“Boolo gá è láá noomai nu dõòna gbò nen.” (Híb. 5:12) Zẹ́ẹ́ ni doomà dẽe ló! Jìhóvà—ea dú kà lé Neǹ Dò Bá ea dì lọ̀l vaá à lee boo zivèkà bàlà booí—kólíi kọ é dù gé noòmà nuù dõòna gbò ea kil ló ẹlẹ! Kọ̀láá kà tóm ea bãàa mm̀ ge noòmà nú ea kil ló Jìhóvà—kabèè mm̀ bẹẹ tọ, mm̀ bõ̀ònatõ̀ò, àbèè gbẹá ól tóm kọ̀ kpẹ̀a—dú kà lé nèà deè nè tóm ea palàge bọọ. Èé náà và vaá è láá naa leevè e?

Ààla di mm̀ gbò bel e Pọ́ọ̀l beè emí má Tímotì ea kọọ̀: “Nvèè sĩ́ ló gè olòó bugi nu e a di m Kpá Káí nè gbò nen kọ bà á dã̀, vaá olòó nvèè kpóó ló gbò nen vaá noòmàva nu.” Pọ́ọ̀l beè kpáá tẹlẹ ló tṍó ea kọ́ọ̀: “Boo bée kọ be ò náa vó, ò é láá dùùlà o bá, biina gé ló gbò e bà gé pãanéni tṍ ló.” (1 Tím. 4:13, 16) Ò íè tóm gè sì ea é duulà dúm gbò nen. Boo béè vó, à dú bíi kọ ó tẹlẹ̀ bá ló bé eo bugì nu nè ge noòmà nu naa. À dú gè emí nakà kpáí ló gè nvèèmà bá nèni kọ ó láá naa vó. Nee sìgà gbò nú ea di mm̀ kpáí:

Jìhóvà ní ea dú “Pọ̀bkà Neǹ Dò Bá Ẹ̀.” (Àìz. 30:20) Boo tṍó e bróshọ̀í gé nveè bá nèni kọ ó kpáá palàge nyimá tẽ́ gè bugi nè ge noòmà nu, á gá tání nyíe kọọ̀ nakà lẹ̀ẹ̀la tómí aa bá Jìhóvà, vaá ẹlẹ ní ea ólò dùùlà gbò nen nvea lóé. (Jọ́ọ̀n 6:44) Boo béè vó, olòó tã̀àgã ló Bàrì kọ á neè ni a nyómá káí. Olòó tú Kpá Káí siimá tóm. Náa kọ gbò nen á nvèè ká ló Jìhóvà, níì ge kọ bàá nvèè ká ló olo nì. Pììga boo gè naa kọọ̀ gbò e bà gé pãané ni tṍ ló á ié kà agẹbá vulè kilma ló Bàrì.

Bàrì kólí ni kọ ó dù gé sí tóm gè noòmà nu ea dú lẹ̀ẹ̀la tóm ea bọọ lọ̀l vaá à lee e Bàrì ne gbò nen. È agàla boo kọọ̀ ò é sim kilsĩ́ tṍó eo dẹ̀ẹ̀a boo “kói e a aa bá Bàrì.”—1 Pít. 4:11.

À aa bá pá bọọ vígà e gé gbá noòmà nu,

Gbò Ge Tulè Tóm Gbò Neǹ Ditõ̀ò Jìhóvà