Dõona kà méné ea beè bẹ̀l Bábilọ̀n beè dú Dèráíọ̀s ea dú Míìd. Dèráíọ̀s beè mòn kọọ̀ Dániẹ̀l dú kele. A beè túe sẹlẹ́ togó gbò e ka di ló e bà di dóá. Gbòí beè bẹ́ nyíe ló Dániẹ̀l vaá noo gè fẹ́ẹ. Ba beè nyimá kọọ̀ Dániẹ̀l ólò tã̀àgã ló Bàrì taà tóm buù dee, vó beè naa kọ bàá kọ́ nè Dèráíọ̀s kọọ̀: ‘Sóo-sóo e méné, temà log ea é náa kọọ̀ kọ̀láá nen á tã̀àgã ló má áá olo. Vaá bàá tobví kọ̀láá nen ea lọl togó kèbá tẹlẹ mm̀ bànà kpẹẹ̀.’ Belá beè leemá Dèráíọ̀s naa ní ea bii bá tẽ́.

Tẽ̀ènè tṍó e Dániẹ̀l dã́ nú ea kil ló ãa log e bà témáá, a beè gbóó àà kil a tọ. A beè kììlà sĩ́ kpee a nvíǹdò ea beè kùùlà vaá kumí dúnú kẽ tã̀àgã ló Jìhóvà. Gbò e bà géè bẹ́ẹ nyíe lóá beè búló bã tọ vaá mònie ea gé tãàgã ló Bàrì. Ba beè teelá gé kọ́ nè Dèráíọ̀s kọọ̀: ‘Dániẹ̀l gé lọl ni togó kèbá. À ólò tã̀àgã ló má a Bàrì taà tó buù dee.’ Dániẹ̀l beè leemá Dèráíọ̀s vaá náa beè gbĩ́ kọ á ù. Kọ̀láá dee, à ólò bugi togó boo nú ea é láá naa kọbé à duulàẹ̀ Dániẹ̀l. Sõò bã̀àna méné náa é láá nyaaná bá ló log e ẹlẹ beè nvee kẽ. Tọ́ọ̀ kà nú ea é láá naa á gé èlmà ge lẹ̀ẹ̀là pá a gbò kọ bàá tobví Dániẹ̀l tẹlẹ mm̀ bànà kpẹẹ̀.

 Dèráíọ̀s dí boo béè ge bùlà nú ea kil ló Dániẹ̀l naa ní e náa láà daa bílá deè deeá. Tṍó e dee zilà, a beè gbalá sí ló bànàa, kolí Dániẹ̀l vaá bĩináe kọọ̀: ‘É kọ o Bàrì a duulà ni?’

À íe mon e Dèráíọ̀s dã́. Aẹ̀ bèè moǹ Dániẹ̀l! A beè aalá bel gã́ Dèráíọ̀s kọọ̀: ‘Nyómá tóm Jìhóvà ká gã́ gbò kpẹẹ̀í. Bà náa nveèm tọ́ọ̀ kà kom ló.’ Nyíè Dèráíọ̀s beè palàge ẹẹ! A beè lẹ̀ẹ̀là kọ bàá tú Dániẹ̀l lọl mm̀ bànàa. Tọ́ọ̀ kà kom náa beè bã ló Dániẹ̀l. Ménéá beè gbóó nègã́ kọọ̀: ‘Tobvii gbò e ba beè gbà bel Dániẹ̀la tẹlẹ mm̀ bànàá.’ Gbò kpẹẹ̀a beè bà va tṍó e bà tóbví va tẹlẹ m.

Dèráíọ̀s beè gbóó nè log pá a gbò kọọ̀: ‘Kọ̀láá nen á iè ge siiá pọ̀ ló Bàrì Dániẹ̀l. A beè dùùlà Dániẹ̀l lọl gã́ gbò kpẹẹ̀a.’

É kọ ò ólò tã̀àgã ló Jìhóvà kọ̀láá dee belí Dániẹ̀l?