Ẽ́èe. Nú e Dévìd beè emíá di lèlà vaá à dú kà kà.

Kẽ̀èa boo kọ a beè émí mm̀ gã́belí nè dõòna kà gbò gã́bel ea bélí níí kọọ̀: “M̀ é gbóó ọlí sọ́l lèèmà o bée dọ̀ọ̀mà dè-dè vaá mm-mè gbò nú em beè zìgà buù dee.” “Nda é tú dénè ńdáà nyíe lèèmà ni, e Jìhóvà, eo dúù ńdáà Bàrì, vaá nda é nveè ka ló o bée dọ̀ọ̀mà dè-dè.” “Nda é leelà o bée dọ̀ọ̀mà dè-dè.”​—Ps. 61:8; 86:12; 145:​1, 2.

Tṍó e Dévìd beè emí gbò belí náa géè bugi togó kọọ̀ náa é úè. A beè nyimá kọọ̀ náàkyọ̀ gbò nen é náa kọ bàá ù, vaá a beè nyimá nágé kọọ̀ ẹlẹẹ̀ nen náàkyọ̀. (Jén. 3:​3, 17-19; Ps. 51:​4, 5) A beè nyimá kọọ̀ bã̀àna gbò e Bàrì beè tenmá kọ bà íe zìgà, dì belí Ébràhàm, Áízèk, nè Jékọ̀b beè ù. Vaá a beè nyimá kọọ̀ ẹlẹ é beè uè. (Ps. 37:25; 39:4) Sõò gbò bel ea ló mm̀ kpá Psalm 61:8 zógè bé ea beè ié tàn ge lèèlà Bàrì dọ̀ dè-dè naa, ea dú kùbmà tṍó ea é diima dùma.​—2 Sám. 7:12.

Sìgà gbò nú e Dévìd beè emí beè kọ́ nú ea beè naaáé ló, dì belí bé e émì nú ea di boo togó kpá Psalms 18, 51, nè 52 togó tẹ́lẹ bàlà kẽ naa. Mm̀ kpá Psalm 23 togó, Dévìd baatẽ́ nú ea kil ló Jìhóvà dì belí neǹ kùdẽe ló naanà ból ea ólò tulè, nè gyã́á, vaá kpènà pá a gbò naanà ból. Dévìd beè dì belí íb neǹ kùdẽe ló naanà bólá. Vaá a beè gbĩ́ gè tú ‘dénè dee mm̀ a dùm fã̀àmà Bàrì.’​—Ps. 23:6.

Kẽ̀èà nàgé boo kọọ̀ Jìhóvà ní ea beè tú a nyómá káí nè Dévìd kọ á emá gbò belá ẹ́. Gbò kọ́ọ̀ bùlà Bàrì ea é beè mm-má dì deèsĩ́ beè di zẹ̀ẹ̀ gbò nú ea beè emí. Dì belí nu dòòmà bá, mm̀ kpá Psalm 110, Dévìd beè kọ́ nú ea kil ló tṍó e Nen Ea Íée é ĩìtẽ́ “boo bá lè [Bàrì]” gbẹá káála, ea dú tṍó e Bàrì é née kpóó. Kọ á naamá éé? Kọ á lẹ̀ẹ̀mà bel ló gbò ọ́b Bàrì vaá “béélá bel ló gbò dó” ea di boo kunukẽ̀í. Dévìd ní ea beè dú nómá tẹ̀ Mèzáíà, ea dú nen ea é bẹl gbẹá káála vaá “dú neǹ vààla gyọ́ọ dọ̀ dè-dè” e. (Ps. 110:​1-6) Jíízọ̀s beè tẹlẹ bàlà kẽ kọọ̀ kọ́ọ̀ bùlà Bàrì ea di mm̀ kpá Psalm 110 togó géè ló bel kilmàè ló ẹlẹ vaá àé ḿḿ-má mm̀ dì deèsĩ́.​—Máát. 22:​41-45.

Mm̀ kà kà, Jìhóvà beè kọọ̀ Dévìd á emí nú ea kil ló tṍó e ẹlẹ beè dììmà dùma nè nú ea kil ló tṍó ea é kẽeà aa kemà ú vaá dé kpéè ló gè lèèlà Jìhóvà dọ̀ọ̀mà dè-dè. Níá nveè bá nèi kọ é dã́ ból ló kọọ̀ kpá Psalm 37:​10, 11, 29 géè ló bel kilma ló nú ea beè naaá Ízràẹ̀l tṍó ea kil nvéeá nè nú ea é nááá dì deèsĩ́ tṍó e Bàrì é ḿm̀-mè gbò a zìgànù.​—Bugi 8 kpò ea di mm̀ togó bel ea kọ́ọ̀ “Òé Zọ́m Bã Mm̀ Páladaìs” ea di mm̀ kpáí.

Vóà naa, kpá Psalm 61:8 nè dõòna kà gbò gã́bel ea ló nágé íb gbò belá zógè kọọ̀ Dévìd beè nvèè ka ló Jìhóvà dọ̀ọ̀mà tṍó ea ú. Vaá gbò nú ea beè naaí zógè gbò nú ea é beè láá naa tṍó e Jìhóvà é kẽée lọl kemà ú.