Lé Kpẹ̀a E Máátìù Beè Emí 20:1-34
20 “Boo béè kọọ̀ Boǹ Méné Bàrì dì belí tẹ̀ íè tọ ea numà àà gé kolí gbò e bà é sí tóm mm̀ a ól vã́ìn.
2 Tṍó ea ni zọ gbò tómá bilá ló kọ à é kpẽ́è ene kà dìnáriọ̀s neè va ló dee, a beè gbóó lẹ̀ẹ̀là va tẹlẹ mm̀ a ól vã́ìn.
3 Tṍó ea ni dú gbán sĩ́ìna òb tóm* boo lọ̀ọ̀le, a beè mòn nàgé dõona gbò e bà di élá kèki e bà gáà ie tóm.
4 À gbóó kọ́ nè va kọọ̀. ‘Aalii gé sii tóm mm̀ ńdáà ól vã́ìn, mè m̀ é kpẽ́ kpègè ea bọ́ló nèi.’
5 Ba beè gbóó àà. A beè àà nàgé gé kolí dõona gbò tṍó ea é láá dú boo òb nè bàà tóm nè boo taà tóm fèèbe.*
6 Dee deè nvée, a beè kpáá àà tṍó ea é láá dú boo 5 tóm* ló èlà vaá mòn dõona gbò e bà di élá kĩá. À gbóó bĩiná va kọọ̀, ‘Éé ní ea náa ò dií élaí kĩí zivè deè nieí e nóo síì tóm ẽ́?’
7 Ba aalá nèe kọọ̀, ‘Boo béè kọọ̀ tọ́ọ̀ nen gáà túi ló tóm.’ À kọ́ nè va kọọ̀, ‘Boolo aalii gé sii tóm mm̀ ńdáà ól vã́ìn.’
8 “Tṍó ea ni dú ló èlà, tẹ̀ íè ól vã́ìna beè gbóó kolí nen ea beè tú sẹlẹ́ togó tómá vaá kọ́ nèe kọọ̀, ‘Kolí gbò tómá vaá ò kpẽ́ ba kpègè nè va. Dààmà togó kpẽ́ dú ló gbò e ba beè dú boo ló èlà, vaá gbò e ba beè zẹ́ẹ́ ináá á dú gbò dee deè nvée.’
9 Tṍó e gbò e ba beè dààmà togó tóm tṍó ea é láá dú boo 5 tóm ló èlà dú, a beè kpẽ́ ene kà dìnáriọ̀s nè buù ọ̀và.
10 Tṍó e gbò e ba beè dààmà togó tóm boo lọ̀ọ̀le dú, ba beè dòòmà kọọ̀ bà é kpẽ́ kpègè ea el vó neè baala. Sõò ba beè kpẽ nágé ene kà dìnáriọ̀s nè buù ọ̀và.
11 Tṍó e bà né va, bà gbóó dààmà togó gè nuumi bel ló tẹ̀ íè ólá,
12 vaá kọọ̀, ‘Gbò e bà ã́àa dùí tú áá ene kà ávà siimá tóm. Sõò kpègè eo kpẽ́è nè va ní eo kpẽ́ nàgé nè beéle e beè tú zivè dee tõoma kè gbei siimá gã́bug tóm ẽ́!’
13 Sõò a beè aalá nè enè ọ̀và kọọ̀, ‘Gbálàí, ním síì ni tọ́ọ̀ kà pọ́lọ́. Ene kà dìnáriọ̀s ní em beè zigà kọ m̀ é kpẽ́ nè ni ẽ́, sẹ̀ níì vó nì?
14 Tú o kpègè vaá ò aà. À taním gè kpẽ́ tẽ̀ènè kà kpègè em kpẽ́è nè oloí nè nàgé gbò e ba beè dú boo ló èlà.
15 É kọ náa lelàḿ ló gè tú ńdáà nu naamá nú ea léémám? Sẹ̀ ò bẹ́ẹ̀m nyíe ló* boo béè kọọ̀ m̀ dúù lé?’
16 Mm̀ tẽ̀ènè sĩ́deèá, gbò e bà di deè nvée é beè di deèsĩ́, vaá gbò e bà di deèsĩ́ é beè di deè nvée.”
17 Tṍó e bà di èèlè e bà gé aà kil Jèrúselẹ̀m, Jíízọ̀s beè kolí 12 nen e bà ólò nyoonée nvéeá kilma kpògà kẽ, vaá kọ́ nè va kọọ̀:
18 “Pãanei tṍ! È gé aà kil Jèrúselẹ̀m, vaá bà é tú Sã́áná nená nvee bá gbò togó vààla gyọ́ọ nè gbò émì kpá. Ba é béélá ú nèe
19 vaá túe nvee bá gbò e bè níì pá Júù nì kọ bà á nvèèmàe lẹ́, kpọ́ẹ té ló, vaá túe ká kú té. Vaá à é kẽeà ní ea égè taà dee.”
