Mɛniɲɔn gɛnɛ ta a kɛ, kɛlɛ-kɛlɛ gwa kɛ gu kpɔɔ maaləngɛi guɔ kɛ ma :  “ akɛtii lə mɛni ɓa mɛnii ɲɛi aa kɛ ? ” Gɛ mɛni ɓa Biblə a gɛɛmaalən tii mukulɔ guɔ kpɔ a ɉu ponoɔ, yili a gu kwəinɛɛ kpɔ kɛnɛ.

1. Mɛniɲɔn ə gɔwɔtɔɔ ləi ?

Sətana ə kulɔ Yálá woo mu. Sətana ə kɛ bɔ ə ŋaawooɓolaa kɛ, yili ɓa ə pili Adamə da Ɛvə di wəlii yiliɠaa di too bɔ di kulɔ Yálá woo mu. Ə gɛ di too bɔ, ə lɛɛ kɛ Ɛvə ɓa (Gɔwɔtɔɔi 3:1-5). Sətana ə gɛ Ɛvə ə giliŋahiɛ yɛ ma Zehova kaa mɛni lɛlɛɛ ta lowui ma. Ə nɛ yɛ ma nukanŋaa da kulɔ Yálá woo mu da kɛ di ɲaanɛɛ hu. Sətana ə kɛ Ɛvə ɓa a nwulu ɓai tii mii ho pai kɛ haai, yili ə kɛ a lɛɛ doloo. Yili ɓa, Biblə a kɛ ma Sətana kaa “ a lɛɛmun yɛ ɓo a lɛɛ nan ” (Ɉaan 8:44).

2. Lə ɓə Adamə da Ɛvə di ɉəɠə ɉu ?

Zehova ə mɛinɛɛ lɛlɛɛ tamaa kɛ Adamə da Ɛvə diɛ. Ə kɛ diɛ nwuluɠaa kpɔ di kaa Edɛn-yea da pɛli kɛ di gəlee ɓa ta mii ho kɛ li lɔ dɔnɔ gbən (Gɔwɔtɔɔi 2:15-17). Kəlaa di ɉəɠə ɉu di kulɔ Yálá woo mu. Ɛvə “ ə nɛɛ ma, ə nwulu ɓai tii ta kulɔ, ə mii. ” Yili pulu, ə da tɛɛ Adamə pɔ, “ yili yaan, ə nwɛi mii ” (Gɔwɔtɔɔi 3:6). Di nu hweelɛi di kulɔ Yálá woo mu. Nɛŋɛn və kɛ Adamə da Ɛvə diɛ, yili ɓa gɛ laa nɛɛ kɛ di yəi di mɛni lɛlɛɛ kɛ. Kəlɛɛ di ɉəɠə ɉu di kulɔ Yálá woo mu. Gɛɛi di mo tii nɛŋɛn ga tii di ɉəɠə, ə lɛɛ di nɛ diɛ di ho kea Yálá ŋɔ ŋaawooɓolaa mu, yili ə gɛ mɔnɔ tamaa ə həli diɛ (Gɔwɔtɔɔi 3:16-19).

3. Mɛnii Adamə da Ɛvə di ɉəɠə ɉu bulu mɛniɠaa ɓaa lə guɔ ?

Ɓɛlowai Adamə da Ɛvə di kulɔ la Yálá woo mu di kɛ kea a nɛŋɛn ɉəɠənua ə lɛɛ di nɛŋɛn tii lɛɛ di lonnii diɛ. Yii Biblə a mo Adamə laa mɛi ya ka : “ Nu laa pɔɔ ɓə nɛŋɛn nɔ yɛnɛɛ, maa nui ɓaa Adamə, nɛŋɛn ɲaan ə pa a haa ; yili ɓə gɛ haa yɛ həli nu kəlee ɓa ” (Romə 5:12).

Gwa mɔnɔ mii mɛni tamaa maamɛni ɓa. Gwa mɔnɔ mii a lowai taɠaa maahɔlɔɓo gwaa mɛni ta həɠə ɉu a ɲɔnwɔɔ, lowai taɠaa nwɔnɔ guɔ mɔnɔ mii maahɔlɔɓo nu takpɛliɠaa ɓə daa mɛni ta həɠə ɉu a ɲɔnwɔɔ, ə lɛɛ guɔ kpinii gwa pɛli gu kɛ kɛɛnaa ɲɔnwɔɔ ɓa a lowai ɲɔnwɔɔ yili ə gɛ guɔ mɔnɔ mii (Kilimaamun 9:12).

 Ə́ WƆ MƐNIKƆLƆNŊAA TA PƐLƐ MA

4. Nui gaa gu wɔ mɔnɔɠaa nwun na

A kɛ nu tamaa di wɔ kili ɓa Yálá ɓə yɛnɛɛ ŋaawooɓoi, kəlaa yili kaa mɔɔn a teɲa ? VIDIO kaa.

Ɉakə 1:13 da Ɉaan dɔlɔɔ 5:19 ɓo, ə lɛɛ ka lono kɛ gɛɛmaalən ŋɛi mɛi :

• Mɔnɔ da mɛniɲɔn da həɠə Yálá yəi ?

5. Sətana ŋɔ ŋaawooɓolaa pulu mɔnɔɠaa

1. Adamə da Ɛvə di kɛ alizana hu nɛŋɛn və kɛ diɛ kəlaa di di wəlitɔɔ Sətana ɓa di kulɔ Zehova woo mu

2.   Yili ə pa a mɔnɔ, nɛŋɛn ə lɛɛ haa, lɔi mɛi naa kəlee

3. Zehova kaa pai mɔnɔ, nɛŋɛn da haa di kpɛɛi ə lɛɛ nukanŋaa kaa pai pənəi di yɛnɛɛ kɛ alizana nɛŋɛn va kɛ diɛ

6. Gu wɔ mɔnɔɠaa maaliihɛlɛn gaa Zehova ɓa

Gwa kɛi mɔnɔ mii yili niihɛlɛn gaa Yálá ɓa ? Gu gaa yii tɔɔmun Davidə da apɔtɛlɛ Piɛre di bɛɛn. Maatɛnɛ 31:8 [31:7 NWT] da Piɛrə dɔlɔɔ 5:7 ɓo, ə lɛɛ ka lono kɛ gɛɛmaalən ŋɛi mɛi :

• Ya kɛ a gɔlɔnŋaa yɛ́ ma gu wɔ mɔnɔɠaa maaliihɛlɛn gaa Zehova ɓa, lə ɓə yili a gɛ yɛ́ ?

 YII GU GALAN

Sətana, Adamə ə lɛɛ Ɛvə diɛ ɓə gɛ mɔnɔ yɛ laa guɔ. Zehova a gu wɔ mɔnɔɠaa maaliihɛlɛn ɉee kpɔ kɛnɛ, ə lɛɛ ɉu ho kea kweali gaa pai di kpɛɛi.

Nɛɛ ə́ kili pɔ

• Lɛɛ ləkɛɛ ɓə Sətana ə gɛ Ɛvə ɓa ?

• Pɔɔ ləkɛɛ ɓə Adamə da Ɛvə di wɔ kulɔnwoomulaa ə nɛɛ guɔ ?

• Gu gɔlɔn ləi guɔ ma gu wɔ mɔnɔɠaa maaliihɛlɛn gaa Zehova ɓa ?