1. Mókà kpãa ní ea ólò naa kọ é nyimá ló kà-kà gbò e bà gé nyoone nvéè Kráìst e?

 ENE kà nú ea ólò naa kọ é nyimá ló kà-kà gbò e bà gé nyoone nvéè Kráìst dú bẹ̀à sã́ bùlà a e bà íe kilma ló gè kọ́ kpẹ̀a. (Táítọ̀s 2:14) Sìgà tṍó, àé láá tàvàlà ní ló gè tú bẹ̀à sã́ bùlà kọọmá kpẹ̀a. Be à sẹlẹ, òé láá ié íb tọa ló e ene kà neǹ kànen beè ié kilma ló gè kọ́ kpẹ̀a. Neǹ kànená kọ́ọ̀, “Sìgà tṍó, náa ólò tànim gè kọ́ kpẹ̀a.”

2. Éé ní ea é láá naa kọ á tàvàlàí ló gè tú bẹ̀à sã́ bùlà kọọmá kpẹ̀a ẹ́?

² Sìgà tṍó, à ólò leemái gè sí dõona kà tóm nè Jìhóvà èlmà ge kọ́ kpẹ̀a. Ló éé? Boo béè kọọ̀ tṍó e tibvì vaá sí tóm ló tọ gè tõó m fã̀ Bàrì, nvèè bá nè gbò e nu kyọa ló, àbèè ge síè kpóó ló pá vígà, è ólò vàlẹ̀ bá mòn nú ea silà aa mm̀ tóm e síì. È ólò dé kpéè ló fẹ́ẹ́-fẹẹ̀ ló nè vulà tṍó e gé zọ pá vígà siá tóm, vaá nyíé va ólò ẹẹ ló gbò tóm e síì nè va. Boo dõona bá, àé láá dú kọ e tú gã́bug gbáá kọọmá kpẹ̀a gbẹá kĩée e ólò kọ́ kpẹ̀a vaá è gáà mòn tọ́ọ̀ kà lé nu ea silà aa m, àbèè kọ gã́bug gbò e bà di kĩée e ólò kọ́ kpẹ̀a náa gbĩ́ gè pãanéi tṍ ló. È nyímà nàgé kọọ̀ bé e ke kùbmà nakà bàlà booí gé dũuà iná kuló naa, níà bé e gbò nen náa é bọọgẹ̀ pãanéi tṍ ló naa ẽ́. (Máát. 10:22) Éé ní ea é láá nvèè bá nèi kọ é kilsĩ́ gè tú bẹ̀à sã́ bùlà kọọmá kpẹ̀a ẹ́?

3. Mósĩ́ deè ní e bel dòòle ló ea di mm̀ kpá Lúùk 13:6-9 tẹ́lẹ bàlà kẽ bé e Jíízọ̀s beè tú bẹ̀à sã́ bùlà kọọmá kpẹ̀a naa ẽ́?

³ Èé láá nó nu lọl ló bé e Jíízọ̀s beè tú bẹ̀à sã́ bùlà kọọmá kpẹ̀a naa. Tṍó e Jíízọ̀s beè di boo kunukẽ̀í, náa beè aa ló gè tú bẹ̀à sã́ bùlà kọọmá kpẹ̀a. Kàsĩ́ tṍó e tṍó téní, a beè kpáá palàge tú gã́bug tṍó kọọmá kpẹ̀a. (Bugi Lúùk 13:6-9.) Dì  belí bé e ene kà gbálà beè fó té fíìg vaá tú gã́bug gbáá siimá tóm ló sõò náa múmí naaá, níà bé e Jíízọ̀s beè tú taà gbáá kọọmá kpẹ̀a nè pá Júù sõò gã́bug ọ̀và náa beè pãanée tṍ ló naa ẽ́. Sõò dì belí bé e gbálà ea beè fó té fíìga náa beè aa ló gè sí tóm ló naaá, níà bé e Jíízọ̀s náa beè aa ló gè kọ́ kpẹ̀a nè gbò e bà náa beè pãanée tṍ ló naa ẽ́. Tãa vó, Jíízọ̀s beè kpáá palàge siá kpóó ló nyòòmà ge kọ́ kpẹ̀a nè va.

