Lé Kpẹ̀a E Máàk Beè Emí 1:1-45
-
Jṍòn Neǹ Dììlè Nen Múú kọ́ kpẹ̀a (1-8)
-
Dììa múú Jíízọ̀s (9-11)
-
Sétàn ẹbmà Jíízọ̀s (12, 13)
-
Jíízọ̀s daamà togó gè kọ́ kpẹ̀a gbẹá Gálilì (14, 15)
-
Túá gbò e Jíízọ̀s beè kolí kọ bà á nyoonèèe nvée (16-20)
-
Jíízọ̀s kpó zọ lọl mm̀ nen (21-28)
-
Jíízọ̀s bó gã́bug nen gbẹá Kàpánìòm (29-34)
-
Jíízọ̀s tãàgã ló Bàrì gbẹá kĩée ea dú áá ẹ̀ẹ̀ (35-39)
-
Jíízọ̀s bó neń e kom̀ kulè di ló (40-45)
1 Nee bé e lé kpẹ̀a ea kil ló Jíízọ̀s Kráìst, ea dú Sã́áná Bàrì beè dààà togó naaí:
2 Dì belí bé e ba beè emí mm̀ kpá Àìzáíà ea dú neǹ kọ́ọ̀ bùlà Bàrì naaá kọọ̀: “(Ẹ̀b! M̀ é lẹẹlà nà neǹ lẹ̀ẹ̀la tóm ea é gyá ní sĩ́, vaá à é kpóògè dee ló o èèlè.)
3 À íe neń ea di boo kpáà bàlà ól ea gé vee kọọ̀: ‘Sii tóm ló èèlè Jìhóvà!* Naanii kọọ̀ gbò a èèlè á lèlà.’”
4 Jṍòn Neǹ Dììlè Nen Múú beè di boo kpáà bàlà ól ea géè kọ́ kpẹ̀a nè gbò nen kọ bà á ọgá aa ló ba pọ́lọ́ vaá dììa múú kọbé Bàrì ia ló ba pọ́lọ́ nè va.
5 Dénè gbò e bà di Jùdíà nè Jèrúselẹ̀m géè síé ló, vaá a beè tú va diilé múú mm̀ Pène Jọ́dàn tṍó e bà kọ́ ba pọ́lọ́.
6 Jṍòn beè nvèà kọ̀là ló e bà tú gyáà kámeẹ̀l naamá, vaá tú kpá láá e bà tú kpá nom naamá bọá tõ̀ò tẽ́, vaá a beè olòó bà ńgùlù bèè vaá dá nóò záá zóó.
7 À géè kọ́ kpẹ̀a kọọ̀: “Neń ea gé dú nvéè nda el kpãà nda, vaá ním sim̀ tùlà ge taalá díí boo a kpá kátọ.
8 Nda túùi diilé múú, sõò ẹlẹ é túi diilé múú tení dú ló nyómá káí.”
9 Mm̀ gbò deeá, Jíízọ̀s beè gbóó aa Názarẹ̀t ea di Gálilì sí ló Jṍòn naa ní e Jṍòn túe diilé múú mm̀ Pène Jọ́dàn.
10 À gé aà gé mm̀ múúá dọ bàlà kẽ, à gbóó mòn káála ea kuuà, vaá nyómá káí ea meà belí kú-kuú kẽ beè gbóó eláẹ́ boo.
11 Mon beè gbóó sìlà aa káála kọọ̀: “Oloò ńdáà Sã́áná em vulè. Nyíém palàge ẹẹ ní ló.”
12 Tẽ̀ènè tṍóá, nyómá káíá beè gbóó faaláẹ kilma boo kpáà bàlà ól.
13 A beè tõó boo kpáà bàlà ólá 40 dee, vaá Sétàn géè ẹ̀bmàe. Gbò nom beè dì nàgé boo kpáà bàlà ólá. Sõò gbò nyómá tóm géè nvèè bá nèe.
14 Tṍó e ba ni síi Jṍòn lọ̀l, Jíízọ̀s beè gbóó kil Gálilì gé vee lé kpẹ̀a ea aa bá Bàrì
15 kọọ̀: “Tṍó e ba beè íbá lóá a lée, vaá Boǹ Méné Bàrì a íná kuló. Ọgai, vaá ò íei zìgà mm̀ lé kpẹ̀aí.”
16 Boo tṍó ea gé kyãa gã́ Pène Gálilì, a beè mòn Sáímòn nè a vígà Ándrù e bà gé tóbví gbṍò, boo béè kọ ba beè dú gbò síì dọọ̀.
17 Jíízọ̀s à gbóó kọ́ nè va kọọ̀: “Dui gé nyooném mi nvée, mè nda é nóòmài bé eo é gbĩ́i gbò nen belí bé eo ólò kpoi dọọ̀ naanii ã́.”
18 Tẽ̀ènè tṍóá, bà gbóó sọ̀bá ba gbṍò gbẹẹ́ kẽ vaá nyoonée nvée.
19 Tṍó ea kyãà ńkem iná deèsĩ́, a beè mòn Jém̀z nvín Zẹ́bidì nè a vígà Jṍòn e bà di mm̀ ba faà sĩ́ múú e bà gé sáálá gbṍò.
20 À gbóó gbẹá boo kolí va. Bà gbóó aa ló ba tẹ̀ Zẹ́bidì nè gbò e ba beè tú ló tóm gbẹẹ́ mm̀ faàa, vaá nyoonée.
