15 TOGÓ BEL GE NÒ
SỌ́L EA GÃ́BUG DÚ 30 Ńdáà Tẹ̀, Nà Bàrì Nè Nà Kóò
“Ge Tõo Bã Ló Bàrì” Léémái!
“Ge tõo bã ló Bàrì léémám.”—PS. 73:28.
NÚ EÉ NÓ
Èé ló bel boo bé eé láá tõo bã ló Jìhóvà naa, nè gbò bélè eé íe lọl ló gè naa vó.
1-2. (a) Éé ní ea dú bíi kọ é naa kọbé è láá zọ̀ nen bã̀àà kóò e? (b) Éé ní eé ló bel boo mm̀ nakà togó belí é?
É KỌ ò íè kà lé kóò? Beè vó, éé ní eo beè naa besĩ́ ò kalá duai kóò e? Àé láá dú kọọ̀ o beè olòó tú gã́bug tṍó dììmàé ló, nyimá ló gbò ànà-ànà ea gé téní bá, vaá nyimá ló gbò nú ea léémáe nè nú ea bẽ́émáe. O beè gbóó mòn kọọ̀ à íe gbò lé kpãa ea é léémá ni gè ié. Vó beè naa kọ ó vùlèe vaá túe naamá kóò.
2 Kọbé ò láá zọ̀ nen bã̀àà kóò, à bĩ́íná tṍó nè sìà kpóó ló. Níà nú ea dú nágé bíi kọ ó naa kọbé ò láá zọ̀ Jìhóvà ié kà lé gbaa ló é. Mm̀ nakà togó belí, èé ló bel boo bé eé láá tõo bã ló Bàrì naa nè gbò bélè eé íe lọl ló gè naa vó. Túá kà, èé zẹ́ẹ́ ló bel boo nú ea náa vaá à dú lé kọ é tõo bã ló Jìhóvà ea dú bẹẹ lé Kóò.
3. Éé ní ea náa vaá à dú bíi kọ é bugi togó boo gbò bélè eé íe lọl ló gè tõo bã ló Jìhóvà ẹ? Nè nu dòòle ló.
3 À dú kà-kà kọọ̀ ge tõo bã ló Jìhóvà dú lé. Sõò ge bugi togó boo nú ea náa vaá à palàge dú lé é nveè bá nèi kọ é kilsĩ́ gè tõo bã̀é ló. (Ps. 63:6-8) Dì belí nu dòòmà bá, è nyímà kọ ge dé lé gã́ gyã́á, ge gànè ló, ge daa, nè ge ṍ gã́bug múú é nveè bá nèi. Sõò gã́bug nen náa ólò naa gbò nuí, bà náa ólò ẹ̀b nú ea kil ló ba bá leevè. Bé e bugì togó boo bé e gè naa gbò nuí é dọ bélè nèi naa, níà bé ea é taníi gè naa gbò nú ea é náa kọ é ié válá ló naaé. Mm̀ tẽ̀ènè sĩ́deèá, è nyímà kọọ̀ ge tõo bã ló Jìhóvà dú lé, sõò ge bugi togó boo bélè eé íe lọl ló gè naa vó é síèi kpóó ló kọ é kilsĩ́ gè tõo bã ló bẹẹ Kóò.—Ps. 119:27-30.
4. Dẹ̀ẹ̀a boo nú ea di mm̀ kpá Psalm 73:28, mókà tọa ló ní e neǹ ọ́lì sọ́l beè iéé?
4 Bugi Psalm 73:28. Nen ea beè emí nú ea di mm̀ kpá Psalm 73 togó dú gãà Lívaì, vaá Jìhóvà beè íe bá ló kọ á tõó mm̀ a tọọ̀ káí ọlí sọ́l. Àé láá dú kọ a tú gã́bug gbáá fã̀àmà Jìhóvà mm̀ bọ́ọ̀ló dẹ̀lẹ̀ nyíé boo. Sõò, a beè mòn kọ à dú bíi kọ á kẽeé nyíè a bá kọọ̀ ge “tõo bã ló Bàrì” dú lé, vaá a beè gbĩ́ gè naa kọ dõona gbò á nyimá nágé kọọ̀ ge zọ̀ Bàrì bã̀àà kóò dú lé. Mókà bélè ní eé íe lọl ló gè tõo bã ló Bàrì e?
