Nda beè mèà mm̀ gbáá 1983. M beè dú nvín e bè ním beè ié tọ́ọ̀ kà bo tṍó em beè mèà, sõò tṍó em tóòlà òb gbáá, zivèkà kpá lóm beè gbóó dààmà togó gè olòó nyaá ḿ ló. Nú ea é láá dú bàà gbáá aa ló tṍóá, m beè kẽ̀èà aa dáá enè deè lọ̀ọ̀lè vaá ním beè láá aa boo kyã̀à. Kọ̀láá bé em piigà ge maaná kpóó tọ́m naa, ním̀ beè láá maaná boo béè kọọ̀ tọ́ọ̀ kà kà náa beè di m. Lọl tã́gíní deeá, m̀ gáà laa kpaa kyã̀ànà. Nà zọ̀ ló beè naa kọ ḿ gá bọọ na. Kátogóí, m̀ gbẹ́à ńdígílí belí pá nvín.

Sìgà ẽ́ aa ló tṍó e kpá lóm beè zọ̀ vaá ním beè láá aa na tọá, bàà Neǹ Ditõ̀ò Jìhóvà beè kãám. À ólò dú nà lóó nu gè gũá tṍó e gbò kyáà dú, sõò deeá, m beè aa ló gbò kọ̀ kpẹ̀aá kọ bàá zọ̀m loá bel. Tṍó e bà ló bel ea kil ló Páladaìs, m beè gbóó kẽ̀èa boo nú em beè dã̀ tṍó em beè di dí vòò gbáá. Tṍóá, à íe enè nen ea ólò kọ́ kpẹ̀a aa dó dọ dó ea bée beè kọ̀là Jethro, ea ólò tõó Suriname, ea ólò dú beélè bon enè tóm mm̀ enè ẽ́ gé zọ̀ ńdáà tẹ̀ noá Kpá Káí. Jethro beè tú kà lé bá sẹ̀ẹ̀màm. M beè palàge vùlèe. Nagé, tẹ̀ nè kà ńdáà tẹ̀ beè olòó faalám siimá sìgà nònù Gbò Neǹ Ditõ̀ò Jìhóvà ea beè olòó sẹ̀ẹ̀a beélè bon. Vóà naa, tṍó e Florence, ea dú enè nen gbàà bàà gbò e ba beè kãám deeá bĩ́ínám be àé léémám gè kpáá nó bọ̀ọ̀vẹ̀, m beè aalá naa ẽei.

Florence beè gbóó faalá a dóm ea kọlà Justus domá, vaá ba beè gbá zọ̀m noá Kpá Káí. Tṍó e bà mon kọọ̀ ním ólò láá bugi nu, ba beè noòmàm bé em é bugi nu naa. Tṍó e sìgà tṍó téní, m beè láá gbóó bugi nú boo nà lóó. Enè dee, dóm nè vaí beè kọ́ nèm kọọ̀ bà lẹẹlàẹ va kọ bàá gé kọẹ̀ kpẹ̀a gbẹá Suriname. A beè dú pọ́lọ́ kọọ̀ tọ́ọ̀ nen náa beè di Orealla ea é láá tú nà nò Kpá Káí kilma sĩ́. Sõò nyíém beè ẹẹ kọ ním beè tá nyíè Jìhóvà.

Pọ́ì ńkem̀ tṍó aa ló tṍóá, ene kà neǹ gyà deè sĩ́ tóm ea kọlà Floyd beè dú Orealla, vaá iná ḿ ló tṍó ea géè kọ́ kpẹ̀a aa tọ dọ tọ. Tṍó ea ló bel ea kil ló gè zọ̀m noá Kpá Káí, m beè màngã̀. À gbóó bĩinám kọọ̀: “Éé ní ea náa kọ ó màngã̀ ẽ?” M beè kọ́ nèe kọọ̀ nda beè nó bróshọ̀ ea kọlà What Does God Require of Us? lọ̀l vaá dààmà togó gè nó kpá ea kọlà Knowledge That Leads to Everlasting Life. * M beè kọ́ nèe nú ea beè naa kọọ̀ nònùa á elá. Floyd beè noòmàm kpáá lọl dẽe, sõò ba beè nyaaná nágé ẹlẹ kilma dõòna ketõ̀ò. M beè kpáá dì nàgé e tọ́ọ̀ nen ea é zọ́m noá Kpá Káí á gé.

 Sõò, mm̀ gbáá 2004, ba beè lẹ̀ẹ̀là Granville nè Joshua, e bà dú gbò kọ̀ kpẹ̀a dénè tṍó ea dì kele, domá Orealla. Ba beè mònim tṍó e bà géè kọ́ kpẹ̀a aa tọ dọ tọ. Tṍó e bà bĩ́ínám be à taním gè nó Kpá Káí, m beè màngã̀. M beè kọ́ nèva kọ bàá zọ̀m noá kpá ea kọlà Knowledge That Leads to Everlasting Life lọl dààmà togó. Nda géè gbĩ́ gè nyimá be bàé nóòmàm tẽ̀ènè kà nú e gbò e bà géè zẹ́ẹ́ zọ̀m noá Kpá Káíá beè noomàm. Granville beè kọ́ nèm kọọ̀ nònù ólò sẹ̀ẹ̀a beélè bon. Náa kal ló béè kọọ̀ m̀ gáà aa beélè be nú ea é láá dú òb gbáá, a beè tànim gè sì. Vóà naa, Granville beè gbóó dú gé túm nvee mm̀ ńkpé kọ̀và vaá tãá m bá kilma Kíndòm Họ́ọ̀l.

