Ə́ kiliŋahiɛ mɛnii ŋɛi ɓa : Alex kwəi aa pili ma. Mɛnii gwəi pili ma ya ka : Ə həɠə nokolo yələ ɓa ə too la yiihu ɓa, naa Yálá mɛni la ə lɛɛ ə gɔlɔn yɛ Yálá ɓə hɛn gəlee kpɛtɛ. Kəlaa ŋɔ lakwəli kalamɔɔ aa mɛni takpɛli ɓo ma háákələi. Aa mo ma yɛ ma huwɔɠaa ɓə lɛɛ di maapənəi di kɛ a nu. Aa mo hɔlɔmu nwɔnɔ ma yɛ ma, mɛni kɔlɔnnua kpea-kpea daa mɛni tii pulu kwɛli daa gaa a teɲa. Alex ho bɔ məlaa di ho gaa a nwungbɛɛɉumun. Gaa giliŋahiɛi yɛ kɛ diɛ : ‘ Akɛ mɛni kɔlɔnnua daa gaa diɛ huwɔɠaa ɓə lɛɛ di maapənəi di kɛ a nu, gbɛɛ ɓaa ɲáá, yai ŋa di laahea too ’.

Akɛ yɛ́ ɓə tii kɛ a Alex, ə́ li lɔ hwaa mɛnii tii ɓa, maahɔlɔɓo lakwəlitaa hɛɓɛɠaa da mo diɛ ma gaa a teɲa ?

Pələi ma nua di wo kiliŋahiɛ hwa kɛ la tanɔn da kɛi mɛniɠaa taɠaa ɓo, yii di laana di hwa səka-səka moi, ə ma kɛ di ho gɔlɔn, mɛnii gɛi diɛ laana.

• Nutaɠaa laana diɛ ma Yálá ɓə hɛn gəlee pɛli maahɔlɔɓo yili ɓə da kɛ galan ɉii diɛ, di yəi galan ma.

• Nutaɠaa laana diɛ ma huwɔɠaa ɓə lɛɛ di maapənəi di kɛ a nu, maahɔlɔɓo yili ɓə da kɛ di maakwɛlii ma nakwəlitaa.

Biblə a mo yɛ : “ Pɛlɛ lɔpee gəlee, nu lɔ ɓə a dɔɔ. Kɛlɛɛ, hɛn gəlee pɛli mun maa a Yálá ” (Hebulu 3:4). Yili ɲaakaa laa nɛɛi ?

Nu taɠaa da mo diɛ ma gɔwɔtɔɔi, hɛnda ɓə pola, ə ɓəla. Yili pulu yɛnɛɛ bili-bili gee mɛi hɛnŋaa kəlee diɛi gu di kɔlɔn háákələi, diɛ kpɛtɛ di kpɔɔ ɓa, ɉɛn tii ɓəla ɉaalai.

Nu taɠaa da mo diɛ ma huwɔɠaa ɓə lɛɛ di maapənəi di kɛ a nu.

Nu taɠaa da mo diɛ ma daa gaa a teɲa diɛ, huwɔɠaa ɓə lɛɛ di maapənəi di kɛ a nu.

“Ə́ kiliŋahiɛ lɔ yɛ́ ya lɛɛ hiɛi wəla ta hu, ə́ kulɔ kələ lɛlɛɛ ta ɓa yii maapuɔ a gwala-laa. Ə́ kaa pai ə́ kiliŋahiɛi yɛ́ ma gwala-laaɠaa di kulɔ gwala wulu hu di kpɔɔ ɓa di pa di pu gələi tii mɛi ? Kpaa, nui kpɔ a mɛni ɲaakaa, maanu hwa pɛli giliŋahiɛ huwu ma yili kɛi. Akɛ kani gaa tii, maahonɛɛli gu ho laana guɔ ma, yɛnɛɛ hɛnŋaa kəlee di lɛɛ di kpɔɔ ɓa di kulɔ ə lɛɛ di kpɛtɛmun və laa ” (Julia).

“Ə́ kiliŋahiɛ lɔ yɛ nuta a mo yɛ́, yɛ diɛ di kɛ hɛɓɛ kóló kɛi ta, hɛɓɛ-yá kɛnɛ ə lɛɛ daa hu ə ɓəla, ɲá ə taɠa-taɠa bɛlɛn naa kəlee. Ɉɛɓɛ-yá kɛnɛi tii taɠa-taɠa bɛlɛn naa kəlee, ə maapənə a hɛɓɛ yili kɛnɛ ta, yii ɉu mɛniɠaa kəlee pɛɛn pələ heɛ gbaŋa kpɔ yɛlɛ tɛtɛ. Da mɛni huwu mai tii ɓo yɛ́, ya pɛli laana ? ” (Gwen).

