Gbò e bà ólò tõó Deè Báà Nàànì ea di ló Ízrẹẹ̀l ólò zìgà kọọ̀ gyã́à káála é láá tulèè va. Enè deè bílá dee, sìgà gbò gbálà e bà aa Deè Báà Nàànì beè mòn gyã́à káála ea palàge mò, ea gé kyãa sĩ́ dee, bà gbóó bììa nvée. “Gyã́à káálaá” beè tulè va kilma Jèrúselèm. Bà gbóó dààmà togó gè bĩiná gbò nen kọọ̀: ‘Ãàe ní e nvín ea é dú méné pá Júù dì e? È dúù ló gè kumí sĩ́ kẽ nèe.’

Nyíè méné Hẹ́rọ̀d beè palàge bììlà tṍó ea dã́ nú ea kil ló ãa ménéí. À gbóó bĩiná gbò togó vààla gyọ́ọ kọọ̀: ‘Mókà bon ní e ba beè kọọ̀ ménéí é meà ẽ?’ Bà aalá nèe kọọ̀: ‘Gbò kọ́ọ̀ bùlà Bàrì beè kọ àé mea mm̀ boǹ Bẹ́tlìhèm.’ Vóà naa, Hẹ́rọ̀d beè gbóó kolí gbò e bà aa Deè Báà Nàànìa vaá kọ́ nè va kọọ̀: ‘Aalii sií Bẹ́tlìhèm mè òé monii nvíná. Ooaí kẽ dui gé kọi kĩée ea dì nèm. Nda gbĩ́ gè kumí nágé sĩ́ kẽ nèe.’ Sõò à géè kpọ́ kyáá bel.

“Gyã́à káálaá” beè dààmà togó gè kpáá kyã̀à. Gbòa beè bììa nvée dọ̀ọ̀mà tṍó e bà íná Bẹ́tlìhèm. Gbòa beè gbóó bã mm̀ tọ e “gyã́à káálaá” élá boo. Ba beè mòn Jíízọ̀s nè Mérì, ea dú a kà. Bà gbóó kumí sĩ́ kẽ nè nvíná vaá dõo nóò kpé, fránkinseǹs, nè máà nèe. É kọọ̀ Jìhóvà ní ea beè lẹ̀ẹ̀là gbòí siimá ló Jíízọ̀s e? Ẽ́èe.

Jìhóvà beè kọ́ nè Jósẹ̀f gbẹá mm̀ gyáálá bílá deè deeá kọọ̀: ‘Hẹ́rọ̀d gbĩ́ gè fẹ́ Jíízọ̀s. Tú o va nè o nvín vaá ò téelai kilíí Íjìpt. Tõoníí kĩá dọ̀ọ̀mà tṍó e tṍó é lée gè òòa kẽ.’ Tẽ̀ènè tṍóá, Jósẹ̀f nè pá a tọ beè gbóó àà kil Íjìpt.

Jìhóvà beè kọ́ nè gbò gbálà e ba beè aa Deè Báà Nàànìa kọ bàá gá òòa na kẽ sí ló Hẹ́rọ̀d. Nyíè Hẹ́rọ̀d beè palàge bììlà tṍó ea nyímá kọ bà náa ooa na kẽ du ná. Tã́gíní bé e bè náa mon Jíízọ̀sa, a beè gbóó nè gã́ kọ bàá fẹ́ kọ̀láá kà pá nvín e bàé láá toolá gã́bug gbáá e Jíízọ̀s ni tóólá e bà di Bẹ́tlìhèm. Sõò tọ́ọ̀ nu náa beè naaá ló Jíízọ̀s boo béè kọ a beè di kpã́á Íjìpt.

 Hẹ́rọ̀d beè ù tṍó e tṍó téní. Jìhóvà beè gbóó kọ́ nè Jósẹ̀f kọọ̀: ‘Kátogóí, gbóó òòa kẽ mè tọ́ọ̀ nu nááá ni.’ Jósẹ̀f, Mérì, nè Jíízọ̀s beè gbóó òòà kil Ízrẹẹ̀l, vaá tõó boǹ Názarẹ̀t.