4. Ténì kà éé ní eé láá nó lọl ló Jíízọ̀s e?

⁴ Mm̀ nakà togó bel ge nòí, èé ló bel boo bé e Jíízọ̀s beè tú bẹ̀à sã́ bùlà kọọmá kpẹ̀a naa, bọọ èlmà tõ̀ò, mm̀ dee-deè nvéè ọ̀ọ̀lẹ̀ ẽ́ ea beè kọọmá kpẹ̀aá. (Ẹ̀b “After these things” ea di mm̀ study note ea di ló Lúùk 10:1 mm̀ New World Translation.) Èé láá kilsĩ́ gè tú bẹ̀à sã́ bùlà kọọmá kpẹ̀a be è nó nu lọl ló gbò nú ea beè naa, nè gbò nú ea beè noomà. Naanii èé ló bel boo ténì kà nú eé láá nó lọl ló Jíízọ̀s: (1) A beè ká bùlà gbẹẹ́ boo gè naa bùlà Jìhóvà, (2) a beè dã́ ból ló gbò kọ́ọ̀ bùlà Bàrì ea di mm̀ Kpá Káí, (3) a beè dẹ̀ẹ̀a boo nvèè bá ea aa bá Jìhóvà, vaá (4) a beè agala boo kọ sìgà gbò é pãanèèe tṍ ló.

A BEÈ KÁ BÙLÀ GBẸẸ́ BOO GÈ NAA BÙLÀ JÌHÓVÀ

5. Mósĩ́ deè ní e Jíízọ̀s beè zogè kọ à káẹ̀ bùlà gbẹẹ́ boo gè naa bùlà Bàrì e?

⁵ Jíízọ̀s beè tú bẹ̀à sã́ bùlà vèèmà “lé kpẹ̀a ea kil ló lẹ̀ẹ̀là bel Bàrì” boo béè kọ a beè nyimá kọọ̀ níà tóm e Bàrì gbĩ́ kọ á sièe. (Lúùk 4:43) Jíízọ̀s beè tú gè kọ́ kpẹ̀a naamá túá kà nú mm̀ a dùm. Bã̀àna tṍó e kùbmà é gé bã ló a sìtóm kọ̀ kpẹ̀a, Jíízọ̀s beè kọ́ kpẹ̀a bã “gbò pọ̀b bon nè gbò ńkem̀ bon,” kọbé à láá noomà nu gbò nen. (Lúùk 13:22) A beè bumá nágé dõona gbò kọbé bà láá zọ̀ẹ kọ́ kpẹ̀a.—Lúùk 10:1.

6. Mókà bèla ní ea di zẹ̀ẹ̀ bẹẹ sìtóm kọ̀ kpẹ̀a nè dõona kà gbò tóm e ólò sí nè Jìhóvà ẹ? (Ẹ̀b nàgé fòtó.)

⁶ Ge kọ́ kpẹ̀a ní ea dú kà pọ̀bkà tóm e Jìhóvà nè Jíízọ̀s gbĩ́ kọ é sí deè nieí é. (Máát. 24:14; 28:19, 20) À íe bèla ea di zẹ̀ẹ̀ bẹẹ sìtóm kọ̀ kpẹ̀a nè dõona kà gbò tóm e ólò sí nè Jìhóvà. Dì belí nu dòòmà bá, è  ólò tìbgì gbò tọ gè tõó m fã̀ Bàrì, àbèè ge sí tóm gbẹá Bẹ́tẹẹ̀l kọbé è nveè sãa kúm bẹẹ sìtóm kọ̀ kpẹ̀a. È ólò nvèè bá nè pá vígà e búùló kyọ̀à sĩ́ nu nááá ló kọbé bà láá kilsĩ́ gè sí nònù vaá kọ́ kpẹ̀a. Tṍó e nyímà bé e gè kọ́ kpẹ̀a palàge dú bíi naa vaá kẽ̀èa boo kọọ̀ níà pọ̀bkà tóm e Jìhóvà gbĩ́ kọ é sìe, àé síèi kpóó ló kọ é olòó kọ́ kpẹ̀a. Ene kà neǹ kànen ea bée kọlà János, ea ólò tõó Hungary kọ́ọ̀, “náa íe tọ́ọ̀ kà tóm eé láá sí nè Jìhóvà ea tõò bẹẹ sìtóm kọ̀ kpẹ̀a; ge kọ́ kpẹ̀a ní ea dú kà pọ̀bkà tóm ea dú bíi kọ é sìe.”

