12 TOGÓ BEL GE NÒ
SỌ́L EA GÃ́BUG DÚ 119 Èé Íè Ge Ié Zìgà
O Béèlàfùl Á Zogè Kọ Ò Íè Zìgà
“Boo béè kọ zìgà bel ní e tõomà nakà di dùmí ẽ́, níì nú e monmà dẽe nì.”—2 KỌ́R. 5:7.
NÚ EÉ NÓ
Èé ló bel boo bé eé láá dẹ̀ẹ̀a boo tùle ea aa bá Bàrì naa tṍó e gé ne béèlàfùl.
1. Éé ní ea beè naa kọ nyíè neǹ tóm Pọ́ọ̀l á ẹẹ tṍó ea kẽea boo bé ea beè tõó dùm naa ẽ́?
TṌÓ e neǹ tóm Pọ́ọ̀l nyimá kọ bà é gé fẹẹ̀ẹ, a beè kẽ̀èa boo bé ea beè tõó dùm naa vaá nyíée beè palàge ẹẹ. A beè kọọ̀: “M téélá teeá iná ke kùbmà, m náa nú e zìgà belí bĩ́inaḿ bá.” (2 Tím. 4:6-8) Pọ́ọ̀l beè nè kà lé béèlàfùl vaá tú dénè a dùm fã̀àmà Jìhóvà, vó beè naa kọ á agala boo kọọ̀ nyíè Jìhóvà ẹ́ẹ̀lìèé ló. Beele gbĩ́ gè nè nàgé lé béèlàfùl vaá naa kọ nyíè Jìhóvà á ẹẹí ló. Mósĩ́ deè ní eé láá naamá vó?
2. Éé ní e nú e Pọ́ọ̀l beè emí mm̀ 2 Kọ́rìnt 5:7 tõó dọ̀ ẹ?
2 Pọ́ọ̀l beè kọ́ kilma ló a bá nè dõona gbò e bà géè nyoone nvéè Kráìst e bà bọ́ló dẹ̀lẹ̀ nyíé boo kọọ̀: “Boo béè kọ zìgà bel ní e tõomà nakà di dùmí ẽ́, níì nú e monmà dẽe nì.” (2 Kọ́r. 5:7) Éé ní e bel e Pọ́ọ̀l beè lòa tõó dọ̀ ẹ? Tṍó e nen náa íe zìgà mm̀ Jìhóvà, à ólò nè béèlàfùl dẹ̀ẹ̀a boo nú ea dã́, nú ea mon, nè bé e nu tọ́aẹ́ ló naa. Boo dõona bá, nen ea íe zìgà ólò dẹ̀ẹ̀a boo Jìhóvà tṍó ea gé ne béèlàfùl. Bé ea lábví láb naa ólò zogè kọ à agala boo kọọ̀ Jìhóvà é neèe kpẽ́, vaá àé íèè bélè lọl ló gè tõó boo gbò dùùlà bá deè tṍ ea di mm̀ Kpá Káí.—Ps. 119:66; Híb. 11:6.
3. Mókà bélè ní e ólò ié lọl ló gè ié zìgà ẹ? (2 Kọ́rìnt 4:18)
3 Sìgà tṍó, è ólò láá nè béèlàfùl dẹ̀ẹ̀a boo nú e dã́à, nú e monì, nè bé e nu tọ́aí ló naa. Sõò èé láá nè pọ́lọ́ béèlàfùl be è dẹ̀ẹ̀a boo áá nú e dã́à, nú e monì, nè bé e nu tọ́aí ló naa tṍó e gé ne béèlàfùl ea palàge dú bíi. Ló éé? Boo béè kọọ̀ sìgà tṍó, nú e monì vaá dã̀ náa ólò dú kà-kà. Vaá èé láá naa nú ea bẽ́émá Jìhóvà be è ne béèlàfùl dẹ̀ẹ̀a boo áá nú e dã́à, nú e monì, nè bé e nu tọ́aí ló naa. (Ẹ̀klì. 11:9; Máát. 24:37-39) Èé láá naa nú “ea léémá Bàrì” tṍó e neè béèlàfùl dẹ̀ẹ̀a boo zìgà e íè mm̀ Jìhóvà. (Ẹ́fẹ. 5:10) Ge tõó boo dùùlà bá deè tṍ ea aa bá Bàrì é náa kọ é ié fẹ́ẹ́-fẹẹ̀ ló nè ẹ́ẹ́-ẹẹ̀ nyíe. (Ps. 16:8, 9; Àìz. 48:17, 18) Èé íe dùm e bè náa tá, be è kilsĩ́ gè ié zìgà.—Bugi 2 Kọ́rìnt 4:18.
