Tṍó e Jíízọ̀s ni ú, ene kà neǹ méné ea kọlà Jósẹ̀f beè sí ló Páílèt gé bàn kọ á sọ̀tọ́ deè kọ á tuè a íí lọl boo té e ba beè káẹ á. Jósẹ̀f beè tú nóo lẹlẹ̀ẹ vaá tú lé báà kàn ea kọlà línìn kọ̀lmàe. A beè túe li mm̀ kóló dem e bà gáà lì tọ́ọ̀ nen m, vaá kpọlẹ̀ báà dem ea nyee uú gã́. Gbò togó vààla gyọ́ọ beè gbóó kọ́ nè Páílèt kọọ̀: ‘Pọ̀ sííi kọọ̀ sìgà gbò nyòòne nvéè Jíízọ̀s é dú gé tú a íí ààmà vaá kọọ̀ a kẽeà aa kemà ú.’ Boo bée vó, Páílèt à gbóó kọ́ nè va kọọ̀: ‘Palàge kubvii bànà úá vaá ò kui dẽe ló.’

Taà dee aa ló deeá, sìgà gbò pábia beè àà sí ló bànà úá kà bòm dee, sõò ba beè mòn kọ bà kpọ́lẹ̀ dem ea beè di gã́á lọ̀l. Ene kà nyómá tóm beè tõó mm̀ bànà úá kọ́ nè gbò biaá kọọ̀: ‘Pọ̀ á gá siíi. Jíízọ̀s a kẽeà aa kemà ú. Aalii gé kọi nei pá a gbò nyòòne nvée kọ bàá àà gé zọ̀ẹ nyòònà gbẹá Gálilì.’

Mérì ea dú Màgdálà beè gbalá àà gé gbĩ́ Pítà nè Jṍòn, vaá kọ́ nè va kọọ̀: ‘Bà dalà íí Jíízọ̀s ààmà!’ Pítà nè Jṍòn à gbóó teelá sí ló bànà úá. Sõò ba beè òòà kil be tṍó e bà íná vaá mòn kọ à dú kóló m.

Tṍó e Mérì ooà iná ló bànà úá vaá mòn bàà kà nyómá tóm e bà di m, à gbóó kọ́ nè va kọọ̀: ‘Ním nyímà kĩée e bà tú Neń Ea Íém kìlmà.’ Tṍóá, à gbóó mòn ene kà gbálà, sõò a beè dòòmà kọọ̀ níà neń ea ólò sí tóm ló kĩá. À gbóó kọ́ nèe kọọ̀: ‘Tẹ́ẹ̀, sóo-sóo dòbá kĩée eo dalàẹ kìlmà nèm.’ Sõò tṍó e gbálàa kólíe kọọ̀, “Mérì!” à gbóó nyimá kọ níà Jíízọ̀s. Mérì à gbóó vulí kpã́ kọọ̀: “Neǹ Dòbá!” vaá bũ̀ùnàe. Jíízọ̀s à kọ́ nèe kọọ̀: ‘Àà gé kọ́ nè pá nà vígà kọ o moním.’ Tẽ̀ènè tṍóá, Mérì à gbóó teelá gé kọ́ nè pá a gbò nyòòne nvée kọ a monìè Jíízọ̀s.

Sìgà tṍó aa ló tṍóá, bàà neń e bà ólò nyoone nvéè Jíízọ̀s beè di èèlè e bà gé aa Jèrúselẹ̀m kil Èméọ̀s. Ene kà gbálà beè kyã̀à iná vá ló vaá bĩiná va nú e bà gé lóá bel boo. Bà aalá kọọ̀: ‘Naa kọ olo gáà dã̀? Taà deé ea kil nvéeá, gbò togó vààla gyọ́ọ beè fẹ́ Jíízọ̀s. Kátogóí, sìgà gbò bia dì e bà gé kọ́ à di dùm!’ Gbálàa à bĩiná va kọọ̀: ‘Nóo zigàì nú e gbò  kọ́ọ̀ bùlà Bàrì beè kọ̀? Ba beè kọọ̀ Kráìst é ú vaá à é kẽeà aa kemà ú.’ À gbóó kilsĩ́ gè baatẽ́ gbò nú ea di mm̀ Kpá Káí nè va. Gbò nyòòǹe nvéeá beè kọ́ nè gbálàá kọ á tõonìè vá ló tṍó e bà íná Èméọ̀s. Tṍó e bà gé dé gyã́á ló èlà, ea ni tãàgã ló Bàrì boo fétúlú e bà gbĩ́ gè dèa lọ̀l, ní e bà nyímá kọ ẹ̀ẹ̀ Jíízọ̀se. Tṍóá, à gbóó ii àà vá ló.

Pálaa neń e bà ólò nyoone nvéè Jíízọ̀sí beè gbóó gbalá sí tọ e gbò tómá beè bõoná ea di Jèrúselẹ̀m gé kọ́ nú ea nááí nè va. Tṍó e bà di tọá, Jíízọ̀s beè sila ló dénè ọ̀và. Túá ból, gbò tómá náa beè zìgà kọ níà Jíízọ̀s. Tṍóá, Jíízọ̀s à gbóó kọ́ nè va kọọ̀: ‘Ẹbvím mi bá vaá ò daalím mi bá ló. Ba beè emí kọọ̀ Kráìst é kẽeà aa kemà ú.’