7. Éé ní ea náa vaá Jìhóvà à gbĩ́ kọ é kilsĩ́ gè kọ́ kpẹ̀a ẹ́? (1 Tímotì 2:3, 4)

⁷ Ge nó gè ẹ̀b gbò nen bé e Jìhóvà ẹb va naa é nveè bá nèi kọ é tú bẹ̀à sã́ bùlà kọọmá kpẹ̀a. À gbĩ́ kọ gã́bug nen á dã́ lé kpẹ̀aí vaá ziga ló nú e bà nó, boo béè kọ lé kpẹ̀aí é duulà dùm gbò nen. (Bugi 1 Tímotì 2:3, 4.) Boo béè kọ lé kpẹ̀aí é duulà dùm gbò nen, Jìhóvà a bumái kọ é nyimá bá gè kọọmá kpẹ̀a nè gbò nen. Dì belí nu dòòmà bá, bróshọ̀ ea kọlà Vùlè Gbò Nen—Naa Kọ Bàá Nyoone Nvéè Kráìst, kọ́ gbò nú eé náa kọbé è láá zọ̀ gbò nen loá bel naa ní e bà é íe tàn ge nó Kpá Káí vaá dú gbò e bà é nyoone nvéè Kráìst. Kọbèè à gá náa vaá gbò nen náa pãanéi tṍ ló kátogóí, bà é láá ié nèà deè ge naa vó besĩ́ pọ̀b kpo tã̀àgã̀ kálá iná kùbmà. Nú e kọ́ọ̀ nè va kátogóí ní ea é beè láá nvèè bá nè va kọ bàá fã̀ Jìhóvà dì deèsĩ́ ẽ́. Sõò níá é láá naaá áá tṍó e kilsĩ́ gè kọ́ kpẹ̀a nè va.

A BEÈ DÃ́ BÓL LÓ GBÒ KỌ́Ọ̀ BÙLÀ BÀRÌ EA DI MM̀ KPÁ KÁÍ

8. Mósĩ́ deè ní e gè dã́ ból ló gbò kọ́ọ̀ bùlà Bàrì ea di mm̀ Kpá Káí beè nvèè bá nè Jíízọ̀s kọ á láá sí a tóm boo bá ea bọ́ló é?

⁸ Jíízọ̀s beè dã́ ból ló bé e gbò kọ́ọ̀ bùlà Bàrì ea di mm̀ Kpá Káí é ḿḿ-má naa. A beè nyimá kọọ̀ taà gbáá nè ọ̀ọ̀lẹ̀ ẽ́ ní ea é kọ́ọ̀màè kpẹ̀a ẹ́. (Dán. 9:26, 27) A beè nyimá nágé nú e gbò kọ́ọ̀ bùlà Bàrì beè kọ́ kilma ló tṍó ea é ú nè bé ea é ú naa. (Lúùk 18:31-34) Jíízọ̀s beè tú a tṍó siimá tóm leevè boo béè kọ a beè nyimá nú ea di mm̀ Kpá Káí, vó beè naa kọ á tú bẹ̀à sã́ bùlà kọọmá kpẹ̀a kọbé à láá sí tóm e Bàrì beè nèe lọl dẽe.

9. Éé ní ea náa vaá gbò kọ́ọ̀ bùlà Bàrì ea di mm̀ Kpá Káí à sièi kpóó ló kọ é tú bẹ̀à sã́ bùlà kọọmá kpẹ̀a ẹ́?

