Tera ae Nanonaki n “te Mata Boona te Mata”?
Ana kaeka te Baibara
Te kaetieti ae “te mata boona te mata” boni kanoan naba Ana Tua te Atua are e anga Mote nakoia tibun Iteraera rimoa, are e mwanewea taekana Iesu n ana Kabwarabwara i aon te Maunga. (Mataio 5:38; Te Otinako 21:24, 25; Te Tua-Kaua 19:21) E nanonaki bwa ngkana a baireaki tuuaaia taani karaoa ae bure, ao e riai ni botau raoi te tuuaa anne ma te bure are karaoaki. a
Te kaetieti aei e kaineti nakoni mwakuri n iowawa aika karaoaki nakon temanna. E taekinaki ae kangai n te Tua Rinanoni Mote ni kaineti ma te tia bure ae bon nanona ni kani karaoa ae bure: “E na karaoaki naba nakoina te aeka ni kaikoaki are e karaoia nakon te aomata, bwa te mwaoto boona te mwaoto, te mata boona te mata, ao te wi boona te wi.”—Nakoaia Ibonga 24:20.
Tera te kantaninga n te kaetieti ae te “mata boona te mata”?
Te kaetieti ae te “mata boona te mata,” e aki anga te kariaia nakon te aomata bwa e na irantangaia i bon irouna. Ma e buokiia taani moti bwa a na bairei tuuaa aika riai, aika aki rangi ni matoatoa ke n rangi ni bebete.
E riki naba te kaetieti aei bwa te bwai ni kauring nakon ane e boni kani karaoa ae a na ruanikai iai aomata ke e boni baireia bwa e na karaoa anne. E kabwarabwaraa ni kangai te Tua: “Ane a na ongo ma ni maaku ake nikirana [naake a ira ana kaetitaeka ae riai te Atua are waakinaki], ao a na aki manga karaoa te buakaka teuana ae ai aron aei i buakomi.”—Te Tua-Kaua 19:20.
E kaineti naba te kaetieti ae te “mata boona te mata” nakoia Kristian?
E aki, bwa a aki kabaeaki Kristian n te kaetieti aei. Boni kanoan te Tua Rinanoni Mote, are e a katokaki ni maten Iesu bwa te karea.—I-Rom 10:4.
Ma e ngae n anne, e karekea te ota te kaetieti aei i aon aron te Atua n iaiango. N te katoto, e oti iai bwa e kakawaki iroun te Atua te kaetitaeka ae riai. (Taian Areru 89:14) E kaotaki naba iai aron ana kaetitaeka ae riai ae taekan ae a riai taani karaoa ae bure n reireinaki ni kaetaki n “te mwaiti ae bon riai.”—Ieremia 30:11.
Iango aika kairua ibukin te kaetieti ae te “mata boona te mata”
Te iango ae kairua: Te kaetieti ae te “mata boona te mata” e rangi ni matoatoa.
Te koaua: E aki kariaiakaki n te kaetieti aei, karaoan te katuuaa ae matoatoa ma n ribuaka. Ma ngkana e karaoaki raoi, ao e nanonaki iai bwa taani moti aika tau a na katuuaaea te tia bure, tii ngkana a a tia n rinanon raoi te kangaanga ao bwa bon nanona raoi ni karaoia ke tiaki. (Te Otinako 21:28-30; Warekaia Iteraera 35:22-25) Mangaia are e riki te kaetieti ae te “mata boona te mata” bwa totokoan te katuuaa ae riao.
Te iango ae kairua: Te kaetieti ae te “mata boona te mata” e kariaia te mwakuri ae reitinako ae te irantangaiko i bon iroum.
Te koaua: E taekinaki ae kangai n te Tua Rinanoni Mote: “Ko na tai irantanga ao ko na tai kaikoa unim irouia natiia am koraki.” (Nakoaia Ibonga 19:18) N oneani mwin are ko na irantangaiko i bon iroum, e kaungaia aomata te Tua bwa a na onimakina te Atua ao te waaki ni kairiri are e a tia ni kateia bwa e na kaetii kairua.—Te Tua-Kaua 32:35.
a N tabetai ao te boto n reirei ae kabonganaaki n te boowi ae aranaki n te taeka n Ratine bwa lex talionis, e kabonganaaki naba n aia boowi botannaomata tabeua rimoa.
Ko Bae Naba n Tangira
TE TAUA-N-TANTANI
Aroni Katokani Butanakon te Riribai—Tai Irantangaiko
Tokanikai i aon te nano ni kan irantangaiko n arom n onimakina te Atua ae e na boni waekoa ni kaetii aaro n ribuaka.
RONGORONGORA
Bubutii Reireim n te Baibara ae Aki Kabooaki ma Ana Tia Kakoaua Iehova
Discuss a Bible topic with Jehovah’s Witnesses, or try out our free Bible study program.