinɛɛ gɛ kóló dɔlɔ hu ” (Kilimaamun 2:24). Zehova a kóló kɛ kpɔ a neelee. Gwa kɛi bɔɔkɔɔn, ə lɛɛ guɔ kóló kɛ kpɔ a neelee yili a gwəinɛɛ ə lɛɛ guɔ kpɛliman yili a gu kwəinɛɛ.
Kóló kɛɛ lɛlɛɛi, kəlaa maahonɛɛli gu ho gu wɔ kóló mɛniɠaa lɛɛ laa ho tɛɛ gu wɔ Yálá mɛni ɓa (Ɉaan 6:27). Zehova kaa kɛi guɔ gwa niiɓa kɛ mɛni tɛɛ tɔwɔ mɛni kəlee hu gu wɔ yɛnɛɛ hu, yiiɠaa kpɔ gu maakpaan gaa ma a dɛɛ gu pɔ.
2. Da kɛ ma gu wɔ wali kaa pələ ə kɛ a bɛliɛ ɉu yili mukulaa ɓaa lə ?
Biblə kaa kɛi ma ‘ wali a nu maakpɛ ’ kəlaa a mo nwɔnɔ yɛ ma wali hwa pɛli kwəinɛɛ leelee tɛɛ gu pɔ (Kilimaamun 7:12). Biblə a gu hwaŋalɔ yɛ ma gu ho wali wɛlilakɛ kəlaa ‘ yii gaa gu yəi ə gu lii hon ’ (Hebreu 13:5 ɓo). Gu hɔlɔɓo hɛn a gu lii hon, gu ho pai kɛi yɛ nua kwəinɛɛ ho di yəi maahɔlɔɓo da kɛ di kiliŋahiɛi diɛ ma hɛn ɲaa maa ho di yəi. Gu ho pai kwələ həɠəi mɛni hwiikpɛɛɠaa hu (Hanwon 22:7). Gu ho nwɔnɔ pai pə́lə́ ta kɛi yii wali mɛni a kɛ ɉu, awala kɛtii gu gu laa too hɛngɔu kɛnɛ hɔlɔɓo mɛni hu ɉaɉa yii kóló kɛnɛ kɛ mɛni hwa kɛ ɉu.
3. Gwa pɛli gu wɔ wali hon bələ kɛi ləi a nɛlɛɛ ?
Zehova kaa a Yálá yii a mɛinɛɛ kɛ. Gwa bɔɔkɔɔn a ɓɛlowai ‘ gu yee a kɛ la guɔ hwɛa-hwɛa guɔ nu takpɛliɠaa kɔ a gu yəi hɛn ’ (Timote dɔlɔɔ 6:18). Gwa gu wɔ wali hon a nɛlɛɛ, gwa kɛi gu yee hee galangbɔn hu mɛniɠaa mu a gu yəi wali, ə lɛɛ guɔ kpɔnmaa tɛɛ nuai di kaa kpaan ɉu di pɔ ɉɛnɛ ə ma gɛ gu nan nonnii. Nwalii gwa dɛɛ ya hwəi Zehova a gaa, kəlaa yii kpɔ a gɛ guɔ dɛɛ ya ɓə a gaa. Gwa dɛɛ a gu lii kəlee yili a kwəinɛɛ tɛɛ gu pɔ, ə lɛɛ yili a Zehova kwəinɛɛ (Gɛlaɠaa 20:35 ɓo).
Ə́ WƆ MƐNIKƆLƆNŊAA TA PƐLƐ MA
Gu kiliŋahiɛ pələ a kɛ a nɛlɛɛ vilɛnŋaa kóló mɛni ɓa, ə lɛɛ gu hɔlɔɓo hɛnŋaa da kɛi gu lii hon, gaa pələi gwa pɛli gu yili pulu mɛinɛɛɠaa hɔlɔɓo la.
4. Zehova maawiɛ ə́ wɔ kóló kɛ pələ hu
Məlannaai gaa gwa Zehova ni gu lowai, maanɛɛ diɛ gaa gu wɔ kóló kɛ pələ hu. VIDIO kaa ə lɛɛ ka lono kɛ gɛɛmaalən ŋɛi mɛi.
-
Vidio hu, lə kpɔ ɓə nwɛli ə too yɛ́ Jason túwɔ́ pələ hu ɲəi góló kɛɛnaa da pələi a kóló kaa la ?
-
Lə ɓə ə gɛ yii yaan gɛ kóló ho ŋɔ lowai kəlee həɠə ?
• Lə mɛni ɓa maahonɛɛli gu maa kóló ho gu wɔ lowai takpɛliɠaa həɠə ?
-
Kolɔsə 3:23, 24 ɓo, ə lɛɛ ka lono kɛ gɛɛmaalən ŋɛi mɛi :
• Lə mɛni ɓa mɛni wala-wala ɓaa guɔ kóló kɛ kpɔ a gu lii kəlee ?
5. Gu hɔlɔɓo hɛnŋaa da kɛi gu lii hon gwa yili pulu mɛinɛɛɠaa hɔlɔɓo
Nu tamaa da mɛni lɔpee gəlee kɛ ə gɛ di wali hɔlɔɓo kpɔ kɛnɛ. Kəlaa Biblə a gu hwaŋalɔ yii yaan gu kiliŋahiɛ pələ ə kɛ a dee. Timote dɔlɔɔ 6:6-8 ɓo, ə lɛɛ ka lono kɛ gɛɛmaalən ŋɛi mɛi :
-
Lə ɓə Biblə a mo guɔ yii yaan gu gɛ ?