Tṍó e tṍó téní, Granville beè sièm kpóó ló kọ ḿ nvèè bée ló Tọọ̀ Kpá Ea Di Kè Bá Bẹ̀l Jìhóvà. A beè kọ́ nèm kọọ̀: “À dú kà kà kọọ̀ bo dì ní ló, sõò òó láá ló bel. Enè dee, òé beè nè lòbèl kè sĩ́ gbò nen. Òé beè íè ge nè lòbèl.” A gbò moǹ bel sìà kpóó lóá beè nèm agẹ ló.

M beè dààmà togó gè zọ̀ Granville kọ́ kpẹ̀a. Sõò, gã́bug èèlè ea di beélè bon beè dú dọ̀ bànà dọ boo kpò ló gè tú kpé kọ̀và tenmá boo. Vó beè naa kọ ḿ kọ́ nè Granville kọ á túm nvee mm̀ wílbailò vaá tãá m bá kilma kọ̀láá kiẽ́e eé sí. Nakà nòònùá beè siá tóm leevè. Nda beè dììa múú mm̀ April 2005. Pọ́ì ńkem̀ tṍó aa ló tṍóá, pá vígà beè bumám kọ ḿ ẹ̀b nú ea kil ló kpá bõ̀ònatõ̀ò nè nu ge kpaamá sọ́l gbẹá Kíndòm Họ́ọ̀l.

Sõò, à dú pọ́lọ́ kọ ńdáà tẹ̀ beè ú mm̀ gbáá 2007, tṍó ea dọ aa mm̀ faà sĩ́ múú vaá ńzì faà sĩ́ múú à palàge nvèèe kom ló naa ní ea ú ńkem̀ dee aa ló dee e nuá beè naaá. A beè palàge biile nyíè pá beéle tọ. Granville beè zọ̀i tã̀àgã ló Bàrì vaá tú Kpá Káí nvèèmài nyíe gbàà. Bàà gbáá aa ló tṍóá, dõòna kà nuù gbáà gã́ beè naáí ló—Granville beè ù tṍó e faà sĩ́ múú beè diié ló.

Bẹẹ ńkem̀ bõ̀ònatõ̀ò náa beè ié ná tọ́ọ̀ neǹ kànen gbẹẹ áá enè neǹ nvèè bá sìtóm. Nyíém beè palàge bììlà boo béè kọọ̀ ńdáà lé kóò Granville ú. A beè olòó nvèè bá nèm kọ ḿ dũ̀ùà bã kpàn Jìhóvà nè ge nèm gã́bug dõòna kà gbò nú em íè bíi ló. M beè ié nèà deè ge bugi Kpá Tọ Kùdẽe Ló gbẹá nònù sè ea úá. M beè láá pììgà bugi túá kà bàà kpò, sõò m beè dààmà togó gè tò vaá gĩ́i à olòó ọví àà ḿ dẽe. A beè dọ̀ ní em aà boo plàtfóm̀.

Lóóm beè dààmà togó gè bã tõ̀ò, tṍó e dõòna kà gbò vígà e bà aa dõòna kà bõ̀ònatõ̀ò dú gé olòó nvèè bá nèi gbẹá Orealla. Nagé, tọ nàà tóm beè lẹ̀ẹ̀là ene kà neǹ kọ̀ kpẹ̀a ea di kele ea bée kọlà Kojo domá. Ge kpáá bọ̀ọ̀vẹ̀ nà zààvà, ńdáà kà nè ńdáà ńkem̀ vígà págbálà beè dààmà togó gè nó Kpá Káí vaá dììa múú. Mm̀ March 2015, ba beè ím bá ló naamá gyóòlo nvèè bá sìtóm. Tṍó e sìgà tṍó téní, m beè gbóó nè túá kà nà lòbèl kè sĩ́ gbò nen. Kà lèlà deeá, m beè màngã̀ vaá to nàgé tṍó em kẽeà boo bel e Granville beè kọ́ nèm gbò gbáá ea kil nvéeá kọọ̀: “Enè dee, òé beè nè lòbèl kè sĩ́ gbò nen. Òé beè íè ge nè lòbèl.”

Tení dú ló gbò nú ea di boo JW Broadcasting^®, ndaa nó nú ea kil ló gbò vígà págbálà nè pábia e bà di bá gbò dìtõ̀ò ea bélí ńdaí. Náa kal ló béè kọọ̀ kpá ló va gé zọ, bà kilsĩ́ gè sí gã́bug tóm vaá ié ẹ́ẹ́-ẹẹ̀ nyíe. Kilma ló nda, nda íè gbò nú em é láá na náa. Nà tàn ge tú kọ̀láá kà kói ea dìḿ ló siimá tóm nè Jìhóvà beè sièm kpóó ló kọ ḿ dú neǹ gyà deè sĩ́ sìtóm kọ̀ kpẹ̀a. Vaá tṍóá, à íe ene kà nu bọ̀ọ̀ ló ea beè gbóó naaá! Ba beè ím bá ló naamá neǹ kànen mm̀ bõ̀ònatõ̀ò e 40 neǹ kọ̀ kpẹ̀a ní ea dìe mm̀ September 2019.

M̀ ṍà zaà pá vígà págbálà nè pábia e ba beè zọ̀m noá nu vaá nvèè bá nèm kọ ḿ fã̀ Jìhóvà. Ní ea palàge bọọ, m̀ ṍà Jìhóvà e bè ním beè táẹ́ nyíeá zaa.