É kọọ̀ à íe nen eo beè vùlè ea beè ù? Mm̀ gbò tàvàlà tṍóá, òó láá bĩiná kọọ̀: ‘Éé ní ea ólò naaá tṍó e úù e? É kọọ̀ èé láá kpáá mòn gbò e beè vùlè e ba beè ù?’ Mm̀ nakà nu gè nòí nè ní ea bẽene, èé ló bel boo gbò bíbví vaá ààla eé mon lọl mm̀ Kpá Káí é nveèi nyíé gbàà.

1. Éé ní ea ólò naaá tṍó e úù e?

Jíízọ̀s beè tú ú doolé ló kà agẹbá dáá. Nen ea di dáá náa ólò nyimá nú ea gé náaé ló. Mósĩ́ deè ní e ú bélí dáá ẹ́? Tṍó e nen ú, nu náa ólò zọ̀nàe. Náa ólò tõoé ló kọọ̀ à dúè áá ẹ̀ẹ̀, kọ̀láá bé ea beè palàge vùlè pá a kóò nè pá a tọ naa. Kpá Káí kọ́ọ̀: “Gbò e bà ni ú náa nyímáná tọ́ọ̀ nu.”—Bugi Ẹ̀klìzíástìs 9:5.

2. Mósĩ́ deè ní e gè nyimá kà kà bel ea kil ló gbò e bà ni ú é láá nvèè bá nèi ẽ́?

Gã́bug nen ólò siiá pọ̀ ló ú—bií nágé ló gbò e ba beè ù! Sõò nú e Kpá Káí kọ́ é láá nvèè ni nyíé gbàà. Jíízọ̀s beè kọọ̀: “Kà kà bel é náa kọ ó dií pọ́ì.” (Jọ́ọ̀n 8:32) Sìgà bõ̀ònaló fã̀ nóòmà kọọ̀ à íe nú ea di ló nen e bè náa ólò ù, sõò Kpá Káí náa nóòmà naa vó. Vóà naa, tọ́ọ̀ nen náa ólò mòn tã̀àgã̀ tṍó ea ni ú. Nagé, boo béè kọọ̀ gbò e bà ni ú náa nyimáná tọ́ọ̀ nu, bà náa gé láá nvèèi kom ló. Boo béè vó, náa dú bíi kọọ̀ é siiá pọ̀ ló gbò e ba ni ú àbèè ge fã̀ va, váa náa bọ́ló kọ é tã̀àgã ló Bàrì má va.

Sìgà gbò kọ́ọ̀ bàé láá zọẹ̀ gbò e bà ni ú loá bel. Sõò náa dú kà kà naa vó. Dì belí bé e ni nó naa, gbò e ba ni ú “náa nyímáná tọ́ọ̀ nu.” Mm̀ kà kà, àé láá dú kọọ̀ gbò e bà kọ́ọ̀ bà ólò zọẹ̀ gbò e ba beè vùlè e ba ni ú loá bel, gé zọ gbò zọ e bà sẹlẹ ló kọọ̀ bà dúè gbò e ba beè ùa loá bel. Vóà naa, ge nyimá kà kà bel ea kil ló gbò e ba beè ù ólò kpènài lọl bá gbò zọ. Jìhóvà ãanéi kọ é gá gbĩ́ gè zọ̀ gbò e ba ni ú loá bel, boo béè kọọ̀ à nyímá kọọ̀ ge naa vó é náa kọ é zọ̀ gbò zọ naaá nu vaá àé nveèi kom ló.—Bugi Dìtolónomì 18:10-12.

3. Nyimá kà lèlà nú ea ólò naaá ló gbò e baa ni ú

Beeá ló bàlà booí, gbò nen iégi kele-kele nú e bà ziga ló kọ à ólò naaáí ló tṍó e úù. Sõò, níì dénè gbò nú e bà ziga ló ní ea dú kà kàẹ nì.

• Gbò éé ní e gbò e bà di kiẽ́e eo ólò tõo ziga ló kilma ló gbò e baa ni ú é?

 4. Ge nyimá kà kà bel ea kil ló gbò e ba beè ù ólò nvèè bá nèi

Ge nyimá kà kà bel ea kil ló gbò e ba beè ù ólò naa kọ é gá siiá va pọ̀ ló. Bugi Ẹ̀klìzíástìs 9:10, vaá ò gbóó aalai nakà bíbví:

• É kọọ̀ gbò e ba beè ù é láá nvèèi kom ló?

Kà kà bel ea di mm̀ Kpá Káí ólò naa kọ é gá ziga ló kyáá bel gè kọọ̀ é siiá pọ̀ ló gbò e ba beè ù àbèè ge fã̀ va. Bugi Àìzáíà 8:19 nè Kùùà Nù 4:11, vaá ò gbóó aalai nakà bíbví:

• Ò bulà kọ à ólò tõó ló Jìhóvà naa vàẹ tṍó e fãà àbèè gè gbĩ́ nvèè bá lọl bá nen ea beè ù e?

5. Ge nyimá kà kà bel ea kil ló gbò e ba beè ù ólò nvèèi nyíé gbàà

Baa nóòmà gã́bug nen kọọ̀ tṍó e bàé ú, bàé mon tã̀àgã̀ boo béè pọ́lọ́ e ba beè sì. Sõò à nveèi nyíé gbàà ge nyimá kọọ̀ tọ́ọ̀ nen ea ú náa ólò mònnà tã̀àgã̀—bã̀àna nen ea beè sí kà agẹbá pọ́lọ́. Bugi Róm̀ 6:7, vaá ò gbóó aalai nakà bíbví:

• Dì belí bé e Kpá Káí kọ́ naa, tṍó e nen ú, à di pọ́ì aa bá pọ́lọ́ ea beè sì. Vóà naa, é kọ à tõó ní ló kọọ̀ nen ea ni ú gé mon tã̀àgã̀ boo béè pọ́lọ́ ea beè sì?

Bé e gé nyímá ló Jìhóvà naa, níà bé eé palàge àgala boo kọọ̀ náa é láá nè kpọ̀té gbò e baa ni ú naa ẽ́. Bugi Dìtolónomì 32:4 nè 1 Jọ́ọ̀n 4:8, vaá ò gbóó aalai gbò bíbví:

• É kọọ̀ Bàrì ea íe gbò lé kpãa e gbò dọ̀ Kpá Káíí kol béeí é ne kpọ̀té gbò e baa ni ú?

• É kọọ̀ nú e Kpá Káí kọ́ ea kil ló gbò e ba beè ù nveè ni nyíé gbàà? Ló éé?

 NÚ E NI NÓ

Tṍó e nen ú, kùbmà a bã́ ló a dùm. Gbò e bà ni ú náa ólò mòn tã̀àgã̀, vaá bà náa é láá nvèè kom ló gbò e bà di dùm.

Ge Òòa Boo

• Éé ní ea ólò naaá tṍó e úù e?

• Mósĩ́ deè ní e kà kà bel ea kil ló gbò e ba beè ù ólò nvèè bá nèi ẽ́?

• Mósĩ́ deè ní e kà kà bel ea kil ló gbò e ba beè ù ólò nvèèi nyíé gbàà ẹ?