À dú pọ́lọ́ kọọ̀, tṍó em ni tóólá 13 gbáá, ním beè ié ná kà lé gbaa ló kilma ló Jìhóvà. A beè tõoḿ ló belí kọọ̀ gbò e gbáà dia tọọ̀ kpá íe gã́bug dì pọ́ì vaá nda beè gbĩ́ gè ié nágé nakà dì pọ́ì. A beè tõoḿ ló belí kọọ̀ gbò log e nà tẹ̀ nè kà ném nè gbò nú ea bọ́ló kọ ḿ naa dì belí neǹ Kráìst dú nyèè tò. Náa kal ló béè kọ m beè zìgà kọọ̀ Jìhóvà dì, ním beè láá tõona bã̀é ló.

Ním beè òòà aa ló gè kọ́ kpẹ̀a, sõò áá-áá tṍó ní em beè olòó kọ́ kpẹ̀a ẹ́. Ním ólò kpoogá dee ló besĩ́ m̀ kálá àà sì gé kọ́ kpẹ̀a; vó ólò naa kọ á tàvàlàḿ ló gè dààmà togó loa sọ́l àbèè ge tú bẹẹ loa sọ́l kilma sĩ́. Ge kọ́ kpẹ̀a náa beè leemá nám, boo béè kọọ̀ ním beè ié nen eḿ ooà sì gé kãa àbèè nen eḿ nóòmà Kpá Káí, vaá nyíém náa beè ẹẹ na. M beè olòó bĩiná nà bá kọọ̀, ‘Éé ní ea é náa kọọ̀ nen á olòó kọ́ kpẹ̀a kọ̀láá sè nè kọ̀láá ẽ́?’

Tṍó em tóòlà 17 gbáá, a beè tànim gè tõ̀òa boo nà bá. Vó beè naa kọ ḿ õá nà nu aa tọ ló nà tẹ̀ nè kà vaá kil Australia. Nyíè nà tẹ̀ nè kà beè palàge bììlà tṍó em aà vá ló tọ. Bà géè ié tã̀àgã̀ bùlà ea kilíḿ ló, sõò, ba beè tuumá kọ m̀ḿ kilsĩ́ gè fã̀ Jìhóvà.

 Gbẹá Australia, nà dìtõ̀òí beè kpáá zoogá. Ním beè láá siná dénè nònù. M beè gbóó bã̀àà kóò gbò nvín ãa e bà di mm̀ bõ̀ònatõ̀ò e bà bélí nda, e nyíé va géè ẹẹ ló gè sí nònù enè dee vaá deé ea bẽene bà sí gé dé bìlà. Tṍó em kẽèa boo gbò nú em géè naa, m beè nyimá kọọ̀ m̀ di mm̀ bõ̀ònatõ̀ò váa tẽ̀ènè tṍóá m̀ géè naa nagé nú e pá bàlà boo gé náa, sõò, tọ́ọ̀ kà náa beè dĩiném ló.

Tṍó e nú ea é láá dú bàà gbáá ni téní, m beè zọ̀ ene kà vígà pábia naaá nu, vaá náa beè nyimá kọọ̀ gbò nú ea gé kọ́ẹ̀ beè naa kọ ḿ bugi togó boo nà dùm. Vòò kà vígà pábia nè m̀m̀ ní e ólò gbá tõ̀òa tọ ẹ́, vaá e beè kolí nen ea gé kudẽe ló sẹ́kiùt nè a va ea bée kọlà Tamara kọ bàá tõoí ló tọ mm̀ enè sè. Tṍó e dóm Tamara dì ea gé sí gbò tóm ea dú bíi mm̀ bõ̀ònatõ̀ò, ẹlẹ ólò tú tṍóá zọ̀ọ̀mài loomá sọ́l. Vaá níá beè palàge leemám. À dú nen ea válí gè kọ́ o bùlà nè vaá àé dã́ ni ból ló. A beè palàge bọọḿ ló gè nyimá kọọ̀ òó láá dé kpéè ló gè zọ̀ nen ea gé ká bùlà gbẹẹ́ boo gè fã̀ Jìhóvà loá sọ́l.