⁹ Ge dã́ ból ló gbò kọ́ọ̀ bùlà Bàrì ea di mm̀ Kpá Káí é nveè bá nèi kọ é tú bẹ̀à sã́ bùlà kọọmá kpẹ̀a. È nyímà kọọ̀ nakà pọ́lọ́ bàlà booí é gé iná kùbmà. È nyímà nàgé kọọ̀ gbò nú ea gé nááá kátogóí nè bé e gbò nen gé lábví láb naa ḿm̀-mè gbò kọ́ọ̀ bùlà Bàrì ea kil ló dee-deè nvéè deeí. Kọ́ọ̀ bùlà Bàrì ea di mm̀ Kpá Káí beè kọ méné boo gù nè méné boo kpọ̀lọ̀-kpọ̀lọ̀ é beè beá ene “mm̀ dee deè nvéè tṍó.” (Dán. 11:40) È dã́ nàgé ból ló kọọ̀ Kpóó Bẹlbẹ̀l Pá Anglo-American ní ea tõó dò kpóó tọọ̀ ńneǹ té e kpá Dániẹ̀l 2:43-45 kọ́ nú ea kil lóé. È agàlà boo kọọ̀ dì belí bé e kọ́ọ̀ bùlà Bàrìa tẹ́lẹ bàlà kẽ naa, pọ́ì ńkem̀ tṍó àla, Boǹ Méné Bàrì é kyọsĩ́ bẹlbẹ̀l gbò nen. Dénè gbò kọ́ọ̀ bùlà Bàrìí zógè kọ è di mm̀ dee-deè nvéè tṍó, vaá à bọ́ló kọ é tú bẹẹ tṍó siimá tóm leevè tení dú ló gè kọ́ kpẹ̀a.

10. Mókà dõona sĩ́deè ní e gbò kọ́ọ̀ bùlà Bàrì ea di mm̀ Kpá Káí é sièi kpóó ló kọ é kilsĩ́ gè kọ́ kpẹ̀a ẹ́?

¹⁰ Gbò kọ́ọ̀ bùlà Bàrì ea di mm̀ Kpá Káí kọ́ nágé gbò nú ea léémái gè kọ́ nè dõona gbò. Ene kà vígà pábia e a bée kọlà Carrie ea ólò tõó Dominican Republic kọ́ọ̀, “Tṍó em bugì togó boo gbò lé nu e Jìhóvà zigà kọ àé náànìè dì deèsĩ́, à ólò tànim gè kọ́ nè dõona gbò.” À kpáá kọọ̀: “Tṍó em monì bé e gbò nen gé mon tã̀àgã̀ naa, à náa kọ ḿ  nyimá kọọ̀ à dú bíi kọ gbò nen á nyimá gbò nú e Jìhóvà zigà nèi.” Gbò kọ́ọ̀ bùlà Bàrì ea di mm̀ Kpá Káí síèi kpóó ló kọ lóói á gá ọọ boo béè kọ è nyímà kọọ̀ Jìhóvà dì ea gé nveè bá nèi mm̀ bẹẹ sìtóm kọ̀ kpẹ̀a. Leila, ea ólò tõó Hungary kọ́ọ̀: “Nú ea di mm̀ kpá Àìzáíà 11:6-9 ólò sièm kpóó ló kọ ḿ kọ́ lé kpẹ̀aí nè gbò e bà sẹlẹ ló belí kọ bà náa é pãaném tṍ ló. M̀ nyímà kọọ̀, kọ̀láá nen é láá nyaaá tení dú ló nvèè bá ea aa bá Jìhóvà.” Enè kà vígà págbálà e a bée kọlà Christopher, ea ólò tõó Zambia kọ́ọ̀: “Kpá Máàk 13:10 beè gbẹẹ́ sĩ́ kọọ̀, bà é kọ́ lé kpẹ̀aí beeá ló bàlà booí, vaá nyíém ólò ẹẹ kọ m̀ di zẹ̀ẹ̀ gbò e bà ḿm̀-mè nakà kọ́ọ̀ bùlà Bàrìá.” Mókà dọ̀ Kpá Káí ní ea ólò nvèè bá nè olo kọ ó kilsĩ́ gè kọ́ kpẹ̀a ẹ́?