4. Mósĩ́ deè ní eé láá nyimá be béèlàfùl e neè dẹẹa boo zìgà e íè mm̀ Jìhóvà, àbèè kọ à dẹẹa boo nú e monmà dẽe ẽ́?
4 Mósĩ́ deè ní eé láá nyimá be béèlàfùl e neè dẹẹa boo zìgà e íè mm̀ Jìhóvà, àbèè kọ à dẹẹa boo nú e monmà dẽe ẽ́? Kọbé è nyímá ààlaà bíbvá, à dú bíi kọ buù bẹ̀ì é bĩiná bẹẹ bá kọọ̀: Éé ní em ólò dẹ̀ẹ̀a boo tṍó em gé ne béèlàfùl e? É kọ m̀ ólò dẹ̀ẹ̀a boo nú em monmà dẽe? Sẹ̀ m̀ ólò dẹẹa boo dùùlà bá deè tṍ ea aa bá Jìhóvà ẹ? Èé ló bel boo bé eé láá kilsĩ́ gè dẹ̀ẹ̀a boo zìgà e íè mm̀ Jìhóvà tṍó e gé ne béèlàfùl kèbá táàa kà dìtõ̀òí naa: tṍó e gé sa tóm eé sí, tṍó e gé sa nen eé ílí àbèè ge iá, nè tṍó e bà néi tùle mm̀ bõ̀ònatõ̀ò. Kèbá buù kà dìtõ̀òí, èé ló bel boo nú eé láá bugi togó boo kọbé è láá nè kà lé béèlàfùl.
TṌÓ E GÉ SA TÓM EÉ SÍ
5. Éé ní ea dú bíi kọ é bugi togó boo tṍó e gé sa tóm eé sí é?
5 Dénè bẹ̀ì gbĩ́ gè sí tóm ea é náa kọ é láá ẹ̀b nú ea kil ló bẹẹ bá nè pá bẹẹ tọ. (Ẹ̀klì. 7:12; 1 Tím. 5:8) Bà ólò kpẽ́ kà lé kpègè ló sìgà tóm. Vó ólò naa kọ nen ea gé sí tómá á láá ẹ̀b nú ea kil ló a bá nè pá a tọ vaá kùmà sìgà kpègè sẹlẹ. Boo tṍó e bà ólò kpẽ́ ńkem kpègè ló sìgà tóm, vaá vó ólò naa kọ nen ea gé sí tómá á láá ié áá nú ea palàge dú bíi ló pá a tọ. Vóà naa, besĩ́ è kálá beeláfùl ge sí enè íb tóm, è ólò palàge bugi togó boo íb kpègè e bà é kpẽ́ nèi. Sõò be níà áá nú e nen bugi togó boo besĩ́ à kalá sà tóm ea é sí é, à ne béèlàfùl dẹ̀ẹ̀a boo nú ea monmà dẽe.