Ə ma kɛ yii gu yəi ho kɛnɛ li gwa pɛli kɛi kwəinɛɛ hu. VIDIO kaa ə lɛɛ ka lono kɛ gɛɛmaalən ŋɛi mɛi.
-
Bələi ma wali ɲaa maa ho la ɉulɔnui ŋɛi da ɲəi bɛlɛnnua di yəi, lə ɓə kwəinɛɛ tɛɛ di pɔ ?
Nui wali kaa ɲəi kɛnɛ, a kɛ nwɔnɔ bɔ da ə pɛlɛ ma kɛnɛ yaan ? Zesu ə nɛ kɔɔmaa ta hu yɛ ma giliŋahiɛ huwui tii ho lɛlɛ li. Lukə 12:15-21 ɓo, ə lɛɛ ka lono kɛ gɛɛmaalən ŋɛi mɛi :
-
Gɔɔmaa ŋɛi Zesu ə dɛɛ kili ləkɛɛ ɓə ə́ ɉɔlɔɓo ɉu ? (Nwookpuɔ 15 kaa).
Hanwon 10:22 ɓo ə́ gɔɔn Timote dɔlɔɔ 6:10 ɓa ə lɛɛ ka lono kɛ gɛɛmaalənŋaa mɛi :
-
Ə́ wɔ kili ɓa mɛni ləkɛɛ ɓə maamɛni wala-walaa : nu ə kɛ a Zehova məlan awala kɛtii nu ə wali kɛnɛ hɔlɔɓo ? Lə mɛni ɓa ə́ kaa moi tii ?
-
Hɛngɔu kɛnɛ hɔlɔɓo lii a kɛ guɔ, mɛniɲɔn ləkɛɛ ɓə a kulɔ yili hu ?
6. Zehova kaa pai gu maakpaanŋaa kpɛɛi
Kóló mɛni a həli guɔ awala kɛtii wali mɛni yili a gɛ gu gaa akɛ gu laa Zehova la. VIDIO kaa, mɛni huwu ma tii a laa yɛ́ yii maanɛɛ ə́ gɛ yɛ́ pɛli gaai, ə lɛɛ ka lono kɛ gɛɛmaalənŋaa ŋɛi mɛi.
-
Vidio hu, mɔnɔ ləkɛɛɠaa ɓə həli nan non ɉulɔnui tii ɓa ?
-
Lə ɓə ə gɛ yɛ pɛli tɔɔ kpaan mɔnɔɠaa tii hu ?
Matie 6:25-34 ɓo, ə lɛɛ ka lono kɛ gɛɛmaalən ŋɛi mɛi :
-
Nuai da Zehova tɛɛ tɔwɔ di wɔ mɛni kəlee hu, lə ɓə Zehova aa mo yɛ gaa pai gɛi diɛ ?
NUTAƓAA DA KƐ KƐI MA : “ Maanɛɛ ŋi kóló kɛ kpɔ a nwala-walaa gɛ pɛli ɲə́i bɛlɛnnua maamɛni ɲɛikulɔi. Yili ɓa va pɛli lii ŋaakpɔnŋaa ɓa lɔwɔ kəlee. ”
-
Biblə ŋɔ vɛlisɛɛ ləkɛɛ ɓə a kpɔnmaa tɛɛ ə́ pɔ ə́ laana kpɔ a neelee yɛ́ ma Zehova kaa pai gu maamɛniɠaa ɲɛikulɔi, gwa maatoo mɛni tɛɛ mɛni kəlee tɔwɔ ?
YII GU GALAN
Gu maakpaan gaa wali ɓa ə ma kɛ kóló, kəlaa maahonɛɛli gu ho di lɛɛ laa di ho gu ɲɛi həɠə Zehova ɓatoo mɛni ɓa.
Nɛɛ ə́ kili pɔ
-
Ə gɛ ə́ wɔ kóló kaa pələ ə kɛ a bɛliɛ ɉu, lə ɓə a pɛli kpɔnmaa tɛɛi ə́ pɔ ?
-
Ə́ hɔlɔɓo hɛnŋaa da kɛi ə́ lii hon ya pɛli yili pulu mɛinɛɛɠaa hɔlɔɓoi ləi ?
-
Zehova aa mo yɛ ma gaa pai maatoonua maamɛniɠaa ɲɛikulɔi, ya pɛli nɛi ləi yɛ́ ma ə́ laa yili la ?
MƐNI TAKPƐLIƓAA
Gaa akɛ Biblə a mo yɛ ma mɛni ɲɔnwɔɔ ɓaa nu ə wali hɔlɔɓo.
“ Wali kaa mɔɔn a mɛniɲɔn gəlee ɉamu ” (Hɛɓɛ yii gaa gwɛli yɛli ɓa)
Gaa pələi gwa pɛli gu wɔ wali hon ɉii la a nɛlɛɛ gu wɛli yɛ pɛli too Yálá ɓa.
“ Lə ɓə Biblə a mo yɛ hwilɛn na kɔɓo kɛ mɛni ɓa ” (Hɛɓɛ yii gaa gwɛli yɛli ɓa)
Pə́lə́ yii wali mɛni kaa ɉu gaa lɔ a pə́lə́ ?
“ Pə́lə́ yii wali mɛni kaa ɉu yii Biblə a mo yɛ hwilɛn na ma ” (Réveillez-vous !, mars 2015)
Gaa yii gɛ hɔlɔnu ta yɛ kpəla pə́lə́ɠaa kɛɛ ɓa yii wali mɛni kaa ɉu, ə lɛɛ yii gɛ yɛ kpəla nwuɔ kɛɛ ɓa.