A BEÈ DẸ̀Ẹ̀A BOO NVÈÈ BÁ EA AA BÁ JÌHÓVÀ

11. Éé ní ea náa vaá Jíízọ̀s beè dẹ̀ẹ̀a boo Jìhóvà kọbé à láá tú bẹ̀à sã́ bùlà kọọmá kpẹ̀a ẹ́? (Lúùk 12:49, 53)

¹¹ Jíízọ̀s beè dẹ̀ẹ̀a boo nvèè bá ea aa bá Jìhóvà kọbé à láá kilsĩ́ gè tú bẹ̀à sã́ bùlà kọọmá kpẹ̀a. Náa kal ló béè kọ Jíízọ̀s beè ié kalì ge kọọmá kpẹ̀a, a beè nyimá kọọ̀ lé kpẹ̀a ea kil ló Boǹ Méné Bàrì é náa kọ gbò nen á bã̀ súng vaá naa uulìèé boo. (Bugi Lúùk 12:49, 53.) Gbò tùle bõ̀ònaló fã̀ beè noo gè fẹ́ Jíízọ̀s boo béè kọ à kọ́ kpẹ̀a. (Jọ́ọ̀n 8:59; 10:31, 39) Sõò Jíízọ̀s beè kilsĩ́ gè kọ́ kpẹ̀a boo béè kọọ̀ à nyímá kọ Jìhóvà dièé ló. A beè kọọ̀: “Áá m̀m̀ ním gé béélá. Tẹ̀ ea beè lẹ̀ẹ̀làm gé zọ́m beelá. . . . Náa sãanàm bá ló, boo béè kọ m̀ ólò naa nú ea léémáe lee.”—Jọ́ọ̀n 8:16, 29.

12. Mósĩ́ deè ní e Jíízọ̀s beè kpoogè dee ló pá a gbò nyòòne nvée kọ bàá kilsĩ́ gè kọ́ kpẹ̀a tṍó e bà bíìgè va ló é?

¹² Jíízọ̀s beè kẽeé nyíè pá a gbò nyòòne nvée kọ bà é láá dẹ̀ẹ̀a boo nvèè bá ea aa bá Jìhóvà. A beè olòó naa kọ bàá agala boo kọọ̀ Jìhóvà é nveè bá nè va tṍó e bà bíìgè va ló. (Máát. 10:18-20; Lúùk 12:11, 12) Vó beè naa kọọ̀ á siè va kpóó ló kọ bàá ié ọ̀ẹ̀ dẽe. (Máát. 10:16; Lúùk 10:3) A beè kọ́ nè va kọ bàá aa ló gbò e bà náa gbĩ́ gè pãané va tṍ ló. (Lúùk 10:10, 11) Vaá a beè kọ nagé nè va kọ bàá teelá tṍó e bà bíìgè va ló. (Máát. 10:23) Náa kal ló béè kọ Jíízọ̀s beè ié bẹ̀à sã́ bùlà vaá dẹlẹ nagé nyíé boo Jìhóvà, náa beè tú a lóó nvee kèbá gẹẹ-gẹẹ ló.—Jọ́ọ̀n 11:53, 54.

13. Éé ní ea náa vaá òé láá agala boo kọ Jìhóvà é nveè bá nè ni ẽ́?