Tamara beè olòó tú bẹ̀à sã́ bùlà loomá bel. Vulè ea íe kilma ló kà kà belí nè ge kọ́ kpẹ̀a beè zilá. Nyíée beè olòó ẹẹ boo béè kọ à gé piigà bé ea kpóó sim tùlà naa gè sí tóm nè Jìhóvà, boo tṍó e nyíè nda gé biilà boo béè kọọ̀ ním síì tóm nè Jìhóvà lọa nyíe. A lé láb nè bé e nyíée gé ẹ́ẹ naa beè nyaaná nà dùm. A lé nu dòòmà bá beè naa kọ ḿ kẽ̀èa boo ene kà kà kà bel ea di mm̀ Kpá Káí ea kọ́ọ̀: Jìhóvà gbĩ́ kọọ̀ kọ̀láá bẹ̀ì é tú “ẹ́ẹ́ nyíe” nè “sọ́l ṍò kààgà” fãamàèe.—Ps. 100:2.

M beè gbĩ́ kọọ̀ nyíém á ẹẹ belí bé e nyíè Tamara gé ẹ́ẹ naaá, sõò, besĩ́ nyíém kálá láá ẹẹ naa vó, m̀ íè bíi ló gè nyaaná bá ló sìgà nu. A beè túm nú ea é láá dú taà gbáá bá, sõò, m beè gbóó dààmà togó gè nyaaná bá ló nà dùm ńkem-kem. M beè gbóó dààmà togó gè olòó kpoogá dee ló besĩ́ m̀ kálá sì gé kọ́ kpẹ̀a, vaá m beè olòó dú neǹ gyà deè sĩ́ tóm kọ̀ kpẹ̀a mm̀ ńkpulu dẽè tṍó aa tṍó dọ tṍó. Ge naa vó, beè naa kọọ̀ pọ̀ á gá siinám vaá ḿ láá dẹlẹ nyíé boo nà bá. Ge olòó tú Kpá  Káí kọọmá kpẹ̀a beè naa kọ ḿ láá dé kpéè ló gè olòó kọ́ kpẹ̀a. Pọ́ì ńkem̀ tṍó aa ló tṍóá, m beè gbóó dú neǹ gyà deè sĩ́ tóm kọ̀ kpẹ̀a mm̀ ńkpulu dẽè tṍó kọ̀láá ẽ́.

M beè gbóó bã̀àà kóò gbò kànen nè gbò pá nvín e bà gé piigà bé e ba kpóò sim tùlà naa gè sí tóm nè Jìhóvà vaá bà gé dé kpéè ló ba sìtóm. Ba lé nu dòòmà bá beè naa kọ ḿ kpáá bugi togó boo gbò nú ea palàge dì bíi mm̀ nà dùm vaá a beè naa kọ ḿ olòó bugi Kpá Káí buù dee. Ge kọ́ kpẹ̀a beè gbóó kpáá palàge kpèḿ ló naa ní em beè gbóó dú neǹ gyà deè sĩ́ tóm kọ̀ kpẹ̀a dénè tṍó. Níì túá tṍó mm̀ gã́bug gbáá ea kil nvéeá e nyíém gé kpáá ẹẹ vaá lóóm à dĩ̀ìnà gbẹá nà tọ nè gbẹá gbàà pá vígà ẹ.

