Lé Kpẹ̀a E Máátìù Beè Emí 28:1-20
28 Tṍó e Deè Bõ̀séi ni téní, ea ni dú boo lọ̀ọ̀leè túá dee ló sè, Mérì ea dú Màgdálà nè nakà Mérìa beè sì gé ẹ̀b bànà úá.
2 Ẹ̀b! kà agẹ bá zùgà kunukẽ̀ beè naaá kĩá, boo béè kọọ̀ nyómá tóm Jìhóvà* beè aa káála dù gé kpọlẹ̀ báà demá lọl gã́ bànà úá, vaá ĩìtẽ́ boo.
3 Nyómá tómá beè nyagĩ́ belí éném dee vaá a kọ̀là ló à ẹẹ belí báà múú.
4 Pọ̀ beè palàge sii gbò kùdẽe lóá tṍó e bà mon nyómá tómá, naa ní ea beè belí kọ bà ú.
5 Sõò nyómá tómá beè kọ́ nè gbò pábiaá kọọ̀: “Pọ̀ á gá siíi boo béè kọ m̀ nyímà kọọ̀ ò gé gbĩ́ì Jíízọ̀s e ba beè túe ká kú téá.
6 Á gé ná kĩí boo béè kọọ̀ a beè kẽ̀èà aa kemà ú, dì belí bé ea beè kọ́ naaá. Dui gé ẹbvii kĩée e ba beè túe maame.
7 Valẹi bá aalii gé kọi nei gbò e bà ólò nyoonée nvée kọ a kẽeà aa kemà ú. A aà kil Gálilì gé elá bànài, vaá ò é monííe gbẹá kĩé. Níà nú em beè dù gé kọ́ nèi ẽ́.”
8 Boo tṍó e pọ̀ gé síí va, vaá nyíé va gé ẹ́ẹ nagéá, bà gbóó gbalá aa ló bànà úá àà gé kọ́ nè pá a gbò nyòòne nvée.
9 Mm̀ bùló, Jíízọ̀s beè gbóó kyã̀à iná vá ló, vaá kọ́ nè va kọọ̀: “Á leèi!” Bà gbóó kyã̀à bã̀é ló vaá siíe bá ló kpóó tọ vaá kumí sĩ́ kẽ nèe.
10 Jíízọ̀s à gbóó kọ́ nè va kọọ̀: “Pọ̀ á gá siíi! Aalii gé kọi nei pá ńdáà vígà kọbé bà aà kil Gálilì, mè bà é moním gbẹá kĩá.”
11 Boo tṍó e bà gé aàa, sìgà gbò kùdẽe lóá beè gbóó bã bon, vaá kọ́ dénè nu ea beè naaá nè gbò togó vààla gyọ́ọ.
12 Tṍó e gbò togó vààla gyọ́ọ nè gbò kàneǹ pá Júù ni bṍóná vaá bilá ló lọ̀l, bà gbóó tú gã́bug kpègè nè gbò béá,
13 vaá kọ́ nè va kọọ̀: “Kọi nei gbò nen kọọ̀, ‘Pá a gbò nyòòne nvée beè dù gé zìb a íí ààmà tṍó e beè di dáá bílá dee.’
14 Ó gá bulai, beè Páílèt dã́ naa vó, beele é ló bel nèe.”
15 Bà gbóó tú kpègèa vaá naa gbõ̀ònà bé e ba beè kọ́ nè va naaá, naa ní e kpẹ̀aí zaàla gbàà dénè pá Júù tẹlẹ̀ nieí.
16 Sõò 11 nen e bà ólò nyoonée nvéeá beè àà kil boo gù ea di Gálilì, kĩée e Jíízọ̀s beè noo kọ bà é monàè gbẹá á.
17 Tṍó e bà moníe, ba beè gbóó kumí sĩ́ kẽ nèe, sõò sìgà ọ̀và beè ié bàà-bàà bùlà.
18 Jíízọ̀s à gbóó kyã̀à bã̀ vá ló vaá kọ́ nè va kọọ̀: “Bàrì a ném dénè lẹ̀ẹ̀là bel mm̀ káála nè boo kunukẽ̀í.
19 Vó à naa, aalii gé naanii kọọ̀ gbò nen e bà aa dénè dó á nyooném nvée, vaá ò túí va diiléí múú boo béè Tẹ̀, Sã́áná, nè nyómá káí.
20 Noomaí va kọ bà á gbàntṍ ló dénè log em beè nèi. Ẹbvii! Mè nda dìí ló dénè dee dọ̀ọ̀mà ke kùbmà bàlà booí.”
Gbò nu ge nvee kpĩ́í ló ea di kèkẽ
^ Ẹ̀b A5.