 ¹³ Deè nieí, è íè bíi ló nvèè bá ea aa bá Jìhóvà kọbé è láá kilsĩ́ gè tú bẹ̀à sã́ bùlà kọọmá kpẹ̀a tṍó e bà bíìgèi ló. (Kùùà 12:17) Éé ní ea náa vaá òé láá agala boo kọ Jìhóvà é nveè bá nè ni ẽ́? Bugi togó boo tã̀àgã̀ ló Bàrì e Jíízọ̀s beè tã̀àgã̀ ea di mm̀ kpá Jọ́ọ̀n 17 togó. Mm̀ tã̀àgã lóá, Jíízọ̀s beè bàn Jìhóvà kọ á kùdẽe ló pá a gbò tóm, vaá Jìhóvà beè aalá tã̀àgã lóá. Nú ea di mm̀ kpá Tóm kọ́ bé e Jìhóvà beè nvèè bá nè gbò tómá kọ bàá láá tú bẹ̀à sã́ bùlà kọọmá kpẹ̀a tṍó e bà bíìgè va ló naa. Mm̀ tã̀àgã lóá, Jíízọ̀s beè bàn nàgé Jìhóvà kọ á kùdẽe ló gbò e bà é íe zìgà mm̀ lé kpẹ̀a e gbò tómá gé vee. Olo dì nàgé m. Jìhóvà gáà aa ló gè aalá tã̀àgã ló e Jíízọ̀s beè tã̀àgã̀a; Àé nveè bá nè ni belí bé ea beè nvèè bá nè gbò tómá naa.—Jọ́ọ̀n 17:11, 15, 20.

14. Éé ní ea náa vaá è nyimá kọ èé láá kilsĩ́ gè tú bẹ̀à sã́ bùlà kọọmá kpẹ̀a ẹ́? (Ẹ̀b nàgé fòtó.)

¹⁴ Kọbèè à gá náa vaá à tõoí ló belí kọ à tàvàlà ge tú bẹ̀à sã́ bùlà kọọmá kpẹ̀a mm̀ dee-deè nvéè tṍóí, èé íe kọ̀láá kà nvèè bá e íè bíi ló. (Lúùk 21:12-15) Dì belí Jíízọ̀s nè pá a gbò nyòòne nvée, èé sọtọ́ deè kọ gbò nen á sà be bà é pãanéi tṍ ló àbèè kọ bà náa é pãanéi tṍ ló, vaá née é zọ gbò nen tàlà bel. Bã̀àna tṍó e bà kub bẹẹ tóm, pá vígà ólò kilsĩ́ gè kọ́ kpẹ̀a boo béè kọ bà dẹẹa boo nvèè bá ea aa bá Jìhóvà, níì baála kói nì. Dì belí bé e Jìhóvà beè nè kpóó pá a gyóòlo mm̀ túá gbò gbááá naaá, deè nieí àé ne nàgé kpóó beele kọbé è láá vee lé kpẹ̀aí belí bé ea gbĩ́ naa. (2 Tím. 4:17) Agala boo kọọ̀ be ò dẹẹa boo nvèè bá ea aa bá Jìhóvà, òé láá tú bẹ̀à sã́ bùlà kọọmá kpẹ̀a.

A BEÈ AGALA BOO KỌ SÌGÀ GBÒ É PÃANÈÈE TṌ LÓ

15. Éé ní ea zógè kọ Jíízọ̀s beè agala boo kọọ̀ lé nu é silà aa mm̀ a sìtóm kọ̀ kpẹ̀a ẹ́?

¹⁵ Jíízọ̀s beè agala boo kọọ̀ gbò nen é pãanèèe tṍ ló. Níà nú ea beè nvèè bá nèe kọ á tú bẹ̀à sã́ bùlà kọọmá kpẹ̀a ẹ́. Dì belí nu dòòmà bá, nyòòmà dee-deè nvéè 30 C.E., Jíízọ̀s beè mòn kọọ̀ gã́bug nen beè di kpènà ló gè pãanèèe tṍ ló, vó beè naa kọ á tú va doolé ló ól e nú ea di boo ni léèvè vaá lee gè bùùlà. (Jọ́ọ̀n 4:35) Nú ea é dú enè gbáá aa ló tṍóá, a beè kọ́ nè pá  a gbò tóm kọọ̀: “Gbele tõ̀ò nu a léèvè.” (Máát. 9:37, 38) A beè kpáá kọọ̀: “Gbele tõ̀ò nu a léèvè. . . Banii Tẹ̀ Íè nu ea ni léèvèí kọ á lẹ̀ẹ̀là gbò tóm ea é kọ́lí tẹlẹ boo bàlà ólí.” (Lúùk 10:2) Jíízọ̀s beè kilsĩ́ gè dẹlẹ nyíé boo kọọ̀ gbò nen é pãane tṍ ló lé kpẹ̀aí, vaá nyíée beè ẹẹ tṍó e bà náa vó.—Lúùk 10:21.