Enè gbáá aa ló tṍóá, m beè gbóó mòn Alex, ea íe lé láb vaá à palàge vùlè Jìhóvà nè sìtóm kọ̀ kpẹ̀a. Alex beè dú neǹ nvèè bá sìtóm vaá a tú ọ̀ọ̀lẹ̀ gbáá siimá tóm gyà deè sĩ́ tóm kọ̀ kpẹ̀a dénè tṍó. A beè kọ nágé kpẹ̀a kiẽ́e e bíi bọọ gbẹá Malawi. A beè zọ̀ gbò kọ̀ kpẹ̀a aa dó dọ dó naaá nu gbẹá kĩá, ba lé nu dòòmà bá beè palàge nvèè bá nèe vaá ba beè sièe kpóó ló kọ á kilsĩ́ gè tú gè fã̀ Jìhóvà naamá túá kà nú mm̀ a dùm.

Alex nè nda bée ilá mm̀ gbáá 2003, vaá è dì e gé sí tóm gyà deè sĩ́ tóm dọ̀ vóí. E nó gã́bug nu, vaá Jìhóvà dì ea gé tã́ànèi dee bá mm̀ gã́bug sĩ́deè.

Mm̀ gbáá 2009, tọ nàà tóm beè íi bá ló naamá gbò kọ̀ kpẹ̀a aa dó dọ dó gbẹá bon e múú bééá tení ló ea kọlà Timor-Leste, ea di dó Indonesia. A beè bọọí ló, nyíéi beè ẹẹ, vaá pọ̀ beè siíi nagé. Vòò ẽ́ aa ló tṍóá, e beè gbóó iná Dili ea dú pọ̀b boǹ Timor-Leste.

Bé e bà ólò naa nu kĩá naa dú kele ló bé e ólò naa nu gbẹá kiẽ́e e beè dì naa. E beè gbóó ié bíi ló gè nó ãa sĩ́deè ge naamá nu, ãa dém bel, gyã́á gè dè, nè sĩ́deè ge tõ̀òma dùm. È ólò bọọgẹ̀ mòn gbò tãa, gbò e bà náa beè sí tọọ̀ kpá, nè gbò e bà gé téní bá nàà uú  boo. Vaá è ólò mòn nàgé gbò e bé gím beè kyọ̀va nu ló. *

Gbò nú e beè mòn tṍó e géè kọ́ kpẹ̀a beè palàge bọọí ló! Dì belí nu dòòmà bá, à íe tṍó em beè mòn ene kà nvín pábia ea ni tóólá 13 gbáá, ea bée kọlà Maria. * A kà beè ú sìgà gbáá ea kil nvéeá vaá náa ólò bọọgẹ̀ mòn a tẹ̀. Maria náa beè ié nú ea sẹẹ̀a sĩ́, vaá níà bé e gã́bug pá a gbò dì nàgé naa ẽ́. M̀ kẽèà boo enè deé ea beè tò vaá kọ́ bé e nu tọ́àẹ̀ẹ́ ló naa nèm. Kọ̀láá bé ea dì naa, ním beè láá dã́ ból ló nú ea géè kọ̀, boo béè kọọ̀ m̀ gáà láá dã ba dém bel leevè. M beè bàn Jìhóvà kọ á nvèè bá nèm kọ ḿ láá sièe kpóó ló, tṍóá m beè gbóó bugi gbò dọ̀ Kpá Káí ea é nveèe nyíé gbàà nèe. Mm̀ gbò gbáá ea kil nvéeá, m mon bé e kà kà belí ni nyaaná láb nè zivèkà dùm Maria naa. A beè dììa múú vaá kátogóí à íe gbò ea ólò noòmà Kpá Káí. Deè nieí, Maria íe gã́bug pá vígà mm̀ bõ̀ònatõ̀ò, vaá à nyímá kọọ̀ bà vulèèe.