6. Mósĩ́ deè ní eé láá zogè kọ è íè zìgà tṍó e gé sa íb tóm eé sí é? (Híbrù 13:5)
6 Be béèlàfùl e neè dẹẹa boo zìgà e íè, èé bugi nagé togó boo bé e tóm e gbĩ́ gè sìa é láá tọá ló bẹẹ gbaa ló e íè kilma ló Jìhóvà naa. Èé láá bĩiná bẹẹ bá kọọ̀: ‘É kọọ̀ tóm em gbĩ́ì ge sìí é náa kọ ḿ labví gbò láb ea bẽ́émá Jìhóvà?’ (Pró. 6:16-19) ‘É kọ tómí é náa kọ ḿ gá láá sí nònù, kọ́ kpẹ̀a, nó Kpá Káí, vaá naa kọ ḿ di kpã́á aa ló pá nà tọ?’ (Fíl. 1:10) Be ààla gbò bíbvá dú ẽei, àé dú lé kọ é gá bã ló tómá, kọbèè ge mòn tóm eé sí náa válí. Be è íe zìgà, èé ne béèlàfùl ea zógè kọ è agàlà boo kọọ̀ Jìhóvà é ẹb nú ea kilíí ló.—Máát. 6:33; bugi Híbrù 13:5.
7-8. Mósĩ́ deè ní e ene kà vígà págbálà ea ólò tõó South America beè zogè kọ à íèè zìgà ẹ? (Ẹ̀b nàgé fòtó.)
7 Nvèè kpíí ló bé e ene kà vígà págbálà ea ólò tõó South America, ea bée kọlà Javier a beè zogè kọ à íèè zìgà naa. À kọ́ọ̀: “M beè nvèè bée ló tóm e bà é kpẽ́ gã́bug kpègè ea é dĩiné m ló nèm. Sõò, a beè tàn Javier ge dú neǹ gyà deèsĩ́ tóm kọ̀ kpẹ̀a. À kpáá kọọ̀ “Ba beè kolím kọbé nen ea di togó tómá bĩ́ínám bel. Sõò besĩ́ m̀ kalá síé ló, m beè bàn nvèè bá lọl bá Jìhóvà boo béè kọ m̀ agàlà boo kọọ̀ Jìhóvà nyímá nú ea é palàge lee ḿ ló. M beè gbĩ́ gè sìm kilsĩ́ mm̀ nà kalì vaá ié kpègè em é ẹbmà nú ea kil ló nà bá, sõò ním beè gbĩ́ gè sí tómá be náa é zigà kọ ḿ ié gã́bug tṍó em é siimá tóm nè Jìhóvà.”
8 Javier kpáá kọọ̀: “Tṍó e neǹ togó tómá nè m̀m̀ géè loá bel, a beè kọ́ nèm kọọ̀ àé dú bíi kọ ḿ tú sìgà tṍó tẹlẹ boo tṍó em é síímá tóm. M beè kọ́ nèe kọ ním é láá naa vó boo béè nà sìtóm kọ̀ kpẹ̀a.” Javier náa beè zìgà ge sí tómá. Tṍó e bàà sè ni téní, a beè gbóó dú neǹ gyà deèsĩ́ tóm kọ̀ kpẹ̀a. Tṍó e sìgà ẽ́ ni téní, a beè gbóó mòn tóm ea é tú sìgà dee siimá. À kọ́ọ̀: “Jìhóvà beè dã́ nà tã̀àgã ló vaá nvèè bá nèm kọ ḿ láá mòn tóm ea é nveè bá nèm kọ ḿ dú neǹ gyà deèsĩ́ tóm kọ̀ kpẹ̀a. Nyíém palàge ẹẹ kọ m mon tóm ea náa kọ ḿ láá tú gã́bug tṍó siimá tóm nè Jìhóvà nè pá vígà.”
Be bà gbĩ́ gè dàlà ni kpãa ló gbẹá boo bọọ tóm, é kọ nú eo é sa é zógè kọ ò agàlà boo kọọ̀ Jìhóvà nyímá nú ea é palàge lee ní ló? (Ẹ̀b 7-8 kpò)
9. Éé ní eo nóò lọl ló nú ea beè naaá ló Trésor ẹ?