20 Tṍóá, vaà Zẹ́bidì beè gbóó faalá pá a nvín domáé ló, vaá kumíe dúnú ke gbàà boo béè kọ à géè gbĩ́ gè bànie nu bá.
21 Jíízọ̀s à gbóó bĩináe kọọ̀: “Éé ní eo gbĩ́ì kọ ḿ naa nè ni ẽ́?” À aalá nèe kọọ̀: “Zìgà nèm kọọ̀ pálaa kà nà nvíní é ĩ́ìni tẽ́ kpàn mm̀ o Boǹ Méné. Enè ọ̀và á ĩìni tẽ́ boo bá lè vaá enè ọ̀và ĩ́ìni tẽ́ boo bá kie.”
22 Jíízọ̀s à kọọ̀: “Nóo nyímàì nú eo gé bĩ́inai. É kọ ò é láá õi nu em é gé õ̀í?” Ba aalá nèe kọọ̀: “Èé láá õ̀.”
23 À kọ́ nè va kọọ̀: “Mm̀ kà-kà, ò é ṍi, sõò náa kuu bá nda gè sà neń ea é ĩ́ìm tẽ́ boo bá lè nè boo bá kie. À dì nè gbò e ńdáà Tẹ̀ beè kpoogè dee ló sẹ̀ẹ̀.”
24 Tṍó e òb nen ea sígáá dã́ naa vó, bà gbóó nvèè súng ló pálaa ọ̀và.
25 Sõò Jíízọ̀s à gbóó kolí va nvea ló vaá kọ́ nè va kọọ̀: “Boolo nyímàì kọọ̀ gbò e bà gé bẹl ólò lẹ̀ẹ̀là bel ló gbò e bà gé bẹl boo, vaá gbò pọ̀b nen ólò lẹ̀ẹ̀là bel ló gbò e ba dì vá kè kẽ.
26 Boolo ó gá naanii vó, sõò kọ̀láá nen ea gbĩ́ gè ié pọ̀b dọ̀ ea dìí zẹ̀ẹ̀ é íè ge sí tóm nè dõona gbò.
27 Vaá kọ̀láá nen ea gbĩ́ gè tú túá dọ̀ ea dìí zẹ̀ẹ̀ é íè ge dú gyóòlo nè nagbòa.
28 Dì belí bé e Sã́áná nená beè dú naaá, níì ge kọ bà á siè tóm neèe nì, tãa vó, a beè dú ló gè sí tóm nè dõona gbò nè ge tú a dùm aamá gã́bug nen.”
29 Tṍó e Jíízọ̀s nè gbò e bà ólò nyoonée nvée géè aa Jérikò, gã́bug nen beè bììàẹ́ nvée.
30 Tṍó e bàà neǹ gímá dẽe e ba beè di ĩ́ìtẽ́ gã́ èèlèa dã́ kọọ̀ Jíízọ̀s gé téní, ba beè gbóó vulí kpã́ kọọ̀: “Neń Ea Íéi, iéi sàn nyíe ló, e Nvín Dévìd!”
31 Sõò gbò e bà beè di kĩá beè bèl va bel ló vaá kọ́ nè va kọ bà á pĩigã́. Sõò ba beè kilsĩ́ gè vulí kpã́ mm̀ agẹ mon kọọ̀: “Neń Ea Íéi, iéi sàn nyíe ló, e Nvín Dévìd!”
32 Jíízọ̀s à gbóó elá, kolí va, vaá bĩiná va kọọ̀: “Éé ní eo gbĩ́ì kọ ḿ naa nèi ẽ́?”
33 Bà aalá nèe kọọ̀: “Neń Ea Íéi, naa kọ é mòn nu.”
34 Jíízọ̀s à gbóó tó va sàn, vaá daá va bá boo dẽe. Tẽ̀ènè tṍóá, ba beè gbóó mòn nu vaá bììàẹ́ nvée.
Gbò nu ge nvee kpĩ́í ló ea di kèkẽ
^ Mm̀ Gríìk, níà “ní ea égè taà kà ávà.”
^ Mm̀ Gríìk, níà “ní ea égè ọ̀ọ̀lẹ̀ nè sĩ́ìna òb kà ávà.”
^ Mm̀ Gríìk, níà “ní ea égè òb nè ene kà ávà.”
^ Mm̀ Gríìk, níà “ò íè bẹẹ súú dẽe.”