Jìhóvà dì ea gé tã́ànè dee bá sìtóm kọ̀ kpẹ̀a gbẹá Timor-Leste. Náa kal ló béè kọọ̀ òb gbáá ea kil nvéeá ní e gã́bug ọ̀và beè dììa múú ẽ́, sìgà ọ̀và a dú gbò gyà deè sĩ́ tóm kọ̀ kpẹ̀a dénè tṍó, gbò nvèè bá sìtóm àbèè gbò kànen mm̀ bõ̀ònatõ̀ò. Sìgà ọ̀và gé sí tóm gbẹá remote translation office vaá bà dì e bà gé tab gbò kpá ea dẹẹ̀a boo Kpá Káí nvee mm̀ ba dém bel. Ge mòn tṍó e bà gé ọ́lí sọ́l gbẹá nònù, bé e nyíé va gé ẹ́ẹ naa, nè bé e gã́bug gbò e bà di kĩí gé bã́ mm̀ bõ̀ònatõ̀ò naa ólò palàge ẹẹlẹ̀m nyíe.

Dùm gbẹá Timor-Leste beè palàge dú kele ló bé e ólò tõó Australia naa, sõò, ním beè nyimá kọọ̀ nyíém e láá ẹẹ naaí. Sìgà tṍó è ólò bã mm̀ faà e gã́bug nen di bììla m, gbá ló kã́á-kãà gyã́à nè sã̀ éb e bà zálí lọl kè ki. Sìgà dee, è ólò noòmà Kpá Káí nen gbẹá mm̀ ene kà nkpílí tọ ea palàge bẹ̀à sã́, e gbá nè dĩ́ di kè tọá vaá gbò ńkõ̀ò gé dõogẽ teá tení ló kẽ. Sõò, kèbá dénè gbò dìtõ̀òí, m̀ ólò bugi togó kọọ̀, ‘Gbò nuí palàge dú lé!’

Tṍó em kẽeà boo gbò nú ea beè naaá tṍó ea kil nvéeá, nyíém ólò ẹẹ ló nà tẹ̀ nè nà kà boo béè bé e ba beè pììgà bé e ba kpóó sim tùlà naa gè noòmàm nú ea kil ló Jìhóvà vaá nvèèm sãa kúm bã̀àna tṍó e bè ním beè ié ná kà lé gbaa ló kilma ló Jìhóvà. Nú ea di mm̀ kpá Próvẹẹ̀b 22:6 beè naaá ló nda. Ńdáà tẹ̀ nè ńdáà kà ólò ẽegã́ boo Alex nè nda; nyíé va ólò ẹẹ gè mòn kọ è gé sí tóm nè Jìhóvà. Lọ̀l gé mm̀ gbáá 2016, è dì e gé sí tóm dì belí gbò kùdẽe ló sẹ́kiùt gbẹá gbò kiẽ́e brach office ea di Australia gé ẹb nú ea kil ló.

Àé láá tàvàlà ge zìgà kọọ̀ sìgà gbáá ea kil nvéeá ním beè olòó dé kpéè ló gè kọ́ kpẹ̀a. Ge kọ́ kpẹ̀a a palàge leemám kátogóí! Kátogóí m̀ nyímà kọọ̀, áá tṍó e fãà Jìhóvà lọa mm̀ bẹẹ nyíe, kèbá kọ̀láá kà dìtõ̀ò mm̀ dùm ní eé láá ié kàà ẹ́ẹ́ nyíe ẽ́. Tọ́ọ̀ kà bàà-bàà bùlà á gé ló kọọ̀ 18 gbáá em ni zọọmà Alex fã̀àmà Jìhóvàí, ní em ni íe kàà ẹ́ẹ́ nyíe mm̀ nà dùm ẽ. Kátogóí, m nyímá bé e bel e neǹ ọ́lì sọ́l Dévìd beè kọ́ nè Jìhóvà dú kà kà naa, a beè kọọ̀: “Kọ̀láá gbò e bà tú olo naamá ba ketõ̀ò kpènà e íe ẹ́ẹ́ nyíe; bàé kilsĩ́ gè ọlí sọ́l gbẹá bá ṍò kààgà. . . . Vaá kọ̀láá gbò e bà vulè o bée e íe ẹ́ẹ́ nyíe.”—Ps. 5:11.