“GE TÕO BÃ LÓ BÀRÌ” ÓLÒ NAA KỌỌ̀ NYÍÈ NEN Á ẸẸ
5. (a) Éé ní ea náa vaá ge tõo bã ló Jìhóvà ólò naa kọọ̀ nyíéi á ẹẹ ẹ́? (b) Dẹ̀ẹ̀a boo nú ea di mm̀ kpá Próvẹẹ̀b 2:6-16, mósĩ́ deè ní e nyìmànù Jìhóvà é láá nvèè bá nè ni vaá kpènà ni ẽ́.
5 Bé e tõò bã ló Jìhóvà naa níà bé e nyíéi é palàge ẹẹ naa ẽ́. (Ps. 65:4) À íe gã́bug nú ea náa vaá níí à dú kà-kà. Túá kà dú kọ è ólò ié bélè tṍó e túù nyìmànù ea di mm̀ Kpá Káí siimá tóm. Nyìmànùá ólò naa kọ é gá ié kà agẹbá lọ̀ vaá kpènài kọ é gá naa nú ea dú pọ́lọ́. (Bugi Próvẹẹ̀b 2:6-16.) Kpá Káí kọ́ọ̀ “Ẹ́ẹ́-ẹẹ̀ nyíe á di ló nen ea íe nyìmànù, nè nen ea íe tàvẹ̀nù.”—Pró. 3:13.
6. Éé ní ea beè naa kọọ̀ neǹ ọ́lì sọ́l á gá ié ẹ́ẹ́-ẹẹ̀ nyíe ẽ́?
6 À dú kà-kà kọọ̀ à íe tṍó e nyíè gbò e bà dú kóò Jìhóvà ólò bììlà. Nyíè nen ea beè emí kpá Psalm 73 togó beè bììlà tṍó ea beè bugi togó boo gbò nú ea dú pọ́lọ́. Nyíée beè palàge bììlà tṍó ea mon kọọ̀ nu léé ló gbò e bà náa gé fã Bàrì àbèè ge gbànie tṍ ló. A beè tuumá kọọ̀ gbò bàg nè gbò dàlà kpá ló boo gé íe kọ̀láá kà nú ea bií va, vaá bà náa gé mon tã̀àgã̀. (Ps. 73:3-7, 12) Neǹ ọ́lì sọ́l beè ié tã̀àgã̀ bùlà naa ní ea bugi togó kọọ̀ tọ́ọ̀ kà bélè á gé ló gè fã̀ Bàrì. Mm̀ bììla nyíe a beè kọọ̀: “Ge ié õ̀òa nyíe náa dọ tọ́ọ̀ kà bélè nèm vaá ge lọ̀l bá mm̀ pọ́lọ́ dú zọ̀là pọ́ì.”—Ps. 73:13.
7. Tṍó e nyíéi biilà, éé ní eé láá naa kọbé è kpáá ié ẹ́ẹ́-ẹẹ̀ nyíe ẽ́? (Ẹ̀b nàgé fòtó.)
7 Náa kal ló béè kọ nyíè neǹ ọ́lì sọ́lá beè palàge bììlà, a beè nyaaná bé ea ólò bugi togó naa. A beè bã mm̀ “tọọ̀ káí Bàrì,” vaá gbẹá kĩá Jìhóvà beè nvèè bá nèe kọ á bugi togó leevè. (Ps. 73:17-19) Tṍó e nyíéi biilà, Jìhóvà ea dú bẹẹ lé kóò nyímá nú ea náa vaá nyíéi à bììlà. Be è ban tùle lọl bá Jìhóvà vaá tú nvèè bá ea gé néi tení dú ló Kpá Káí nè a bõ̀ònatõ̀ò, àé néi kói kọbé è láá kilsĩ́ gè fã̀e bã̀àna tṍó e nyíéi biilà. Tṍó e íè tã̀àgã̀ bùlà vaá née nyímà ló nu gè naa, Jìhóvà é nveèi nyíé gbàà.—Ps. 94:19. a
Nen ea dú gãà Lívaì ea beè emí kpá Psalm 73 togó, ea di élá mm̀ “tọọ̀ káí Bàrì” (Ẹ̀b 7 kpò)
“GE TÕO BÃ LÓ BÀRÌ” ÓLÒ NAA KỌ BẸẸ DÙM Á DÚ LÉ VAÁ À ÓLÒ NÈI BÓL DẼESĨ́
8. Mókà dõona kà sĩ́deè ní gè tõo bã ló Jìhóvà palàge dú lé kìlmàí ló é?
8 Ge tõo bã ló Bàrì palàge dú lé kìlmàí ló mm̀ bàà sĩ́deè. Túá kà, à ólò naa kọ bẹẹ dùm á dú lé. Ní ea égè bàà, à ólò naa kọ é ié ból dẽesĩ́ kilma ló dì deèsĩ́. (Jèr. 29:11) Naanii èé ló bel boo pálaa kà sĩ́deè e ni kólí béeí.
