I bungiaki n te kaawa ae uarereke i Poland n aki raroa ma tian Tiaman. Ti otabwaniniaki n taabo n ununiki ibukini kain amwarake ao te buakonikai, I bon rangi ni maiu raoi. A kaungaai au karo aika tatangira bwa N na maiuakina ae raoiroi, N na iangoa au reirei ao ni karekea te nakoa ae bubura.

A moan riki au kangaanga ngke I reiakina te tua n te kuura n reirei ae rietata i Wrocław. Ibukina bwa I a raroanako ma au karo, I a rineia raoraou aika buakaka. I a kaman tatangira te butibooro ma I a rangi ni baaba riki iai mairouia raoraou aikai. Te tiim ae I tatangiria are e roko mai Warsaw ao I iririia ni katoa wikeen n aki ongeia bwa te tabo raa ae a na boo iai. Ti bae ni koro ni manging ni mwanangara, ni kamanena te drug ao n tabetai ti un ma taani boutoka n tiim ake a kaitaraa ara tiim. I a iangoia bwa aei katokan rawawatau ni maiu, e ngae ngke I ataia bwa e na rotakibuaka iai au mwakuri ibukin te tua ni kabureau.

Ti kani kakawari kirabu ao taabo ni mwaie ngai ma raoraou. N te tai are ti roko iai n taabo akanne, ti bae ni mangao n oro i rarikini kawai n taai nako. I boni kabureaki n tabetai, ma I aki toki ni kamanoai mani kangaanga aika kakaiaki man te tua ao n tabetai man te mwakuri ni kamaraato. I iangoia bwa bon aei te maiu ae rangi ni kakukurei. E ngae n anne, I bon ataia bwa a kairua baike I karaoi. I nanako n taromauri ni katoa Taabati bwa e aonga n rau nanou.

N 2004, a a karebwerebwe uoman Ana Tia Kakoaua Iehova n au mataroa ao I kukurei ni maroroakina taekan te Baibara ma ngaiia. Ngke I a reiakina ae bati riki ni kaineti ma ae nanonaki n te riki ni Kristian ni koaua ao e a moanna n tabetabe iai mataniwin nanou. I ataia bwa I riai ni katoka te manging ae riao, kamanenaan taian drug, ao te reitaki ma aomata aika aki maiuakini kaetieti man te Baibara. I noria naba bwa I riai ni bitii aroarou aika aki riai ao te iowawa. Ma e ngae ngke I ataia bwa I riai ni bita maiu ma I bon aki karaoa anne.

E reke bitakini maiu n te tairiki teuana ngke I boo n oro ma mwaane aika waniman. I uringnga ae I wene i nanon te kawai, I tiriboaki ao n oreaki naba atuu. I tataro ni kangai ngke I a kaani mate: “Kabwaraa au bure Iehova ngkai I aki maiuakina raoi am taeka. Ngkana I maiu ao I berita bwa N na reirei n te Baibara ma taani Kakoaua ao  ni bita maiu.” I mimi bwa e reke maiu. I kateimatoa au berita bwa I reiakina te Baibara.

N 2006 ao I a mwaing nako Engiran. Ma tiau bwa N na karekea au mwane ae tau bwa I aonga ni manga okira Poland ao ni karekea au beeba ae bubura riki ibukin te tua. Ma ngke I reitaanako au reirei n te Baibara ao e a rotaki nanou n te kibu teuana. E korea ae kangai te abotoro Bauro: “I taku bwa e bon riai buani bwaai ni kabane ibukin te atatai ae moanibaan te raoiroi ae taekan au Uea ae Kristo Iesu. I kariaia buani bwaai ni kabane ibukin teuaei, ao I tarai bwa maange bwa I aonga ni karekea Kristo irou.” (I-Biribi 3:8) E karekea te reirei ae bubura Bauro ibukin te tua ao bon te mwaane naba ae rangi n iowawa n ai arou. (Mwakuri 8:3) Ma e noria bwa te kawai ae rangi n tamaroa ni maiuna bon: te beku ibukin te Atua ao kabanean ana konaa ni kakairi iroun Iesu. Ngke I kaatuua au iango n ana katoto Bauro ao I noria bwa tiaki kiingin te maiu ae kakukurei te mwakuri ae bati iai te mwane ao te maiubuaka. I kakoauaa raoi bwa ngkai e kona ni bitaki Bauro, I boni kona naba ngai. Ngaia are I a motinnanoia bwa N na tiku i Engiran ao ni mwaninga taekani karekean au beeba ae bubura riki ibukin te tua.

Ngkana I reiakina taekan Iehova, I a kaaniaki riki ma ngaia. E rotaki riki nanou n ana berita are e na kabwarai aia bure te koraki ake a tangiria ni koaua ni bitii maiuia. (Mwakuri 2:38) Ao ngke I kananoa au iango n 1 Ioane 4:16, are e taekinaki iai bwa “te Atua bon te tangira,” ao I moana iai ataakini bukina ngkai e ribaa te buakaka te Atua.

E bon anaaki naba nanou n aroaroia taani Kakoaua. Te bwai ae I noria bwa a kataia ni maiuakini kaetieti man te Baibara ibukin te aroaro ni maiu ae riai. I tangiria naba n riki bwa kaain te botaki n itaritari ae a mena iai koraki akanne. Imwin au kakorakora ao ni karaoi bitaki ni maiu, I a bwabetitoaki bwa temanna Ana Tia Kakoaua Iehova n 2008.

E a tia te Baibara ni bitii aroarou man te kani kakannato, te iowawa, kabonganaan taian drug, te koro ni manging ao babaeakinan te butibooro, nakon ana toro te Atua are e kukurei n reiakinia aomata taekan te Baibara. I teimatoa ni kani mamataku n te butibooro, ma I motinnanoia bwa N na teimatoa ni babairea raoi au kaakibotu.

I a rangi ni kukurei riki ngkai I a mare ma Nei Esther ae te tia taromauria naba Iehova. Ti karekea te kukurei ni koaua n reiakinaia aomata n te Baibara ake a kamanena te taetae ni Poland ikai i meangini maeaon Engiran. I a bon tibwa namakina te raunnano ni koaua ni maiu n te tai aei. E a itiaki mataniwin nanou ao e a rangi ni manena maiu.