 Biblə a ə́ hwaŋalɔ ə́ laa Yálá mɛni la a ə́ wɔ ‘ mɛni hu kpɛ kili ’ (Hebulu 5:14). Yili mukulaa ɓaa ə́ laa mɛni Yálá la, kɔwɔ ho kɛ lɔ a vilɛnŋaa

• Ə́ KWƏI MƐNIƓAA MƐI (Gwə́i mɛniɠaa da nɛ kpɔ máá a ɉu ponoɔ diɛ ma Yálá kaa laa, vaŋa kɛnɛi dɛɛ máá).

• NU TAKPƐLIƓAA KILIŊAHIƐ PƏLƏ MƐI (Kalan mɛni lɔ ɓə gɛnɛ ɓɛ bɔ́ taai, ya ɓə aa gɛ, gɛ́ laa Yálá mɛni la).

• NU TAKPƐLIƓAA MAAMƐNI ƁA (Gáánua di mo máá diɛ ma ŋi laa Yálá mɛni la. Ɲáá gbinii leelee hwəi yili giti tee gwə́i).

Kəlaa ə́ laa mɛni Yálá la kɔwɔ ə kɛ a vilɛnŋaa mɛni ta mɛi yii yɛ́ kpinii yaa ɉu pili ə lɛɛ yaa ɲaakaa kpɔ a neelee.

“ Ŋa kɛ nakwəli kələ mu, gɛ́ nakwəli kalamɔɔ woo mɛn yɛ ɉukulɔ pələi gu kɔlɔ dɔɔ-tɔɔɠaa da kɛ kóló kɛi la, gwə́i pələ, ŋa mo kpɔ gɛ́ diɛ volomaa ho ɉu, Yálá kaa laa. Gu kɔlɔ dɔɔ-tɔɔ lɔpee gəlee kɛ kóló kaa ma, ə ma kɛ gu tɔɔ-tɔɔ yiiɠaai gu ɲɛi tɛɠɛɓoɔ di hu. Kɛlɛ-kɛlɛ hu, gólóɠaa tii kəlee a kɛ kɛi gu tɛɠii. Nukan gbɛtɛ pələ kaa kpɔ a Yálá ŋɔ kpalo mɛni leelee ! ” (Teresa).

“ Ŋa pɛlɛ kɛnɛ kaa tɔɔ ni awala kɛtii, kələn gɛnɛ, awala nwɔnɔ kɛtii mɔbili, giliŋahiɛ toloo a pa máá ya ɓaa, ŋi gbɔ́ɔ́ maaləngɛ gɛ́ diɛ : Gbɛɛ ŋɔ kóló kɛɛ ɓəi ? Gwa gɔɔmaa həɠə mɔbili ɓa, nwungɛɉunua ɓə da hee di gbɛtɛ. Kwɛli pɛlɛɛ tamaa katii da ɉee gee la a yɛlɛ, yɛ kɛ a mɔbili. Akɛ nuta ɓə a hee ə giliŋahiɛ, ə mɔbili kpɛtɛ, bələ lɔ ɓə gaa la a nukan. Gu kpɛtɛmun gaa laa ” (Richard).

“ Ŋi kɛi lɔ tɛ tɔwɔ ŋɔ́ lakwəli mɛni hu, gɛ́ gbaɠala kaa gɛ́ kɛ diɛ huwɔɠaa di hwa pɛli di maapənəi di ho kɛ a nu. [...] Gɛ laa walaai gu laana guɔ ma huwɔɠaa ɓə di maapənə di kɛ a nu, kəlaa gɛ laa nɛi gu laana guɔ ma Yálá ɓə gu kpɛtɛ ” (Anthony).

Lakwəli kɛnɛ kɛ nua daa mɛni tamaa hupili aa kɛ kea a kwəlan damaa. Kəlaa di woo tɔɔ ho tanɔn yii hwilɛn na huwɔɠaa maapənə mɛni ɓa diɛ kɛ a nu. Akɛ lakwəli kɛnɛ kɛ nua woo tɔɔ ho tanɔn yɛ hwilɛn na mɛnii ŋɛi ɓa, teɲa ho mɔɔn ə́ pɔ yɛ́ kpɛli ə́ yili ɉea too ?