9. Mósĩ́ deè ní e gè tõo bã ló Jìhóvà ólò naa kọ nyíéi á ẹẹ ẹ́?
9 Tṍó e tõò bã ló Jìhóvà, bẹẹ dùm é palàge dú lé. Deè nieí gã́bug nen náa zigà kọọ̀ Bàrì dì. Bà náa nyímá ló nú ea náa vaá gbò nen à di boo kunukẽ̀í, vaá bà zigà kọ dì deèsĩ́ gbò nen náa é beè di na boo kunukẽ̀í. Sõò nú e beele nóò lọl mm̀ Kpá Káí náa kọ é “zìgà kọ Bàrì dì vaá mè à ólò kpẽ́-kpẽ́ nè gbò e bà gbĩ́e.” (Híb. 11:6) Deè nieí, nyíéi ólò palàge ẹẹ boo béè kọ è gé náa nú e Jìhóvà beè dèmii kọ é naa, naamá ge fã̀ẽ.—Dìt. 10:12, 13.
10. Dẹ̀ẹ̀a boo nú ea di mm̀ kpá Psalm 37:29, éé ní e Jìhóvà zigà nè gbò e bà dẹlẹ́ẹ nyíé boo é?
10 Gã́bug nen náa íe ból dẽesĩ́ kilma ló dì deèsĩ́, áá gè ilí va, bumá gbò pá nvín, vaá kpoogè dee ló kpègè sẹ̀ẹ̀ tṍó e bà náa é láá si ná tóm ní e bà ólò naa ẽ́. Bà náa nyímá ló gbò lé nu e Jìhóvà zigà kilma ló dì deèsĩ́. Sõò beele nyímà kọ Jìhóvà ólò ẹ̀b nú ea kil ló gbò e bà gé fã́e. (Ps. 25:3-5; 1 Tím. 6:17) È dẹlẹ̀ nyíé boo bẹẹ Bàrì nè bẹẹ Kóò vaá è agàlà boo kọ àé ḿm̀-mè kọ̀láá kà nú ea beè zìgà. È íè ból dẽesĩ́ gè fã̀ Jìhóvà dọ̀ dè-dè gbẹá mm̀ Páradaìs.—Bugi Psalm 37:29.
11. Mókà tọa ló ní e ólò ié tṍó e tõò bã ló Bàrì e, vaá à ólò tọá ló Barì naa vàẹ tṍó e tõò bã̀é ló é?
11 Ge tõo bã ló Bàrì palàge dú lé mm̀ gã́bug sĩ́deè. Dì belí nu dòòmà bá, Jìhóvà zigà kọ àé iàẹ̀ ló bẹẹ pọ́lọ́ nèi tṍó e ọ́gà vaá tõo bãèé ló. (Àìz. 1:18) Vóà naa náa dú bíi kọ é bẽgẽ̀ bel bẹẹ bá boo béè pọ́lọ́ e beè sí tṍó ea kil nvéeá. (Ps. 32:1-5) Vaá è íè nèà deè ge naa kọ nyíè Jìhóvà á ẹẹ. (Pró. 23:15) Mm̀ kà-kà, à íe gã́bug dõona kà gbò lé nu e ólò dé kpéè ló boo béè kọ è íè kà lé gbaa ló kilma ló Jìhóvà. Naanii èé ló bel boo gbò nú eé láá naa kọbé è tõo ló Bàrì.
BÉ EÉ LÁÁ KILSĨ́ “GÈ TÕO BÃ LÓ BÀRÌ” NAA
12. Éé ní eo ni náa kọbé ò láá tõo bã ló Bàrì e?
12 Be ò dúù nen eo gé nyoone nvéè Kráìst eo ni diia múú, o náa gã́bug nu kọbé ò láá tõo bã ló Jìhóvà. O beè nó gbò kà-kà bel ea kil ló Jìhóvà nè Jíízọ̀s Kráìst, ọgá aa ló pọ́lọ́ eo beè sì, ié zìgà mm̀ Bàrì, vaá ò beeláfùl ge naa bùlà Bàrì. Sõò, kọbé è láá tõo bã ló Bàrì, à dú bíi kọ é kilsĩ́ gè naa gbò nuí.—Kọ́l. 2:6.