9 Éé ní ea bọ́ló kọ é naa be è monì kọọ̀ tóm e gé sí náa sọ́i tọ́ deè kọ é láá ié tṍó gè siimá tóm nè Jìhóvà ẹ? Bugi togó boo nú ea beè naaá ló ene kà vígà págbálà ea bée kọlà Trésor, ea ólò tõo Congo. À kọ́ọ̀: “M̀ ã́àa ié tóm ea ólò palàge leemám gè sì. Ba beè kpẽ́ taà tóm íb kpègè em beè olòó dé ló tóm em beè zẹ́ẹ́ olòó sì nèm, vaá gbò nen beè palàge nvèèm ka ló.” Sõò, Trésor beè olòó lọẹ nònù, tú tṍó tẹlẹ boo tṍó ea ólò siimá tóm, vaá ba beè olòó tãgĩ́e bá kọ á kpọ́ kyáá bel kọbé gbò nen náa nyímá pọ́lọ́ láb e bà ólò labví gbẹá boo ba tóm. A beè tàn Trésor gè aa ló tómá, sõò pọ̀ beè siíe kọ náa é válí gè mòn dõona kà tóm ea é sí. Éé ní ea beè nvèè bá nèe ẽ́? À kọ́ọ̀: “Nú ea di mm̀ kpá Hábakọ̀k 3:17-19 beè nvèè bá nèm kọ ḿ dã́ ból ló kọọ̀ kọbèè à gá náa vaá m̀ aa ló tómá, Jìhóvà é ẹb nú ea kilím ló. M beè gbóó aa ló tómá.” À baatẽ́ kọọ̀: “Gã́bug gbò e bà di togó tóm ólò dòòmà kọọ̀ nen é náa kọ̀láá kà nú e bà kọ́ á naa, vaá di kpènà ló gè aa ló pá a tọ nè ge fã̀ Bàrì kọbé à láá sí tóm e bà é kpẽ́ gã́bug kpègè nèe. Nyíém ẹ́ẹ kọ m beè kpènà gbaa ló em íè kilma ló Jìhóvà. Tṍó e enè gbáá ni téní, Jìhóvà beè nvèè bá nèm kọ ḿ ié tóm ea náa kọ ḿ láá ẹ̀b nú ea kil ló nà bá vaá ié tṍó gè fã̀àmàe. Tṍó e túù Jìhóvà naamá túá kà nú mm̀ bẹẹ dùm, nu é láá tàvàlàí ló mm̀ sìgà tṍó, sõò Jìhóvà é ẹb nú ea kilíí ló.” Mm̀ kà-kà, be è dẹlẹ nyíé boo gbò dùùlà bá deè tṍ nè zìgànù Jìhóvà, vaá nè béèlàfùl ea zógè kọ è íèè zìgà m, àé tã́ànèi dee bá.
TṌÓ E GÉ SA NEN EÉ ÍLÍ ÀBÈÈ GE IÁ
10. Gbò éé ní ea palàge dú bíi kọ nen á bugi togó boo tṍó ea gé sa nen ea é ílí àbèè ge iá ẹ́?
10 Ílà dóm nè va dú dõ̀ònù ea aa bá Jìhóvà, vaá náa dú pọ́lọ́ be è gbĩ́ gè ilí àbèè ge iá. Tṍó e vígà pábia gbĩ́ gè nè béèlàfùl ea kil ló nen ea é íá, àé láá bugi togó boo bé ea meà naa, bé ea ólò labví láb naa, bé ea ólò tú kpègè naamá nu naa, bé ea ólò ẹ̀b nú ea kil ló pá ba tọ naa, nè be àé láá ẹ̀b nú ea kilìèé ló naa ní e nyíée é ẹẹ. b Ge bugi togó boo gbò gáá palàge dú bíi. Sõò be níà áá nú ea bugi togó boo é, àé láá dú kọ à ne béèlàfùl dẹ̀ẹ̀à boo nú ea mon.
