TE BOTO N REIREI MAN TE BAIBARA: “Teimatoa . . . n ikabwarabure ngkana iai bukini ngurenguremi i marenami, n aron Iehova ngke e tauraoi ni kabwarai ami bure, ao ai aromi naba.”—I-Korote 3:13.

Tera ae nanonaki iai? E kabotauaki te bure n te Baibara bwa ai aron te taarau ao kabwaraan te bure ai aroni kabwaraan te taarau. (Ruka 11:4) E kabwarabwaraaki n te boki teuana bwa te taetae ni Kuriiti ae rairaki n te Baibara ae “kabwarai buure” e nanonaki iai “kakeaan te taarau n aki kairoro.” Ngaia are ngkana ti rineia bwa ti na kabwaraa ana bure temanna ae bure nakoira, ti na aki kantaningaa te bwai ae na karaoaki nakoira. Ngkana ti tauraoi ni kabwarai buure, e aki nanonaki bwa ti kariaia te kairua ae karaoaki ke ni kauarerekea te maraki are e riki nakoira. Ma ti na iangoa katokan te riribai, e ngae naba ngkana ti teimatoa ni kakoauaa raoi ‘bukini ngurengurera.’

E manena ni boong aikai? Ti bane ni bure kioina ngkai bon aomata ngaira aika ti aki kororaoi. (I-Rom 3:23) Ngaia are ti wanawana ngkana ti kabwarai aia bure tabeman bwa imwina ti na manga kainnanoa kabwaraan ara bure. Irarikin anne, ti kakabwaiaaki naba ngkana ti motinnanoia ae ti na kai kabwarai buure. N te aro raa?

Ti kona ni kammarakira ngkana ti kaikoa te un ma te riribai ao n aki kabwarai buure. E kona te namakin ae aron aei n iraea kukureira, n tiatiana aroni maiura ao ni karawawataira. A kona ni karekea te aoraki ae kakaiaki are e a rotaki iai marurungira. E ribootinaki man te Journal of the American College of Cardiology iroun Dr. Yoichi Chida ao te tia Rabakau n te Iango ae Andrew Steptoe ni kangai: “E iangoaki ni kukune aika tibwa karaoaki bwa e rangi ni karuanikai bwainan te un ao te riribai bwa e kona ni karika aorakin te buroo.”

N te itera teuana, ti na iangoi kakabwaia aika reke man te kabwarabure. Ngkana ti kai kabwarai aia bure tabeman, ti a kateimatoa iai te katiteuanaaki ao te rau ao ti kawakina naba ara iraorao. Ma ae kakawaki riki, ti kaotira iai bwa ti katotonga aron te Atua are e kabwarai aia bure aomata aika raraoma ni koaua, ao e kantaningaia bwa ti na karaoa naba anne.—Mareko 11:25; I-Ebeto 4:32; 5:1.