13. Taa kà éé ní ea é nveè bá nèi kọ é kilsĩ́ gè tõo bã ló Jìhóvà ẹ?
13 Éé ní ea é nveè bá nèi kọ é kilsĩ́ gè tõo bã ló Jìhóvà ẹ? (1) À dú bíi kọ é olòó bugi vaá nó Kpá Káí. Boo tṍó e gé náa vó, bẹẹ nu sẹ̀ẹ̀a sĩ́ á gá dú gè nyimá pọ́ì ńkem̀ nú ea kil ló Bàrì. Tãa vó, èé gbĩ́ gè nyimá nú ea dú bùlà Bàrì vaá tõó boo gbò nòòkúu ea di mm̀ Kpá Káí. (Ẹ́fẹ. 5:15-17) (2) À bọ́ló kọ é agẹló bẹẹ zìgà tení dú ló gè olòó bugi togó boo gbò nú ea zógè kọ Bàrì vulèi. (3) À bọ́ló kọ é kilsĩ́ gè ọví kọ̀láá kà nú ea bẽ́émá Jìhóvà vaá è kpoolà lóó lọl ló gbò e bà gé lábví pọ́lọ́ láb.—Ps. 1:1; 101:3.
14. Dẹ̀ẹ̀a boo nú ea di mm̀ 1 Kọ́rìnt 10:31, gbò éé ní eé láá naa buù dee kọbé à léémá Jìhóvà ẹ? (Ẹ̀b nàgé fòtó.)
14 Bugi 1 Kọ́rìnt 10:31. À palàge dú bíi kọ é naa gbò nú e nyímà kọọ̀ àé léémá Jìhóvà. Níí bọọ èlmà áá nú e ólò naa tṍó e gé kọ́ kpẹ̀a nè tṍó e di nònù. À dú bíi kọ é naa nú ea é nveè ka ló Jìhóvà buù dee. Dì belí nu dòòmà bá, tṍó e lóò kà-kà bel mm̀ kọ̀láá kà nú e gé náa, è náà kọọ̀ nyíè Jìhóvà á ẹẹ. (2 Kọ́r. 8:21; 9:7) Jìhóvà gbĩ́ nágé kọ é zogè kọ è nveè ka ló dùm. È ólò tõo nagé bã ló nen ea beè nèi dùm tení dú ló gè dé nu, ṍ nu, vaá ẹ̀b nú ea kil ló bẹẹ bá boo bá ea bọ́ló. Tṍó e Jìhóvà mon bé e gé piigà ge naa nú ea léémáe naa, à ólò kpáá palàge vùlèi.—Lúùk 16:10.
Ge kpènà o bá tṍó eo gé ọ́ví faà, ẹ̀b nú ea kil ló bẹẹ bá téní dú ló gè gànè ló vaá dé lé gyã́á, nè ge dõo nu taalẹ bá dú sìgà sĩ́deè eé láá naa kọ nyíè Jìhóvà á ẹẹ (Ẹ̀b 14 kpó)
15. Móbá ní e Jìhóvà gbĩ́ kọ é sẹ̀ẹ̀mà dõona gbò e?
15 Jìhóvà ólò ié lé nyíe kilma ló gbò lé nè gbò pọ́lọ́. (Máát. 5:45) À gbĩ́ nágé kọ beele é ié lé nyíe kilma ló dõona gbò. Dì belí nu dòòmà bá, à bọ́ló kọ é “gá ló pọ́lọ́ bel ló tọ́ọ̀ nen àbèè ge kaná-kàna, . . . [sõò èé] ié gbọ́ọ́-gbọọ̀ ló kilma kĩée e kọ̀láá nen dì.” (Táítọ̀s 3:2) Vóà naa, náa dú bíi kọ é bugi togó kọ è léè èl dõona gbò boo béè kọọ̀ bà náa gé fã Jìhóvà. (2 Tím. 2:23-25) È ólò tõo bã ló Jìhóvà tení dú ló gè ié lé nyíe vaá ẹ̀b nú ea kil ló dõona gbò.
ÈÉ LÁÁ “TÕO BÃ LÓ BÀRÌ” BÃ̀ÀNA TṌÓ E ÍÈ LỌ̀
16. Tṍó e tṍó téní, mókà tọa ló ní e nen ea beè emí kpá Psalm 73 togó beè dààmà togó gè ié é?
16 Sõò, èé kọ́ vàẹ be à tõó ní ló kọ Jìhóvà náa vulè ni boo béè lọ̀ eo beè ié é? Dì belí bé e ni nó naa, níà íb nú ea beè naaá ló nen ea beè emí kpá Psalm 73 togó é. A beè kọọ̀: “Nà kpóó tọ gáẹ̀ gé ọlí; sìgè ńkem, m̀ gáẹ̀ dọ̀.” (Ps. 73:2) À kọ́ọ̀, nyíém beè “bììlà” vaá “m beè dú ból, m beè dì belí nom̀ kọ̀l e náa nyimá nu” gbẹá kèsĩ́ Jìhóvà. (Ps. 73:21, 22) É kọ a beè tõoé ló kọ boo béè a lọ̀ Jìhóvà náa vulè nàèe vaá náa é iàẹ̀ ló neèe?