11. Mósĩ́ deè ní eé láá zogè kọ è íè zìgà tṍó e gé ne béèlàfùl ea kil ló nen eé ílí àbèè ge iá ẹ́? (1 Kọ́rìnt 7:39)
11 Jìhóvà palàge kaaga boo gbò vígà pábia nè gbò vígà págbálà e bà tõó boo a dùùlà bá deè tṍ, tṍó e bà gé sa nen e bà é ílí àbèè ge iá! Dì belí nu dòòmà bá, bà ólò tú dùùlà bá deè tṍ ea di mm̀ Kpá Káí siimá tóm, vó ólò naa kọ bàá elá dọ̀ọ̀mà tṍó e bà é láá lẹ̀ẹ̀là bel ló ba bá leevè besĩ́ bà kálá zọ̀ nen bilá ló ílà dóm nè va. (1 Kọ́r. 7:36) Bà ólò gbĩ́ kọọ̀ nen e bà é ílí àbèè ge iá á íe gbò kpãa e Jìhóvà ẹb kọ à dú bíi kọọ̀ dóm àbèè va á ié. (Pró. 31:10-13, 26-28; Ẹ́fẹ. 5:33; 1 Tím. 5:8) Bã̀àna tṍó e nen e náa ólò fã̀ Jìhóvà íé va lèèmá m, bà ólò tõó boo dùùlà bá deè tṍ ea di mm̀ 1 Kọ́rìnt 7:39. (Bugi.) ea kọ́ bàá iá “neǹ Kráìst.” Ge naa vó zógè kọ bà agala boo kọọ̀ Jìhóvà nyímá bé e nu tọ́a vá ló naa vaá àé ẹb nú ea kilìèè vá ló.—Ps. 55:22.
12. Éé ní eo nóò lọl ló nu dòòmà bá Rosa ẹ?
12 Bugi togó boo nú ea beè naaá ló ene kà vígà pábia e a bée kọlà Rosa, ea dú neǹ gyà deèsĩ́ tóm kọ̀ kpẹ̀a ea ólò tõó Colombia. Tóm ea ólò sì beè naa kọọ̀ ene kà gbálà e náa ólò fã̀ Jìhóvà á iée lèèmá m. Gbálàa beè leemá Rosa. Vígàí kọ́ọ̀: “Gbálàa ólò palàge nvèè bá nè gbò nen, vaá à bélí kọ ẹ̀ẹ̀ kà lé nen. A beè ié gbò láb ea ólò leemám kọ nen em é íá á ié, áá nú ea dú pọ́lọ́ dú kọọ̀ ẹ̀ẹ̀ níì enè Neǹ Ditõ̀ò Jìhóvà nì. Náa beè valím ló gè kọ́ nèe kọ ním é íáẹ boo béè kọ a beè palàge leemá m. Kà lèlà tṍóá, a beè tõo ḿ ló belí kọ à dú áá m̀m̀, vaá a beè tànim gè iá dóm, sõò m̀ gáà beè mòn nen ea di mm̀ bõ̀ònatõ̀ò ea íém lèèmá m.” Sõò Rosa náa beè ká dẽe gbẹẹ́ boo áá nú ea mon. A beè bugi togó boo bé e béèlàfùla é láá tọá ló a gbaa ló kilma ló Jìhóvà naa. Vó beè naa kọ á gá zọ̀ nà gbálàa loá bel, a beè gbóó kpáá tú gã́bug tṍó nvee mm̀ ge sí tóm nè Jìhóvà. Pọ́ì ńkem̀ tṍó aa ló tṍóá, ba beè kolíe kọ á sí Tọọ̀ Kpá Ea Dì Nè Gbò E Bà Gé Vee Kpẹ̀a Boǹ Méné, vaá à di boo kele íb sìtóm kọ̀ kpẹ̀a kátogóí. Rosa kpáá kọọ̀: “Jìhóvà a náa kọ nyíém á palàge ẹẹ.” À dú kà-kà kọọ̀ náa ólò bọọgẹ̀ valí gè naa nú e Jìhóvà gbĩ́ bọọ èlmà tõ̀ò, tṍó ea dú bíi kọ é aa ló nu ea palàge leemái. Sõò tṍó e tõò boo dùùlà bá deè tṍ Jìhóvà, à ólò dọ̀ bélè nèi.