21 Bà gbóó àà kil Kàpánìòm.
Tṍó ea ni dú Deè Bõ̀séi, à gbóó àà kil mm̀ tọ bõ̀ònaló fã̀ pá Júù vaá dààmà togó noomà nu.
22 Bé ea nóòmà nu naa beè palàge bọọ́ vá ló, boo béè kọọ̀, à géè noomà nu belí neń ea íe kpóó lẹ̀ẹ̀là bel, níì belí gbò émì kpá nì.
23 Tṍóá, à íe ene kà gbálà e zọ beè dìé m, ea beè di mm̀ ba tọ bõ̀ònaló fã̀, vaá a beè vulí kpã́ kọọ̀:
24 “Jíízọ̀s eo dúù Názarẹ̀t, éé ní eo gbĩ́ìí ló é? É kọọ̀ ò dúù gé kyọ̀i sĩ́? M̀ palàge nyimá kọọ̀ ọ̀ọ̀ Neń Ea Di Káí E Bàrì Beè Lẹ̀ẹ̀là!”
25 Sõò Jíízọ̀s beè kọ́ẹ bel kọọ̀: “Pĩigã́ ni, vaá ò aàẹ́ m!”
26 Tṍóá, zọá beè gbóó naa kọọ̀ gọ́í á sii gbálàa. À gbóó kòòlà kpã́ vaá ààẹ́ m.
27 A beè palàge bọọ́ ló gbò e bà di kĩá naa ní e bà daamà togó gè kọ́ nè ene kọọ̀: “Níì ééí é? Níà ãa nòòmànù! À tú kpóó ea íe lẹ̀ẹ̀mà bel ló gbò zọ vaá bà gbànie tṍ ló.”
28 Vó beè naa kọọ̀ kpẹ̀a ea kilíé ló a gbẹá boo zààlà iná dénè ketõ̀ò ea di bálásĩ́ Gálilì.
29 Jém̀z nè Jṍòn beè gbóó nyooné va aa tọ bõ̀ònaló fã̀ pá Júùa kil be e Sáímòn nè Ándrù ólò tõo.
30 Kà vaà Sáímòn beè di mà kẽ e sìsã́ géè síé ló, bà gbóó gbẹá boo kọ́ nú ea kilíé ló nè Jíízọ̀s.
31 Tṍó ea ínaé ló, à gbóó siíe bá ló bá lọl boo. Sìsã́á à gbóó táẹ́ ló, naa ní ea aa boo naa nu nè va.
32 Tṍó ea ni dú ló èlà e nàànì ni dọ, gbò nen beè gbóó dààmà togó gè faalá gbò zọ̀ló nè gbò e zọ di m domáé ló,
33 vaá dénè gbò e bà di boná beè bõoná gã́ nùtọá.
34 Vó à naa, a beè bó gã́bug gbò e kele-kele íb zọ̀ló di ló vaá kpó zọ lọl mm̀ gã́bug nen. Sõò, náa beè zìgà kọọ̀ gbò zọá á ló bel boo béè kọ ba beè nyimá kọọ̀ ẹ̀ẹ̀ Kráìst.
35 Kà bòm dee tṍó e dee gáà ẹẹ, a beè gbóó dọ kèdẹi vaá àà kil kĩée ea é dú áá ẹ̀ẹ̀ gé tã̀àgã ló Bàrì.
36 Sõò, Sáímòn nè gbò e ba beè dìé ló beè gbĩ́e bã kọ̀láá ketõ̀ò,
37 vaá tṍó e bà moníe, ba gbóó kọ́ nèe kọọ̀: “Kọ̀láá nen gé gbĩ́ ni.”
38 Sõò a beè kọ́ nè va kọọ̀: “Naanii èé aà bã gbò boń ea di kuló kĩí naa ní em é kọ́ nágé kpẹ̀a kĩá, boo béè kọọ̀ níà nú em beè dú ló é.”
39 À gbóó àà gé kọ́ kpẹ̀a mm̀ gbò tọ bõ̀ònaló fã̀ pá Júù beeá ló zivèkà Gálilì vaá kpó zọ lọl mm̀ gbò nen.
40 À íe nagé ene kà gbálà e kom̀ kulè di ló ea beè dù gé kumíe dúnú ke gbàà, vaá bànie kọọ̀: “Be à dú o bùlà, ò é láá naa kọ ḿ boá.”
41 A beè dúe ńsàn nyíe. À gbóó nììnà bá daaẹ́ ló vaá kọ́ nèe kọọ̀: “M̀ gbĩ́ì kọ ó boá.”
42 Tẽ̀ènè tṍóá, kom̀ kulèa beè gbóó táẹ́ ló vaá kpálóe à gbóó õ̀òà.
43 Jíízọ̀s à gbóó gbẹá boo kọ á àà, vaá a beè ãanée
44 kọọ̀: “Ó gá kọ́ nè tọ́ọ̀ nen, sõò àà gé tú o lóó zogè neǹ vààla gyọ́ọ, vaá ò tú o dõ̀ònù e Log Mózìs kọ́á nèe, kọbé bà nyímá kọ o õoà.”
45 Sõò tṍó e gbálàa aà, a beè kọ́ nú ea nááá zaali naa ní e Jíízọ̀s náa beè láá taaá ló bàna gbò bon ea di kĩá. Tãa vó, a beè tõó kĩée ea é dú áá ẹ̀ẹ̀, sõò gbò nen géè kònà aa dénè ketõ̀ò dúé ló.
Gbò nu ge nvee kpĩ́í ló ea di kèkẽ
^ Ẹ̀b A5.