17. (a) Tṍó e nyíè neǹ ọ́lì sọ́l beè palàge bììlà, éé ní ea beè naa ẽ́? (b) Éé ní eé láá nó lọl ló nú ea beè naaá ló neǹ ọ́lì sọ́l ẹ́? (Ẹ̀b nàgé fòtó.)
17 Be neǹ ọ́lì sọ́l beè bugi togó kọ Jìhóvà sọẹ̀ẹ bá, àé láá dú kọ a beè tõoé ló naa vó mm̀ pọ́ì ńkpulu dẽè tṍó. Bã̀àna tṍó e nyíée beè palàge bììlà, a beè nyimá kọ à dú bíi kọ á tõonèè bãè ló Jìhóvà, a beè kọọ̀: “Sõò kátogóí, m̀ dì ní ló lee; [Jìhóvà]; Ò síìm bá ló bá lè. Ò ólò nèm dùùlà bá deè tṍ ea é lelém dee bá, vaá dee-deè nvée, òé beè gbóó nvèèm ka ló.” (Ps. 73:23, 24) À bọ́ló kọ beele é bàn nàgé Jìhóvà kọ á sièi kpóó ló tṍó e lóói ọọ boo béè bẹẹ lọ̀. (Ps. 73:26; 94:18) Kọ̀bèè è síì kà agẹbá pọ́lọ́, èé láá òòa kẽ dú ló Jìhóvà vaá agala boo kọọ̀ à “di kpènà ló gè ia ló” nèi. (Ps. 86:5) Bọọ èlmà tõ̀ò tṍó e nyíéi palàge bììlà, à dú bíi kọ é tõo bã ló Jìhóvà.—Ps. 103:13, 14.
Tṍó e lóói ọọ mm̀ bẹẹ gè fã̀ Bàrì, à dú bíi kọ é tõo bã ló Jìhóvà mm̀ tã̀àgã ló vaá sí nònù dénè tṍó (Ẹ̀b 17 kpó)
“TÕO BÃ LÓ BÀRÌ” DỌ̀Ọ̀MÀ DÈ-DÈ
18. Éé ní ea náa vaá èé láá kilsĩ́ gè tõo bã ló Jìhóvà dọ̀ọ̀mà dè-dè e?
18 Èé láá kilsĩ́ gè tõo bã ló Jìhòvà dọ̀ọ̀mà dè-dè. Née é aa ló gè nó nú ea kilíé ló. Kpá Káí kọ́ọ̀ èèlè Jìhóvà, a nyìmànù, nè tàvẹ̀nù, dú nú e tọ́ọ̀ nen náa é láá “kpó tẽ́.”—Róm̀ 11:33.
19. Éé ní e kpá Psalm 73 togó náa kọ é agala boo kilma ló dì deèsĩ́ ẽ́?
19 Kpá Psalm 79:13 kọ́ọ̀: “Beele, e dúù pá o gbò nè naanà ból eo gé búmá, é ṍá ni zaa dọ̀ọ̀mà dè-dè; vaá èé leelà ni lọl kúúlí tẹlẹ kúúlí.” Be ò kilsĩ́ gè tõo bã ló Jìhóvà, òé láá agàlà boo kọọ̀ àé tã́ànè ni dee bá dọ̀ọ̀mà dè-dè. Òé láá kọọ̀: “Bàrì ní ea ólò kpènà nà nyíe ẽ́, vaá à dú nà dem nè nà ìènù dọ̀ dè-dè.”—Ps. 73:26.
SỌ́L EA GÃ́BUG DÚ 32 Nvèè Sãa Kúm Jìhóvà!
a Sìgà gbò e bà di kèbá tã̀àgã̀ bùlà àbèè kọ nyíé va a biilà mm̀ gã́bug tṍó íe bíi ló nvèè bá ea aa bá neǹ dóm biè. Kọbé ò kpáá dã́ ból ló bọ̀ọ̀vẹ̀, bugi Kpá Tọ Kùdẽe Ló 1 2023.
