É kọ ò monì gé ãa nvín pábia ea di dẽè fòtóí?— Níá sílà Jẹ́ftà. Kpá Káí náa kọ́ a bée, sõò è nyímà kọ ẹlẹẹ̀ naà kọ nyíe a tẹ̀ nè Jìhóvà á ẹẹ. Naa é nó nu ea kil ló ẹlẹ nè a tẹ̀, Jẹ́ftà.

Jẹ́ftà be bèè lé nen vaá aẹ̀ tú tõ̀ò tṍó nvee mm̀ ge noòmà nu a sílà ea kil ló Jìhóvà. Aẹ̀ bèè nen eaẹ̀ ié kpóó vaá à du nágé lé nen tùle. Vó beè naa kọ pá nvín Ízraẹ̀l á kọ́ nèe kọ á tu lèè va mm̀ ge bé pá ba gbò ọ́b.

Jẹ́ftà beè tã̀àgã ló Bàrì kọ á nveèn nèè bá neèe kọ á beè elèèbá. Jẹ́ftà beè zìgà zìgà kọ be à béè elèèbá, àẹ́ túè túá nen ea dúe mm̀ ńlẹ́ẹ̀ tọ ea zọẹ̀ẹ nyoònàè neè Jìhóvà. Nakà není é tú dénè deé mm̀ a  dùm tònmà vaá siimá tóm mm̀ tọkàn káí Bàrì. Tṍó ea kil nvéeá, tọkàn káí beè dú kĩí e gbò nen beè olòó másĩ́ gé nèfã̀ Bàrì. Mm̀ kàkà, Jẹ́ftà beè bébéá èlbá! É kọ olo nyímà ló túá nen eaẹ̀ zẹẹ́ zọ̀ẹ nyòònà tṍó eaè òòa kẽ kil be?—

Ẽei, níà sílà Jẹ́ftà! Ẹlẹẹ̀ áá kà a nvíné, vaá kátogóí Jẹ́ftà é gboó gé lẹ̀ẹ̀laẹ ààmà. Níí beè palà ge biilée nyíe. Sõò kẽ̀èa boo, kọ ẹlẹ beè zìgà zìgà. Tẽ̀ènè tṍóá, a síla beè kọọ̀: ‘Tẹ̀, olo beè zìgà zìgà nè Jìhóvà, vó à naà, mm̀ mè o zìgà.’

Nyíè sílà Jẹ́ftà beè bììlà nàgé. A gè sí tóm tọkàn káíá náé née deè kọ á iá dóm vaá ié nvin. Sõò aẹ̀ palà ge tànee kọ ẹlẹ ḿ ḿm̀ mèè zìgà ńlẹ́ẹ̀ tẹ̀ nè ge naà kọ nyíè Jìhóvà á ẹẹ. Níéè bọ̀ọ̀gẹ̀ díe bíí ló èlmà ge iá dóm à bèè ge ié nvín. Boo béè vó aẹ̀ gboó aa tọ a tẹ̀ gé gbẹá mm̀ tọkàn káí dénè dee mm̀ a dùm.

É kọ olo bulà kọ nu e ẹlẹ beè naaí beè ẹẹ̀lẹ̀ nyíè a tẹ̀ nè Jìhóvà?— Ẽei, aẹ̀ naà vó! Vóá, be olo gbantṍ ló vaá ò vùlè Jìhóvà, olo é láá belí nágé sílà Jẹ́ftà. Olo ó náa nagé kọ nyíè o tẹ̀ nè o kà nè níí Jìhóvà á ẹẹ.