TṌÓ E BÀ NÉI TÙLE MM̀ BÕ̀ÒNATÕ̀Ò
13. Mókà tọa ló ní e ólò láá ié nyòòmà sìgà tùle e bõ̀ònatõ̀òí néi ẽ́?
13 Gbò kànen mm̀ bõ̀ònatõ̀ò, gbò e bà gé kudẽe ló sẹ́kiùt, tọ nàà tóm nè Gbò Ge Tulè Tóm ólò nèi tùle ea é nveè bá nèi kọ é fã̀ Jìhóvà leevè. Sìgà tṍó, née ólò dã́ ból ló bùlà ea di nvéè tùle e bà néi. È ólò láá ẹ̀b nàgé kọ tùle e bà néi náa é síá tóm leevè. Vó ólò naa kọ é ká bùlà gbẹẹ́ boo lọ̀ e pá vígà e bà néi tùleá íe.
14. Éé ní ea é nveè bá nèi kọ é tõó boo tùle e bà néi mm̀ bõ̀ònatõ̀ò ẽ? (Híbrù 13:17)
14 Zìgà e íè ólò naa kọ é agala boo kọọ̀ Jìhóvà ní ea gé túlè a bõ̀ònatõ̀ò ẽ, vaá à nyímá ló nú e gé téní bá. Vó ólò naa kọ é di kpènà ló gè gbàntṍ ló, vaá ẹ̀b gbò tùle e bà néi boo bá ea bọ́ló. (Bugi Híbrù 13:17.) È nyímà kọọ̀ gè tõó boo tùle e bà néi ólò naa kọ bõ̀ònatõ̀ò á di mm̀ gbaa ló. (Ẹ́fẹ. 4:2, 3) È agàlà boo kọ náa kal ló béè kọọ̀ gbò e bà gé túlèi náa gbõoma, Jìhóvà é tã́ànèi dee bá tṍó e gban va tṍ ló. (1 Sám. 15:22) È agàlà nàgé boo kọọ̀, Jìhóvà é beè naa kọ kọ̀láá kà nu á lela sĩ́ boo tṍó ea bọ́ló.—Máí. 7:7.
15-16. Éé ní ea beè nvèè bá nè ene kà vígà págbálà kọ á láá tõó boo tùle e bõ̀ònatõ̀ò ne bã̀àna tṍó ea beè tõoé ló belí kọ tùleá náa é síá tóm ẽ́? (Ẹ̀b nàgé fòtó.)
15 Bugi togó boo nú ea beè naaá ea zógè kọọ̀ ge tõó boo tùle e bõ̀ònatõ̀ò néi ólò dọ̀ bélè nèi. Náa kal ló béè kọ gbò e bà ólò tõó Peru ólò láá ló dém bel pá Spain, gã́bug ọ̀và ólò lo nagé kele-kele dém bel. Quechua di gbàà ene kà dém bel e gã́bug ọ̀và ólò lò. Mm̀ gã́bug gbáá, pá vígà e bà di bõ̀ònatõ̀ò e bà ólò ló Quechua ólò gbĩ́ gbò e bà ólò ló Quechua tṍó e bà gé kọ́ kpẹ̀a. Sõò kọbé è láá tõó boo log e kpóó ea gé bẹl nvee kẽ, nyààa beè bã ló bé e pá vígà é kọ́ kpẹ̀a naa (Róm̀ 13:1) Vó beè naa kọ á tõo ló sìgà pá vígà kọọ̀ nyààaá é tãagẽ ba sìtóm kọ̀ kpẹ̀a. Sõò boo béè kọ pá vígà beè gbàn tṍ ló tùle e bà né vaá, Jìhóvà beè tãanè va dee bá vaá naa kọ bàá mòn gã́bug gbò e bà ólò ló dém bel Quechua tṍó e bà gé kọ́ kpẹ̀a.