16. Mósĩ́ deè ní e gbò bel dòòle ló Jíízọ̀s beè nvèè bá nè gbò nen kọ bàá ẹ̀b sìtóm kọ̀ kpẹ̀a boo bá ea bọ́ló é? (Lúùk 13:18-21) (Ẹ̀b nàgé fòtó.)

¹⁶ Jíízọ̀s beè noomà pá a gbò nyòòne nvée kọ bàá ká bùlà gbẹẹ́ boo gbò lé nu ea é láá sìlà aa mm̀ ba sìtóm kọ̀ kpẹ̀a, vaá níí beè siè va kpóó ló kọ bàá kilsĩ́ gè tú bẹ̀à sã́ bùlà kọọmá kpẹ̀a. Dì belí nu dòòmà bá, bugi togó boo bàà kà bel dòòle ló ea beè lò. (Bugi Lúùk 13:18-21.) Jíízọ̀s beè tú ńdígílí súú té mustard bààmà tẽ́ bé e sìtóm kọ̀ kpẹ̀aí é bọọ́ gbàà mm̀ sĩ́deè ea dú dũ̀ùnè, vaá gbò nen náa é láá kùb naa. Jíízọ̀s beè tu nagé nú ea ólò gbuuve fétúlú bààmà tẽ́ bé e lé kpẹ̀a ea kil ló Boǹ Méné Bàrì é zaalà iná gã́bug ketõ̀ò vaá nyaaná dùm gbò nen naa. A beè nvèè nàgé bá nè pá a gbò nyòòne nvée kọ bàá nyimá kọọ̀ lé nu é silà aa mm̀ ba sìtóm kọ̀ kpẹ̀a.

17. Mókà bug ní ea náa vaá à dú bíi kọ é kilsĩ́ gè kọ́ kpẹ̀a ẹ́?

¹⁷ Tṍó e bugì togó boo bé e sìtóm kọ̀ kpẹ̀aí gé nveè bá nè gã́bug nen naaá deè nieí, à ólò sièi kpóó ló kọ é tú bẹ̀à sã́ bùlà kọọmá kpẹ̀a. Buù gbáá, gã́bug gãà gbò nen e bà íe lèèma ólò zọ̀i sí kẽeè Sẹ̀lẹ̀nù Ge Kẽ̀èa Boo Ú Kráìst, vaá zọ̀i noá Kpá Káí. Gã́bug nen ólò dììa múú vaá zọ̀i kọ́ kpẹ̀a. Née nyímà ló gã́bug gbò e bà é kpáá zọ̀i fã̀ Jìhóvà, sõò è nyímà kọ Jìhóvà é bṍònè ló gbele gã́bug nená naa ní e bà é ful zelí bá pọ̀b kpo tã̀àgã̀ ea gé dú sĩ́. (Kùùà 7:9, 14) Jìhóvà ní ea dú Tẹ̀ Íè ól ea ni léèvèaẹ, vaá à nyímá kọọ̀ gã́bug nen é kpáá ziga ló lé kpẹ̀a e gé kọ́ nè vaí. Vóà naa, à dú bíi kọ é kilsĩ́ gè kọ́ kpẹ̀a.

18. Éé ní e gbĩ́ì kọ gbò nen á nyimá ea kilíí ló é?

¹⁸ Bà ólò nyimá ló gbò e bà gé nyoone nvéè Jíízọ̀s tení dú ló bé e bà tú bẹ̀à sã́ bùlà kọọmá kpẹ̀a naa. Tṍó e gbò nen mon bé e gbò tómá tú bẹ̀à sã́ bùlà kọọmá kpẹ̀a naa, ba beè “gbóó kẽeà boo kọ ba beè olòó di nvéè Jíízọ̀s.” (Tóm 4:13) Tṍó e gbò nen mon bé e gé tú bẹ̀à sã́ bùlà kọọmá kpẹ̀a naa, bà é mon kọọ̀ è dúù gbò e gé nyoone nvéè Jíízọ̀s.