16 Ene neǹ kànen e a bée kọlà Kevin, ea di bõ̀ònatõ̀ò e bà óló ló dém bel Quechua beè di zẹ̀ẹ̀ gbò e ba beè ẹ̀b kọọ̀ tùleá náa é síá tóm. À kọ́ọ̀: “A beè tõó ḿ ló belí kọọ̀ ãa tùle e bà néíá é náa kọ ge mòn gbò e bà ólò ló dém bel Quechua á tàvàlà.” Éé ní e Kevin beè naa ẽ́? À kpáá kọọ̀: “M beè kẽ̀èa boo nú ea di mm̀ kpá Próvẹẹ̀b 3:5, vaá bugi nagé togó boo nú ea beè naaá ló Mózìs. Tṍó e Jìhóvà beè kọ́ nèe kọ á tulè pá Ízrẹẹ̀l lọl Íjèpt tenmá kĩée e mii-miì pèneá dì, a beè belí kọ bà náa é láá dùùà aa bá pá Íjèpt. Sõò a beè gbàntṍ ló tùleá, vaá Jìhóvà beè tãanè va dee bá mm̀ sĩ́deè e bà náa beè ẹ̀bmà dẽe.” (Ẹ́xọ. 14:1, 2, 9-11, 21, 22) Kevin beè beeláfùl ge tõó boo ãa tùleá, vaá nyaaná bá ló bé ea ólò kọ́ kpẹ̀a naa. Éé ní ea beè sìlà aa m ẽ́? À kpáá kọọ̀: “Bé e Jìhóvà tã́ànèi dee bá naa beè palàge bọọ ḿ ló. Tṍó ea kil nvéeá, e beè olòó tú gã́bug tṍó kyààmà gbẹá kĩée e ólò kọ́ kpẹ̀a, vaá sìgà tṍó áá ene àbèè bàà nen e bà ólò ló dém bel Quechua ní e ólò mòn ẽ. Sõò kátogóí, è ólò sí kĩée e áá gbò e bà ólò ló dém bel Quechua ní e bà dìe gé kọ́ kpẹ̀a. Ge naa vó a náa kọ é láá kọ́ kpẹ̀a nè gã́bug nen, ié gbò ge sì gé kãa, nè gã́bug gbò ge noomà Kpá Káí. Gã́bug nen ólò sí bẹẹ gbò nònù kátogóí èlmà tṍó ea kil nvéeá.” Mm̀ kà-kà, Jìhóvà ólò tãanèi dee bá tṍó e tõò boo tùle e bõ̀ònatõ̀òí néi.
Gã́bug nen beè dòbá kĩée e gbò e bà ólò ló dém bel Quechua dì nè pá vígà (Ẹ̀b 15-16 kpò)
17. Éé ní eo ni nó lọl mm̀ nakà togó bel ge nòí ẽ́?
17 E ló bel boo taa kà gá ea palàge dú bíi kọ é dẹẹa boo Jìhóvà tṍó e gé ne béèlàfùl. Sõò à dú bíi kọ é dẹ̀ẹ̀a boo Jìhóvà mm̀ kọ̀láá kà nú e gé náa, dì belí tṍó e gé ne béèlàfùl ea kil ló íb kólì kyáà eé sa, íb tọọ̀ kpá eé sí, nè bé eé bumá bẹẹ gbò nvín naa. À dú bíi kọ é gá dẹ̀ẹ̀a boo áá nú e monmà dẽe tṍó e gé ne béèlàfùl, sõò é dẹ̀ẹ̀a boo gbò dùùlà bá deè tṍ e Jìhóvà néi vaá agala boo kọ àé ẹb nú ea kilíí ló. À dú nágé bíi kọ é bugi togó boo bé e béèlàfùl e neè é tọ́á ló bẹẹ gbaa ló kilma ló Jìhóvà naa. Be è náa vó, èé “kyãa boo béè Jìhóvà ea dú beélè Bàrì dọ̀ọ̀mà dè-dè.”—Máí. 4:5.
SỌ́L EA GÃ́BUG DÚ 156 Jìhóvà Dì Ḿ Ló
